ཨ་རིའི་ཕྱི་སྲིད་ལས་ཁུངས་ཀྱིས་ཨ་རིས་བོད་ཀྱི་ཆོས་དང་རིག་གཞུང་། འགྲོ་བ་མིའི་ཐོབ་ཐང་སྲུང་སྐྱོབ། བོད་རྒྱའི་དཀའ་རྙོག་སེལ་ཐབས་སུ་མུ་མཐུད་རྒྱབ་སྐྱོར་གནང་རྒྱུ་ཡིན་ཞེས་གསུངས་འདུག
ཟླ་འདིའི་ཕྱི་ཚེས་ ༣ ཉིན་ཨ་རིའི་ཕྱི་སྲིད་ལས་ཁུངས་ཀྱི་ཚོགས་ཁང་དུ། ཨ་རིའི་ཕྱི་སྲིད་ལས་ཁུངས་ཀྱི་གོ་སྒྲིག་འོག བོད་རྒྱལ་ལོ་ ༢༡༥༢ ཤིང་སྦྲུལ་ལོའི་བོད་ཀྱི་ལོ་གསར་སྲུང་གཙི་གནང་ཡོད་ཅིང་། མཛད་སྒོའི་ཐོག་ཨ་རིའི་ཕྱི་སྲིད་ལས་ཁུངས་ཀྱི་མི་མང་བདེ་འཇགས་དང་། དམངས་གཙོ། འགྲོ་བ་མིའི་ཐོབ་ཐང་ཚན་པའི་དྲུང་ཆེ་ལས་རོགས་ལས་ཚབ་ཨལ་བྷེར་ཌི་གྷོམ་བྷི་སི་ (Albert Gombis) ལགས་དང་། ཨ་རིའི་སྐུ་ཚབ་དོན་གཅོད་རྣམ་རྒྱལ་མཆོག་སྒྲུབ་ལགས། རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་བསྟན་ཆོས་རྒྱ་མཚོ་ལགས། ཨ་རིའི་རྒྱུད་སྟོད་དགོན་པའི་དགེ་འདུན་པ་ཁག་ཅིག དེ་བཞིན་ནེའུ་ཡོག་ཁུལ་གྱི་བོད་མི་ཁག་ཅིག་བཅས་འཛོམས་ཡོད་འདུག
མཛད་སྒོའི་ཐོག་སྐུ་ཞབས་ཨལ་བྷེར་ཌི་གྷོམ་བྷི་སི་མཆོག་གིས། ལོ་ངོ་བཅུ་ཕྲག་མང་པོའི་རིང་གི་བོད་དོན་འཐབ་རྩོད་ནི་བོད་ནང་གི་བོད་མི་ས་ཡ་དྲུག་དང་ཕྱི་རྒྱལ་དུ་ཡོད་པའི་བོད་མི་ཡོངས་ཀྱི་རང་སྲིད་རང་སྐྱོང་གི་གནད་དོན་ཙམ་མིན་པར། དེ་ནི་རྒྱ་ནག་གཞུང་གི་མནར་གཅོད་ལས་རང་དབང་སླད་འཐབ་རྩོད་བྱེད་པའི་འཛམ་གླིང་གི་དམིགས་འདུན་ཞིག་ཆགས་ཡོད། དེ་བཞིན་རྒྱ་ནག་གཞུང་གིས་རྒྱལ་མཚམས་ལས་བརྒལ་ཏེ་ཨ་རིའི་བོད་མི་རྣམས་ལ་དྲག་གནོན་སྤེལ་ཐབས་བྱེད་པར་བཟོད་གསོལ་བྱ་ཐབས་མེད་པ་ཞིག་ཡིན། ང་ཚོས་རང་དབང་དང་ཞི་བདེའི་ཆེད་དུ་རྒྱ་གཞུང་གིས་དྲག་གནོན་བྱེད་བཞིན་པའི་བོད་ཕྱི་ནང་གཉིས་ཀྱི་བོད་མི་ཡོངས་ལ་མུ་མཐུད་རྒྱབ་སྐྱོར་བྱ་རྒྱུ་ཡིན། བོད་ནི་ཁྱིམ་མཚེས་རྒྱལ་ཁབ་ཁག་གི་མི་འབོར་ས་ཡ་མང་པོའི་ཆུའི་འབྱུང་ཁུངས་གཙོ་བོར་གྱུར་ཡོད། ཨ་རིའི་གཞུང་གིས་བོད་དོན་རྒྱབ་སྐྱོར་བྱ་རྒྱུ་ནི་ཨ་རིའི་ནུས་པ་དང་། འཕེལ་རྒྱས། བརྟན་བརླིང་བཅས་ཀྱི་ཐོག་ཕན་ཐོགས་འབྱུང་གི་ཡོད། ཅེས་གསུངས་འདུག
དེ་བཞིན་ཁོང་གིས་བོད་དིང་རིའི་ས་ཡོམ་གྱི་གོད་ཆག་དང་། ༧སྐུའི་གཅེན་པོ་རྒྱལ་ལོ་དོན་གྲུབ་མཆོག་དགོངས་པ་རྫོགས་པར་མྱ་ངན་ཞུས་ཡོད་པ་མ་ཟད། ཨ་རིའི་ཆབ་སྲིད་ཚོགས་པ་ཟུང་འབྲེལ་གྱི་ཐོག་ནས་བོད་ཀྱི་ཆོས་དང་རིག་གཞུང་། འགྲོ་བ་མིའི་ཐོབ་ཐང་སྲུང་སྐྱོབ། བོད་རྒྱའི་དཀའ་རྙོག་སེལ་ཐབས་སུ་བོད་དོན་དམིགས་བསལ་འབྲེལ་མཐུད་ལས་ཁུངས་ངོས་ནས་མུ་མཐུད་ཕྱག་ལས་གནང་རྒྱུ་ཡིན་སྐོར་གསུངས་ཡོད་འདུག
དེ་བཞིན་བོད་ཀྱི་ལོ་གསར་ཚེས་གཅིག་ཉིན་ཨ་རིའི་ཕྱི་སྲིད་ལས་ཁུངསཀྱི་་ཕྱི་སྲིད་དྲུང་ཆེ་མཱར་ཁོ་རུ་བྷིའོ་ (Marco Rubio) མཆོག་གིས་ཡོངས་ཁྱབ་གསལ་བསྒྲགས་ཤིག་སྤེལ་བའི་ནང་། ངས་བོད་ཀྱི་ལོ་གསར་སྲུང་གཙི་ཞུ་མཁན་ཡོངས་ལ་འཚམས་འདྲི་ཞུ་རྒྱུ་ཡིན། བོད་ཤིང་སྦྲུལ་ལོའི་ལོ་གསར་ཉིན་དང་པོར། ང་ཚོས་འཛམ་གླིང་ཡོངས་ཀྱི་བོད་མིའི་ཚོགས་སྡེ་ཁག་གི་སྟོབས་ཤུགས་བརྟན་པོ་གནས་ཐུབ་པའི་དགའ་སྟོན་སྲུང་གཙི་བྱེད་ཀྱི་ཡོད། ཨ་རི་གཞུང་གིས་བོད་མི་རིགས་ཀྱི་ཀུན་ཁྱབ་ཀྱི་འགན་འཁུར་དང་། གཞི་རྩའི་འགྲོ་བ་མིའི་ཐོབ་ཐང་སྲུང་སྐྱོབ། བོད་ཀྱི་ཐུན་མོང་མ་ཡིན་པའི་རིག་གཞུང་དང་སྐད་ཡིག ཆོས་ལུགས་བཅས་དར་སྤེལ་གཏོང་རྒྱུར་རྒྱུན་དུ་འབད་བརྩོན་བྱེད་བཞིན་ཡོད། ལོ་གསར་བའི་ནང་འཛམ་གླིང་ཡོངས་ཀྱི་བོད་མི་རྣམས་ལ་ཞི་བདེ་དང་དཔལ་འབྱོར་འཕེལ་རྒྱས་ཡོང་བའི་སྨོན་འདུན་ཞུ། ཞེས་ལོ་གསར་ལ་འཚམས་འདྲི་གནང་ཡོད་འདུག
ཨ་རིའི་ཕྱི་སྲིད་ལས་ཁུངས་ཀྱིས་བོད་ཀྱི་ལོ་གསར་སྲུང་གཙི་ཞུས་པའི་གལ་གནད་སྐོར་ལ་ཨ་རིའི་སྐུ་ཚབ་དོན་གཅོད་རྣམ་རྒྱལ་མཆོག་སྒྲུབ་ལགས་ཀྱིས། ད་ལོ་བོད་ནང་དུ་ས་ཡོམ་གོད་ཆག་བྱུང་བས་ལོ་གསར་ལ་རྒྱས་སྤྲོས་ཀྱི་དགའ་སྟོན་རྣམ་པ་སྟོན་གྱི་མེད་ཀྱང་། ཨ་རིའི་སྲིད་གཞུང་གསར་བའི་ངོས་ནས་བོད་ཀྱི་ལོ་གསར་སྲུང་གཙི་ཞུས་པ་གལ་གནད་ཅིག་ཆགས་ཡོད་ཅིང་། ད་ལན་ཨ་རིའི་ཕྱི་སྲིད་ལས་ཁུངས་ཀྱིས་ནམ་རྒྱུན་བཞིན་བོད་ཀྱི་ལོ་གསར་སྲུང་གཙི་ཞུས་པ་མ་ཟད། ལོ་གསར་སྲུང་གཙི་སྐབས་སུ་ཨ་རིའི་ཕྱི་སྲིད་ལས་ཁུངས་ཀྱི་མི་མང་བདེ་འཇགས་དང་། དམངས་གཙོ། འགྲོ་བ་མིའི་ཐོབ་ཐང་ཚན་པའི་དྲུང་ཆེ་ལས་རོགས་ལས་ཚབ་ཨལ་བྷེར་ཌི་གྷོམ་བྷི་སི་མཆོག་གིས་ཨ་རིའི་ཆབ་སྲིད་ཚོགས་པ་ཁག་ཐུན་མོང་ནས་ཁ་ཞེ་གཉིས་མེད་ཐོག་རྒྱབ་སྐྱོར་བྱེད་བཞིན་ཡོད་པ་མུ་མཐུད་རྒྱབ་སྐྱོར་གནང་འཆར་ཡོད་པ་གསལ་སྟོན་གནང་སོང་། ཞེས་བརྗོད་འདུག
ཕྱི་ལོ་ ༢༠༡༥ ལོར་ཨ་རིའི་བོད་དོན་དམིགས་བསལ་འབྲེལ་མཐུད་པ་སཱ་རཱ་སི་ཝལ་ (Sara Sehwall) མཆོག་གི་སྐབས་སུ་ཨ་རིའི་ཕྱི་སྲིད་ལས་ཁུངས་ཀྱི་གོ་སྒྲིག་འོག་བོད་ཀྱི་ལོ་གསར་ཐོག་མར་སྲུང་གཙི་ཞུ་མགོ་བཙུགས་ཡོད་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་པ། པདྨ་མཚོ།
