གནས་མཆོག་རྡོ་རྗེ་གདན་དུ་ཀིརྟིའི་སྨོན་ལམ་ཚོགས་ཆུང་གི་གོ་སྒྲིག་འོག་༸གོང་ས་མཆོག་དགུང་གྲངས་དགུ་བཅུ་ཐམ་པར་ཕེབས་པའི་གོ་སྟོན་དང་བཀའ་དྲིན་རྗེས་དྲན་སོགས་ལ་དམིགས་ཏེ་སྨོན་ལམ་ཆེན་མོ་འཚོག་བཞིན་འདུག
དེ་རིང་ཕྱི་ཚེས་ ༨ ནས་ ༡༢ བར་ཀིརྟིའི་སྒར་བསམ་ཡས་གླིང་དུ། ཀིརྟིའི་སྨོན་ལམ་གོ་སྒྲིག་ཚོགས་ཆུང་གིས། བོད་ལུགས་ལྟར་ན་༸གོང་ས་རྒྱལ་རིན་པོ་ཆེ་མཆོག་དགུང་གྲངས་དགུ་བཅུ་ཐམ་པར་ཕེབས་པའི་གོ་སྟོན་དང་བཀའ་དྲིན་རྗེས་དྲན་ལ་ཆེད་དུ་དམིགས་ཏེ། ཉིན་གྲངས་བཞིའི་རིང་སྨོན་ལམ་ཆེན་མོ་འཚོག་རྒྱུ་དང་ཉིན་གཅིག་རིང་བཀའ་དྲིན་རྗེས་དྲན་གྱི་གཟེངས་རྟགས་འབུལ་བཞེས་ཀྱི་མཛད་སྒོ་བཅས་འཚོགས་མགོ་བཙུགས་འདུག
ཐེངས་འདིའི་སྨོན་ལམ་ཆེན་མོའི་སྟེང་ ༸འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་ཐོག་བརྒྱ་དང་བཞི་པ་སྟེ་ཁྲི་ཟུར་༸རྗེ་བཙུན་བློ་བཟང་བསྟན་འཛིན་དཔལ་བཟང་པོ་མཆོག་དབུ་བཞུགས་ཐོག ༧སྐྱབས་རྗེ་ཀིརྟི་རིན་པོ་ཆེ་མཆོག་དང་ཀིརྟིའི་བླ་སྤྲུལ་དགེ་བའི་བཤེས་གཉེན་རྣམ་པ་དབུས་པའི་འཛམ་གླིང་ཡུལ་གྲུ་མི་འདྲ་བ་ ༡༢ ནས་ཕེབས་པའི་སེར་སྐྱ་ཁྱོན་ ༣༧༠ ལྷག་མཉམ་ཞུགས་གནང་ཡོད་ཅིང་། སྨོན་ལམ་སྐབས་དགའ་ལྡན་ཁྲི་ཟུར་༧རྗེ་བཙུན་བློ་བཟང་བསྟན་འཛིན་མཆོག་ནས་ སྐྱེས་རབས་ཀྱི་གསུང་ཆོས་སྩལ་རྒྱུ་དང་། ཉིན་ལྟར་ཞོགས་པའི་ཆུ་ཚོད་ ༦།༣༠ ནས་དགོང་མོའི་ཆུ་ཚོད་ ༨ བར་སྨོན་ལམ་གསུང་འདོན་གྱི་གཙོས་དབུ་མ་དང་ཕར་ཕྱིན། ཚད་མ། འདུལ་མཛོད་སོགས་ཀྱི་དམ་བཅའ་འཚོགས་པ་སོགས་ཉིན་རེར་ཆོས་ཕྱོགས་ཀྱི་བྱེད་སྒོ་མི་འདྲ་བ་མང་པོ་སྤེལ་བཞིན་ཡོད་པ་རེད།
ཟླ་འདིའི་ཕྱི་ཚེས་ ༡༡ ཉིན་འཛམ་གླིང་ཞི་བདེའི་དེད་དཔོན་༸གོང་ས་རྒྱལ་བའི་དབང་པོ་སྐུ་ཕྲེང་བཅུ་བཞི་པ་ཆེན་པོ་མཆོག་བོད་ལུགས་ལྟར་དགུང་གྲངས་དགུ་བཅུར་ཕེབས་པའི་གོ་སྟོན་དང་འབྲེལ་ནས་སྐུ་ཚེ་༸ཞབས་པད་མི་འགྱུར་རྡོ་རྗེའི་ཁམས་སུ་བརྟན་པར་བཞུགས་པའི་ཞབས་རིམ་དང་སྤྱི་སྒེར་བསོད་ནམས་ཀྱི་ཚོགས་གོང་མཐོར་སྤེལ་བའི་ཆེད་དང་ཐུགས་དགྱེས་པའི་མཆོད་སྤྲིན་དུ་དམིགས་ནས། རྒྱ་བལ་ཁུལ་སོགས་ཡུལ་ཁག་མི་འདྲ་བ་བཅོ་ལྔ་ཙམ་ནས་ཀིརྟི་ཚང་དང་དམིགས་བསལ་འབྲེལ་ཡོད་བླ་སྤྲུལ་དགེ་འདུན་པས་གཙོས་སེར་སྐྱ་གང་མང་རྡོར་གདན་ཀིརྟིའི་སྒར་བསམ་ཡས་གླིང་དུ་ལྷན་འཛོམས་ཀྱིས། ༧གོང་ས་རྒྱལ་བ་རིན་པོ་ཆེ་མཆོག་དང་འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་ཟུར་རིན་པོ་ཆེ་མཆོག ༸སྐྱབས་རྗེ་སློབ་དཔོན་ཟམ་གདོང་རིན་པོ་ཆེ་མཆོག སྐུ་བཅར་རྣམ་རྒྱལ་གྲྭ་ཚང་ཕན་བདེ་ལེགས་བཤད་གླིང་། འབྲས་སྤུངས་མཁས་མང་བློ་གསལ་གླིང་གྲྭ་ཚང་། དཔལ་ལྡན་གསང་ཆེན་སྟོད་རྒྱུད་གྲྭ་ཚང་། བཞུགས་སྒར་དྷ་རམ་ས་ལའི་རིགས་ལམ་སློབ་གཉེར་ཁང་། གནས་ཆུང་གྲྭ་ཚང་རྡོ་རྗེ་སྒྲ་དབྱངས་གླིང་སོགས་ལ་བཀའ་དྲིན་རྗེས་དྲན་གྱི་མཛད་རིམ་གཉེར་ཡིན་འདུག
གསར་འགོད་པ། སྐལ་བཟང་སྦྱིན་པ།
