༧གོང་ས་མཆོག་ལ་སྐུ་བཅར་རྣམ་རྒྱལ་གྲྭ་ཚང་གིས་བརྟན་བཞུགས་ཕུལ།
ཕྱི་ལོ་ ༢༠༢༤ ཟླ་ ༢ ཚེས་ ༡༤ ཉིན་སྐུའི་བླ་གཟའ་ཉིན་བཞུགས་སྒར་རྒྱལ་བའི་ཕོ་བྲང་དུ། སྐུ་བཅར་རྣམ་རྒྱལ་གྲྭ་ཚང་ཕན་བདེ་ལེགས་བཤད་གླིང་གི་མཁན་བླ་གྲྭ་སོགས་ནས་༧གོང་ས་རྒྱལ་བ་རིན་པོ་ཆེ་མཆོག་ལ་སྒྲོལ་དཀར་ཡིད་བཞིན་འཁོར་ལོའི་ཆོ་གའི་སྒོ་ནས་བརྟན་བཞུགས་བསྟར་འབུལ་ཞུས། སྐབས་དེར་༧གོང་ས་མཆོག་ནས། འཛམ་གླིང་གང་སར་གྲོགས་པོའི་འདུ་ཤེས་དང་། མིའི་བརྩེ་བ་བཅས་ཀྱི་ཐོག་ནས་དགའ་མོས་བྱེད་མཁན་ཧ་ཅང་མང་པོ་ཡོད། དེ་དག་ཚང་མར་ཕན་ཐོགས་ཡོང་ཐུབ་པའི་བག་ཆགས་བཟང་པོ་ཞིག་བཞག་ན་ཚེ་རབས་ནས་ཚེ་རབས་སུ་ང་ཚོར་ལས་ཀྱི་འབྲེལ་བ་ཡོད་པ་དང་། ངོས་རང་འཕགས་པ་སྤྱན་རས་གཟིགས་ཀྱི་བྱིན་རླབས་ཡོད་པའི་མི་ཞིག་ཆགས་ཡོད་པས། དངོས་སུ་ངོས་དང་འབྲེལ་བ་ཡོད་པ་རྣམས་དོན་གྱིས་འཕགས་པ་སྤྱན་རས་གཟིགས་ལ་འབྲེལ་བ་ཡོད་པ་ཞིག་ཆགས་ཡོད། དེར་བརྟེན། ངོས་དང་འབྲེལ་བ་ཡོད་པ་རྣམས་ཚེ་རབས་ནས་ཚེ་རབས་སུ་འཕགས་པ་སྤྱན་རས་གཟིགས་ཀྱིས་རྗེས་སུ་བཟུང་ནས་སྐྱེ་བ་ནས་སྐྱེ་བར་བསྐལ་བ་བཟང་དུ་འགྲོ་བ་ཞིག་དང་། བདེ་སྐྱིད་ལྡན་པ་ཡོང་ཐུབ་པ་ཞིག སྐབས་སུ་བབས་པའམ་གཙོ་ཆེ་ཤོས། བོད་གངས་ཅན་ལྗོངས་ཀྱི་བོད་མི་ཚོ་ཧ་ལས་པའི་དད་པ་དང་། མོས་པ་རྩེ་གཅིག་ཡོད་པ་རེད། དེ་བཞིན་ལ་དྭགས་སོགས་ཧི་མ་ལ་ཡའི་རི་རྒྱུད་ཀྱི་མི་རྣམས་ཀྱིས་ངོས་ལ་དགའ་མོས་རྩེ་གཅིག་ཏུ་ཡོད་པས་མི་ཚེ་འདི་ལ་བག་ཆགས་བཟང་པོ་ཞིག་བཞག་ནས་ཚེ་རབས་ནས་ཚེ་རབས་སུ་བག་ཆགས་དེའི་འབྲས་བུ་སྨིན་ཡོང་དུས་རིམ་པར་སངས་རྒྱས་ཀྱི་སར་སླེབས་ཐུབ་པ་ཞིག་ལ་ངོས་ཀྱིས་སྨོན་ལམ་རྒྱག་གི་ཡིན་ལ། ཁྱོད་ཚོ་ཚང་མས་སྨོན་ལམ་རྒྱག་རོགས། ཞེས་གསུངས།
༧གོང་ས་མཆོག་ལ་སྟོད་པ་སྐྱིད་སྡུག་དང་སྤུ་ཧྲེང་མི་མང་གིས་བརྟན་བཞུགས་ཕུལ།
ཕྱི་ལོ་ ༢༠༢༤ ཟླ་ ༤ ཚེས་ ༣ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། སྟོད་པ་གཞིས་བྱེས་དང་སྤུ་ཧྲེང་མི་མང་གིས་༧གོང་ས་རྒྱལ་བ་རིན་པོ་ཆེ་མཆོག་ལ་སྒྲོལ་དཀར་ཚེ་སྦྱིན་ཡིད་བཞིན་འཁོར་ལོའི་སྒོ་ནས་བརྟན་བཞུགས་བསྟར་འབུལ་ཞུས་ཡོད་ཅིང་། སྐབས་དེར་༧མགོན་པོ་གང་ཉིད་མཆོག་ནས། བརྟན་བཞུགས་བསམ་པ་རྣམ་དག་དང་། སྦྱོར་དངོས་རྗེས་གཙང་ཧ་ཅང་ཡག་པོ་བྱུང་སོང་། ངོས་རང་ལ་ཆ་བཞག་ན་ལོ་བརྒྱ་ཕྲག་ལ་སྡོད་ཐུབ་པའི་སྨོན་ལམ་རྒྱག་གི་ཡོད་ལ། སེམས་ཤུགས་ཀྱང་བསྐྱེད་ཀྱི་ཡོད། གང་ལྟར་འཛམ་གླིང་འདིར་སངས་རྒྱས་ཀྱི་བསྟན་པ་ཏོག་ཙམ་རྒུད་འགྲོ་བའི་དུས་ཚོད་ལ་ངོས་ཀྱིས་བསྟན་པའི་ཞབས་འདེགས་ཕྲན་བུ་སྒྲུབ་ཐུབ་པའི་ཕྱི་ནང་གི་རྐྱེན་མང་པོ་ཞིག་འདུག དེ་སྔ་ནང་པའི་ཆོས་དམིགས་བསལ་དར་ཁྱབ་མེད་པའི་ས་ཁུལ་དུའང་། དེང་སང་དོ་སྣང་གསར་པ་ཞིག་སླེབས་ཡོད། ལྷག་པར་དུ་ཚན་རིག་པ་ཆོས་ཁས་མི་ལེན་མཁན་མང་པོ་ཞིག་གིས་ཧ་ཅང་དགའ་བོ་བྱེད་ཀྱི་འདུག ཆོས་ཁས་ལེན་མཁན་དང་། ཆོས་ཁས་མི་ལེན་མཁན་ཚང་མས་སེམས་ཀྱི་ཞི་བདེ་རྒྱུད་དེ་འཛམ་གླིང་ཞི་བདེ་ཡོང་བར་དམིགས་བསལ་དོ་སྣང་ཞིག་བྱེད་བཞིན་ཡོད། དེར་དོ་སྣང་བྱེད་པའི་ཚན་རིག་པ་མང་པོ་ཞིག་ངོས་ཀྱི་གྲོགས་པོ་ཆགས་ཡོད། མང་པོ་ཞིག་གིས་དམིགས་བསལ་གྱིས་དོ་སྣང་དང་དགའ་བོའང་བྱེད་ཀྱི་འདུག ཅེས་གསུངས།
༧གོང་ས་མཆོག་ལ་ཚོགས་པ་ཁག་གསུམ་གྱིས་བརྟན་བཞུགས་ཕུལ།
ཕྱི་ལོ་ ༢༠༢༤ ཟླ་ ༦ ཚེས་ ༡༡ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། བོད་མིའི་སྒྲིག་འཛུགས་ཀྱི་ལས་བྱེད་ཟུར་པ་དང་། སྐུ་སྲུང་ཟུར་པ། དེ་བཞིན་འགྲོ་ཕན་བོད་ཀྱི་སྨན་རྩིས་ཁང་བཅས་ཀྱིས་༧གོང་ས་མཆོག་ལ་སྒྲོལ་དཀར་ཡིད་བཞིན་འཁོར་ལོའི་སྒོ་ནས་བརྟན་བཞུགས་བསྟར་འབུལ་ཞུས་ཡོད་ཅིང་། སྐབས་དེར་༧མགོན་པོ་གང་ཉིད་ཀྱིས། དེ་རིང་འདིར་ཆོས་གྲོགས་ཚོས་བརྟན་བཞུགས་ཕུལ་བ་རེད། རྨི་ལམ་ལ་ངོས་རང་ལོ་བརྒྱ་དང་བཅུ་གྲངས་ཤིག་སྡོད་རྒྱུ་ཧ་ཅང་གསལ་པོ་ཞིག་འདུག དཔལ་ལྡན་ལྷ་མོ་ངོས་ཀྱི་མཇིང་པའི་སྒང་དུ་བཞུགས་ཏེ་ཁྱོད་རང་ལོ་བརྒྱ་དང་བཅུ་གྲངས་ཤིག་སྡོད་ཀྱི་རེད་ཅེས་གསུང་གི་འདུག རིགས་པའི་རྒྱུ་མཚན་བཀོད་པ་ཡིན་ན་ད་ལྟ་ང་ཚོ་བོད་པ་དཀའ་ངལ་ཆེན་པོ་ཞིག་གི་སྒང་ལ་བསྡད་ཡོད། བོད་པའི་སྤྱི་མཐུན་གྱི་ལས་དང་སྨོན་ལམ་གྱི་སྟོབས་ལས་ངོས་རང་མདོ་སྨད་ནས་སྐྱེས་ཤིང་། བོད་པ་མང་པོས་དགའ་བོ་བྱེད་ས་ཞིག་དང་། ལུང་རྟོགས་ཀྱི་བསྟན་པ་ལ་ཡིན་ནའང་ཞབས་འདེགས་གང་ལ་གང་འཚམ་སྒྲུབ་ཐུབ་མཁན་ཞིག་ཆགས་ཡོད་པས་ལྷ་མོའི་ལུང་བསྟན་དེ་རྒྱུ་མཚན་ལྡན་པ་ལྟ་བུ་འདུག ངོས་རང་འདིར་ལས་དང་སྨོན་ལམ་གྱི་དབང་གིས་སྐྱེས་པ་ཞིག་རེད། དེར་བརྟེན། ལྷ་མོའི་ལུང་བསྟན་ནང་བཞིན་ལོ་བརྒྱ་དང་བཅུ་གྲངས་ཤིག་སྡོད་ཀྱི་རེད། ཁྱོད་ཚོ་ཚང་མ་བློ་བདེ་བར་བཞུགས། ཞེས་གསུངས།
༧གོང་ས་མཆོག་ལ་བྱང་ཨ་རིའི་ནང་པ་ཡོངས་ནས་བརྟན་བཞུགས་ཕུལ།
ཕྱི་ ༢༠༢༤ ཟླ་ ༨ ཚེས་ ༢༢ ཉིན་ཨ་རིའི་ནེའུ་ཡོག་ཡུག་བྷི་ཨེ་སི་ཨ་རེ་ནཱ་རྩེད་རའི(UBS ARENA) ནང་དུ། བྱང་ཨ་རིར་གནས་སྡོད་བོད་མི་སྤྱི་དང་། ཨ་རིའི་ཆོ་འཕྲུལ་སྨོན་ལམ་ཚོགས་པས་གཙོས་དགེ་ལུགས་པའི་ཆོས་ཚོགས་ཁག སོག་རིགས། ཧི་མ་ལ་ཡའི་རི་རྒྱུད་ཀྱི་མི་མང་བཅས་ཐུན་མོང་གིས་༧གོང་ས་རྒྱལ་བ་རིན་པོ་ཆེ་མཆོག་ལ་མཚོན་དོན་བརྟན་བཞུགས་བསྟར་འབུལ་ཞུས། སྐབས་དེར་༧མགོན་པ་གང་ཉིད་མཆོག་ནས། དེ་རིང་འདིར་བོད་ཀྱི་མདོ་སྟོད་སྨད་དབུས་གཙང་སོགས་བོད་ཀྱི་ས་ཁུལ་ཡོངས་རྫོགས་ཀྱི་མི་སྣ་འཛོམས་ཡོད། འདིར་མི་སྣ་འཛོམས་པ་དེ་རྒྱུ་དངོས་པོའི་ཐོག་ནས་འཛོམས་པ་མ་རེད། ཚང་མས་སེམས་ནང་བོད་རིགས་ཞེས་པའི་བསམ་ཚུལ་གྱི་ཐོག་ནས་ང་ཚོ་ཚང་མ་རྡོག་སྒྲིལ་ནས་ཡོང་གི་ཡོད། ང་ཚོ་བོད་པ་ཙམ་མིན་པར་བོད་ཀྱི་ཆོས་དང་རིག་གཞུང་ལ་ཤེས་ནས་དད་པ་ཐོབ་པའི་གྲོགས་པོ་མང་པོ་ཞིག་འདིར་འདུས་ཡོད། ཚང་མས་བོད་ཀྱི་རིག་གཞུང་འདི་འཛམ་གླིང་སྤྱི་ལ་མཁོ་བའི་རིག་གཞུང་ཞིག་ཆགས་ཡོད། བཅོམ་ལྡན་འདས་མངོན་པར་རྫོགས་པའི་སངས་རྒྱས་པའི་རྗེས་སུ། ཆོས་ཀྱི་འཁོར་ལོ་རིམ་པ་གསུམ་གསུངས་པ་རེད། གང་ལྟར་སངས་རྒྱས་བཅོམ་ལྡན་མྱ་ངན་ལས་འདས་རྗེས་སངས་རྒྱས་བཅོམ་ལྡན་འདས་ཀྱི་ཆོས་ལ་སྤུས་དག་པོའི་ཐོག་ཆ་ཚང་བདག་པོ་རྒྱག་མཁན་གཙོ་བོ་ཧི་མ་ལ་ཡའི་རི་རྒྱུད་ཀྱི་བོད་རིགས་ཚོ་གཙོ་བོ་རེད་འདུག དེང་སྐབས་ང་ཚོས་དངོས་སུ་མཐོང་ཆོས་སུ་ཡོད་པ་དེ་རེད། དངོས་གནས་དྲང་གནས་བོད་གངས་ཅན་ལྗོངས་ཀྱི་སློབ་གཉེར་གཙོ་བོ་ཚིག་གི་འགྲེལ་བཤད་རྒྱག་རྒྱུ་ཡོད་པ་དང་། དོན་དག་ལ་བསམ་བློ་གཏོང་རྒྱུ་ཡོད་པ། སོ་སོ་རང་གི་ཉམས་ལེན་གྱི་ཐོག་ནས་བསམ་བློ་གཏང་ན་བསླབ་པ་གསུམ་གྱི་ཐོག་ལ་ཉམས་ལེན་བྱ་རྒྱུ་ནི་ང་ཚོ་བོད་པར་ལོ་ངོ་སྟོང་ཕྲག་རིང་གོམས་ཏེ་སྤུས་དག་པོ་ཆགས་ཡོད། ཅེས་གསུངས།
༧གོང་ས་མཆོག་ལ་ཡུ་རོབ་ཀྱི་བོད་མི་ཚོས་བརྟན་བཞུགས་ཕུལ།
ཕྱི་ལོ་ ༢༠༢༤ ཟླ་ ༨ ཚེས་ ༢༥ ཉིན་སུད་སི་གྲོང་ཁྱེར་ཛུ་རིག་གི་ཧཱ་ལན་སི་ཌེ་ཤོན་(Hallenstadion ) ཚོགས་ཁང་དུ། ༧གོང་ས་རྒྱལ་བ་རིན་པོ་ཆེ་མཆོག་ནས་ཡུ་རོབ་ཏུ་གནས་བཞུགས་བོད་མི་ ༡༥༠༠༠ བརྒལ་བར་སྤྱན་རས་གཟིགས་བླ་མའི་རྣལ་འབྱོར་བསྡུས་པའི་བཤད་ལུང་དང་མ་ཎིའི་ལྗགས་ལུང་གི་བཀའ་ཆོས་བསྩལ་བ་དང་སྦྲགས། ཆོས་ཀྱི་སྙིང་པོ་ནི་ཡ་རབས་སྤྱོད་བཟང་རེད། དེ་ནས་ཆོས་ཁས་མ་བླངས་ཀྱང་སོ་སོའི་མི་ཚེ་འདི་ཡ་རབས་སྤྱོད་བཟང་གིས་བསྐྱལ་རྒྱུ་བྱུང་ན་ཆོས་ཀྱི་དགོས་པ་ཚང་ཡོད། ཁ་ནས་ཆོས་མང་པོ་བཤད་ཅིང་། ཆོས་ཕྱོགས་ཀྱི་ཐོག་ནས་གྲུབ་འཐའི་འཐེན་འཁྱེར་བྱེད་བསྡད་ལྟ་བུ་དང་། སེམས་ཞི་ཞིང་དུལ་བ་ཡག་པོ་ཞིག་མེད་ཚེ་དེ་ནི་ཆོས་འབག་ལ་གྱོན་པ་ལྟ་བུ་ཞིག་རེད། ཕན་ཐོགས་གང་ཡང་མེད། ང་ཚོ་བོད་རྣམས་ཧ་ཅང་ཡག་པོ་རེད། ད་ལྟའི་བར་དུ་ཧུར་ཐག་བྱས་པ་རེད། ད་དུང་ཡིན་ནའང་ཚང་མས་ཧུར་ཐག་བྱོས། སངས་རྒྱས་པའི་ཆོས་ནི་ལྟ་གྲུབ་དང་འབྲེལ་ནས་འགྲོ་བཞིན་ཡོད་པས་སློབ་སྦྱོང་གང་ལ་གང་འཚམ་ཞིག་བྱེད་དགོས་པ་གལ་ཆེན་པོ་རེད། སློབ་སྦྱོང་ཡོད་པའི་ཆོས་དད་དང་སློབ་སྦྱོང་མེད་པའི་ཆོས་དད་ལ་ཁྱད་པར་ཡོད་པ་རེད། འགྲེལ་བཤད་སྐྱོན་དུས་ཀྱང་ཟབ་ཁྱད་ཡོད་པ་རེད་ལ། གཙོ་ཆེ་ཤོས་སེམས་རྒྱུད་འདུལ་བར་ཆོས་ཀྱི་གནད་འགག་ཤེས་པའི་ཐོག་ནས་དད་པ་བྱས་པ་ཡིན་ན་ཁྱད་པར་ཆེན་པོ་ཡོད་པ་རེད། མི་རིགས་ཀྱི་ཆ་ནས་བཤད་པ་ཡིན་ནའང་། ཆོས་དད་ཀྱིས་མི་རིགས་ཀྱི་རྣམ་པ་མཚོན་ཐུབ་པ་ཞིག་དང་། ལུང་པའི་གོམས་གཤིས་དང་རིག་གཞུང་ཟེར་ཡང་ནང་པའི་ཆོས་ཀྱིས་སྒྲོམ་གཞི་བྱས་ཡོད། དེར་བརྟེན། ང་ཚོ་ཚང་མས་བོད་ཀྱི་ཆོས་དང་རིག་གཞུང་ཟེར་བའི་གོམས་གཤིས་བཟང་པོ་འདིར་བདག་པོ་རྒྱག་རྒྱུ་ཧ་ཅང་གལ་ཆེན་པོ་རེད། ཅེས་གསུངས།
༧གོང་ས་མཆོག་ལ་མོན་ཡུལ་དད་ལྡན་མི་མང་གིས་བརྟན་བཞུགས་ཕུལ།
ཕྱི་ལོ་ ༢༠༢༤ ཟླ་ ༩ ཚེས་ ༧ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། མོན་ཡུལ་གྱི་དད་ལྡན་མི་མང་ཡོངས་ནས་༧གོང་ས་རྒྱལ་བ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུས། སྐབས་དེར་༧མགོན་པོ་གང་ཉིད་མཆོག་ནས། ང་ཚོ་བོད་ནས་ཁ་བྲལ་ཏེ་བཙན་བྱོལ་བ་ཆགས་པ་རེད། རྒྱ་གར་ནང་འགྲོ་དོན་རྒྱ་ཆེན་པོ་བྱས་ནས་བསྡད་པ་རེད། དེ་རིང་སྐབས་སུ་བབས་པ་མོན་པ་ལྷ་ལྡན་མི་རིགས་ཡོངས་ནས་བཞུགས་སྒར་དུ་ཆེད་དུ་བརྟན་བཞུགས་འབུལ་གྱི་ཡོད། ངོས་རང་བོད་ནས་མོན་ཡུལ་བརྒྱུད་རྒྱ་གར་དུ་ཡོང་དུས། མོན་པ་ཚོས་དངོས་གནས་དྲང་གནས་དད་པ་ཆེན་པོ་བྱས་ཏེ། ངོས་རང་གི་ལྷམ་མགོར་མགོ་ཐུག་པ་སོགས་བྱས་སོང་། ང་ཚོ་བཙན་བྱོལ་དུ་ཐོག་མར་ཡོང་སྐབས་མོན་ལ་འབྱོར་བ་རེད། མོན་པ་ཚོས་དད་འདུན་ཆེན་པོ་བྱས་ཏེ་སེམས་འགུལ་ཐེབས་པ་ཞིག་བྱུང་། དེ་རིང་མོན་པ་ཚོས་བརྟན་བཞུགས་ཕུལ་གྱི་ཡོད་པ་རེད། ཁྱེད་རང་ཚོ་གཞིས་བྱེས་མི་མང་ཚང་མ་འཕགས་པ་སྤྱན་རས་གཟིགས་ཀྱི་རྗེས་སུ་བཟུང་སྟེ། འཕྲད་ལ་ཉེ་བའི་འདོད་དོན་ཐམས་ཅད་བདེ་བླག་ཏུ་འགྲུབ་པའི་སྐྱབས་འཇུག་ཞུ་ཡི་ཡོད། ཅེས་གསུངས།
༧གོང་ས་མཆོག་ལ་ཚོགས་སྐྱིད་ཁག་གསུམ་ནས་བརྟན་བཞུགས་ཕུལ།
ཕྱི་ལོ་ ༢༠༢༤ ཟླ་ ༩ ཚེས་ ༡༨ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། བོད་ཀྱི་བུད་མེད་ལྷན་ཚོགས་དང་། བོད་ཀྱི་རྒྱལ་ས་ལྷ་སའི་མཐུན་གྲོགས་རྫོང་ཁག ཌལ་ཧོར་སློབ་ཟུར་བཅས་ཀྱི་གོ་སྒྲིག་འོག ༧གོང་ས་རྒྱལ་བ་རིན་པོ་ཆེ་མཆོག་ལ་༸གོང་ས་ལྔ་པ་ཆེན་པོའི་དག་སྣང་ཚེ་དཔག་མེད་དྭངས་མ་བཅུད་འདྲེན་གྱི་སྒོ་ནས་བརྟན་བཞུགས་བསྟར་འབུལ་ཞུས། སྐབས་དེར་༧མགོན་པོ་གང་ཉིད་མཆོག་ནས། ངོས་རང་ལ་ཆ་བཞག་ན་ཚེ་རབས་མང་པོའི་ལས་བསགས་ཏེ། ད་ལྟའི་དུས་ཚོད་ཁག་པོ་འདིའི་སྐབས་སུ་ལས་དང་སྨོན་ལམ་གྱི་སྟོབས་ཀྱིས་བོད་བསྟན་སྲིད་ཀྱི་དོན་བྱེད་མཁན་གྱི་སྐྱེ་གནས་ཤིག་བླངས་ཡོད། ནང་པའི་ཆོས་ལ་འགྲེལ་བཤད་དང་། སེམས་ཁམས་རིག་པའི་ཐོག་ནས་ཚན་རིག་པ་དང་མཉམ་དུ་བགྲོ་གླེང་ཡག་པོ་བྱེད་ཐུབ་པ་ཞིག་ཆགས་ཡོད། ལས་དང་སྨོན་ལམ་གྱིས་མདོ་སྨད་པ་ལྷ་མོ་དོན་གྲུབ་ཅེས་པ་མི་གོ་ཆོད་མཁན་ཞིག་ཆགས་ཡོད། ངོས་ཀྱིས་ད་ལྟའི་བར་དུ་བོད་བསྟན་སྲིད་ཀྱི་དོན་དུ་གང་ཡོང་ཅི་ཡོང་བྱས་པ་ཡིན་ལ། གང་ལྟར་ངོས་ཀྱི་མི་ཚེ་འདིར་བོད་བསྟན་སྲིད་ལ་ཕན་ཐོགས་ངེས་ཅན་ཞིག་བྱུང་ཡོད་ཅེས་བཀའ་སློབ་བསྩལ།
༧གོང་ས་མཆོག་ལ་ཐའེ་ཝན་གྱི་དད་ལྡན་མི་མང་གིས་བརྟན་བཞུགས་ཕུལ།
ཕྱི་ལོ་ ༢༠༢༤ ཟླ་ ༡༠ ཚེས་ ༡ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། ༧གོང་ས་རྒྱལ་བ་རིན་པོ་ཆེ་མཆོག་ལ་ཐའེ་ཝན་གྱི་དད་ལྡན་མི་མང་གིས་བླ་མ་མཆོད་པའི་སྒོ་ནས་བརྟན་བཞུགས་བསྟར་འབུལ་ཞུས། སྐབས་དེར་༧གོང་ས་རྒྱལ་བ་རིན་པོ་ཆེ་མཆོག་ནས། དེ་རིང་ལྷག་བསམ་རྣམ་པར་དག་པའི་ཐོག་ནས་བརྟན་བཞུགས་འབུལ་མཁན་གཙོ་བོ་ནི་ཐའེ་ཝན་གྱི་དད་ལྡན་ཆོས་ཞུ་བ་རྣམས་ཡིན། ངོས་ཀྱིས་དུས་གཏན་དུ་རྒྱ་བོད་ཧོར་གསུམ་ལ་སངས་རྒྱས་ཀྱི་བསྟན་པ་དངོས་གནས་ཉམས་པ་སོར་ཆུད་མི་ཉམས་གོང་འཕེལ་ཡག་པོ་ཡོང་ཐུབ་པའི་སྨོན་ལམ་རྒྱག་གི་ཡོད། དེ་རིང་ཁ་སང་རྒྱ་རིགས་མི་མང་ནང་ནས་ནང་ཆོས་ལ་དོ་སྣང་ཤུགས་ཆེན་པོ་འགྲོ་བསྡད་པ་དངོས་ཡོད་རེད། མ་འོངས་པར་ངོས་རང་གི་ངོས་ནས་རྒྱ་ཧོར་བོད་གསུམ་ལ་སངས་རྒྱས་པའི་ཆོས་ཉམས་པ་སོར་ཆུད་མི་ཉམས་གོང་འཕེལ། དེ་ཡང་ཐེག་པ་ཆེ་ཆུང་སྔགས་དང་བཅས་པ་ཆ་ཚང་བ་ཡག་པོ་ཞིག་ཡོང་ཐུབ་པར་འབད་བརྩོན་བྱེད་ཀྱི་ཡིན་ལ་སྨོན་ལམ་ཡང་རྒྱག་གི་ཡིན། ཞེས་གསུངས།
༧གོང་ས་མཆོག་ལ་ཁུ་ནུ་ནང་པའི་དགོན་སྡེ་དང་ཡུལ་སྡེ་ཁག་གིས་བརྟན་བཞུགས་ཕུལ།
ཕྱི་ལོ་ ༢༠༢༤ ཟླ་ ༡༢ ཚེས་ ༦ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། ༧གོང་ས་རྒྱལ་བ་རིན་པོ་ཆེ་མཆོག་ལ་ཁུ་ནུའི་སྟོད་སྨད་ཀྱི་དད་ལྡན་སེར་སྐྱ་མང་ཚོགས་ ༢༠༠༠ ཙམ་ནས་སྒྲོལ་དཀར་ཡིད་བཞིན་འཁོར་ལོའི་ཆོ་གའི་སྒོ་ནས་བརྟན་བཞུགས་བསྟར་འབུལ་ཞུས་ཡོད་ཅིང་། སྐབས་དེར་༧མགོན་པོ་གང་ཉིད་མཆོག་ནས། ང་ཚོ་བོད་ནས་ཁ་བྲལ་ཏེ་བཙན་བྱོལ་བ་ཆགས་པ་དང་། རྒྱ་གར་གྱི་ས་ཁུལ་འདིར་འགྲོ་དོན་རྒྱ་ཆེ་ཐག་ཆོད་བྱས་ནས་བསྡད་པ་རེད། དེ་རིང་སྐབས་སུ་བབ་པ་མོན་པ་ལྷ་སྡེ་མི་སྡེའི་ཡོངས་ཆེད་དུ་བརྟན་བཞུགས་འབུལ་བར་བཅར་བ་རེད། ངོས་རང་དེ་སྔ་བོད་ནས་ཚུར་སླེབས་ཏེ་མོན་གྱི་ས་ཟིན་མཚམས་མོན་པ་ཚོས་ཧ་ཅང་དད་པ་ཆེན་པོ་བྱས་ཏེ་ངོས་ཀྱི་ལྷམ་ལ་མགོ་གཏུགས་ཀྱི་འདུག སྙིང་རྗེ། ཞེས་དང་། ངོས་རང་བཙན་བྱོལ་དུ་དང་པོ་མོན་ལ་འབྱོར་སྐབས་མོན་པ་ཚོས་དད་འདུན་ཧ་ཅང་ཆེན་པོ་བྱས་ཏེ་སེམས་འགུལ་ཐེབས་པ་བྱུང་། དེ་རིང་མོན་པ་ཚོས་བརྟན་བཞུགས་ཕུལ་བ་རེད། ཁྱོད་ཚོ་གཞིས་བྱེས་མི་མང་ཚང་མ་འཕགས་པ་སྤྱན་རས་གཟིགས་ཀྱིས་རྗེས་སུ་བཟུང་ནས་འཕྲལ་དང་ཡུན་གྱི་འདོད་དོན་ཐམས་ཅད་བདེ་ལེགས་ཏུ་འགྲུབ་པའི་སྐྱབས་འཇུག་ཞུ་གི་ཡོད། ཅེས་གསུངས།
༧གོང་ས་མཆོག་ལ་གྲྭ་ཚང་གསུམ་ཐུན་མོང་གིས་བརྟན་བཞུགས་ཕུལ།
ཕྱི་ལོ་ ༢༠༢༥ ཟླ་ ༢ ཚེས་ ༥ ཉིན་སེ་ར་ཐེག་ཆེན་གླིང་གི་ཚོགས་ཆེན་འདུ་ཁང་དུ། ༧གོང་ས་རྒྱལ་བ་རིན་པོ་ཆེ་མཆོག་ལ་སེ་ར་བླ་སྤྱི་དང་། སེར་སྨད་གྲྭ་ཚང་། སེར་བྱེས་གྲྭ་ཚང་གསུམ་ཐུན་མོང་ནས་སྒྲོལ་དཀར་ཚེ་སྒྲུབ་དང་བླ་མ་མཆོད་པའི་མདོ་ལུགས་ཀྱི་ཆོ་གའི་སྒོ་ནས་བརྟན་བཞུགས་བསྟར་འབུལ་ཞུས་ཡོད་ཅིང་། སྐབས་དེར་ལས་དང་སྨོན་ལམ་གྱི་ཐོག་ནས་༧མགོན་པོ་གང་ཉིད་མཆོག་དང་བོད་གངས་ཅན་གྱི་བསྟན་འགྲོ་དང་དམིགས་བསལ་གྱི་འབྲེལ་བ་ཆགས་ཡོད་པ་དང་། ལྷག་པར་དུ་གདན་ས་གསུམ་ལ་ཐུགས་ཉེ་བོ་ཡོད་པ། དེ་བཞིན། ད་བར་བོད་བསྟན་སྲིད་དོན་དུ་སྙིང་ཁོངས་རུས་པའི་གཏིང་ནས་སེམས་ཤུགས་སྒྲིལ་ཏེ་༸སྐུ་འཚོ་བཞུགས་མཛད་ཡོད་པ་མ་ཟད། ད་དུང་དགུང་ལོ་བརྒྱ་དང་བཅུ་གྲངས་བཞུགས་རྒྱུ་ཡིན་པའི་ཞལ་བཞེས་མཛད་ཡོད། ཅེས་བརྒྱུད་ལམ་ཁག་ཏུ་གསལ་འདུག
༧གོང་ས་མཆོག་ལ་ཆོས་སྡེ་བཀྲ་ཤིས་ལྷུན་པོ་དགོན་པས་བརྟན་བཞུགས་ཕུལ།
ཕྱི་ལོ་ ༢༠༢༥ ཟླ་ ༢ ཚེས་ ༡༢ ཉིན་རྒྱ་གར་ལྷོ་ཕྱོགས་ཀྱི་གདན་ས་བཀྲ་ཤིས་ལྷུན་པོས་༧གོང་ས་རྒྱལ་བ་རིན་པོ་ཆེ་མཆོག་ལ་མདོ་ལུགས་ཀྱི་བརྟན་བཞུགས་བསྟར་འབུལ་དང་། ༧རྒྱལ་དབང་སྐུ་ཕྲེང་རིམ་བྱོན་གྱི་མཛད་རྣམ་ཕྱོགས་སྒྲིག་ཞུསས་པའི་པོད་ ༢༩ ཅན་གྱི་དཔེ་ཚོགས་ཤིག་དབུ་འབྱེད་མཛད་ཡོད་ཅིང་། སྐབས་དེར་༧མགོན་པོ་གང་ཉིད་མཆོག་གིས། དེ་རིང་བཀྲ་ཤིས་ལྷུན་པོས་བརྟན་བ
༧གོང་ས་མཆོག་ལ་རྒྱ་གར་ལྷོ་ཕྱོགས་རྒྱུད་སྨད་གྲྭ་ཚང་གིས་བརྟན་བཞུགས་ཕུལ།
ཕྱི་ལོ་ ༢༠༢༥ ཟླ་ ༢ ཚེས་ ༡༧ ཉིན་རྒྱ་གར་ལྷོ་ཕྱོགས་ཧོན་སུར་དུ་རྟེན་གཞི་བྱས་པའི་དཔལ་ལྡན་རྒྱུད་སྨད་གྲྭ་ཚང་གིས། ༧གོང་ས་རྒྱལ་བ་རིན་པོ་ཆེ་མཆོག་ལ་དཔལ་ལྡན་སྨད་རྒྱུད་པའི་བཤད་སྒྲུབ་འཆད་ཉན་གྱི་བསྟན་པའི་བདག་པོར་མངའ་གསོལ་བའི་གཟེངས་རྟགས་དང་བརྟན་བཞུགས་བསྟར་འབུལ་ཞུས་ཡོད་ཅིང་། སྐབས་དེར་༧མགོན་པོ་གང་ཉིད་མཆོག་ནས་དད་ལྡན་སེར་སྐྱ་མང་ཚོགས་ལ་བརྒྱུད་འདེབས་ཀྱི་ལྗགས་ལུང་དང་། གསང་འདུས་རིམ་ལྔ་དམར་ཁྲིད་ཀྱི་བཤད་ལུང་མདོར་བསྡུས་ཤིག་གསུངས་རྗེས་བཀའ་སློབ་བསྩལ་དོན། གསང་སྔགས་ཀྱི་ཆོས་ཉམས་ལེན་བྱེད་མཁན་ཚོས་སྔོན་ལ་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་ལ་སེམས་གཏིང་ནས་འགུལ་བསྐྱོད་ཐེབས་པ་ཞིག་དགོས། བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་མེད་ན་སྔགས་ཉམས་ལེན་བྱ་ཤེས་ཐབས་མེད། འཛམ་གླིང་འདིའི་སྟེང་གི་ཉམས་ཐག་པའི་སེམས་ཅན་སྤྱི་དང་། ད་ལྟ་ང་ཚོའི་མཐོང་ཆོས་ལ་ཡོད་པའི་འཛམ་གླིང་གི་མི་གཙོ་བོར་གྱུར་པའི་སྲོག་ཆགས་རྣམས་སྡུག་བསྔལ་མི་འདོད་པ་དང་བདེ་བ་འདོད་པ་རང་དང་མཚུངས་པ་རེད་དེ། སྡུག་བསྔལ་གྱིས་མནར་བ་དང་བདེ་བས་ཕོངས་ནས་ཡོད་པ་ང་ཚོ་ཚང་མས་མཐོང་བསྡད་པ་འདི་རེད། འཛམ་གླིང་འདིའི་སྒང་གི་མི་དུང་ཕྱུར་ཁ་ཤས་ཡོད་པ་ཚང་མས་འདོད་པ་བདེ་བ་དང་། མི་འདོད་པ་སྡུག་བསྔལ་ཡིན་ཡང་། སེམས་མ་རུང་བ་དང་རྨོངས་པའི་དབང་གིས་སྡུག་བསྔལ་གྱི་རྒྱུ་སྡུག་བསྔལ་གྱི་རྒྱུ་ཡིན་པ་མ་ཤེས་པར་སྣང་མེད་དུ་བཞག་སྟེ། སྡུག་བསྔལ་སྐྱེ་བའི་རྒྱུ་མང་པོ་ཞིག་ལ་ཉིན་རེ་བཞིན་དུ་དང་དང་དོད་དོད་བྱེད་པ་ཞིག་ཡོང་གི་འདུག ཅེས་གསུངས།
གསར་འགོད་པ་སྐལ་བཟང་སྦྱིན་པས་ཕྱོགས་སྒྲིག་བྱས།
