སྔ་འགྱུར་རྙིང་མའི་སྨོན་ལམ་ཚོགས་ཆེན་མོའི་ཚོགས་གཙོ་༧སྐྱབས་རྗེ་ཞི་ཆེན་རབ་འབྱམས་རིན་པོ་ཆེ་མཆོག་དབུ་བཞུགས་ཐོག་༧རྒྱལ་བའི་བཀའ་འགྱུར་རིན་པོ་ཆེའི་དཀར་ཆག་རྒྱས་ཤོས་དང་འཇུག་བདེ་ཤོས་ཤིག་ཏུ་ངོས་འཛིན་བྱས་པའི་པོད་ ༡༡ ཅན་གྱི་བཀའ་འགྱུར་དཀར་ཆག་ཅིག་དབུ་འབྱེད་གནང་འདུག
པོད་གྲངས་ ༡༡ གི་བདག་ཉིད་ཅན་གྱི་༧རྒྱལ་བའི་བཀའ་འགྱུར་ཡིད་བཞིན་ནོར་བུའི་ནང་དོན་ངོ་སྤྲོད་དང་འབྲེལ་བའི་དཀར་ཆག་བསྟན་པའི་མཛེས་རྒྱན། ༢༠༢༥།༢།༥
དེ་རིང་ཕྱི་ཚེས་ ༥ ཉིན་གནས་མཆོག་རྡོ་རྗེ་གདན་གྱི་བྱང་ཆུབ་ཤིང་དྲུང་དུ་སཱ་ར་ཎཱ་ཐ་རྒྱལ་ཡོངས་སྔ་འགྱུར་རྙིང་མའི་སློབ་གཉེར་ཁང་གི་༧རྒྱལ་བའི་བཀའ་འགྱུར་ཡིད་བཞིན་ནོར་བུའི་ནང་དོན་ངོ་སྤྲོད་དང་འབྲེལ་བའི་དཀར་ཆག་བསྟན་པའི་མཛེས་རྒྱན་གྱི་རྩོམ་སྒྲིག་ཚོགས་ཆུང་གིས། པོད་གྲངས་ ༡༡ གི་བདག་ཉིད་ཅན་གྱི་༧རྒྱལ་བའི་བཀའ་འགྱུར་ཡིད་བཞིན་ནོར་བུའི་ནང་དོན་ངོ་སྤྲོད་དང་འབྲེལ་བའི་དཀར་ཆག་བསྟན་པའི་མཛེས་རྒྱན་ཞེས་པ་ཞིག་དབུ་འབྱེད་གནང་ཡོད་ཅིང་། དབུ་འབྱེད་མཛད་སྒོའི་ཐོག་སྔ་འགྱུར་རྙིང་མའི་སྨོན་ལམ་ཆེན་མོའི་ཚོགས་གཙོ་༧སྐྱབས་རྗེ་ཞི་ཆེན་རབ་འབྱམས་རིན་པོ་ཆེ་མཆོག་དང་། སྨིན་གླིང་མཁན་ཆེན་མཆོག གྱང་ཁང་སྤྲུལ་སྐུ་མཆོག བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག དེ་བཞིན་སྔ་འགྱུར་རྙིང་མའི་སྨོན་ལམ་ཐོག་ཕེབས་པའི་བླ་སྤྲུལ་དང་གྲྭ་བཙུན། དེ་བཞིན་དད་ལྡན་མང་ཚོགས་བཅས་འཛོམས་ཡོད་འདུག
དེ་རིང་དབུ་འབྱེད་གནང་བའི་༧རྒྱལ་བའི་བཀའ་འགྱུར་ཡིད་བཞིན་ནོར་བུའི་ནང་དོན་ངོ་སྤྲོད་དང་འབྲེལ་བའི་དཀར་ཆག་བསྟན་པའི་མཛེས་རྒྱན་གྱི་པོད་དང་པོའི་ནང་བཀའ་འགྱུར་པར་མ་མི་འདྲ་བ་ཁག་གི་བྱུང་རིམ་དང་། མདོ་སོ་སོའི་བརྗོད་བྱའི་ནང་དོན་གནད་བསྡུས། དེ་བཞིན་བཀའ་འགྱུར་དཀར་ཆག་འདིའི་རྩོམ་སྒྲིག་གི་དགོས་དམིགས་དང་། བརྒྱུད་རིམ་སོགས་ཀྱི་སྐོར། པོད་གཉིས་པར་བཀའ་འགྱུར་ལས་འདུལ་བའི་སྐོར་གྱི་མདོ་བརྒྱད་ཀྱི་ངོ་སྤྲོད་དང་། ཤེར་ཕྱིན་གྱི་མདོ་ལས་འབུམ་ཉི་ཁྲི་གཉིས་ཀྱི་ནང་དོན་ངོ་སྤྲོད། པོད་གསུམ་པར་བཀའ་འགྱུར་ལས་ཤེར་ཕྱིན་གྱི་མདོ་རྣམས་དང༌། མདོ་ཕལ་པོ་ཆེ་བཅས་ཀྱི་ནང་དོན་ངོ་སྤྲོད། དེ་བཞིན་པོད་བཞི་པར་བཀའ་འགྱུར་ལས་མདོ་དཀོན་མཆོག་བརྩེགས་པའི་ནང་དོན་ངོ་སྤྲོད། པོད་ལྔ་པ་ནས་དགུ་པའི་བར་མདོ་སྡེའམ་མདོ་མངས་གི་ནང་དོན་ངོ་སྤྲོད། པོད་བཅུ་པར་བཀའ་འགྱུར་ལས་རྒྱུད་སྡེའི་སྐོར་ངོ་སྤྲོད་མདོར་བསྡུས་དང༌། བཀའ་འགྱུར་གྱི་དཀར་ཆག་འདི་ལ་ཟུར་རྒྱན་གྱི་ཚུལ་དུ་བོད་ཀྱི་ཆོས་བརྒྱུད་ཆེན་པོ་ལྔ་ཡི་མཁས་པའི་ཆེད་རྩོམ། པོད་བཅུ་གཅིག་པར་གཙོ་བོ་མི་སྐྱ་རྣམས་ལ་དམིགས་ནས། གོང་གི་མདོ་སོ་སོའི་ངོ་སྤྲོད་རྒྱས་པའི་དོན་རྣམས་ཤིན་ཏུ་བསྡུས་པའི་ཚུལ་གྱིས་མདོ་ཡོངས་རྫོགས་ཀྱི་ནང་དོན་ངོ་སྤྲོད་མདོར་བསྡུས་གནང་ཡོད་འདུག
སཱ་ར་ཎཱ་ཐ་རྒྱལ་ཡོངས་སྔ་འགྱུར་རྙིང་མའི་སློབ་གཉེར་ཁང་གི་༧རྒྱལ་བའི་བཀའ་འགྱུར་ཡིད་བཞིན་ནོར་བུའི་ནང་དོན་ངོ་སྤྲོད་དང་འབྲེལ་བའི་དཀར་ཆག་བསྟན་པའི་མཛེས་རྒྱན་གྱི་རྩོམ་སྒྲིག་ཚོགས་ཆུང་། ༢༠༢༥།༢།༥
དཀར་ཆག་བསྟན་པའི་མཛེས་རྒྱན་ནི་༧གོང་ས་རྒྱལ་བ་རིན་པོ་ཆེ་མཆོག་དང་། ༧སྐྱབས་རྗེ་ཁྲ་འགུ་རིན་པོ་ཆེ། ༧སྐྱབས་རྗེ་དར་ཐང་རིན་པོ་ཆེ། ༧སྐྱབས་རྗེ་རྫོང་གསར་མཁྱེན་བརྩེ་རིན་པོ་ཆེ། ཁྲི་ཟུར་ཟམ་གདོང་རིན་པོ་ཆེ་སོགས་རིས་སུ་མ་ཆད་པའི་སྐྱེས་བུ་དམ་པ་རྣམ་པས་བཀའ་མངགས་བཞིན། དེང་རབས་ཀྱི་དགོས་མཁོ་དང་བསྟུན་ནས་གོ་སླ་ཞིང་གནད་བསྡུས་རང་བཞིན་གྱི་ཐོག་ནས་ཕྱོགས་སྒྲིག་གནང་ཡོད་པ་མ་ཟད། ད་བར་གྱི་རྒྱལ་བའི་བཀའ་འགྱུར་རིན་པོ་ཆེའི་དཀར་ཆག་རྒྱས་ཤོས་དང་། སྤུས་དག་ཤོས། འཇུག་བདེ་ཤོས་ཤིག་ཏུ་ངོས་འཛིན་བྱེད་ཀྱིན་འདུག
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།
