བོད་ནང་གི་ཕ་མའི་སྐད་འཕྲིན་ཚོགས་པ་ཞིག་གི་ནང་དུ་ད་ནས་བཟུང་མཐོ་རིམ་ཡིག་རྒྱུགས་ཁྲོད་བོད་ཡིག་འཇོག་རྒྱུ་མིན་པས་ཕ་མ་ཚོས་སོ་སོའི་བུ་ཕྲུག་ལ་མུ་མཐུད་བོད་ཡིག་སྦྱོང་དུ་འཇུག་མིན་བསམ་བློ་ཡག་པོ་གཏོང་དགོས་ཞེས་བསྒྲགས་འདུག
སྐད་འཕྲིན་ཚོགས་པ་ཞིག་ཏུ་ཕ་མ་རྣམ་པར་མཐོ་རྒྱུགས་ནང་བོད་ཡིག་མེད་པས་བུ་ཕྲུག་ལ་མུ་མཐུད་བོད་ཡིག་སྦྱོང་དུ་འཇུག་མིན་ཐད་བསམ་བློ་ཡག་པོ་གཏོང་དགོས་པའི་བརྡ་ཁྱབ་བཏང་། དྲ་ལམ་གྱི་པར།
འདས་པའི་ལོ་ཤས་རིང་རྒྱ་ནག་གཞུང་གིས་བོད་ཁུལ་གྱི་སློབ་གྲྭ་ཁག་ནང་བོད་སྐད་ཡིག་སློབ་ཚན་ཙམ་ལས་བོད་ཡིག་སློབ་འཁྲིད་མེད་པ་བཟོས་ཏེ་རྒྱ་ཡིག་རྒྱ་སྐད་གཙོ་གཉེར་གྱི་སྲིད་ཇུས་ལག་བསྟར་བྱེད་བཞིན་ཡོད་པ་ལྟར། མཐོ་རྒྱུགས་ནང་དུའང་བོད་ཡིག་འཇོག་གི་མེད་པས། ཕ་མ་ཚོས་སོ་སོའི་བུ་ཕྲུག་ལ་མུ་མཐུད་བོད་ཡིག་སྦྱོང་དུ་འཇུག་མིན་གདམ་ག་ཡིན་པའི་བརྡ་ཁྱབ་ཅིག་སྤེལ་འདུག་ལ། སྤྱིར་བཏང་ཕྱི་ལོ་ ༢༠༢༢ ཙམ་ནས་བཟུང་བོད་ཁུལ་གྱི་ས་གནས་མང་པོར་མཐོ་རྒྱུགས་ནང་བོད་ཡིག་མེད་པ་བཟོས་ཏེ་བོད་ཁུལ་གྱི་དགེ་རྒན་དང་སློབ་མ་མང་པོར་དཀའ་ངལ་འཕྲད་མུས་ཡིན་པ་རེད།
བོད་ནང་གི་ཕ་མའི་སྐད་འཕྲིན་ཚོགས་པ་ཞིག་ཏུ་རྒྱུགས་སྤྲོད་དང་འབྲེལ་བའི་གསལ་བསྒྲགས་ཤིག་སྤེལ་བའི་ནང་། ཐེངས་འདིའི་རེས་གཟའ་པ་སངས་ཀྱི་ཕྱི་དྲོ་ནས་གཟའ་ཟླ་བའི་དགོང་ཚོགས་བར་དུ་གུང་སེང་བཞག་རྒྱུ་རེད། དེའི་རིང་ལ་ཁྱིམ་བདག་གིས་སློབ་མའི་བདེ་འཇགས་ལ་དོ་སྣང་བྱེད་རོགས། ང་ཚོའི་སྐབས་འདི་ནས་བཟུང་བོད་ཡིག་མཐོ་རྒྱུགས་ལ་མི་ཞུགས་པས། ཁྱིམ་བདག་ཚོའི་རང་ཉིད་ཀྱི་ཕྲུ་གུས་བོད་ཡིག་མུ་མཐུད་དུ་སྦྱོང་མིན་གཏན་འཁེལ་བྱེད་རོགས། མུ་མཐུད་དུ་སྦྱོང་ན་བོད་ཡིག་གི་སློབ་ཚན་ནི་སྔོན་མ་ལྟར་མི་འགྱུར་བར་སྦྱོང་ཆོག གལ་ཏེ་བོད་ཡིག་གདམ་གསེས་མ་བྱེད་ཚེ་ཕྱིས་སུ་བོད་ཡིག་སློབ་ཚན་མེད་པས་ཁྱིམ་བདག་ཚོའི་བསམ་བློ་ཡག་པོ་གསལ་པོ་གཏོང་རོགས། ཞེས་གསལ་འདུག
གནད་དོན་དེའི་ཐད་བོད་ནང་གི་བོད་ཀྱི་ཟིན་བྲིས་ཞེས་པའི་ན་གཞོན་ཞིག་གིས་དྲ་ལམ་ཁག་ཏུ་བརྙན་ཐུང་ཞིག་སྤེལ་བའི་ནང་། མཐོ་རིམ་སློབ་མའི་ཡིག་རྒྱུགས་ཁྲོད་བོད་ཡིག་རིམ་གྱིས་ཇེ་ཉུང་དུ་ཕྱིན་ཏེ་གདམ་གའི་ངོ་བོར་བཞག་པ་དེར་ཉེ་སྔོན་ནས་མི་མང་གིས་དོ་སྣང་བྱེད་བཞིན་པའི་གནད་དོན་ཞིག་ཆགས་འདུག གནད་དོན་འདིའི་ཐད་ལྟ་ཚུལ་མི་འདྲ་བ་ཡོད་རེད། ཁ་ཤས་ཀྱིས་འདི་ནི་བོད་ཡིག་བཀོལ་སྤྱོད་ཀྱི་གནད་དོན་ཞིག་ཏུ་ངོས་འཛིན་དང་། ཡང་ཁ་ཤས་ཀྱིས་འདི་ནི་སློབ་གསོ་བསྒྱུར་བཅོས་ཐད་ངེས་པར་དུ་དགོས་པ་ཞིག་ཏུ་མཐོང་གི་ཡོད་སྲིད། ཡིན་ནའང་། གནད་དོན་འདི་འདྲར་ཐུག་པའི་སྐབས་སུ་ང་ཚོས་སྔར་ལས་གཏིང་ཟབ་པའི་ཐོག་ནས་བསམ་བློ་གཏོང་དགོས་སྐོར་དང་། ཉེ་བའི་ལོ་ཤས་ནང་རྒྱ་ནག་སློབ་གསོ་ལས་ཁུངས་ཀྱིས་བསྒྱུར་བཅོས་ཁག་ཅིག་བཏང་ནས་ང་ཚོའི་སྲོལ་རྒྱུན་གྱི་སློབ་གསོའི་ལམ་ལུགས་དང་། བོད་སྐད་ཡིག་ལ་བཟུང་བའི་ངེས་ཤེས་སོགས་ལ་འགྱུར་བ་བཏང་ནས་ཚན་རིག་ལག་རྩལ་དང་མི་ཤུགས་ཐོན་ཁུངས་སྐྱེད་སྲིང་ཕྱོགས་ལ་ནུས་པ་འདོན་གྱི་ཡོད་སྐོར་བརྗོད་འདུག
འདི་གའི་གསར་འགོད་པས་གནས་ཚུལ་དེ་སྤྱི་ཚོགས་དྲ་ལམ་དུ་གཏོང་མཁན་ས་དཀར་བཀྲིས་ལགས་སུ་ཕྱིར་བསྒྲགས་དེ་བོད་ཀྱི་ས་ཁུལ་གང་ཞིག་ཡིན་མིན་སོགས་དྲིས་པར་ཁོང་གིས། རྒྱ་ནག་གཞུང་གིས་མཐོ་རྒྱུགས་ཡིག་ཚད་ཁྲོད་བོད་ཡིག་གདམ་ཁ་རུ་བཞག་པ་དེ་ནི་བོད་ཀྱི་སྐད་ཡིག་གི་བཀོལ་སྤྱོད་ཀྱི་ཁྱབ་རྒྱ་ཇེ་ཆུང་དུ་བཏང་བའི་གནད་དོན་གནད་ཆེན་ཞིག་ཡིན་པས། གནད་དོན་དེའི་རིགས་ལ་དོ་སྣང་ཆེན་པོས་བལྟ་དགོས་ནའང་། བོད་ཡིག་གདམ་ཁའི་སྐད་ཡིག་ཏུ་བཞག་པའི་སྲིད་ཇུས་དེ་ས་གནས་གང་དུ་ལག་བསྟར་བྱེད་ཀྱི་ཡོད་གསལ་ཁ་མེད་སྐོར་བརྗོད་བྱུང་།
སྤྱིར་འདས་པའི་ལོ་ཤས་རིང་རྒྱ་ནག་གཞུང་གིས་བོད་སྐད་ཡིག་བཀོལ་སྤྱོད་བྱེད་མུས་ཡིན་པའི་སྒེར་ཚུགས་སློབ་གྲྭ་མང་པོ་ཞིག་བཙན་གྱིས་སྒོ་རྒྱག་ཏུ་བཅུག་ཡོད་པ་མ་ཟད། ཕྱི་ལོ་ ༢༠༡༠ ཙམ་ནས་བཟུང་བོད་མཚོ་སྔོན་ཞིང་ཆེན་གྱི་སློབ་གྲྭ་ཆུང་འབྲིང་ནང་བོད་ཡིག་སློབ་འཁྲིད་ཉུང་དུ་བཏང་ནས་རྒྱ་བསྒྱུར་སློབ་གསོ་སྤེལ་བའི་མགོ་བརྩམས་ཡོད་པ་དང་། ཕྱི་ལོ་ ༢༠༢༣ ལོའི་དཔྱིད་ཀའི་སློབ་མགོ་བཙུགས་པ་ནས་བཟུང་རྔ་བ་ཁུལ་གྱི་སློབ་གྲྭ་ཆུང་འབྲིང་ནང་བོད་ཡིག་རིམ་བཞིན་མཚམས་འཇོག་བྱེད་པའི་མགོ་བརྩམས་ཡོད་པ་དང་། འདི་ལོ་ནས་བཟུང་དཀར་མཛེས་ཁུལ་གྱི་སློབ་གྲྭ་ཆུང་འབྲིང་ནང་དུའང་བོད་ཡིག་སློབ་འཁྲིད་མེད་པ་བཟོ་བའི་སྲིད་ཇུས་གཏན་འབེབ་ཟིན་ཡོད་པ་རེད། ཡིན་ནའང་། ད་ལྟའི་ཆར་སྲིད་ཇུས་དེ་ལག་བསྟར་བྱས་པའི་ཁྱབ་ཚད་སོགས་ཁ་གསལ་བཟོ་ཁག་པོ་ཆགས་འདུག
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།
