ཨ་རིའི་རོགས་དངུལ་མཚམས་འཇོག་བྱས་རྐྱེན་འཛམ་གླིང་གི་གསར་འགྱུར་བརྒྱུད་ལམ་ཁག་ཏུ་གནས་ཚུལ་བསྡུ་ལེན་བྱེད་པར་དོ་ཕོག་ཤུགས་ཆེན་འགྲོ་རྒྱུ་ཡིན་འདུག
དེ་རིང་རྒྱལ་སྤྱིའི་གསར་ལམ་ཁག་ཏུ་གནས་ཚུལ་ཐོན་པ་ལྟར་ན། ཨ་རིའི་སྲིད་འཛིན་ཊོམ་ཕུའི་གཞུང་གིས། ཨ་རིའི་རོགས་ཚོགས་ཀྱི་ལས་གཞིའི་ཁྲོད་གསར་ཁང་དང་རང་དབང་ཅན་གྱི་བརྒྱུད་ལམ་ཁག་ལ་རྒྱབ་སྐྱོར་ཆེད་རོགས་དངུལ་ཨ་སྒོར་ས་ཡ་ ༢༦༨ ལྷག་གི་ལས་འཆར་འགྲོ་གྲོན་གཏོང་བཞིན་པ་མཚམས་འཇོག་བྱས་ཡོད་པ་ལྟར། ཨེ་ལོན་མ་སི་ཀས་ཨ་རིའི་གཞུང་ནས་མ་དངུལ་གཏོང་བཞིན་པའི་ཡུ་རོབ་རང་དབང་རླུང་འཕྲིན་ཁང་དང་། ཨ་རིའི་རླུང་འཕྲིན་ཁང་གཉིས་སྒོ་རྒྱག་དགོས་པའི་རེ་འདུན་བཏོན་འདུག
དེ་བཞིན། ཨ་རིའི་དམིགས་བསལ་རྒྱལ་འབྲེལ་ཕོ་ཉ་རི་ཆར་ཌ་གྷི་རི་ནེལ་ (Richard Grenell) གྱིས་ ཨེག་སི་(X) སྤྱི་ཚོགས་དྲ་ལམ་ཐོག རླུང་འཕྲིན་ཁང་དེ་དག་ནི་ཨ་རིའི་གཞུང་གིས་མ་དངུལ་བཏང་བ་ཞིག་ཡིན་ཡང་། འདས་དོན་གྱི་སྣང་བརྙན་ཙམ་ལས་དོན་དངོས་ཐོག་བེད་སྤྱོད་ལོགས་པར་གཏོང་གིན་ཡོད་པས། ད་ལྟ་ང་ཚོར་གཞུང་འབྲེལ་གྱིས་མ་དངུལ་གཏོང་བཞིན་པའི་གསར་ཁང་འདི་དག་དགོས་མཁོ་མེད། ཅེས་བརྗོད་འདུག
གནད་དོན་དེའི་ཐད། ཨ་རིའི་རྒྱལ་མཚམས་མེད་པའི་གསར་འགོད་པའི་མཐུན་ཚོགས་ཀྱི་འཛིན་སྐྱོང་འགན་འཛིན་ཁི་ལེ་ཌོན་ཝི་མེར་སི་ལགས་ཀྱིས། སྲིད་འཛིན་ཊོམ་ཕུའི་ཐག་གཅོད་དེས་ཟང་ཟིང་དང་འཁྲུག་ཆ་བཟོས་ཡོད། ཁེ་ལས་མིན་པའི་གསར་ཁང་དང་བརྒྱུད་ལམ་ཁག་ཅིག་ལས་མཚམས་བཞག་སྟེ་ལས་བྱེད་མང་པོ་གནས་དབྱུང་བཏང་ཡོད། ཟླ་གསུམ་རིང་གི་ཨ་རིའི་རོགས་དངུལ་གྱི་མཚམས་འཇོག་གི་རྗེས་སུ། གསར་འགྱུར་ལས་དོན་གཉེར་མཁན་མང་པོ་ཞིག་གཏན་དུ་མེད་པ་ཆགས་རྒྱུ་རེད། ཅེས་བརྗོད་འདུག་ལ། ཉེ་ལམ་བར་དུ་ཡུག་ཁུ་རེན་གྱི་གསར་འགྱུར་བརྒྱུད་ལམ་བཅུ་ཆའི་དགུ་ཙམ་ཨ་རིའི་རོགས་དངུལ་ལ་བརྟེན་ཡོད་འདུག
ཡུག་ཁི་རེན་ཀི་ཝ་རུ་རྟེན་གཞི་བྱས་པའི་སི་ལི་ཌ་སི་ཌ་ཝོ་(Slidstvo.Info) གསར་འགྱུར་བརྒྱུད་ལམ་གྱི་དྲ་ཚིགས་གསར་འཛུགས་བྱེད་མཁན་ཨན་ན་བྷ་བྷི་ནེ་སི་( Anna Babinets) ཡིས། ད་ལྟ་ནི་ཧ་ཅང་ཉེན་ཁ་ཆེན་པོ་ཞིག་རེད། ཨ་རིའི་རོགས་ཚོགས་སྒོ་བརྒྱབ་པས་ང་ཚོའི་གསར་ཁང་གི་རོགས་དངུལ་བརྒྱ་ཆ་ ༨༠ ཤོར་ཡོད། ང་ཚོས་གལ་ཆེན་གསར་འགྱུར་དང་དམག་འཁྲུག་གནད་དོན་སྐོར་ཇེ་ཉུང་དུ་གཏོང་བར་བསམ་བློ་གཏོང་གི་ཡོད། འཛམ་གླིང་མི་མང་གིས་ཡུག་ཁི་རེན་ནང་དུ་ཅི་ཞིག་བྱུང་བཞིན་པའི་གནས་ཚུལ་ཤེས་རྟོགས་ཐུབ་རྒྱུ་ཇེ་ཉུང་དུ་འགྲོ་རྒྱུ་རེད། ཅེས་བརྗོད་འདུག
ཉེ་ལམ་ཨ་རིའི་སྲིད་འཛིན་ཊོམ་ཕུས་ཨ་རི་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་དང་། རྒྱལ་ཚོགས་ཀྱི་པ་ལི་སི་ཐན་རོགས་སྐྱོར་ཚོགས་པ། དེ་བཞིན། རྒྱལ་ཚོགས་ཀྱི་ཤེས་ཡོན་དང་ཚན་རིག རིག་གཞུང་བཅས་ཀྱི་ཚོགས་པ་སྟེ། རྒྱལ་ཚོགས་ཀྱི་རིག་དངོས་ཤུལ་བཞག་ཚོགས་ཁོངས་སོགས་ནས་ཕྱིར་ཐོན་བྱ་རྒྱུ་ཡིན་པའི་ཐག་གཅོད་བྱས་ཡོད་འདུག ཨ་རིའི་རོགས་ཚོགས་ཀྱི་རོགས་དངུལ་གསར་པ་དང་འགྲོ་བཞིན་པའི་ལས་དོན་ཁག་ཟླ་གསུམ་རིང་བཀག་སྡོམ་བྱས་པ་ཙམ་དུ་མ་ཟད། འཛམ་གླིང་ཁྱོན་ཡོངས་སུ་ཨ་རིའི་རོགས་ཚོགས་ཀྱི་ལས་གཞི་དང་ལས་མི་སྟོང་ཕྲག་མང་པོས་ལས་མཚམས་འཇོག་དགོས་བྱུང་ཡོད་ཅིང་། དམིགས་བསལ་ཨ་རིའི་རོགས་ཚོགས་ཀྱི་དབུས་ལས་ཁུངས་དང་དྲ་རྒྱའང་བཀག་སྡོམ་བྱས་ཡོད་པ་བཞིན། ཨ་རིའི་རོགས་ཚོགས་ཀྱིས་རྒྱལ་སྤྱིའི་གསར་འགྱུར་བརྒྱུད་ཁག་ལ་རོགས་སྐྱོར་བྱས་ཡོད་པའི་ནང་། ཕྱི་ལོ་ ༢༠༢༣ ལོར་ཨི་རན་དང་། ཨབ་གྷ་ནི་སི་ཐན། ཨུ་རུ་སུ་སོགས་རྒྱལ་ཁབ་ ༣༠ ལྷག་གི་ནང་རང་དབང་གི་གསར་འགོད་པ་གྲངས་ ༦༢༠༠༠ ལ་གསར་འགྱུར་ལས་རིགས་ཀྱི་སྦྱོང་བརྡར་ཐོག་རོགས་སྐྱོར་བྱས་ཡོད་པ་མ་ཟད། གཞུང་འབྲེལ་མིན་པའི་གསར་ཁང་ ༧༠༧ དང་། གསར་འགྱུར་རང་དབང་གི་ནུས་སྟོབས་ཆེད་དམིགས་པའི་ཚོགས་སྡེ་ཁག་ ༢༧༩ ལ་རྒྱབ་སྐྱོར་བྱས་ཡོད་འདུག
ཨ་རིའི་སྲིད་འཛིན་ཊོམ་ཕུས་ཨ་རིའི་རོགས་དངུལ་མཚམས་འཇོག་བྱས་པ་དེས་འཛམ་གླིང་གི་རང་དབང་ཅན་གྱི་གསར་འགྱུར་བརྒྱུད་ལམ་ཁག་ཉུང་དུ་འགྲོ་རྒྱུ་ཡིན་པ་མ་ཟད། དྲང་བདེན་མིན་པའི་གནས་ཚུལ་ཁྱབ་གདལ་ཤུགས་ཆེ་རུ་ཕྱིན་སྟེ། གསར་འགྱུར་བརྒྱུད་ལམ་ཁག་གཞུང་གི་དྲིལ་བསྒྲགས་ལས་ཁུངས་ཀྱི་གནས་སྟངས་ཤིག་ཏུ་འགྱུར་རྒྱུ་ཡིན་པའི་ཉེན་བརྡ་བཏང་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
