བོད་མིའི་སྒྲིག་འཛུགས་ནས་བོད་ཀྱི་ས་ཁྲ་གསར་བཟོ་བྱ་རྒྱུ་ཡིན་འདུག

བོད་མིའི་སྒྲིག་འཛུགས་ཀྱི་ཕྱི་དྲིལ་ལས་ཁུངས་སུ་མདོ་དབུས་ཁམས་གསུམ་གྱི་སྐད་ཐོག་གསར་འགྱུར་རྒྱང་སྲིང་ཞུ་མཁན་མེད་པའི་དཀའ་ངལ་འཕྲད་ཀྱིན་ཡོད་འདུག

དེ་རིང་སྐབས་ ༡༧ པའི་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དགུ་པའི་ལས་ཉིན་བཞི་པའི་ཚོགས་ཐུན་དང་པོའི་སྟེང་། སྤྱི་འཐུས་ཨ་ཀྲོང་རིན་ཆེན་རྒྱལ་མཚན་ལགས་ཀྱིས། སྣར་ཐར་པར་ཁང་གི་རྒྱུན་གྲོན་ཐོག་ས་ཡ་གཉིས་ཙམ་བཏང་ནས་ལས་དོན་ཐོག་ཕན་ཐོགས་ཇི་ཙམ་ཡོང་གི་ཡོད་མེད་དང་། སྣར་ཐང་པར་ཁང་དུ་ལས་བྱེད་ག་ཚོད་ཡོད་པ་དང་། ལོ་ལྟར་བོད་མིའི་སྒྲིག་འཛུགས་ཀྱི་རྩིས་དེབ་ཕུད་པའི་པར་སྐྲུན་གཞན་གང་དག་བྱེད་བཞིན་ཡོད་མེད་སོགས་ཀྱི་དོགས་འདྲི་གནང་བ་དང་། སྤྱི་འཐུས་བསྟན་པ་ཡར་འཕེལ་ལགས་ཀྱིས། ཕྱི་དྲིལ་ལས་ཁུངས་ཀྱིས་མདོ་དབུས་ཁམས་གསུམ་གྱི་སྐད་ཀྱི་ཐོག་རྒྱང་སྲིང་བྱེད་ཐུབ་པའི་དགོས་གལ་ཆེ་ཞིང་། བོད་ཀྱི་ས་ཁྲ་གསར་བཟོ་བྱེད་པར་སྔོན་རྩིས་ཧིན་སྒོར་འབུམ་ ༩༠ ཙམ་ཞུས་འདུག་པར། བོད་ཀྱི་ས་ཁྲ་ཚད་ལྡན་དགོས་གལ་ཆེ་བ། བོད་ཆོལ་ཁ་གསུམ་ཁྱོན་ཡོངས་སུ་ཁྱབ་པའི་རྒྱ་སྐད་ཀྱི་ཚིག་ག་རེ་ཡོད་དམ་ཞེས་དགོངས་འཆར་དང་བཀའ་འདྲི་གནང་སོང་།

ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས་གསལ་བཤད་ལན་འདེབས་གནང་སྐབས། སྣར་ཐང་པར་ཁང་གི་རྒྱུན་གྲོན་ས་ཡ་གཉིས་ཙམ་ཆགས་ཡོད། སྔོན་མ་སྣར་ཐང་པར་ཁང་ལ་ལས་བྱེད་ ༡༤ ཡོད་ཅིང་། ད་ལྟའི་ཆར་ལས་བྱེད་ ༨ ཡོད། སྣར་ཐང་པར་ཁང་གིས་བོད་མིའི་སྒྲིག་འཛུགས་ཀྱི་རིག་གནས་ཐོག་པར་སྐྲུན་བྱེད་བཞིན་ཡོད་ཅིང་། རྒྱུན་དུ་ཤེས་བྱ་དང་། བོད་མིའི་རང་དབང་། དབྱིན་ཡིག་དང་རྒྱ་ཡིག་བཅས་བདུན་རེ་དང་ཟླ་རེའི་ཚགས་ཤོག་པར་སྐྲུན་བྱེད་བཞིན་ཡོད། དེ་བཞིན་བོད་མིའི་སྒྲིག་འཛུགས་ཀྱི་དུས་དྲན་དང་མཛད་སྒོ་ཆེ་ཁག་བཞི་དང་། བོད་མིའི་སྒྲིག་འཛུགས་ཀྱི་ཚོགས་འདུའི་སྐབས་ཀྱི་ཡིག་ཆ་རིགས་པར་སྐྲུན་བྱེད་བཞིན་ཡོད། ཕྱི་དྲིལ་ལས་ཁུངས་ཀྱི་པར་སྐྲུན་བྱེད་བཞིན་པའི་ཡིག་ཆ་དང་ཚགས་ཤོག་ཁག་ལོ་རྒྱུས་ཐོག་བཞག་དགོས་པར་གལ་གནད་ཆེན་པོར་བརྩི་བཞིན་ཡོད། ཅེས་དང་། སྔོན་མ་པར་སྐྲུན་བྱས་པའི་ཚགས་ཤོག་མི་སྒེར་པས་མངགས་པ་བཞིན་ཕུལ་བཞིན་ཡོད་ཀྱང་། ཕྱིས་སུ་དཔེ་མཛོད་ཁང་ཆེན་པོ་དང་སྒྲིག་འཛུགས་ཁག་ཏུ་གང་མང་གཏོང་ཐུབ་ཚེ། ཀློག་པ་པོ་མང་པོ་དང་ཁྱབ་ཆེན་པོར་འགྲོ་བཞིན་ཡོད་པར་བརྟེན། བསྐྱར་ཞིབ་ཀྱི་ཐོག་ནས་ཡར་རྒྱས་གཏོང་བཞིན་ཡོད། ད་ལན་དཔེ་སྐྲུན་གྱི་འཕྲུལ་ཆས་ཤིག་གི་སྔོན་རྩིས་འཁྱེར་ཡོད། ད་ལྟ་བར་དུ་སྣར་ཐང་པར་ཁང་གི་ལས་བྱེད་རྣམས་ཀྱིས་ལག་པས་ཚད་བརྒྱབ་སྟེ་བཟོ་བཞིན་ཡོད་པས་ཡིག་ཆ་རྣམས་ཏག་ཏག་མེད་པ་ཆགས་ཡོད། པར་སྐྲུན་གྱི་ལས་ཀ་དེ་དག་བྱེད་པའི་འཕྲུལ་ཆས་ཤིག་ཉོ་བར་ཧིན་སྒོར་འབུམ་ ༧༠ ཙམ་རེད། ཡིན་ནའང་ང་ཚོས་རོགས་སྐྱོར་བྱེད་མཁན་གཞན་ནས་ཐབས་ཤེས་འཐེན་བཞིན་ཡོད། གལ་སྲིད་རོགས་སྐྱོར་རག་ཚེ་བོད་མིའི་སྒྲིག་འཛུགས་ཀྱི་སྔོན་རྩིས་མ་དངུལ་ནས་འགྲོ་གྲོན་གཏོང་རྩིས་མེད། དུས་དང་མཐུན་པའི་ཐོག་འཕྲུལ་རིགས་ཀྱིས་པར་སྐྲུན་བྱེད་པར་འགྲོ་སོང་འགྲོ་མི་དགོས་པ་ཁག་པོ་ཆགས་ཀྱི་འདུག ཅེས་གསུངས་སོང་།

ཡང་བཀའ་བློན་མཆོག་གིས། གྲོས་ཚོགས་སྔོན་མ་ནས་ཕྱི་དྲིལ་བརྙན་འཕྲིན་ཚན་པར་མདོ་དབུས་ཁམས་གསུམ་གྱི་སྐད་ཐོག་རྒྱང་སྲིང་བྱེད་དགོས་པའི་དགོངས་འཆར་བཏོན་པ་བཞིན། ཕྱི་དྲིལ་བརྙན་འཕྲིན་ཚན་པའི་ནང་མདོ་དབུས་ཁམས་ཀྱི་སྐད་ཐོག་རྒྱང་བསྲིངས་བྱེད་ཐུབ་པ་བྱུང་ཡོད། ལས་མི་གསལ་བསྒྲགས་སྐབས་དབུས་གཙང་ནས་མི་ ༡༢ དང་། མདོ་སྨད་ནས་མི་ ༢ ། མདོ་སྟོད་ནས་མི་ ༡ བྱུང་སྟེ། ལས་དོད་ཆུང་ཆུང་ཞིག་ཕུལ་ནས་ཟླ་རེའི་གནས་ཚུལ་ཕྱོགས་སྡོམ་རྒྱང་སྲིང་ཞུས་ཡོད་ཀྱང་། ད་ལྟའི་ཆར་ལས་མི་དེ་དག་མེད་པ་ཆགས་འདུག སྙན་སྒྲོན་གནང་མཁན་ཡག་པོ་བྱུང་ཚེ་མུ་མཐུད་དུ་རྒྱང་བསྲིངས་བྱ་རྩིས་ཡོད་ལ། དེ་ནི་དགེ་མཚན་ཡོད་པ་ཞིག་དགོངས་ཀྱི་ཡོད། ཅེས་དང་། དེ་བཞིན་སྔོན་མ་བོད་མིའི་སྒྲིག་འཛུགས་ཀྱི་རྒྱ་ཡིག་དྲ་རྒྱའི་ཁ་བྱང་ལ་ཞིས་ཙང་ཞེས་བྲིས་པ་དེ་ (tibet.com) ནང་འགྱུར་བ་གཏོང་ཐུབ་ཡོད་པ་དང་། རྒྱ་ཡིག་ནང་བོད་ཡོངས་སུ་ཁྱབ་པའི་ཚིག་ཅིག་བེད་སྤྱོད་བྱེད་པའི་ཐོག་བགྲོ་གླེང་འགྲོ་བཞིན་ཡོད། ཅེས་གསུངས་སོང་།

གསར་འགོད་པ། བསྟན་འཛིན་ཕུར་བུ། བྱམས་པ་ཚེ་རིང་། རྩོམ་སྒྲིག་བྱེད་མཁན། སྐལ་བཟང་སྦྱིན་པ།