མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༥༨ པ་དང་བསྟུན་བོད་པ་དང་རྒྱ་རིགས་རྣམས་ཀྱིས་རྒྱ་གཞུང་གིས་འགྲོ་བ་མིའི་ཐོབ་ཐང་དང་ཆོས་དད་རང་མོས་རྡོག་རོལ་གཏོང་བཞིན་པར་ཞི་བའི་ངོ་རྒོལ་བྱས་འདུག
ཁ་སང་ཕྱི་ཚེས་ ༢༤ ཉིན་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༥༨ པ་འཚོག་བཞིན་པ་དང་བསྟུན། སུད་སི་གྲོང་ཁྱེར་ཇི་ནི་ཝར་རྟེན་གཞི་བྱས་པའི་མཉམ་འབྲེལ་རྒྱལ་ཚོགས་ཀྱི་མདུན་ཐང་དུ། སུད་སི་དང་ལིག་ཏེན་སི་ཊི་ཡན་བོད་རིགས་ཚོགས་པའི་གོ་སྒྲིག་འོག རྒྱ་གཞུང་གིས་བོད་ནང་གི་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བཞིན་པར་ཞི་བའི་ངོ་རྒོལ་གནང་ཡོད་ཅིང་། འདུ་འཛོམས་ཐོག་སུད་སི་སྐུ་ཚབ་དོན་གཅོད་ཁང་གི་མཉམ་འབྲེལ་རྒྱལ་ཚོགས་ཀྱི་འབྲེལ་མཐུད་པ་ཕུན་ཚོགས་སྟོབས་རྒྱལ་ལགས་དང་། ཡུ་རོབ་རྒྱ་རིགས་འབྲེལ་མཐུད་པ་སངས་རྒྱས་སྐྱབས་ལགས། སུད་སི་དང་ལིག་ཏེན་སི་ཊི་ཡན་བོད་རིགས་ཚོགས་པའི་ཚོགས་གཞོན་སྐལ་བཟང་རྣམ་རྒྱལ་ལགས། ས་གནས་བོད་རིགས་མི་མང་། ཧྥ་རན་སིའི་བོད་དོན་རྒྱབ་སྐྱོར་པ། རྒྱ་རིགས་ཡི་ཤུའི་ཚོགས་པའི་ཚོགས་མི་གྲངས་ ༣༠ ཡིས་མཉམ་ཞུགས་གནང་ཡོད་འདུག
སྐབས་དེར་སུད་སི་དང་ལིག་ཏེན་སིཊིཡན་བོད་རིགས་ཚོགས་པའི་ཚོགས་གཞོན་སྐལ་བཟང་རྣམ་རྒྱལ་ལགས་ཀྱིས། མཉམ་འབྲེལ་རྒྱལ་ཚོགས་ཀྱི་མདུན་ཐང་དུ་བོད་དོན་གྱི་ཆེད་དུ་ལས་འགུལ་དེ་ལོ་མང་པོའི་སྔོན་ནས་མགོ་བཙུགས་ཡོད་ཅིང་། བོད་དོན་བདེན་མཐའ་མ་སེལ་བར་དུ་མུ་མཐུད་སྤེལ་དགོས་པ་ཞིག་རེད། རྒྱ་གཞུང་གིས་བོད་ནང་འགྲོ་བ་མིའི་ཐོབ་ཐང་མུ་མཐུད་རྡོག་རོལ་གཏོང་བཞིན་ཡོད་པ་དང་། བོད་ནང་གི་བོད་མིའི་འབོད་སྒྲ་དེ་རང་དབང་ལུང་པའི་ནང་གི་བོད་མི་རྣམས་ཆགས་ཀྱི་ཡོད་པས། བོད་མི་ཉུང་ཤས་ཤིག་ལས་མེད་ཀྱང་སྤོབས་པ་སྐྱེས་དགོས་པ་ཞིག་རེད། དེ་རིང་སུད་སི་དོན་གཅོད་ཁང་བརྒྱུད་ནས་རྒྱ་རིགས་གང་མང་མཉམ་ཞུགས་གནང་བཞིན་ཡོད། གང་ལྟར་ང་ཚོས་མུ་མཐུད་དུ་ལས་འགུལ་སྤེལ་ཐུབ་པ་དང་། བོད་ནང་དུ་འབྱུང་བཞིན་པའི་གནས་ཚུལ་རྣམས་འཛམ་གླིང་མི་མང་གི་ཁྲོད་དྲིལ་བསྒྲགས་བྱེད་དགོས་པ་གནད་འགག་ཅིག་རེད། དེ་བཞིན་ཡུ་རོབ་ཀྱི་བོད་མིའི་རང་དབང་སྒེར་ལངས་ཐེངས་ ༦༦ གི་དུས་དྲན་གྱི་སྐབས་སུ་འཛམ་གླིང་ལག་རྩེད་སྤོ་ལོ་རྩེད་མཁན་གྲགས་ཅན་ཨེ་ནི་སི་ཧྥི་རི་ཌམ་(Enes Freedom) ལགས་ཀྱང་མཉམ་ཞུགས་བྱེད་གཏན་ཁེལ་ཡོད་པར་བོད་དོན་ཐོག་དྲིལ་བསྒྲགས་ཤུགས་ཆེན་འགྲོ་རྒྱུ་རེད། ལས་འགུལ་འདིས་རྒྱ་གཞུང་གི་སྡུག་རྩུབ་འོག་དཀའ་ངལ་མྱོང་བཞིན་པའི་བོད་དང་ཡུ་གུར་སོགས་གྲངས་ཉུང་མི་རིགས་ཚང་མའི་དཀའ་ངལ་ལ་གདོང་ལེན་བྱེད་བཞིན་པ་མཚོན་གྱི་ཡོད། ཅེས་བརྗོད་སོང་།
སུད་སི་སྐུ་ཚབ་དོན་གཅོད་ཁང་གི་མཉམ་འབྲེལ་རྒྱལ་ཚོགས་ཀྱི་འབྲེལ་མཐུད་པ་ཕུན་ཚོགས་སྟོབས་རྒྱལ་ལགས་ཀྱིས། མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ནང་ཚོགས་མི་རྒྱལ་ཁབ་ ༤༧ ཡོད་པའི་ཁྲོད། ཕྱི་ལོ་ ༢༠༢༥ ལོའི་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོ་དེ་སུད་སི་རྒྱལ་ཁབ་བསྐོ་གཞག་གནང་ཡོད་ཅིང་། ཕྱི་ཟླ་ ༢ ཚེས་ ༡༢ ཉིན་སུད་སི་གཞུང་གིས་རྒྱ་གཞུང་གིས་བོད་དང་ཡུ་གུར་གྱི་ཐོག་གནོན་ཤུགས་སྤྲོད་བཞིན་པའི་གཞུང་འབྲེལ་ཡིག་ཆ་ཞིག་བཏོན་ཡོད། དེ་ནི་སུད་སི་གཞུང་གིས་རྒྱ་གཞུང་གི་གནོན་ཤུགས་ལ་ཞིབ་འཇུག་དང་ལྟ་ཞིབ་བྱས་པའི་ཡིག་ཆ་ཞིག་ལ་ངོས་འཛིན་བྱེད་ཀྱི་ཡོད། དེ་རིང་མཉམ་འབྲེལ་རྒྱལ་ཚོགས་ཀྱི་མདུན་ཐང་སྡིངས་ཆ་འདི་བརྒྱུད་ནས་སུད་སི་གཞུང་དང་མི་མང་ཚང་མར་ཐུགས་རྗེ་ཆེ་ཞུ་རྒྱུ་ཡིན་ལ། འདི་ལོའི་ལོ་གཅིག་རིང་སུད་སི་རྒྱལ་ཁབ་དེ་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོར་བསྐོ་གཞག་བྱས་པར་འཚམས་འདྲི་ཞུ་རྒྱུ་ཡིན། ཞེས་བརྗོད་སོང་།
ཡང་ཁོང་གིས། ཐེངས་འདིའི་ལས་འགུལ་ནང་རྒྱ་རིགས་ཡི་ཤུའི་ལས་འགུལ་བ་མང་པོ་མཉམ་ཞུགས་བྱེད་བཞིན་ཡོད། ཁོང་ཚོ་རྒྱ་རིགས་ཡིན་ཡང་རྒྱ་ནག་ནང་དུ་ཆོས་དད་རང་དབང་མེད་པ་མ་ཟད། རྒྱ་གཞུང་གིས་ཆོས་དད་རང་དབང་རྩོད་ལེན་པ་རྣམས་བཙོན་འཇུག་བྱེད་པ་དང་། གར་སོང་ཆ་མེད་གཏོང་བ། ཐ་ན་གཟུགས་པོའི་ནང་ཁྲོལ་གྱི་ཚོང་ལས་བྱེད་པའི་གནས་སྟངས་བྱུང་ཡོད། མཉམ་འབྲེལ་རྒྱལ་ཚོགས་ཀྱི་མགོ་ཁྲིད་རྣམ་པས་རྒྱ་གཞུང་གི་ལངས་ཕྱོགས་ལ་སེམས་འཚབ་གནང་ཡོད་ཀྱང་། རྒྱ་གཞུང་གིས་རྒྱ་རིགས་མི་མང་ལའང་དཀའ་ངལ་མུ་མཐུད་དུ་སྤྲོད་མུས་ཡིན་པས། ད་ལན་ང་ཚོས་ཐུན་མོང་ཐོག་ཞི་བའི་ངོ་རྒོལ་བྱ་དགོས་པ་དམིགས་ཡུལ་གཙོ་བོ་ཆགས་ཡོད། རྒྱ་གཞུང་གིས་བོད་ནང་ཁོར་ཡུག་ལ་གཏོར་བཤིག་དང་། གཏེར་ཁ་སྔོག་འདོན། ཆུ་མཛོད་འདྲ་མིན་འཛུགས་སྐྲུན་སོགས་ལ་བརྟེན་ནས་ཉེ་སྔོན་བོད་ཀྱི་དིང་རི་ཁུལ་དུ་ས་ཡོམ་བརྒྱབ་པ་རེད། དེ་བཞིན་རྒྱ་གཞུང་གིས་བོད་ཕྲུག་རྣམས་གཏན་འཇགས་སློབ་གྲྭ་ལ་བཙན་འཇུག་བྱེད་བཞིན་བོད་ཀྱི་སྐད་ཡིག་རིག་གཞུང་དང་བཅས་པ་རྩ་བརླག་གཏོང་བཞིན་ཡོད། དེ་རིང་འདིར་འཛོམས་དགོས་པའང་རྒྱ་ནག་གཞུང་གི་མནར་གཅོད་འོག་དཀའ་ངལ་འཕྲད་མུས་ཡིན་པའི་བོད་མི་ཡོངས་ཀྱི་ཆེད་དུ་ཡིན་པས། མ་འོངས་པའང་ང་ཚོ་མཉམ་རུབ་ཀྱི་ཐོག་རྒྱ་གཞུང་ལ་ཁ་གཏད་གཅག་དགོས་པ་གལ་ཆེན་པོ་རེད། ཅེས་བརྗོད་སོང་།
དེ་བཞིན་རྒྱ་རིགས་ཡི་ཤུའི་ཚོགས་པ་དང་ཧྥ་རན་སིའི་བོད་དོན་རྒྱབ་སྐྱོར་ཚོགས་པ་བཅས་ཀྱི་སྐུ་ཚབ་མི་སྣས་རྒྱ་ནག་གཞུང་གིས་བོད་དང་ཡུ་གུར་སོགས་གྲངས་ཉུང་མི་རིགས་ལ་དཀའ་ངལ་སྤྲོད་མུས་ཡིན་པ་མ་ཟད། ཆོས་དད་རང་མོས་ཐོག་དྲག་གནོན་ཚད་མེད་བྱེད་བཞིན་ཡོད་པས། འཛམ་གླིང་གི་རྒྱལ་ཁབ་ཡོངས་ཀྱིས་མཉམ་འབྲེལ་ཐོག་རྒྱ་གཞུང་ལ་གདོང་ལེན་བྱ་དགོས་སྐོར་བརྗོད་སོང་།
གསར་འགོད་པ། བྱམས་པ་ཚེ་རིང་།
