དེ་རིང་ཞོགས་པར་བོད་ཁྱུང་མཆུ་རྫོང་ཁོངས་སུ་ཚད་རིམ་ ༤།༩ ཅན་གྱི་ས་འགུལ་ཞིག་བརྒྱབ་ཡོད་ནའང་རྒྱ་ནག་གཞུང་གིས་ས་འགུལ་དང་འབྲེལ་བའི་པར་དང་བརྙན་སོགས་འགྲེམ་སྤེལ་བྱས་པར་བཀག་སྡོམ་ཤུགས་ཆེན་བྱེད་ཀྱིན་ཡོད་འདུག
དེ་རིང་ཕྱི་ཚེས་ ༢༠ ཉིན་གྱི་ཞོགས་པར་བོད་ཁྱུང་མཆུ་རྫོང་དང་ཉེ་འཁོར་གྱི་རྫོང་ཁག་ཅིག་ཏུ་ས་ཡོམ་བརྒྱབ། དྲ་ལམ་གྱི་པར།
དེ་རིང་ཕྱི་ཟླ་ ༡ ཚེས་ ༢༠ ཉིན་གྱི་བོད་ནང་གི་ཞོགས་པའི་ཆུ་ཚོད་ ༥།༧ ཙམ་ལ་རྒྱ་ནག་གཞུང་གིས་བཅད་བགོས་བྱས་པའི་རྔ་བ་ཁུལ་ཁྱུང་མཆུ་རྫོང་གཙོ་བོར་གྱུར་བའི་མཛོད་དགེ་རྫོང་དང་རྔ་བ་རྫོང་། ཟུང་ཆུ་རྫོང་། རྨ་ཆུ་རྫོང་བཅས་ཀྱི་ས་ཡོམ་ཚད་རིམ་ ༤།༩ ཅན་ཞིག་བརྒྱབ་ཡོད་པ་དང་། འགུལ་ཚད་ཆེ་ཤོས་དེ་ཁྱུང་མཆུ་རྫོང་སྦྲ་ཆེན་ཡུལ་ཚོ་དང་། གསེར་དེའུ་ཡུལ་ཚོ་སོགས་སུ་བརྒྱབ་ཡོད་འདུག རྒྱ་ནག་གཞུང་གིས་གཞུང་འབྲེལ་བརྒྱུད་ལམ་རེ་ཟུང་དུ་དེ་འབྲེལ་གནས་ཚུལ་ཐུང་ཐུང་རེ་སྤེལ་ཡོད་པ་ཙམ་ལས་སྤྱི་ཚོགས་དྲ་ལམ་སོགས་སུ་དམ་དྲག་ཆེན་པོ་བྱེད་བཞིན་ཡོད་སྟབས། ད་ལྟའི་བར་དུ་མི་དང་སྒོ་ཕྱུགས་སེམས་ཅན་ལ་འཆི་སྐྱོན་དང་སྡོད་ཁང་སོགས་ལ་རྡིབ་སྐྱོན་བྱུང་བའི་གནས་ཚུལ་གོ་ཐོས་མི་འདུག
འབྲེལ་ཡོད་མི་ཞིག་གིས་འདི་གའི་གསར་འགོད་པར། དེ་རིང་བོད་ནང་གི་ཞོགས་པ་ཆུ་ཚོད་ལྔ་ཙམ་ལ་གློ་བུར་དུ་ཁྱུང་མཆུ་རྫོང་ཁོངས་སུ་ས་ཡོམ་རྒྱུག་ནས་ས་འགུལ་གྱི་ཚད་རིམ་ཅུང་བཙན་པའི་དབང་གིས་ཁྱིམ་ཆས་སོགས་ས་རུ་ལྷུང་བ་དང་། དཀར་ཡོལ་ཆག་པའི་གནས་ཚུལ་ཐོན་ཡོད་ཀྱང་། ད་ལྟ་མི་ཤི་བ་དང་ཁང་པ་བརྡིབ་སྐྱོན་སོགས་བྱུང་ཡོད་མེད་ཀྱི་གནས་ཚུལ་ཐད་གསལ་ཁ་མེད་པའི་ཁར། ད་ལྟ་ཁུལ་དེར་གློག་གི་དཀའ་ངལ་དང་། དྲ་ལམ་ཧ་ཅང་སྐྱོ་བོ་ཡིན་སྐོར་སོགས་བརྗོད་བྱུང།
ཡང་འབྲེལ་ཡོད་གཞན་ཞིག་གིས་འདི་གའི་གསར་འགོད་པར། ད་ལན་ཁྱུང་མཆུ་རྫོང་ཁུལ་དུ་རྒྱུག་པའི་ས་ཡོམ་དེ་ཁྱུང་མཆུ་རྫོང་གི་ཆུ་སྨད་ཁུལ་གྱི་སྦྲ་ཆེན་དང་། རྨེ་བ། གསེར་དེའུ་སོགས་སུ་ཤུགས་ཆེ་ཤོས་རྒྱུག་ཡོད་ཅིང་། ཁུལ་དེར་ཞོགས་པ་སྔ་པོ་ནས་གཞུང་འབྲེལ་མི་སྣ་དང་། ཉེན་རྟོག་པ་སོགས་འབྱོར་ཏེ། ཕྱི་རོལ་དུ་གུར་ཕུབ་ནས་ཉེན་ཁ་ལས་གཡོལ་དགོས་སྐོར་ལམ་སྟོན་བྱས་ཡོད་སྐོར་བརྗོད་བྱུང་།
ཡང་འབྲེལ་ཡོད་བོད་མི་གཞན་ཞིག་གིས། ཉེ་ལམ་བོད་གཞིས་རྩེ་ཁུལ་དུ་ས་ཡོམ་རྒྱུག་སྐབས་ཀྱི་པར་དང་བརྙན་མང་པོ་ཞིག་སྤྱི་ཚོགས་དྲ་ལམ་དུ་སྤེལ་ནས། བོད་ཕྱི་ནང་གཉིས་སོགས་སུ་ཤུགས་ཆེན་བཀྲམ་ཡོད་སྟབས། རྒྱ་ནག་གཞུང་གིས་ཉེ་ལམ་མགོ་ལོག་རྨ་སྟོད་རྫོང་སོགས་སུ་ས་འགུལ་བྱུང་བ་དང་། དེ་རིང་ཁྱུང་མཆུའི་ས་ཡོམ་སྐབས་ཀྱང་ས་གནས་ཀྱི་པར་བརྙན་སོགས་དྲ་ལམ་དུ་སྤེལ་རྒྱུར་ཚོད་འཛིན་ཤུགས་ཆེན་བྱེད་ཀྱིན་ཡོད་པ་མ་ཟད། མི་སྒེར་གྱིས་པར་དང་བརྙན་ཐུང་སོགས་སྤེལ་ཚེ་དཀྲོག་གཏམ་སྤེལ་བའི་ཉེས་མིང་གི་འོག་ནས་འཛིན་བཟུང་བྱ་རྒྱུ་ཡིན་ལུགས་ཀྱི་འཇིགས་སྐུལ་བྱེད་ཀྱིན་ཡོད་སྐོར་སོགས་བརྗོད་བྱུང་།
དེ་རིང་ཞོགས་པར་བོད་མཚོ་སྔོན་ཞིང་ཆེན་འབྲི་སྟོད་རྫོང་དང་གཞིས་ཀ་རྩེ་གདེང་སྐྱེས་རྫོང་། ཡུ་གུར་རང་སྐྱོང་ཁུལ་གྱི་ཨ་ཁི་སི་ས་ཁུལ་སོགས་སུ་ཚད་རིམ་ ༥ ལས་དམའ་བའི་ས་ཡོམ་བརྒྱབ་ཡོད་འདུག
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།
ཁྱུང་མཆུ་སོགས་ཟེར་དགོས་པའི་ཞེ་འདོད་ཅི་ཡིན་ནམ