རྒྱ་ནག་གཞུང་གིས་རྒྱལ་ཁབ་ལ་བློ་མི་དཀར་བ་དང་ཏང་གཤིས་རྩ་དོན་ཤོར་བ། ལྐོག་ཟ་རུལ་སུངས་བྱས་པ་སོགས་ཀྱི་ཉེས་མིང་འོག་བོད་ཡུལ་གྱི་མཐོ་རིམ་དཔོན་རིགས་ཁག་ཅིག་གཅིག་རྗེས་གཉིས་མཐུད་དུ་ཞིབ་བཤེར་གནས་དབྱུང་བཏང་འདུག་ལ་བོད་སྐྱེ་རྒུ་མདོ་ཁུལ་གྱི་དམར་ཤོག་དྲུང་ཆེ་གཞོན་པར་ཞིབ་བཤེར་བྱེད་བཞིན་ཡོད་འདུག
བོད་སྐྱེ་རྒུ་མདོ་ཁུལ་གྱི་དམར་ཤོག་དྲུང་ཆེ་གཞོན་པ་དང་ནང་ཆེན་རྫོང་གི་རྫོང་དཔོན་ཤེས་རབ་རྒྱ་མཚོ། དྲ་ལམ་གྱི་པར།
ཟླ་འདིའི་ཕྱི་ཚེས་ ༡༢ ཉིན་རྒྱ་ནག་གཞུང་གིས་བོད་སྐྱེ་རྒུ་མདོ་ཁུལ་གྱི་དམར་ཤོག་དྲུང་ཆེ་གཞོན་པ་དང་ནང་ཆེན་རྫོང་གི་རྫོང་དཔོན་ཤེས་རབ་རྒྱ་མཚོ་ཞེས་པར་ཞིབ་བཤེར་བྱེད་བཞིན་ཡོད་འདུག་ལ། གཞུང་འབྲེལ་གསར་འགྱུར་ནང་དུ་ཁོང་གིས་ཁྲིམས་སྒྲིག་དང་འགལ་འཛོལ་ཚབས་ཆེན་བྱས་པའི་དོགས་གཞི་ཡོད་སྐོར་བསྒྲགས་འདུག ཁོང་ནི་འདས་པའི་ཟླ་ ༣ ནང་རྒྱ་ནག་གཞུང་གིས་ཞིབ་བཤེར་ཡོངས་བསྒྲགས་བྱས་པའི་བོད་ཁུལ་གྱི་མཐོ་རིམ་དཔོན་རིགས་གསུམ་དེ་རེད་འདུག
འདས་པའི་མི་ལོ་གཉིས་ལྷག་གི་རིང་བོད་ཁུལ་གྱི་མཐོ་རིམ་དཔོན་རིགས་ ༡༥ ཙམ་གནས་དབྱུང་ཞིབ་བཤེར་བྱས་འདུག དེ་ཡང་འདི་ལོའི་ཕྱི་ཟླ་ ༡ ཚེས་ ༢༣ ཉིན་བོད་རང་སྐྱོང་ལྗོངས་ཟེར་བའི་སྲིད་གཞུང་གི་མགོ་གཙོ་ཆེ་དགྲ་ལྷ་ཞེས་པ་ཁྲིམས་སྒྲིག་དང་འགལ་འཛོལ་ཆེན་པོ་བྱུང་སྐོར་བརྗོད་དེ་ཞིབ་བཤེར་བྱེད་ཀྱིན་པའི་གནས་ཚུལ་ཕྱིར་བསྒྲགས་བྱས་ཡོད་པ་དང་། དེ་བཞིན་འདས་ལོའི་ཕྱི་ཟླ་ ༡༢ ཚེས་ ༡༡ ཉིན། བོད་རང་སྐྱོང་ལྗོངས་ཀྱི་དམར་ཤོག་དྲུང་ཆེ་ཟུར་པ་ཝུའུ་ཡེན་ཇེ་(Wu Yingjie)ཡིས། ཏང་ལ་དད་སེམས་ཉམས་པ་དང་ཏང་གཤིས་ཀྱི་རྩ་དོན་ཤོར་བ། ཕུགས་བསམ་ཉམས་པ་སོགས་ཀྱི་ཉེས་མིང་འོག་དམར་ཤོག་ཚོགས་ཁོངས་ནས་ཕྱིར་ཕུད་བཏང་།
དེ་བཞིན་ཕྱི་ལོ་ ༢༠༢༢ ལོའི་ལོ་མཇུག་ཏུ་བོད་རང་སྐྱོང་ལྗོངས་ཟེར་བའི་སྲིད་གཞུང་གི་མགོ་འཁྲིད་གཞོན་པ་ཀྲང་ཡོང་ཙི་དང་། དྲིལ་བསྒྲགས་ལྷན་ཁང་གི་རྒྱུན་ལྷན་ཚོགས་གཙོ་གཞོན་པ་ཝང་ནིན་ཧྲིན། བོད་རང་སྐྱོང་ཟེར་བའི་ཉེན་རྟོག་ཁང་གི་རྒྱུན་ལྷན་ཚོགས་གཙོ་གཞོན་པ་ཡང་ཀང་མིན་བཅས་ལས་གནས་གནས་དབྱུང་དང་། ཕྱི་ལོ་ ༢༠༢༤ ལོའི་ཟླ་ ༢ ཚེས་ ༣ ཉིན་དཀར་མཛེས་ཁུལ་རྟའུ་རྫོང་ཉེན་རྟོག་ལས་ཁུངས་ཀྱི་དཔོན་པོ་གཞོན་པ་ཡེ་ཤེས་རྡོ་རྗེ་དང་། ཕྱི་ལོ་ ༢༠༢༢ ལོའི་ཟླ་ ༡༡ ཚེས་ ༢༤ ཉིན་ཆབ་མདོ་གྲོང་ཁྱེར་འཐབ་ཕྱོགས་གཅིག་གྱུར་ཁང་གི་འགན་འཛིན་ཚེ་རིང་འགྱུར་མེད། དེ་བཞིན་ཕྱི་ལོ ༢༠༢༢ ལོར་བོད་ཀྱི་མཚོ་ཤར་དང་མཚོ་ནུབ་ཁུལ། སྐྱེ་རྒུ་མདོ་ཁུལ་སོགས་སུ་ལོ་ངོ་ ༣༣ ལྷག་ཙམ་རིང་མགོ་ཁྲིད་བྱས་མྱོང་བའི་རྒྱ་དཔོན་ཝུན་གོ་ཏུང་ཟེར་བ་སོགས་ཚུད་པའི་ཉུང་མཐར་བོད་ཁུལ་གྱི་མཐོ་རིམ་དཔོན་རིགས་ ༡༥ ཙམ་ཞིག་ལ་ཞིབ་བཤེར་དང་བཙོན་འཇུག་བྱས་པའི་གནས་ཚུལ་ཐོན་ཡོད་པ་རེད།
འདས་པའི་ཟླ་ ༣ ནང་གནས་དབྱུང་བཏང་བའི་བོད་ཁུལ་གྱི་མཐོ་རིམ་དཔོན་རིགས་གཉིས། དྲ་ལམ་གྱི་པར།
ཕྱི་ལོ་ ༢༠༡༤ ཟླ ༡ ཚེས་ ༢༤ ཉིན་རྒྱ་ནག་དམར་ཤོག་ཚོགས་པའི་མགོ་འཁྲིད་ཞི་ཅིན་ཕིང་གི་གཙོ་སྐྱོང་འོག དབུས་ཆབ་སྲིད་ལས་ཁུངས་ཀྱིས་ཚོགས་འདུ་བསྡུས་ཏེ་རྒྱལ་ཁབ་བདེ་འཇཊ་ཨུ་ཡོན་ལྷན་ཁང་ཞེས་པ་གསར་འཛུགས་བྱ་རྒྱུའི་གཏན་འབེབས་བྱས་ཏེ། དབུས་གཞུང་གིས་གཏན་འབེབས་དོན་ཚན་བརྒྱད་ལག་བསྟར་བྱས་པའི་གནས་ཚུལ་ཕྱོགས་བསྡོམས་དང་འབྱུང་འགྱུར་གྱི་ལས་དོན་སྤྱི་ལེགས་བཅོས་བྱེད་དགོས་པའི་ཐག་གཅོད་འོག རྒྱ་ནག་ནང་ལོགས་དང་བོད་སོགས་བཙན་བཟུང་འོག་ཡོད་པ་ཚང་མར་ལྐོག་ཟ་རུལ་སུངས་དང་གཞུང་དངུལ་ལོག་སྤྱོད། རྒྱས་སྤྲོས་བག་མེད་སོགས་ཀྱི་ཉེས་མིང་འོག དབུས་ས་གཉིས་ནས་དཔོན་རིགས་མང་པོར་ཞིབ་བཤེར་དང་བཙོན་འཇུག་ཁྲིམས་ཐག་བཅད་ཡོད་ལ། སྤྱི་ཡོངས་ནས་མང་ཚོགས་ཁྲོད་བྱ་འགུལ་དེ་ལ་དགའ་མོས་དང་རྒྱབ་སྐྱོར་བྱེད་མཁན་མང་པོ་བྱུང་།
གནད་དོན་དབྱེ་ཞིབ་པའི་ཁྲོད་འགུལ་སྐྱོད་ཆེན་མོ་དེ་ནི་ཞི་ཅིན་ཕིང་ཆབ་སྲིད་ཤོག་ཁག་གི་དབང་ཆ་བརྟན་སྲུང་གི་གཡུལ་འགྱེད་ཆེན་མོ་ཞིག་ཏུ་ངོས་འཛིན་བྱེད་ཀྱི་ཡོད་པ་རེད། གཡུལ་འགྱེད་དེའི་ཁྲོད་དབུས་གཞུང་གི་གཏན་འབེབས་དོན་ཚན་བརྒྱད་དང་འགལ་བ། རྒྱལ་ཁབ་ལ་བློ་མི་དཀར་བ། དྲིན་ལན་ལོག་འཇལ། དད་སེམས་ཉམས་པ། ཕུགས་འདུན་བརླག་པ་སོགས་ཀྱི་ཉེས་མིང་ཚུད་ཡོད་པ་མ་ཟད། ལྐོག་རྔན་བླངས་བ་དང་ལྐོག་ཟ་རུལ་སུངས་བྱས་པ། སྤྱི་ཚོགས་བརྟན་ལྷིངས་ལ་གནོད་སྐྱོན་བཟོས་པ་དང་རྒྱལ་ཁབ་ཁ་བྲལ་གཏོང་ཐབས་བྱས་པ་ཟེར་བའི་ཉེས་མིང་དེ་དམར་ཤོག་གི་ལྟ་བར་འདོད་མོས་མེད་མཁན་གྱི་ཤེས་ཡོན་པའི་སྡེ་དང་ཁོར་ཡུག་སྲུང་སྐྱོབ་པ། འགྲོ་བ་མིའི་ཐོབ་ཐང་འཐབ་རྩོད་པ་སོགས་ལ་མང་དུ་གཡོགས་ཏེ་ཚར་གཅོད་ཀྱི་ཡོད་པ་གསལ་པོ་ཆགས་ཡོད་པ་རེད།
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།
