གཙུག་ལག་སློབ་གཉེར་བ་སྐྱེད་སྲིང་ཆེད་ལོ་ལྟར་༧གོང་ས་ཏཱ་ལའི་བླ་མའི་དགའ་ལྡན་ཕོ་བྲང་དགེ་རྩ་ནས་བོད་ཕྲུག་མང་པོར་སློབ་ཡོན་གནང་སྲོལ་ཡོད་པ་ལྟར་ཕྱི་ལོ་ ༢༠༢༥ དང་ ༢༠༢༦ ལོའི་སློབ་ཡོན་ཞུ་བློ་ཡོད་རིགས་ནས་འདི་ལོའི་ཕྱི་ཟླ་ ༤ ཚེས་ ༢༠ བར་འགྱང་མེད་སྙན་ཞུ་འབུལ་དགོས་ཀྱི་ཡོད་འདུག
Tibetan school students at the Tibetan Children’s Village School near Dharamsala. (Shyam Sharma/Hindustan Times)
༧གོང་ས་ཏཱ་ལའི་བླ་མའི་དགའ་ལྡན་ཕོ་བྲང་དགེ་རྩས་གསལ་བསྒྲགས་གནང་བ་ལྟར་ན། འདི་ལོར་ཡུ་རོབ་དང་ཨ་རི། ཨོ་གླིང་། རྒྱ་གར་ཕུད་པའི་ཨེ་ཤ་ཡའི་རྒྱལ་ཁབ་ཏུ་གཙུག་ལག་རབ་འབྱམས་པ་དང་ཆེད་ལས་སྨན་པའི་སློབ་སྦྱོང་བྱེད་མཁན་གྱི་བོད་པའི་སློབ་མ་རྣམས་ལ་སློབ་ཡོན་གནང་རྒྱུ་དང་། དེ་སྔོན་སློབ་ཡོན་ཐོབ་ཟིན་པ་དག་གིས་ཀྱང་བསྐྱར་དུ་སློབ་ཡོན་ཞུ་ཆོག་གི་ཡོད་འདུག སློབ་ཡོན་དེའི་ཁོངས་སུ་མཉམ་ཞུགས་བྱེད་འདོད་མཁན་རྣམས་ཀྱིས། རང་ཉིད་ལ་ཨ་རི་དང་། ཨོ་གླིང་། ཡུ་རོབ་སོགས་ཀྱི་མཐོ་སློབ་ཁག་ནང་སློབ་འཇུག་ཟིན་པའི་དཔང་ཡིག་དང་། རང་ཉིད་བོད་མི་ཡིན་པའི་ར་སྤྲོད་ཀྱི་ཡིག་ཆ་ (www.dalailamafoundation.org)བརྒྱུད། འདི་ལོའི་ཕྱི་ཟླ་ ༤ ཚེས་ ༢༠ ཉིན་བར་འབུལ་ཟིན་པ་དགོས་ཀྱི་ཡོད་འདུག
ཏཱ་ལའི་བླ་མའི་དགའ་ལྡན་ཕོ་བྲང་དགེ་རྩའི་སློབ་ཡོན་དེ་༧གོང་ས་རྒྱལ་བ་རིན་པོ་ཆེ་མཆོག་གི་མཚན་ཐོག་ནས་འབུལ་གྱི་ཡོད་ཅིང་། སློབ་ཡོན་གྱི་ལས་གཞིའི་དགོས་དམིགས་ནི། བོད་པའི་སློབ་མ་རྣམས་ལ་སློབ་ཡོན་གྱི་མཐུན་རྐྱེན་སྦྱར་ཏེ་གཙུག་ལག་རབ་འབྱམས་པའི་སློབ་ཚན་ལ་ཆེད་སྦྱོང་བྱེད་པ་བརྒྱུད་བོད་མིའི་ནུས་སྟོབས་ཀྱི་རྩ་བ་གོང་སྤེལ་དང་། འགྲོ་བ་མིའི་རིགས་དང་ཤེས་ཡོན་ལ་མཐུན་འགྱུར་གང་ཐུབ་གནང་རྒྱུའི་བརྒྱུད་ལམ་བསྐྲུན་པ་ཞིག་ཡིན་འདུག དེ་ཡང་ད་བར་ཏཱ་ལའི་བླ་མའི་དགའ་ལྡན་ཕོ་བྲང་དགེ་རྩ་ཚོགས་པས་བོད་རིགས་སློབ་མ་ ༢༤༠ ལྷག་ལ་ཨ་སྒོར་ས་ཡ་ ༢། ༥ ཙམ་སློབ་ཡོན་དུ་ཕུལ་ཡོད་པ་མ་ཟད། སློབ་ཡོན་དེ་བརྒྱུད་བོད་རིགས་སློབ་མ་མང་དག་ཅིག་གིས་རྒྱལ་སྤྱིའི་ཚད་ལྡན་གྱི་མཐོ་སློབ་ཁག་ཏུ་སྨན་དང་། ཁྲིམས་ལུགས། འཆར་འགོད། ཚོང་རིག སེམས་ཁམས་རིག་པ། དེ་བཞིན་རྒྱལ་སྤྱིའི་འབྲེལ་ལམ་སོགས་ཀྱི་ཐད་ལ་སློབ་སྦྱོང་བྱས་དང་བྱེད་མུས་ཡིན་འདུག
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།
