ཀརྨ་ཚེ་བརྟན་དང་ཅན་ཝུན་ཕེང་གཉིས་བོད་རང་སྐྱོང་ལྗོངས་ཟེར་བའི་མི་དམངས་སྲིད་གཞུང་གི་མགོ་ཁྲིད་དང་བོད་རང་སྐྱོང་ལྗོངས་ལྟ་ཞིབ་ཨུ་ལྷན་ཟེར་བའི་མགོ་ཁྲིད་དུ་གསར་འདེམས་བྱས་འདུག
ཁ་སང་ཕྱི་ཟླ་ ༡ ཚེས་ ༢༢ ཉིན་བོད་རང་སྐྱོང་ལྗོངས་ཟེར་བའི་སྲིད་གྲོས་ཀྱི་སྐབས་བཅུ་གཉིས་པའི་ཚོགས་འདུ་ཐེངས་གསུམ་པ་དེ་མཇུག་བསྒྲིལ་ཡོད་ཅིང་། ཐེངས་འདིའི་ཚོགས་ཆེན་ཐོག་ཀརྨ་ཚེ་བརྟན་བོད་རང་སྐྱོང་ལྗོངས་ཟེར་བའི་མི་དམངས་སྲིད་གཞུང་གི་མགོ་ཁྲིད་དང་ཅང་ཝུན་ཕེང་བོད་རང་སྐྱོང་ལྗོངས་ལྟ་ཞིབ་ཨུ་ལྷན་ཟེར་བའི་མགོ་ཁྲིད་དུ་གསར་འདེམས་བྱས་འདུག
ཀརྨ་ཚེ་བརྟན་ནི་ཕྱི་ལོ་ ༡༩༦༧ ལོར་བོད་ཀྱི་ཁམས་འཇོ་མདའ་རུ་སྐྱེས་ཤིང་། ཁོ་ནི་རྒྱ་ནག་གཞུང་གི་ལས་བྱེད་པ་དང་། སྐབས་ཉི་ཤུ་བའི་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྗེས་སྣོན་ཨུ་ཡོན་ཟེར་བ་དང་། བོད་རང་སྐྱོང་ལྗོངས་ཟེར་བའི་དམར་ཤོག་ཚོགས་པའི་མགོ་ཁྲིད་གཞོན་པ་ཟུར་བ། བོད་རང་སྐྱོང་ལྗོངས་ཟེར་བའི་སྲིད་གཞུང་གི་དམར་ཤོག་འགན་འཛིན་སོགས་ཡིན་འདུག དེ་བཞིན་རྒྱ་རིགས་ཅང་ཝུན་ཕེང་ཟེར་བ་ནི་ཁྲིམས་རྩོད་པ་ཞིག་དང་། རྒྱ་ནག་དམར་ཤོག་ཚོགས་པའི་ལས་བྱེད་པ། བོད་རང་སྐྱོང་ལྗོངས་ཟེར་བའི་དམར་ཤོག་ཚོགས་པའི་རྒྱུན་ལས། སྒྲིག་ཨུད་ཟེར་བའི་འགན་འཛིན། བོད་རང་སྐྱོང་ལྗོངས་ལྟ་ཞིབ་ཨུ་ལྷན་གྱིའགན་འཛིན། རིམ་པ་གཉིས་པའི་སྤྱི་ཁྱབ་ལྟ་ཞིབ་དཔོན་གཞོན་པ་བཅས་ཡིན་འདུག
བོད་རང་སྐྱོང་ལྗོངས་ཟེར་བའི་སྲིད་གྲོས་ཀྱི་མཇུག་སྡོམ་མཛད་སྒོའི་སྟེང་བོད་རང་སྐྱོང་ལྗོངས་ཟེར་བའི་དམར་ཤོག་དྲུང་ཆེ་གསར་པ་ཝང་ཅུན་ཀྲེང་གིས། ཕྱི་ལོ་ ༢༠༢༥ ལོ་ནི་ལོ་ལྔ་ཚན་བཅུ་བཞི་པའི་འཆར་འགོད་ཀྱི་ལས་དོན་མཇུག་བསྡུ་བའི་ལོ་ཞིག་ཡིན་པས། རྒྱ་ནག་གཞུང་གི་ལས་བྱེད་ཚོས་རྒྱ་ནག་གི་མགོ་ཁྲིད་ཞི་ཅིན་ཕིན་གྱི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་བསམ་བློ་ཟེར་བ་དེ་རྒྱུན་འཁྱོངས་དང་ལས་དོན་གཉེར་དགོས་སྐོར་དང་། རྒྱ་ནག་གཞུང་གི་ལས་བྱེད་དེ་དག་གིས་རྒྱ་ནག་དམར་ཤོག་ཚོགས་པའི་ཁྲིམས་སྒྲིག་ལ་གུས་བརྩི་དང་། དམར་ཤོག་གི་ཆེད་དུ་ལས་དོན་གཉེར་བ། ཏང་གི་སྲིད་ཇུས་ཟེར་བ་དྲིལ་བསྒྲགས་བྱ་དགོས་ལུགས་སོགས་བཤད་ཡོད་འདུག
དེ་བཞིན་ཟླ་འདིའི་ཕྱི་ཚེས་ ༢༡ ཉིན་མཚོ་སྔོན་ཞིང་ཆེན་སྲིད་གྲོས་སྐབས་བཅུ་གསུམ་པའི་གྲོས་ཚོགས་ཐེངས་གསུམ་པའི་ཚོགས་ཆེན་དེ་མཇུག་བསྒྲིལ་ཡོད་ཅིང་། ཚོགས་ཆེན་དེའི་ཐོག་ཞི་ཅིན་ཕིན་ཟེར་བ་ནི་རྒྱ་ནག་རྒྱལ་ཁབ་ཀྱི་སྲོག་ཤིང་དུ་བརྩི་འཇོག་བྱས་པའི་ཐོག མཐུན་སྒྲིལ་བློ་གཅིག་ཟེར་བ་དང་། ཀྲུང་གོའི་ལམ་ལུགས་ཅན་གྱི་མཚོ་སྔོན་ཞིང་ཆེན་ཟེར་བ་ཞིག་གསར་སྐྲུན་བྱ་དགོས་པའི་དྲིལ་བསྒྲགས་ཤུགས་ཆེན་བྱས་འདུག
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
