རྒྱ་གར་གྱི་མི་སེར་ལག་འཁྱེར་རྫུན་མ་བཀོལ་མཁན་རྣམས་ལ་ལོ་བདུན་གྱི་བཙོན་འཇུག་ཁྲིམས་ཐག་གཅད་རྒྱུ་ཡིན་འདུག

རྒྱ་གར་ནང་སྲིད་ལས་ཁུངས་ཀྱིས་བཏོན་པའི་གྲོས་གཞིའི་ཁྲོད་རྒྱ་གར་གྱི་མི་སེར་ལག་འཁྱེར་རྫུན་མ་བཟོ་མཁན་རིགས་ལ་ལོ་བདུན་གྱི་བཙོན་འཇུག་ཁྲིམས་ཆད་དང་ཧིན་སྒོར་འབུམ་བཅུ་ཡི་ཉེས་ཆད་གཅད་རྒྱུ་ཡིན་འདུག

ཉེ་ལམ་རྒྱ་གར་དབུས་ནང་སྲིད་ལས་ཁུངས་ཀྱིས་རྒྱ་གར་གྲོས་ཚོགས་སུ་རྒྱ་གར་གྱི་གནས་སྤོར་དང་འབྲེལ་བའི་གྲོས་གཞི་ (India’s new immigration Bill) གསར་པ་ཞིག་བཏོན་ཡོད་ཅིང་། གལ་ཏེ་གནས་སྤོར་གྲོས་གཞི་དེ་རྒྱ་གར་གྲོས་ཚོགས་སུ་གཏན་འབེབས་བྱུང་ཚེ། རྒྱ་གར་གྱི་མི་སེར་ལག་འཁྱེར་རྫུན་མ་བཀོལ་ནས་རྒྱ་གར་དུ་འཛུལ་མཁན་དང་། ཁྲིམས་མཐུན་མིན་པའི་ཐོག་ནས་རྒྱ་གར་མི་སེར་ལག་འཁྱེར་བཟོས་ཏེ་ཐོངས་མཆན་བཀོལ་མཁན་རྣམས་ལ་མི་ལོ་བདུན་གྱི་བཙོན་འཇུག་ཁྲིམས་ཆད་དང་ཧིན་སྒོར་འབུམ་བཅུ་ཡི་ཉེས་ཆད་གཅད་རྒྱུ་ཡིན་འདུག

རྒྱ་གར་གྱི་གནས་སྤོར་དང་འགྲོ་འོང་གི་གནད་དོན་དང་འབྲེལ་བའི་ཆེས་མཐོའི་མི་སྣ་ཞིག་གིས། ཁྲིམས་འཆར་འདིས་རྒྱ་གར་ནང་ཁྲིམས་འགལ་གྱིས་གནས་སྡོད་བྱེད་མཁན་གྱི་གནད་དོན་ཐག་གཅོད་བྱེད་པར་ཕན་ཐོགས་ཡོང་རྒྱུ་མ་ཟད། རྒྱ་གར་ནང་དུས་ཡུན་ལས་བརྒལ་ཏེ་གནས་སྡོད་བྱེད་མཁན་ཕྱི་རྒྱལ་བ་རྣམས་ཀྱི་འགྲོ་འོང་ལ་རྗེས་འདེད་གཏོང་རྒྱུར་དེ་བས་ཀྱང་ཕན་ཐོགས་ཡོད་ཅིང་། དེས་བརྩི་སྲུང་གི་ཁུར་པོ་ཇེ་ཡང་དུ་གཏོང་རྒྱུར་ཡང་ཕན་ཐོགས་ཡོད།  ཅེས་བརྗོད་འདུག

ཕྱི་ཟླ་ ༣ ཚེས་ ༡༡ ཉིན་གྲོས་ཚོགས་འོག་མའི་གྲོས་འཆར་ནང་། རྒྱ་གར་དུ་འཛུལ་མཁན་ནམ་གནས་སྡོད་མཁན། ཡང་ན་རྒྱ་གར་ནས་ཕྱིར་ཐོན་ཆེད་མི་སེར་ལག་འཁྱེར་བེད་སྤྱོད་བྱས་པ། ཡང་ན་འགྲུལ་བཞུད་ཡིག་ཆ་གཞན། དེ་བཞིན་ཕྱིར་སྐྱོད་ཐོངས་མཆན་བེད་སྤྱོད་གཏོང་མཁན་སུ་ཞིག་ཡིན་རུང་། ལོ་གཉིས་ལས་མི་ཉུང་བའི་བཙོན་འཇུག་ཉེས་ཆད་གཅད་རྒྱུ་ཡིན་ཡང་། ལོ་བདུན་བར་དུ་བསྲིང་ཆོག་པ་མ་ཟད་དངུལ་ཆད་ཀྱང་སྒོར་འབུམ་གཅིག་ལས་མི་ཉུང་བ་དང་འབུམ་བཅུ་བར་དུ་སྤར་ཆོག ཅེས་གསལ་འདུག་ལ། ནང་སྲིད་ལྷན་ཁང་གིས་བཏོན་པའི་གྲོས་གཞི་དེའི་ཁྲོད།  མགྲོན་ཁང་དང་གཙུག་ལག་སློབ་གྲྭ། སློབ་གསོའི་སྡེ་ཚན། སྨན་ཁང་དང་སྨན་གཡོག་ཁང་ཚོས། རྒྱ་གར་ནང་གནས་སྡོད་ཀྱི་དུས་ཡུན་རྫོགས་ཟིན་པའི་ཕྱི་རྒྱལ་བ་རྣམས་ཀྱི་གནས་ཚུལ་ངེས་པར་དུ་སྙན་སེང་ཞུ་དགོས་སྐོར་སོགས་གསལ་འདུག

ཕྱི་ལོ་ ༢༠༢༥ ལོའི་ཕྱི་རྒྱལ་མི་སེར་དང་གནས་སྤོར་བཅའ་ཁྲིམས་ནི་ཕྱི་རྒྱལ་མི་སེར་དང་གནས་སྤོར་དང་འབྲེལ་བའི་ཁྲིམས་བཟོ་ཞིག་ཡིན་ཞིང་། དེ་ནི་རྒྱ་གར་གྱི་ཕྱི་མིའི་སྐྱོད་སྡོད་དང་རྒྱ་གར་གྱི་གནས་སྤོར་དང་འབྲེལ་བའི་ཁྲིམས་འཆར་བཞིའང་དེའི་ཁོངས་སུ་འདུས་ཡོད་སྐོར་གསལ་ཡོད་པ་མ་ཟད། དོན་གནད་གསར་པ་ཁག་ཅིག་ཀྱང་ཁ་སྣོན་བྱས་ཡོད་ཅིང་། སྤྱིར་རྒྱ་གར་གྱི་ཕྱི་རྒྱལ་མི་སེར་རྣམས་གནས་སྤོར་དང་འབྲེལ་བའི་གནད་དོན་རྣམས་བཅའ་ཁྲིམས་བཞི་བརྒྱུད་ནས་འཛིན་སྐྱོང་བྱེད་བཞིན་ཡོད་པ་ལས།  དེ་དག་ནི་ཕྱི་ལོ་ ༡༩༢༠ ལོའི་ཕྱི་སྐྱོད་ལག་དེབ་(རྒྱ་གར་ནང་འཛུལ་ཞུགས།) བཅའ་ཁྲིམས་དང་། ཕྱི་ལོ་ ༡༩༣༩ ལོའི་ཕྱི་རྒྱལ་མི་སེར་ཐོ་འགོད་བཅའ་ཁྲིམས། ཕྱི་ལོ་ ༡༩༤༦ ལོའི་ཕྱི་རྒྱལ་མི་སེར་བཅའ་ཁྲིམས། ཕྱི་ལོ་ ༢༠༠༠ ལོའི་གནས་སྤོར་(སྐྱེལ་འདྲེན་པའི་འགན་འཁྲི།)བཅའ་ཁྲིམས་བཅས་ཡིན་འདུག

རྒྱ་གར་ཕྱི་དྲིལ་ལས་ཁུངས་དང་ཡན་ལག་ལས་ཁུངས་ཁག་གིས། རྒྱལ་ཁབ་གཞན་གྱི་མི་སེར་རྣམས་ལ་རྒྱ་གར་གྱི་ཐོངས་མཆན་སྤྲོད་ཆོག་པ་མ་ཟད། རྒྱ་གར་ནང་གནས་སྡོད་གནས་སྤོར་ལས་ཁུངས་ (BoI)  ཀྱིས། རྒྱལ་ཁབ་༡༦༧ གྱི་མི་སེར་ལ་རིགས་མི་འདྲ་བ་བདུན་དང་། ཉི་ཧོང་དང་། ལྷོ་ཀོ་རི་ཡ། ཡུ་ཨེ་ཨི་ ( UAE) བཅས་ཀྱི་མི་སེར་ལ་འབྱོར་འཕྲལ་ཐོངས་མཆན་སྤྲོད་ཀྱིན་ཡོད་ཅིང་། རྒྱ་གར་ནང་གནས་སྡོད་དང་གནས་སྤོར་ལས་ཁུངས་དང་། རྒྱ་གར་དབུས་གཞུང་། དེ་བཞིན་མངའ་སྡེ་ཁག་གི་དབུས་གཞུང་བཅས་ཀྱིས་རྒྱ་གར་ནང་ཕྱི་རྒྱལ་མི་རིགས་འགྲོ་འོང་། གནས་སྡོད། དེ་བཞིན་སློབ་གཉེར་སོགས་དང་འབྲེལ་བའི་གནད་དོན་རིགས་ལ་སྟངས་འཛིན་དང་དོ་དམ་བྱེད་ཀྱི་ཡོད།

རྒྱ་གར་གྱི་མི་སེར་ཐོབ་ཐང་རྩ་ཁྲིམས་ནང་། ཕྱི་ལོ་ ༡༩༥༠ ལོའི་ཟླ་ ༡ ཚེས་ ༢༦ ཉིན་ནས་ ༡༩༨༧ ལོའི་ཟླ་ ༧ ཚེས་ ༡ ཉིན་བར་རྒྱ་གར་ནང་སྐྱེས་པ་ཡིན་ན་རྒྱ་གར་མི་སེར་གྱི་ཐོབ་ཐང་ཡོད་སྟབས། ཕྱི་ལོ་ ༢༠༡༡ ལོར་བོད་རིགས་བུད་མེད་རྣམ་རྒྱལ་སྒྲོལ་དཀར་ལགས་ཀྱིས་ལྡི་ལི་མཐོ་རིམ་ཁྲིམས་ཁང་བརྒྱུད་ཡོངས་གྲགས་ཐོག རྒྱ་གར་གྱི་མི་སེར་ཐོབ་ཐང་ཐོབ་ཡོད་ཅིང་། དེ་ནི་བོད་མི་ཞིག་ལ་ཁྲིམས་མཐུན་ཐོག་རྒྱ་གར་མི་སེར་གྱི་ཐོབ་ཐང་འཐོབ་མཁན་ཐོག་མར་གྱུར། དེ་བཞིན་ཕྱི་ལོ་ ༢༠༡༧ ཟླ་ ༧ ཚེས་ ༥ ཉིན་བཀའ་དྲུང་ཡིག་ཚང་གིས་རྒྱ་གར་མི་སེར་ལག་འཁྱེར་བཟོ་མཁན་གྱི་བོད་མི་རྣམས་ལ་སྤེལ་བའི་གསལ་བསྒྲགས་དང་ལམ་སྟོན་ཁྲོད། རྒྱ་གར་མི་སེར་ཞུ་མཁན་གྱི་བོད་མི་ཚོས་སྐྱབས་བཅོལ་ལག་དེབ་དང་། ཕྱིར་སྐྱོད་ལག་དེབ་ཕྱིར་སྤྲོད། དེ་བཞིན་བཙན་བྱོལ་བོད་མིའི་གནས་སྡོད་བྱེད་མཁན་ཞིག་མིན་པའི་ཁར། བཙན་བྱོལ་བོད་མིའི་རོགས་དངུལ་རིགས་གཏན་ནས་བླང་ཆོག་གི་མེད་སྐོར་གསལ་འདུག

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།