བླ་བྲང་བཀྲ་ཤིས་འཁྱིལ་གྱི་ལྷ་སྡེ་མི་སྡེ་ཡོངས་ནས་བྱེས་ཀྱི་བཀྲ་ཤིས་འཁྱིལ་གྱི་བླ་མ་རིགས་གྲྭ་སྐལ་བཟང་བསྟན་པ་རབ་རྒྱས་མཆོག་དགུང་གྲངས་བརྒྱ་ཕེབས་པའི་བརྒྱ་སྟོན་དང་བསྟུན་བརྟན་བཞུགས་བསྟར་འབུལ་ཞུས་སོང་།
ཟླ་འདིའི་ཕྱི་ཚེས་ ༤ ཉིན་བྱེས་ཀྱི་གདན་ས་ཆེན་པོ་བཀྲ་ཤིས་འཁྱིལ་དུ་རིགས་གྲྭ་རིག་པའི་རལ་གྲི་སྐུ་ཕྲེང་བཞི་པ་རྗེ་སྐལ་བཟང་བསྟན་པ་རབ་རྒྱས་མཆོག་དགུང་གྲངས་བརྒྱ་ལ་ཕེབས་པའི་བརྒྱ་སྟོན་མཛད་སྒོ་འཚོགས་གནང་བ་དང་བསྟུན། བླ་བྲང་བཀྲ་ཤིས་འཁྱིལ་གྱི་ལྷ་སྡེ་མི་སྡེ་ཡོངས་ནས་བླ་མ་མཆོད་པའི་ཆོ་གའི་སྒོ་ནས་ཨ་ལགས་རིགས་གྲྭ་མཆོག་ལ་བརྟན་བཞུགས་བསྟར་འབུལ་ཞུས་སོང་། བརྒྱ་སྟོན་མཛད་སྒོའི་སྟེང་བཀྲ་ཤིས་འཁྱིལ་གྱི་མཁན་པོ་སྐྱབས་རྗེ་ཡོངས་འཛིན་རིན་པོ་ཆེ་མཆོག་དང་སྐྱབས་རྗེ་སྟག་འཚེར་རིན་པོ་ཆེ་མཆོག ཨ་ལགས་རྔ་རྒོད་རིན་པོ་ཆེ་མཆོག་བཅས་དབུ་བཞུགས་ཐོག འབྲས་སྤུངས་སྒོ་མང་གྲྭ་ཚང་དང་ཀིརྟི་དགོན་པའི་སྐུ་ཚབ། སྒོ་མང་བྲལ་ཁང་ཚན་དང་ཀླུ་འབུམ་ཁང་ཚན། བྱང་ཨ་རིའི་སྐུ་འབུམ་བྱམས་བརྩེ་གླིང་། དམུ་དགེ་དགོན་རྡོ་སྦིས་ཤིས་ཚང་སྒར་དང་ཕྱོགས་མཐའ་ཁག་ནས་ཕེབས་པའི་གྲྭ་བཙུན་གྱི་དབུས་པའི་བོད་མི་མང་སྤྱི་འཐུས་ཁག་ཅིག་དང་། བོད་མིའི་སྒྲིག་འཛུགས་ཀྱི་སྐུ་ཚབ་ས་གནས་མགོ་འཛིན་མཆོག་དང་བྱང་ཕྱོགས་ཁྲིམས་ཞིབ་པ་མཆོག བཀའ་ཟུར་དང་སྤྱི་ཟུར་ཁག་ཅིག དེ་བཞིན། ས་གནས་ཀྱི་འབྲེལ་ཡོད་མི་སྣ་ཁག་གིས་གཙོས་འཛམ་གླིང་ཡུལ་གྲུ་གང་སར་ནས་ཕེབས་པའི་བཀྲ་ཤིས་འཁྱིལ་གྱི་དད་ལྡན་མི་མང་ཆིག་སྟོང་ཟིན་ལ་ཉེ་བ་ཙམ་འཛོམས་འདུག
མཛད་རིམ་གྱི་ཐོག་མར་ཨ་ལགས་རིགས་གྲྭ་རིན་པོ་ཆེ་མཆོག་ཚོགས་མགོན་དུ་ཆིབས་བསྒྱུར་གདན་འདྲེན་ཞུས་རྗེས། སྐྱབས་རྗེ་མཁན་རིན་པོ་ཆེ་བློ་བཟང་ཡེ་ཤེས་བསྟན་པ་རྒྱལ་མཚན་མཆོག་གིས་མཎྡལ་བཤད་པ་གསུངས་པ་དང་འབྲེལ་རྟེན་གསུམ་འབུལ་ལམ་ཞུས་མཚམས། བཀྲ་ཤི་འཁྱིལ་གྱི་ཕྱག་མཛོད་ཆེན་མོ་ནས་རྟེན་གསུམ་འབུལ་ལམ་ཞུས་སོང་ལ། དེ་ནས་རིམ་བཞིན་བཀའ་ཟུར་དང་སྤྱི་འཐུས་ལས་ཐོག་དང་ཟུར་པ། རྡེ་ར་ལྡིན་ས་གནས་མགོ་འཛིན་སོགས་ནས་མཎྡལ་རྟེན་གསུམ་འདེགས་འབུལ་དང་། དགོན་པ་ཁག་དང་དགོན་པའི་ཁང་ཚན་ཁག་གི་སྐུ་ཚབ་རྣམ་པ། སྦྱིན་བདག་རྣམ་པ། དེ་བཞིན་སྐུ་མགྲོན་མི་མང་བཅས་ནས་མཇལ་ཁ་ཞུས་གྲུབ་མཚམས། ཨ་ལགས་རིགས་གྲྭ་རིན་པོ་ཆེ་མཆོག་གི་སྐུ་ཚེ་མཛད་རྣམ་ རྣམ་ཐར་ལོ་བརྒྱ་མའི་ཕྱག་དེབ་ཅིག་ཨ་ལགས་ཡོངས་འཛིན་རིན་པོ་ཆེ་མཆོག་དང་། སྐྱབས་རྗེ་སྟག་འཚེར་རིན་པོ་ཆེ་མཆོག ཨ་ལགས་རྔ་རྒོད་རིན་པོ་ཆེ་མཆོག བཀའ་ཟུར་ཐུབ་བསྟན་ལུང་རིགས་དང་བཀའ་ཟུར་འཕགས་པ་ཚེ་རིང་བཅས་ནས་དབུ་འབྱེད་གནང་སོང་། དེ་རྗེས་ཨ་ལགས་ཡོངས་འཛིན་རིན་པོ་ཆེ་མཆོག་ནས་བརྒྱ་སྟོན་གྱི་སྦྲིན་གོར་ཞལ་ཕྱེ་གནང་མཚམས། བཀྲ་ཤིས་འཁྱིལ་གྱི་ཕྱག་མཛོད་ཆེན་མོ་ཨ་ཁུ་བློ་གྲོས་རྒྱ་མཚོ་ལགས་ཀྱིས་བརྒྱ་སྟོན་བརྟན་བཞུགས་དང་འབྲེལ་བའི་གསུང་བཤད་གནང་སོང་།
དེ་རྗེས་༸གོང་ས་རྒྱལ་བ་རིན་པོ་ཆེ་མཆོག་ནས་ཨ་ལགས་རིགས་གྲྭ་རིན་པོ་ཆེ་མཆོག་དགུང་གྲངས་བརྒྱ་ལ་ཕེབས་པར་འཚམས་འཕྲིན་བསྩལ་འདུག་པ་སྒྲོག་སྦྱངས་གནང་ཞིང་འཚམས་འཕྲིན་ནང་། བཤེས་གཉེན་དམ་པ་སྤྱི་བོའི་རྒྱན་དུ་བསྟེན། །གཞུང་ལུགས་དུ་མར་ཐོས་བསམ་སྒོམ་པ་བགྱིས། །སྐལ་བཟང་བསྟན་པ་རབ་རྒྱས་འགྲོ་བའི་གཉེན། །ཀུན་ཏུ་དགེ་བས་རིང་དུ་བརྟན་གྱུར་ཅིག །ཅེས་པ་འདི་ནི་མདོ་སྨད་བཀྲ་ཤིས་འཁྱིལ་བའི་ཨ་ལགས་རིག་གྲྭ་སྤྲུལ་སྐུ་སྐལ་བཟང་བསྟན་པ་རབ་རྒྱས་ལོ་བརྒྱར་སོན་པ་དང་བསྟུན་རིང་འཚོའི་སྨོན་ཚིག་དགོས་ཞེས། བྱེས་འཁོད་བླ་བྲང་བཀྲ་ཤིས་འཁྱིལ་བའི་འདུས་སྤྱི་ནས་རྟེན་བཅས་བསྐུལ་ངོར། ཤཱཀྱའི་དགེ་སྦྱོང་ཆོས་སྨྲ་བ་ཏཱ་ལའི་བླ་མས། ཞེས་གསལ་འདུག
འབྲས་སྤུངས་བཀྲ་ཤིས་སྒོ་མང་མཁན་པོ་བྱ་བྲལ་འཇིགས་མེད་རྒྱ་མཚོ་མཆོག་གིས་སྩལ་བའི་འཚམས་ནང་། མདོ་སྨད་བསྟན་པའི་འབྱུང་གནས་ཆོས་སྡེ་ཆེན་པོ་དཔལ་ལྡན་བཀྲ་ཤིས་གཡས་སུ་འཁྱིལ་བའི་གླིང་གི་སྐྱེས་ཆེན་གསེར་རིའི་ཕྲེང་བའི་དབུས་ན་མངོན་པར་མཐོ་བ། རིགས་གྲྭ་རིགས་པའི་རལ་གྲི་ཞེས་ཡོངས་སུ་གྲགས་པའི་སྐྱེས་ཆེན་དམ་པ་གང་དེའི་སྤྲུལ་བའི་ཟློས་གར། མཚུངས་མེད་ཨ་ལགས་རིགས་གྲྭ་རིན་པོ་ཆེ་རྗེ་སྐལ་བཟང་བསྟན་པ་རབ་རྒྱས་དཔལ་བཟང་བོ་མཆོག་བསྟན་པ་དང་འགྲོ་བའི་སླད་དུ། དགུང་ གྲངས་བརྒྱ་ལ་ཕེབས་པའི་བཀྲ་ཤིས་རྟེན་འབྲེལ་གྱི་རི་མོ་མངོན་པར་གསལ་བའི་དུས་བཟང་ཁྱད་པར་ཅན་འདིར། དེ་ག་བཀྲ་ཤིས་འཁྱིལ་དགོན་པས་ཐུགས་འགན་རྐང་བཞེས་ཀྱིས་རིན་པོ་ཆེ་མཆོག་གི་སྐུའི་བརྒྱ་སྟོན་མཛད་སྒོ་དང༌། བརྟན་བཞུགས་དཀྱུས་གཅིག་ཏུ་འབུལ་རྒྱུའི་མཛད་རིམ་གོ་སྒྲིག་གནང་བཞིན་པར་ ལེགས་གསོལ་བསྔགས་བརྗོད་ཞུ།
རིན་པོ་ཆེ་མཆོག་ནས་འདི་གར་ཆེད་དུ་མགྲོན་ཤོག་བཏང་གནང་བར་ཐུགས་རྗེ་ཆེ། འོན་ཀྱང༌། ལོ་སར་རྗེས་ཀྱི་སྨོན་ལམ་ཆེན་མོ་སོགས་ལ་བརྟེན་དེ་གར་དངོས་སུ་བཅར་མ་ཐུབ་ཀྱང༌། འདིར་ང་རང་སྒེར་དང་བཀྲ་ཤིས་འཁྱིལ་བ་རྣམས་ཀྱི་ཚབ་ཞུས་ཏེ། རིན་པོ་ཆེ་མཆོག་སྐུ་གཟུགས་གསལ་ཐང་ངང་སྐུ་ཚེ་ཡུན་དུ་བརྟན་ཅིང་། བསྟན་འགྲོར་སྨན་པའི་མཛད་བཟང་མུ་མཐུད་རྒྱས་པ་སོགས་ཀྱི་རྟེན་འབྲེལ་ཁྱད་པར་ཅན་ལ་དམིགས་ནས། རྟེན་དོད་རྒྱལ་བ་ཚེ་དཔག་མེད་ཀྱི་སྐུ་བརྙན་བྱོན་ལེགས་ཤིག་གིས་ཐོག་དྲངས་ཏེ་མཎྜལ་རྟེན་དོད་བཅས་འབུལ་ལམ་ཞུ་བ་ལགས་ན། ཇི་ལྟར་སྨོན་པ་ལྟར་རིན་པོ་ཆེ་མཆོག་གི་སྐུ་ཚེ་རྒྱལ་བ་ཚེ་མཐའ་ཡས་པའི་ངོར་བརྟན་པ་དང༌། ཐུགས་བཞེད་མ་ལུས་ལྷུན་གྱིས་འགྲུབ་པའི་སྨོན་འདུན་གྲངས་མེད་ཞུ་བ་བཅས། ཞེས་གསུངས་འདུག
དེ་བཞིན་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས། བྱེས་ཀྱི་དཔལ་ལྡན་བླ་བྲང་བཀྲ་ཤིས་འཁྱིལ་གྱི་ྋསྐྱབས་རྗེ་མཁན་རིན་པོ་ཆེ་སྨད་རྒྱུད་མཁན་ཟུར་ཨ་ལགས་ཡོངས་འཛིན་རིན་པོ་ཆེ་མཆོག་དང་། ༸སྐྱབས་རྗེ་ཨ་ལགས་རིགས་གྲྭ་སྐལ་བཟང་བསྟན་པ་རབ་རྒྱས་མཆོག་གིས་དབུས་བླ་སྤྲུལ་ལས་སྣེ་དགེ་འདུན་འདུས་མང་ཡོངས་ལ་བོད་རབ་གནས་ཤིང་སྤྲེལ་གནམ་ལོ་གསར་ཚེས་ལ་འཚམས་འདྲི་བཀྲ་ཤིས་བདེ་ལེགས་ཞུ་རྒྱུ་དང་། སྐབས་བབ་དེ་གའི་འདུས་མང་ཡོངས་དང་། བོད་གཞིས་བྱེས་དད་ལྡན་རྗེས་སློབ་ཐུན་མོང་ནས་ྋསྐྱབས་རྗེ་ཨ་ལགས་རིགས་ གྲྭ་རིན་པོ་ཆེ་མཆོག་དགུང་གྲངས་བརྒྱ་ལ་ཕེབས་པའི་སྐབས་བསྟུན་བརྟན་བཞུགས་བསྟར་འབུལ་དང་། བརྒྱ་སྟོན་གྱི་མཛད་སྒོ་སྟབས་བདེ་ཞིག་ལོ་གསར་ཚེས་ལྔ་ཉིན་སྐྱོང་གཏན་ཁེལ་བའི་བཀྲ་ཤིས་དགའ་སྟོན་ལ་ལེགས་གསོལ་དང་རྗེས་སུ་ཡི་རངས་ཞུ་བཞིན་ཡོད།
ྋསྐྱབས་རྗེ་ཨ་ལགས་རིགས་གྲྭ་རིན་པོ་ཆེ་མཆོག་གི་སྐུ་ཕྲེང་རིམ་བྱོན་ནི། མཁས་པ་དང་གྲུབ་པའི་རྒྱལ་མཚན་འཛིན་པའི་སྐྱེས་མཆོག་ཤ་སྟག་ཏུ་བྱོན་ཏེ། འཆད་རྩོད་རྩོམ་གསུམ་སོགས་ཀྱི་སྒོ་ནས་སངས་རྒྱས་ཀྱི་བསྟན་པར་ལེགས་སྐྱེས་རྒྱ་ཆེར་ཕུལ་མྱོང་མཁན་གྱི་སྐྱེས་མཆོག་ཅིག་ཏུ་མ་ཟད་། རྒྱ་ཆེའི་དད་ལྡན་མང་པོ་ཕན་བདེ་རྒྱ་ཆེར་མཛད་པའི་རྣམ་ཐར་གྱི་བྱུང་བ་མང་པོ་མདོ་སྨད་ཀྱི་ཡུལ་ཕྱོགས་ཀུན་ལ་ཡོངས་སུ་གྲགས་ཆེ་ཞིང་། ལྷག་པར་སྐུ་ཕྲེང་འདི་ཉིད་དགུང་གྲངས་བརྒྱད་ཀྱི་ཐོག་ཀུན་མཁྱེན་ ༧འཇམ་དབྱངས་བཞད་པ་སྐུ་ཕྲེང་ལྔ་པ་བསྟན་པའི་རྒྱལ་མཚན་མཆོག་གིས་མཁས་མཆོག་རིགས་གྲྭ་རིག་པའི་རལ་གྲིའི་སྐུ་ཕྲེང་བཞི་པར་ངོས་འཛིན་གྱིས་སྐུ་གཞོན་ནུའི་དུས་ནས་ཆོས་སྡེ་ཆེན་པོ་བླ་བྲང་བཀྲ་ཤིས་འཁྱིལ་དུ་ཆོས་ཞུགས་ཀྱིས་གཞུང་ཆེན་ཁག་ལ་སློབ་གཉེར་དང༌། ཆོས་སྡེ་ཆེན་པོ་བླ་བྲང་བཀྲ་ཤིས་འཁྱིལ་གྱི་དགོན་ལག་ཙ་ཡུས་དགའ་ལྡན་ཆོས་འཁོར་གླིང་དང་། དམུ་དགེ་བཀྲ་ཤིས་འཁོར་ལོ་དགོན་དུ་ལོ་བཞི་རེར་ཁྲི་པའི་མཛད་འགན་བསྐྱངས་པ་མ་ཟད། ཤིས་ཚང་སྒར་གསར་དུའང་ལོ་གསུམ་གྱི་རིང་ཁྲི་པའི་ཐུགས་འགན་བཞེས་ཏེ་སྐུ་གཞོན་ནུའི་དུས་ནས་མཁས་པའི་མཛད་པ་རྒྱ་ཆེར་བསྐྱངས་ཤིང་།
ཕྱི་ལོ་ ༡༩༥༧ ལོར་རྒྱ་གར་དུ་ཕེབས་ནས་ད་ལྟའི་བར་བློ་བརྟན་འགྱུར་མེད་ངང་༸གོང་ས་སྐྱབས་མགོན་ཆེན་པོར་དབུ་འོག་དཔུང་འདེགས་ཀྱི་ཚུལ་དུ་རང་ནུས་གང་ཡོད་བཏོན་ཏེ། བོད་ཀྱི་ཆོས་དང་རིག་གཞུང་ལ་དངོས་ཤུགས་བརྒྱུད་གསུམ་ནས་ཞབས་འདེགས་གང་མང་ཞུས་ཡོད་པ་དང་། ལྷག་བར་ཐང་བྲིས་སྒྱུ་རྩལ་ཐོག་མཛད་རྗེས་བླ་མེད་བཞག་ཅིང་། དོན་གཉེར་ཅན་མང་པོར་ལུང་མན་ངག་སྩོལ་གནང་དང་། དཀའ་ངལ་ཅན་མང་པོར་ཕན་བདེ་རྒྱ་ཆེར་བསྒྲུབས་པའི་མཛད་རྗེས་ལ་ཡི་རང་ ངསྔགས་བརྗོད་ཞུ་བཞིན་ཡོད་ལ། ད་དུང་སྐུ་ཚེ་ཡུན་རིང་བརྟན་པའི་ཐོག་བསྟན་འགྲོ་སྤྱི་དང་ཁྱད་པར་དད་ལྡན་རྗེས་འཇུག་རྣམས་ལ་ཐུགས་བརྩེ་བ་ཆེན་པོས་རྗེས་གཟིགས་ཀྱིས་ཐུགས་བསྐྱེད་སྨོན་པའི་སྨོན་འདུན་ཞུ་བ་ལགས་ཞེས་གསུངས་འདུག
བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས། ཕྱི་ལོ་ ༡༩༥༩ ལོར་རྒྱ་དམར་གཞུང་ནས་བོད་ནང་དྲག་ཤུགས་བཙན་གནོན་རྒྱ་ཆེ་བྱས་རྐྱེན་མཐར་སྤྱི་ནོར་༸གོང་ས་ྋསྐྱབས་མགོན་ཆེན་པོ་མཆོག་གིས་དབུས་བོད་མི་ཁྲི་ཕྲག་བརྒྱད་ཙམ་བཙན་བྱོལ་དུ་ཕེབས་དགོས་བྱུང་། རིམ་པས་རིས་སུ་མ་མཆིས་པའི་ཆོས་བརྒྱུད་ཁག་མི་ཉམས་རྒྱུན་འཛིན་ཐུབ་སླད་བྱེས་ཀྱི་དགོན་སྡེ་སོགས་གསར་འཛུགས་གནང་ཡོད་པ་ལྟར། རྒྱ་གར་བྱང་ཕྱོགས་སྡེ་ར་སྡུན་ཀེ་ལེ་མེན་ཊའུ་ཁུལ་དུ་བྱེས་ཀྱི་གདན་ས་བླ་བྲང་བཀྲ་ཤིས་འཁྱིལ་དགོན་པ་ནི་ཕྱི་ལོ་ ༡༩༦༦ ལོ་ཙམ་ནས་གསར་བཞེངས་གནང་ཞིང་དགེ་བའི་བཤེས་གཉེན་རྣམ་པས་དགེ་འདུན་གྱི་སྡེ་སྐྱོང་ཞིང་བསྟན་པ་སྤྱི་དང་བྱེ་བྲག་ལ་ཕན་ཐོགས་དང་གྲུབ་འབྲས་བཟང་པོ་བྱུང་ཡོད།
ཡོངས་གྲགས་སུ་བོད་མདོ་སྨད་བླ་བྲང་བཀྲ་ཤིས་འཁྱིལ་གྱི་གདན་ས་ཆེན་པོ་༧ཀུན་མཁྱེན་ཆེན་པོ་འཇམ་དབྱངས་བཞད་པའི་རྡོ་རྗེ་མཆོག་ཉིད་དབུས་པའི་གསེར་ཁྲི་རྣམ་པ་བཞི་དང་། མཁན་པོ་རྣམ་པ་བརྒྱད། གྲུབ་ཆེན་རྣམ་པ་བཞི་སོགས་བཞུགས་པའི་རིགས་གྲྭ་གྲུབ་ཆེན་སྐུ་ཕྲེང་བཞི་པ་རྗེ་བཙུན་སྐལ་བཟང་བསྟན་པ་རབ་རྒྱས་མཆོག་དགུང་ལོ་བཅོ་བརྒྱད་ནས་བོད་མདོ་སྨད་ཙ་ཡུས་དགོན་སོགས་ལ་ཁྲི་པ་གནང་ཞིང་། བོད་ཀྱི་རྒྱལ་ས་ལྷ་ལྡན་དང་། དེ་རྗེས་རྒྱ་གར་དུ་བཙན་བྱོལ་ལ་ཕེབས་ནས་རིམ་པས་འཕགས་ཡུལ་བྱེས་ཀྱི་གདན་ས་བཀྲ་ཤིས་འཁྱིལ་གྲྭ་ཚང་གི་སྐུ་ཐང་རྟེན་བཞེངས་སོགས་ཀྱི་ཐུགས་འགན་གཙང་བཞེས་དང་། ལྷག་པར་དགོན་པའི་འགན་འཛིན་གྱི་མཚན་བཞེས་ཀྱིས་ད་ལྟའི་བར་དུ་དོན་གཉེར་ཅན་དུ་མར་དབང་ལུང་མན་ངག་གི་རྒྱུན་དཀོན་རིགས་མང་པོ་འབུལ་མནོས་དང་། ནད་པ་སོགས་ལ་བཅོས་ཐབས་འདྲ་མིན་གྱི་སྒོ་ནས་བཀའ་དྲིན་བསྐྱངས་དང་སྐྱོང་བཞིན་པར་རྗེས་སུ་ཡི་རངས་དང་། རིན་པོ་ཆེ་མཆོག་འདི་ལོ་དགུང་ལོ་ཧྲིལ་པོ་བརྒྱ་ཐམ་པ་འཁོར་བཞིན་ཡོད་པར་དགོན་པའི་འདུས་མང་སྦྱིན་བདག་ལྟོས་བཅས་ཡོངས་ནས་དགའ་དད་སྤྲོ་གསུམ་གྱི་ངང་ནས་བརྟན་བཞུགས་དང་བརྒྱ་སྟོན་རྟེན་འབྲེལ་མཛད་སྒོ་གོ་སྒྲིག་ཞུས་པར་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་དང༌། རིན་པོ་ཆེ་གང་ཉིད་བསྟན་པ་དང་འགྲོ་བའི་དོན་དུ་མུ་མཐུད་མཛད་འཕྲིན་རྒྱས་ཤིང་སྐུ་ཚེ་བསྐལ་བརྒྱར་བཞུགས་པའི་གསོལ་འདེབས་ཞུ་རྒྱུ་ཡིན། མཐའ་དོན། ྋགོང་ས་ྋསྐྱབས་མགོན་ཆེན་པོ་མཆོག་སྐུ་ཚེ་བརྟན་ཅིང་མཛད་འཕྲིན་རྒྱས་པ་དང་། བྱེས་ཀྱི་བླ་བྲང་བཀྲ་ཤིས་ འཁྱིལ་དགོན་པའི་བསྟན་འགྲོའི་མཛད་བཟང་གེགས་མེད་ལྷུན་གྱིས་འགྲུབ་ཅིང་། བོད་གཞིས་བྱེས་མཉམ་འཛོམས་ཀྱི་སྐྱིད་པའི་ཉི་མ་ མགྱོགས་ནས་མྱུར་དུ་འཆར་བའི་སྨོན་འདུན་དང་བཅས། ཞེས་གསུངས་འདུག
བླ་བྲང་བཀྲ་ཤིས་འཁྱིལ་དུ་༧ཀུན་མཁྱེན་ཆེན་པོ་འཇམ་དབྱངས་བཞད་པའི་རྡོ་རྗེ་མཆོག་གི་དབུས་པའི་གསེར་ཁྲི་རྣམ་པ་བཞི་དང་། མཁན་པོ་རྣམ་པ་བརྒྱད། གྲུབ་ཆེན་རྣམ་པ་བཞི་སོགས་བཞུགས་པའི་རིགས་སྨྲའི་ཁྱུ་མཆོག་རིགས་གྲྭ་རིག་པའི་རལ་གྲི་སྐུ་ཕྲེང་བཞི་བ་རྗེ་སྐལ་བཟང་བསྟན་པ་རབ་རྒྱས་མཆོག་ནི་ཕྱི་ལོ་༡༩༢༦ ལོར་བླ་བྲང་བཀྲ་ཤིས་འཁྱིལ་གྱི་ལྷ་སྡེ་ནང་མ་ཁོ་ཚེ་རུ་ཡབ་རིན་ཆེན་དང་ཡུམ་ཀླུ་སྨན་གཉིས་ཀྱི་སྲས་སུ་སྐུ་འཁྲུངས། སྤྲུལ་སྐུར་ངོས་འཛིན་མ་གནང་བའི་གོང་དུ་མཚན་ལ་རྟ་མགྲིན་སྐྱབས་ཞུ་ཡི་ཡོད་ཅིང་། ཁོང་ཚང་ལ་བུ་སྤུན་ཆེ་བ་བློ་བཟང་དང་འབྲིང་བ་གཅོད་པ་བཅས་ཡོད་འདུག ཕྱི་ལོ་ ༡༩༣༤ ལོར་ཁོང་དགུང་ལོ་བརྒྱད་ཀྱི་སྟེང་ནས་ཀུན་མཁྱེན་སྐུ་ཕྲེང་ལྔ་པ་བསྟན་པའི་རྒྱལ་མཚན་མཆོག་གིས་རིགས་གྲྭ་སྐུ་གོང་མ་འཇམ་དབྱངས་བསྟན་འཛིན་རྒྱ་མཚོ་མཆོག་གི་ཡང་སྲིད་དུ་ངོས་འཛིན་གནང་རྗེས། བླ་བྲང་བཀྲ་ཤིས་འཁྱིལ་དུ་གདན་འདྲེན་བགྱིས་ཏེ་ཁྲི་འདོན་གནང་།
དེ་ནས་རིམ་བཞིན་ཨ་ལགས་ཡོངས་སྐུ་གོང་མ་ཚང་དབུས་པའི་དགེ་བའི་བཤེས་གཉེན་དུ་མར་བསྟེན་ནས་ཐོས་བསམ་སྒོམ་གསུམ་གྱི་བསླབ་པ་སློབ་གཉེར་དབུ་ཚུགས། དགུང་ལོ་ཆུང་དུས་ནས་སློབ་གཉེར་གྱི་བརྒྱུད་རིམ་ཁྲོད་དུ་རི་མོ་འབྲི་རྒྱུར་ཐུགས་སྣང་ཡོད་ཅིང་གྲུབ་ཆེན་ཉི་མ་འཛིན་དང་རྗེ་བཙུན་མི་ལ་རས་པ་སོགས་ཀྱི་སྐུ་ཐང་བྲིས་གནང་མྱོང་། བླ་བྲང་དུ་གུང་ཐང་འཇམ་པའི་དབྱངས་དང་བརྒྱ་སྟོན་ལྷ་རམས་པ། ཨ་ལགས་བྲག་དཀར་ཚང་སོགས་དུས་མཉམ་དུ་འཛིན་གྲྭར་བཞུགས་ཏེ། ཁ་དོག་དཀར་དམར་ནས་དབུ་ཚུགས་ཏེ་གཞུང་ཆེན་ཁག་ལ་རིམ་བཞིན་སློབ་གཉེར་མཛད་ཅིང་། ཕྱིས་སུ་ཀུན་མཁྱེན་རིན་པོ་ཆེའི་བཀའ་དགོངས་འོག་ནས་ཙ་ཡས་དགའ་ལྡན་ཆོས་འཁོར་གླིང་དང་དམུ་དགེ་བཀྲ་ཤིས་འཁོར་ལོ་དགོན། ཤིས་ཚང་སྒར་གསར་སོགས་ཀྱི་ཁྲི་པར་ཕེབས་ཏེ་བསྟན་འགྲོའི་དོན་རྒྱ་ཆེར་མཛད།
ཕྱི་ལོ་ ༡༩༥༦ ལོར་རྒྱ་གར་དུ་ཕེབས་ཏེ་ཐོག་ཀ་ལིམ་པོང་དུ་ཕེབས་འབྱོར་བྱུང་རྗེས། རྒྱ་གར་འཕགས་ཡུལ་གྱི་གནས་མཆོག་རྡོ་རྗེ་གདན་དང་ཝཱརཱཎསཱི། ཡངས་པ་ཅན་དང་མཚོ་པདྨ་སོགས་ནང་པའི་གནས་ཆེན་ཁག་ལ་གནས་གཟིགས་མཛད་གྲུབ་མཚམས་རི་ཁྲོད་དུ་ཕེབས། ཕྱིས་སུ་རྡེ་ར་ལྡུན་དོན་འགྲུབ་གླིང་དུ་ཕེབས་ནས་ཐང་བྲིས་རྟེན་བཞེངས་སོགས་ཀྱི་མཛད་འཕྲིན་བསྐྱངས་གནང་བ་མ་ཟད། བྱེས་ཀྱི་བཀྲ་འཁྱིལ་དགོན་པ་བཞེངས་བསྐྲུན་གྱི་ཕྱག་ལས་རྒྱ་ཆེར་མཛད་ཡོད་ཅིང་། དམིགས་བསལ་༧གོང་ས་རྒྱལ་བ་རིན་པོ་ཆེ་མཆོག་ལ་རང་ནུས་ཅི་ལྕོགས་ཀྱིས་དབུ་འོག་དཔུང་འདེགས་ཞུས་ཏེ། བོད་ཀྱི་ཆོས་རིག་གང་ཐད་ལ་དངོས་ཤུགས་བརྒྱུད་གསུམ་ནས་ཞབས་འདེགས་གང་མང་ཞུས་མྱོང་ཞིང་། ལྷག་པར་དུ་ཐང་བྲིས་སྒྱུ་རྩལ་ཐོག་མཛད་རྗེས་བླ་མེད་བཞག་ཅིང་བོད་ཕྱི་ནང་གཉིས་སུ་ཐང་བྲིས་སྒྱུ་རྩལ་གྱི་རྒྱུན་འཛིན་སློབ་མ་བསྐྱངས་གནང་། མདོར་ན་རིགས་གྲྭ་རིག་པའི་རལ་གྲི་རྗེ་སྐལ་བཟང་བསྟན་པ་རབ་རྒྱས་མཆོག་གིས་བོད་དུ་གཞུང་ཆེན་ཁག་ལ་སློབ་གཉེར་བགྱིས་ཏེ་བསྟན་འགྲོའི་དོན་དུ་མཛད་འཕྲིན་བསྐྱངས་པ་དང་བཙན་བྱོལ་དུ་སྐུ་ཚེ་ཧྲིལ་པོ་ཆེས་དཀྱུས་མར་སྙེག་སྟེ་༧གོང་ས་མཆོག་གི་དབུ་འོག་དཔུང་འདེགས་ཞུས་ཏེ་བཀྲ་ཤིས་འཁྱིལ་དང་འབྲས་སྤུངས་སྒོ་མང་སོགས་སུ་མཛད་འཕྲིན་བསམ་གྱིས་མི་ཁྱབ་པ་བསྐྱངས་གནང་ཡོད་འདུག
རྒྱ་གར་བྱང་ཕྱོགས་རྡེ་ར་ལྡུན་ནས་གསར་འགོད་པ་སྐལ་བཟང་སྦྱིན་པས་སྤེལ།
