དཔལ་འབྱོར་བཀའ་བློན་མཆོག་གིས་སྔོན་རྩིས་གསུང་བཤད་དང་འབྲེལ་ནས་ལན་འདེབས་གསལ་བཤད་གནང་།

བཀའ་ཤག་གིས་ཨ་རིའི་རོགས་དངུལ་ཆད་པའི་གནས་སྟངས་འོག་ཟླ་གསུམ་རིང་གི་འགྲོ་གྲོན་ཆེད་རོགས་དངུལ་ས་ཡ་ ༡༥༠ ཐབས་འཚོལ་ཐུབ་ཡོད་འདུག

དེ་རིང་སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དགུ་བའི་ལས་ཉིན་གཉིས་པའི་སྟེང་དུ། སྲིད་སྐྱོང་དང་དཔལ་འབྱོར་བཀའ་བློན་གཅིག་ལྕོགས་སྤེན་པ་ཚེ་རིང་མཆོག་གི་བོད་མིའི་སྒྲིག་འཛུགས་ཀྱི་རྩིས་ལོ་ ༢༠༢༥་་་༢༦ ལོའི་སྔོན་རྩིས་འགོད་འབུལ་གྱི་གསུང་བཤད་དང་། སྔོན་རྩིས་ཚོད་དཔག་འཆར་རྩིས་ཚོགས་ཆུང་གི་སྙན་ཐོར་སྤྱི་ཡོངས་བགྲོ་གླེང་གནང་སོང་བ་དང་། སྐབས་དེར་བོད་མི་མང་སྤྱི་འཐུས་ ༢༡ ཙམ་གྱིས་དཔལ་འབྱོར་བཀའ་བློན་མཆོག་གི་སྔོན་རྩིས་གསུང་བཤད་དང་འབྲེལ་ནས་བཀའ་འདྲི་གནང་བར་དཔལ་འབྱོར་བཀའ་བློན་སྤེན་པ་ཚེ་རིང་མཆོག་གིས་ལན་འདེབས་གསལ་བཤད་གནང་སོང་།

དཔལ་འབྱོར་བཀའ་བློན་སྤེན་པ་ཚེ་རིང་མཆོག་གིས། ད་ལྟའི་གནས་སྐབས་སུ་བོད་མིའི་སྒྲིག་འཛུགས་ཀྱི་ལས་བྱེད་ཉུང་དུ་གཏོང་དགོས་པ་གང་ཡང་ཆགས་མེད། སྤྱི་ཚོགས་ནང་དུ་བོད་མིའི་སྒྲིག་འཛུགས་ཀྱི་དངུལ་ཉུང་དྲགས་ནས་ལས་བྱེད་ཀྱི་གླ་ཆ་མར་བཅག་ཡོད་ཟེར་བ་དེ་བདེན་པ་མ་རེད། ད་ལྟའི་ཆར་གཞུང་ཞབས་ལས་བྱེད་གང་ཡོད་པ་རྣམས་མུ་མཐུད་དུ་ཉར་རྒྱུ་རེད། ཨ་རིའི་རོགས་དངུལ་གྱི་ལས་གཞི་ཁ་ཤས་ཡོད་པའང་མཚམས་འཇོག་བྱས་མེད། འགྲོ་སོང་མང་པོ་གཏོང་མི་དགོས་པའི་ཐོག་ནས་ལས་མཇུག་བསྒྲུབ་རྒྱུ་ལས། ད་ལྟ་བར་དུ་འགྲོ་སོང་མང་པོ་བཏང་བ་བེད་མེད་དང་ནུས་མེད་ཆགས་འགྲོ་ཡི་རེད། དེའི་ཐོག་ང་ཚོས་དངུལ་འཛིན་བཀའ་འཁྲོལ་ཞུས་ཡོད། དེ་བཞིན་ཆོས་རིག་ལས་ཁུངས་ཀྱི་ཁོངས་སུ་གྲངས་འཛིན་དཔེ་མཛོད་ཀྱི་ལས་གཞི་ལོ་གསུམ་ཞུས་པ་ལོ་གཉིས་པའི་ནང་དུ་འགྲོ་བཞིན་ཡོད།  དེ་ཡང་ཨ་རིའི་རོགས་དངུལ་ཆད་ཀྱང་དགོས་མཁོ་དང་མཐུན་པའི་ཐོག་འགྲོ་སོང་བཏང་ནས་མུ་མཐུད་འགྲོ་དགོས། ཟབ་སྦྱོང་དང་ཚོགས་འདུ་སོགས་འཚོག་མི་དགོས་པ་དེ་དག་ཐེངས་འདིའི་གཅོག་ཆའི་ནང་བཏང་ཡོད། ཅེས་ལན་འདེབས་གནང་སོང་།

དཔལ་འབྱོར་བཀའ་བློན་མཆོག་གིས། རོགས་དངུལ་བཀག་སྐྱིལ་བྱས་པའི་རྒྱུ་མཚན་ལ་བརྟེན་ནས་ཕྱི་ཟླ་ ༡ པོ་ནས་ཕྱི་ཟླ་ ༣ པའི་ཟླ་མཇུག་བར་དུ་འགྲོ་གྲོན་ཞིག་འགྲོ་ཡི་ཡོད་པ་རེད། དེ་གཅིག་པུ་གྲ་སྒྲིག་བྱེད་པར་བདུན་ཕྲག་གཅིག་འགོར་སོང་། ང་ཚོས་ཞིབ་ཚགས་པོ་བྱས་ནས་ལས་ཁུངས་རེ་རེར་བལྟ་དགོས་ཀྱི་ཡོད་པ་རེད། ཕྱོགས་གཅིག་ནས་ཕྱི་རྒྱལ་གྱི་རོགས་དངུལ་བཀག་སྐྱིལ་བྱས་པའི་གནས་ཚུལ་ཐོས་ཡོང་གི་ཡོད་པ་དེ་སླར་གསོ་བྱ་རྒྱུའི་འབད་བརྩོན་བྱེད་དགོས་ཀྱི་ཡོད་པ་རེད། ཕྱོགས་གཞན་ཞིག་ནས་བོད་མིའི་སྒྲིག་འཛུགས་ཀྱི་ཁྲིམས་དང་སྒྲིག་གཞི་དེ་དག་སྲུང་གཙི་བྱེད་དགོས་ཀྱི་ཡོད་པར་བརྟེན། སྔོན་རྩིས་ནས་བཀའ་འཁྲོལ་ཞུ་དགོས་ཀྱི་ཡོད་པ་རེད། བོད་མིའི་སྒྲིག་འཛུགས་ཀྱིས་ཁྲིམས་དང་སྒྲིག་གཞི་གཞིར་བཟུང་བཀའ་ཤག་གིས་ཉིན་མ་མང་པོ་འཛོམས་ཏེ། ལྷན་ཁང་སོ་སོའི་ཟླ་བ་གསུམ་ནང་འགྲོ་སོང་ག་ཚོད་ཆགས་ཀྱི་ཡོད་པ་དེ་དག་ཆ་ཚང་བལྟ་དགོས་ཀྱི་ཡོད་པ་རེད། ཟླ་བ་གསུམ་གྱི་རིང་ལ་འགྲོ་སོང་ཀ་རོར་ (Crore)  ༡༢ འགྲོ་ཡི་འདུག དེ་དང་འབྲེལ་ནས་ང་ཚོས་རོགས་དངུལ་ཀ་རོར་ (Crore) ༡༥ ཐབས་ཤེས་བྱས་ཐུབ་སོང་། མི་མང་སེམས་འཚབ་བྱེད་བཞིན་པ་དེ་དག་ཞི་འཇགས་ཡོང་བའི་ཆེད་དུ་ལབ་ཡིན། ཞེས་སོགས་གསུངས་སོང་།

ཡང་དཔལ་འབྱོར་བཀའ་བློན་མཆོག་གིས། ཨ་རིའི་གཞུང་ནས་བཙན་བྱོལ་ནང་རོགས་པ་བྱེད་པ་དེ་ས་ཡ་ ༡༤ ཆགས་ཀྱི་ཡོད་པ་རེད། དེའི་ནང་ནས་ས་ཡ་ ༢ (PRM) རེད། ད་ལྟ་ཨ་རིའི་གཞུང་གིས་ཐག་གཅོད་བྱེད་སྟངས་ཀྱི་བརྒྱུད་རིམ་ནང་ (USAID) བརྒྱུད་ནས། མིའི་སྲོག་དང་འབྲེལ་བ་ཡོད་པ་དེ་དག་གནས་སྟངས་གཅིག་རེད་མ་གཏོགས་གཞན་ཆ་ཚང་མེད་པར་བཟོས་ཡོད་པ་རེད། ཕྱི་སྲིད་བློན་ཆེན་གྱིས། བརྒྱ་ཆ་ ༨༣ མེད་པ་བཟོ་རྒྱུ་ཡིན། བརྒྱ་ཆ་ ༡༧ ཕྱི་སྲིད་ལས་ཁུངས་ནང་ཟླ་སྒྲིལ་བྱེད་ཀྱི་ཡིན། ཞེས་གསུངས་ཡོད་པ་རེད། ང་ཚོས་སླར་གསོ་བྱེད་པར་མུ་མཐུད་ནས་འབད་བརྩོན་ཞུ་རྒྱུ་ཡིན།  ཞེས་གསལ་བཤད་གནང་སོང་།

གསར་འགོད་པ། བྱམས་པ་ཚེ་རིང་། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།