ཕྱི་ལོ་ ༢༠༡༠ ཙམ་ནས་༧གོང་ས་རྒྱལ་བ་རིན་པོ་ཆེ་མཆོག་གི་སྐུ་ཚབ་དང་རྒྱ་ནག་གཞུང་བར་གྲོས་མོལ་ཆད་ཡོད་ཀྱང་། ཕྱི་ལོ་ ༢༠༡༩ བར་༧མགོན་པོ་གང་ཉིད་ལ་དངོས་ཤུགས་བརྒྱུད་གསུམ་ནས་རྒྱ་ནག་གཞུང་གི་མགོ་ཁྲིད་ཚོ་དང་འབྲེལ་འདྲིས་བྱུང་ཡོད་པ་ཕྱག་དེབ་གསར་པའི་ནང་གསལ་འདུག
ཉེ་ལམ་ཨ་རིའི་ཝི་ལིམ་མོར་རོ་(William Morrow) དཔེ་སྐྲུན་ཁང་དང་དབྱིན་ཡུལ་གྱི་ཧར་པར་དངོས་སྒྲུང་དཔེ་སྐྲུན་ཁང་(HarperNonFiction) གཉིས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་གིས་མཛད་པའི་སྨྲ་བརྗོད་བྲལ་བ་རྣམས་ཀྱི་མགྲིན་ཚབ་ (Voice for the Voiceless)། ངོས་ཀྱི་ཡུལ་དང་མི་དམངས་ཀྱི་ཆེད་མི་ལོ་བདུན་ཅུ་ལྷག་རིང་རྒྱ་ནག་དང་འཐབ་རྩོད་ཅེས་པའི་ཕྱག་དེབ་ནང་། ནམ་མཁའ་ཇི་ཙམ་མུན་ནག་ཡིན་ན་ཡང་རེ་བ་མ་འབོར་ཞེས། ༧གོང་ས་རྒྱལ་བ་རིན་པོ་ཆེ་མཆོག་གིས་རྗེས་འབྲངས་བོད་མི་རྣམས་ལ་དཀའ་ངལ་ཇི་ཙམ་བྱུང་ཡང་སེམས་ཤུགས་གཏན་ནས་ཆག་མི་ཉན་པའི་ལམ་སྟོན་མཛད་འདུག
ད་ལྟ་རྒྱལ་སྤྱིའི་སྤྱི་ཚོགས་གང་སར་འགྲེམས་སྤེལ་བྱེད་མུས་ཡིན་པའི་དཔེ་དེབ་དེའི་གླེང་བརྗོད་དུ་༧གོང་ས་རྒྱལ་བ་རིན་པོ་ཆེ་མཆོག་ནས། པེ་ཅིང་དང་ལྷན་དུ་ངོས་རང་གིས་དུས་ཡུན་རིང་པོར་འབྲེལ་བ་བྱས་པའི་ཉམས་མྱོང་ལ་བརྟེན་ནས། དེབ་འདིས་མ་འོངས་པར་ཇི་ལྟར་མདུན་སྐྱོད་བྱ་དགོས་མིན་ཐད་ལ་ལམ་བུ་གསར་པ་ཞིག་བསྟན་ཡོད་པའི་མུར། ང་ཚོ་ནི་ཤེས་རིག་དར་རྒྱས་སུ་ཕྱིན་པའི་ལོ་རྒྱུས་རང་བཞིན་ལྡན་པའི་མི་རིགས་ཤིག་ཡིན་སྟབས། གལ་ཏེ་དགོས་ངེས་ཡིན་ཚེ་ངའི་ཚེ་ཚད་ལས་ཀྱང་འགོངས་ཏེ་མུ་མཐུད་བོད་དོན་འཐབ་རྩོད་གནས་རྒྱུ་དང་། བོད་མི་ནི་བོད་ཀྱི་བདག་དབང་འཛིན་མཁན་ཡིན་པའི་ཐོབ་ཐང་ལ་བཀག་འགོག་བྱེད་མི་རུང་ལ། བོད་མིའི་རེ་འདུན་ཡང་གཉའ་གནོན་གྱི་འོག་ནས་རྩ་མེད་བཟོ་མི་རུང་། ང་ཚོས་ལོ་རྒྱུས་ཐོག་ནས་ཤེས་པའི་བསླབ་བྱ་གསལ་པོ་ཞིག་ནི། གལ་ཏེ་ཁྱེད་ཀྱིས་མི་རྣམས་སྐྱིད་པོ་མེད་པ་བཟོས་ཚེ། ཁྱེད་ལ་བརྟན་བརླིང་གི་སྤྱི་ཚོགས་ཤིག་མེད་པ་རེད། ཅེས་གསུངས་འདུག
དཔེ་དེབ་འདིའི་ས་བཅད་བདུན་པ་སྟེ་རྒྱ་གཞུང་དང་ལྷན་བོད་རྒྱ་གྲོས་མོལ་གྱི་གནད་དོན་དང་འབྲེལ་ནས། ཕྱི་ལོ་ ༡༩༧༨ ལོའི་གསུམ་བཅུ་དུས་དྲན་གྱི་བསྒྲགས་གཏམ་སྟེ། བོད་ནང་གི་བོད་མི་རྣམས་དངོས་གནས་སྔར་བྱུང་མ་མྱོང་བའི་སྐྱིད་པོ་དང་ཡར་རྒྱས་ཕྱིན་ཡོད་ཚེ། ང་ཚོས་དེ་ལྟར་རྩོད་དགོས་དོན་མེད། གལ་ཏེ་བོད་མི་ཚོ་དངོས་གནས་སྐྱིད་པོ་ཡོད་ན། རྒྱ་ནག་གཞུང་གིས་ཕྱི་རྒྱལ་བ་རྣམས་བོད་ནང་དུ་འགྲོ་འོང་བཀག་སྡོམ་མ་བྱས་པར་བོད་ལ་གཟིགས་སྐོར་དུ་ཡོང་བཅུག་དགོས། འདི་ལྟར་བྱས་ན་གཟིགས་སྐོར་བ་ཚོས་བོད་ནང་གི་དངོས་ཡོད་གནས་སྟངས་ཤེས་ཐུབ་ལ། རྒྱ་ནག་གཞུང་གིས་བཙན་བྱོལ་བོད་མི་རྣམས་གཉེན་འཕྲད་དུ་འགྲོ་བཅུག་དགོས། ཞེས་སོགས་ལུང་འདྲེན་དང་སྦྲགས། ད་བར་བོད་རྒྱའི་གྲོས་མོལ་སླད་བོད་ནང་སྐུ་ཚབ་ཚོགས་ཆུང་མངག་གཏོང་གནང་བའི་བརྒྱུད་རིམ་དང་། ༧མགོན་པོ་གང་ཉིད་ཀྱིས་སྐབས་དེའི་རྒྱ་ནག་གི་མགོ་ཁྲིད་དག་གིས། བོད་ནང་གི་བོད་མི་རྣམས་ཀྱི་གཞི་རྩའི་འགྲོ་བ་མིའི་ཐོབ་ཐང་སྲུང་སྐྱོབ་དང་། བོད་མི་རྣམས་ལ་རང་འདུན་བཞིན་བོད་ཀྱི་ཆོས་རིག་སྲུང་སྐྱོབ་དང་སྐད་ཡིག་སྦྱོང་སྤྱོད་འཇུག་དགོས་པའི་རེ་སྐུལ་ཞུས་ཡོད་པའི་སྐོར་སོགས་གསལ་འདུག
ཡང་ཕྱག་དེབ་དེའི་མཇུག་གི་རེ་སྐུལ་ས་བཅད་ཁྲོད་༧མགོན་པོ་གང་ཉིད་ཀྱིས། ངོས་ཀྱི་བོད་རིགས་སྤུན་ཟླ་རྣམས། ནམ་མཁའ་ཇི་ཙམ་མུན་ནག་ཡིན་རུང་རེ་བ་མ་འབོར། ང་ཚོའི་གཏམ་དཔེར་ལན་དགུ་འགྱེལ་ན་ཡང་ལན་དགུ་ལོངས། སྤྲིན་པའི་རྒྱབ་ཏུ་ཉི་འོད་གསལ་པོ་ཞིག་སྒུག་ནས་ཡོད་པ་དྲན་པར་གྱིས། ང་ཚོ་ནི་ལོ་རྒྱུས་རིང་པོ་ཡོད་པའི་གནའ་བོའི་མི་རིགས་ཤིག་དང་། རྩམ་གཟན་མི་རིགས་ཤིག་སྟེ་ལོ་སྟོང་ཕྲག་མང་པོའི་རིང་འཛམ་གླིང་གི་ཡང་རྩེ་ཞེས་གྲགས་པའི་བོད་མཐོ་སྒང་དེ་སྲུང་སྐྱོབ་བྱས་ཡོད། ང་ཚོའི་ལོ་རྒྱུས་མི་ལོ་སྟོང་གཉིས་ལྷག་རིང་ལ། ང་ཚོས་འཕེལ་འགྲིབ་སྣ་ཚོགས་བརྒྱུད་དེ་སྐྱོད་མྱོང་ཞིང་། ང་ཚོའི་སྐད་དང་རིག་གཞུང་། ཆོས་ལུགས་སོགས་ནི་འུ་ཅག་གི་སྲོག་ཤིང་དུ་གྱུར་བར་ངོས་འཛིན་བྱེད་ཀྱི་ཡོད། རྒྱ་ནག་གིས་བཙན་བཟུང་བྱས་པའི་ད་ལྟའི་མུན་ནག་གི་དུས་སྐབས་འདི་ལ་མཐའ་མེད་པ་འདྲ་པོ་མཐོང་ཡང་། དེ་ནི་ང་ཚོའི་ལོ་རྒྱུས་རིང་མོའི་ཁྲོད་ཀྱི་མཚན་མོའི་རྨི་ལམ་ཐུང་ཐུང་ཞིག་ཡིན་པ་མ་ཟད། ཆོས་ཉིད་ཐམས་ཅད་འགྱུར་བའི་རང་བཞིན་ཡིན་པར་ལྡོག་ཏུ་མེད་སྐོར་གསུངས་འདུག
ཤོག་ངོས་ ༢༨༤ ཡི་བདག་ཉིད་ཅན་གྱི་དཔེ་དེབ་དེའི་ཁྲོད། ས་བཅད་མི་འདྲ་བ་བཅུ་དྲུག་དང་ལྷན་ཐབས་ཀྱི་ས་བཅད་ལྔ་ཡོད་པའི་ཁྲོད། ༧གོང་ས་རྒྱལ་བ་རིན་པོ་ཆེ་མཆོག་དགུང་ལོ་ཕྲ་བའི་དུས་ཏེ། ཆབ་སྲིད་ཀྱི་རྙོག་འཛིང་ཆེས་ཆེ་བའི་དུས་སྐབས་སུ་བོད་ཀྱི་ཆོས་སྲིད་གཉིས་ཀྱི་ཐུགས་འགན་ཆ་ཚང་བཞེས་ནས། རྒྱ་ནག་གཞུང་གིས་བོད་ས་བཙན་འཛུལ་བྱེད་སྐབས། རྒྱ་ནག་དམར་ཤོག་རིང་ལུགས་ཀྱི་མགོ་ཁྲིད་མཱའོ་དང་རྒྱ་ནག་གི་མགོ་ཁྲིད་གཞན་ཁག་དང་ལྷན་ཞི་མོལ་གནང་བའི་བརྒྱུད་རིམ། དེ་བཞིན་རྒྱ་གར་ལ་བཙན་བྱོལ་དུ་ཕེབས་རྗེས། རྒྱ་ནག་གཞུང་གི་མགོ་ཁྲིད་ལྷན་རེ་འབྲས་བྲལ་བའི་གྲོས་མོལ་བྱུང་མཚམས། བོད་ཀྱི་ཆོས་རིག་སྲུང་སྐྱོབ་དང་བོད་མིའི་གཞི་རྩའི་ཐོབ་ཐང་སྲུང་སྐྱོབ་སླད། བོད་ལ་མིང་དོན་མཚུངས་པའི་རང་སྐྱོང་གི་ཐད་ལ་ཤར་སྐྱོད་གནང་ཕྱོགས་དང་། ཕྱི་ལོ་ ༢༠༡༡ ལོར་༧གོང་ས་རྒྱལ་བ་རིན་པོ་ཆེ་མཆོག་གིས་ཆབ་སྲིད་འགན་དབང་ཡོད་ཚད་མི་མང་རང་བཞིན་གྱི་འོས་བསྡུའི་ལམ་བུར་བསྒྱུར་ནས། མི་མང་གིས་འོས་འདེམས་བྱས་པའི་ཆབ་སྲིད་ཀྱི་མགོ་ཁྲིད་ལ་རྩིས་སྤྲོད་གནང་བའི་སྐོར་དང་། ཕྱི་ལོ་ ༢༠༡༠ ཙམ་ནས་༧གོང་ས་རྒྱལ་བ་རིན་པོ་ཆེ་མཆོག་གི་སྐུ་ཚབ་དང་རྒྱ་ནག་གཞུང་བར་གྲོས་མོལ་ཆད་ཡོད་ཀྱང་། ཕྱི་ལོ་ ༢༠༡༩ བར་༧མགོན་པོ་གང་ཉིད་ལ་དངོས་ཤུགས་བརྒྱུད་གསུམ་ནས་རྒྱ་ནག་གཞུང་གི་མགོ་ཁྲིད་ཚོ་དང་འབྲེལ་འདྲིས་བྱུང་ཡོད་པའི་སྐོར། རྒྱ་ནག་གཞུང་གིས་བོད་ཕྲུག་རྣམས་བཅའ་སྡོད་སློབ་གྲྭར་བཅུག་ནས་རྒྱ་ཡིག་བཙན་གྱིས་སྦྱོང་སྤྱོད་བྱེད་དུ་འཇུག་གིན་ཡོད་པའི་སྐོར་སོགས་གསལ་འདུག
ད་ལྟ་༧གོང་ས་རྒྱལ་བ་རིན་པོ་ཆེ་མཆོག་གིས་མཛད་པའི་ཕྱག་དེབ་དེ། དཔེ་ཁང་དང་ཨེ་མེ་རྫོན་(Amzone) དང་། Barnes and Noble། Books -A-Millon ། Target ། དེ་བཞིན་ Walmart བཅས་དྲ་ལམ་ཚོང་གཉེར་ཁང་དེ་དག་ལ་མངག་ཉོ་དང་། དཔེ་དེབ་དེ་ཡུ་རོབ་ཀྱི་རྒྱལ་ཁབ་ཧྥ་རན་སི་དང་། འཇར་མན། ཨི་ཊ་ལི། ཧོ་ལེན་དང་། ཁེ་ན་ཊ་སོགས་སུ་འགྲེམས་སྤེལ་བྱས་འདུག
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
