ཨ་རིའི་གྲོས་ཚོགས་གོང་མའི་འཐུས་མིས་ཨ་རིས་ཐའེ་ཝན་ལ་རྒྱབ་སྐྱོར་དང་ཐའེ་ཝན་མཉམ་འབྲེལ་རྒྱལ་ཚོགས་ནང་མཉམ་ཞུགས་བྱེད་པར་བཀག་འགོག་བྱེད་མི་རུང་བའི་གྲོས་འཆར་བཏོན་འདུག
ཟླ་འདིའི་ཕྱི་ཚེས་ ༢༡ ཉིན་ཨ་རིའི་གྲོས་ཚོགས་གོང་མའི་འཐུས་མི་ཇིམ་ (Jim Risch) ལགས་དང་། གྲོས་ཚོགས་གོང་མའི་འཐུས་མི་རྗེན་ (Jeanne Shaheen) ལགས། གྲོས་ཚོགས་གོང་མའི་ཕྱི་འབྲེལ་ལས་དོན་ཚོགས་ཆུང་གི་ཚོགས་གཙོ་པི་ཊི་ (Pete Ricketts) ལགས། ཁི་རི་སི་ (Chirs Coons) ལགས་བཅས་ཀྱིས། རྒྱ་ནག་གཞུང་གིས་ཐའེ་ཝན་གྱི་བདག་དབང་ལེན་པར་ཨ་རི་དང་རྒྱལ་ཁབ་གཞན་ལ་གནོན་ཤུགས་སྤྲོད་པར་ངོ་རྒོལ་དང་། ཨ་རིས་ཐའེ་ཝན་ལ་རྒྱབ་སྐྱོར་ཡོད་པ་དང་། འཛམ་གླིང་མཉམ་འབྲེལ་རྒྱལ་ཚོགས་ནང་ཐའེ་ཝན་མཉམ་ཞུགས་བྱེད་པར་བཀག་འགོག་བྱེད་མི་རུང་ཞེས་མཉམ་འབྲེལ་གྲོས་འཆར་ཞིག་ངོ་སྤྲོད་གནང་ཡོད་འདུག
དེ་འབྲེལ་ཨ་རིའི་གྲོས་ཚོགས་གོང་མའི་འཐུས་ཇིམ་ལགས་ཀྱིས། ཨ་རིའི་གཞུང་ནས་རྒྱ་ནག་གིས་ཐའེ་ཝན་ལ་བདག་དབང་ཡོད་ཚུལ་བརྗོད་པ་དེར་ངོས་ལེན་མེད་ལ། རྒྱ་ནག་གཞུང་གིས་འཛམ་གླིང་ཡོངས་ལ་མགོ་སྐོར་བཏང་སྟེ་མཉམ་འབྲེལ་རྒྱལ་ཚོགས་ཀྱི་དམིགས་ཡུལ་ལ་ཆེད་དུ་འགྱུར་བ་གཏོང་ཐབས་བྱས་ཡོད་ཀྱང་། ང་ཚོས་ངན་ཇུས་དེ་དག་མཐོང་སྟེ་ཐའེ་ཝན་ལ་རྒྱབ་སྐྱོར་བྱེད་ཀྱི་ཡིན། ཞེས་གསུངས་འདུག
ཟླ་འདིའི་ཕྱི་ཚེས་ ༢༢ ཉིན་ཐའེ་ཝན་གྱི་སྲིད་འཛིན་གཞོན་པ་ཚའོ་ (Hsiao Bi-khim) ལགས་ཀྱིས། རྒྱལ་སྤྱིའི་སྟེང་རྒྱ་ནག་གིས་ངན་ཇུས་འདིང་བཞིན་པར་སྐྱོན་བརྗོད་གནང་བ་དང་། ཐའེ་ཝན་ལ་རྒྱབ་སྐྱོར་གནང་བར་ཐུགས་རྗེ་ཆེ་ཞུ་རྒྱུ་ཡིན། ཞེས་གསུངས་འདུག
གྲོས་ཚོགས་གོང་མའི་འཐུས་མི་རྗེན་ལགས་ཀྱིས། རྒྱ་ནག་པེ་ཅིན་གཞུང་གིས་ཐའེ་ཝན་མཉམ་འབྲེལ་རྒྱལ་ཚོགས་ནང་ཞུགས་པར་བཀག་འགོག་བྱེད་ཀྱི་ཡོད་པར་བརྟེན། ཐའེ་ཝན་ལ་རྒྱལ་སྤྱིའི་རྒྱབ་སྐྱོར་ཇེ་ཞན་དུ་འགྲོ་བཞིན་ཡོད་པ་དང་། ཨ་རིས་གྲོས་འཆར་འདི་བརྒྱུད་རྒྱ་གཞུང་གི་བྱ་སྤྱོད་དེར་འགོག་གི་ཡོད་པ་ཁ་གསལ་བཟོས་ཡོད། ཅེས་འགྲེལ་བརྗོད་གནང་འདུག་ལ། དེ་བཞིན་ཕྱི་འབྲེལ་ལས་དོན་ཚོགས་ཆུང་གི་ཚོགས་གཙོ་པི་ཊི་ལགས་ཀྱིས། རྒྱ་ནག་གིས་རྒྱ་ནག་གཅིག་གི་སྲིད་ཇུས་ཞེས་པའི་འོག རྒྱལ་སྤྱིའི་ཐོག་ནས་ཐའེ་ཝན་ལ་བཙན་ཤེད་དང་བཙན་འཛུལ་བྱེད་པར་རྒྱབ་སྐྱོར་ཐོབ་ཐབས་བྱེད་ཀྱི་ཡོད། ང་ཚོས་རྒྱ་ནག་གིས་ལོ་རྒྱུས་བསྐྱར་བཅོས་བྱེད་པར་ཁས་ལེན་མི་བྱེད་པ་དང་། འཛམ་གླིང་གི་ཚོགས་སྡེ་ཁག་ཏུ་ཐའེ་ཝན་མཉམ་ཞུགས་བྱེད་པར་རྒྱབ་སྐྱོར་བྱེད་དགོས། ཞེས་གསུངས་འདུག
གྲོས་འཆར་འདིས་རྒྱ་ནག་གིས་ཐའེ་ཝན་ལ་བདག་དབང་ཡོད་ཚུལ་གྱི་རྫུན་གཏམ་ལ་ངོས་ལེན་མེད་པ་དང་། ཐའེ་ཝན་རྒྱལ་སྤྱིའི་ཚོགས་སྡེ་ཁག་གི་ནང་མཉམ་ཞུགས་བྱེད་པར་བཀག་འགོག་བྱེད་ཀྱི་ཡོད་པ་དེ་ལ་ངོ་རྒོལ་ཡོད་པ་མཚོན་ཡོད། ཕྱི་ལོ་ ༡༩༧༡ ལོར་མཉམ་འབྲེལ་རྒྱལ་ཚོགས་ཀྱི་གྲོ
ཟླ་འདིའི་ཕྱི་ཚེ་ ༡༧ ཉིན་ཨ་རིའི་ཕྱི་སྲིད་ལས་ཁུངས་ཀྱི་གཞུང་འབྲེལ་དྲ་རྒྱའི་སྟེང་བཀོད་པའི་ཐའེ་ཝན་གྱི་རང་བཙན་ལ་རྒྱབ་སྐྱོར་བྱེད་ཀྱི་མེད་ཅེས་པའི་ཚིག་བརྗོད་དེ་མེད་པ་བཟོས་ཡོད་སྟབས། ཉིན་དེར་ཐའེ་ཝན་གྱི་ཕྱི་སྲིད་བློན་ཆེན་ལིན་ (Lin Chia-lung) ལགས་ཀྱིས། འགྱུར་བ་དེ་འདྲ་བཏང་བར་ཐུགས་རྗེ་ཆེ་ཞུས་འདུག་ལ། ཐའེ་ཝན་དང་ཨ་རི་གཉིས་ཀྱི་འབྲེལ་ལམ་དམ་ཟབ་ཡོད་པ་མཚོན་གྱི་ཡོད་སྐོར་གསུངས་འདུག
ཕྱི་ཚེས་ ༡༧ ཉིན་རྒྱ་ནག་གི་ཕྱི་སྲིད་ལྷན་ཁང་མགྲིན་ཚབ་པ་ཀོ་ཅཱ་ཀོན་ (Guo Jiakun) གྱིས། ཨ་རིས་ཐའེ་ཝན་དང་འབྲེལ་བའི་བསྐྱར་བཅོས་དེས་བརྡ་ལན་ནོར་པ་སྤྲོད་ཀྱི་ཡོད་པ་དང་། ཐའེ་ཝན་རང་བཙན་ལ་རྒྱབ་སྐྱོར་ཡོད་པའི་གྲོས་འཆར་བཏོན་པ་དེ་འཕྲལ་དུ་བཟོ་བཅོས་རྒྱག་དགོས་སྐོར་བཤད་འདུག དེ་འབྲེལ་གནད་དོན་དབྱེ་ཞིབ་པ་ཁག་ཅིག་གིས། གནད་དོན་དེ་དག་ལ་བརྟེན་ནས་ཨ་རི་དང་རྒྱ་ནག་གཉིས་ཀྱི་འབྲེལ་ལམ་ཇེ་སྡུག་ཏུ་འགྲོ་རྒྱུའི་ཚོད་དཔག་བྱེད་བཞིན་འདུག
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། པདྨ་མཚོ།
