རྒྱ་གར་གྱི་རྒྱལ་ས་ལྡི་ལིར་བོད་དོན་ཞུ་གཏུག་གི་ལས་འགུལ་སྤེལ་གྱིན་འདུག  

རྒྱ་གར་གྱི་སྔོན་རྩིས་གྲོས་ཚོགས་དང་བསྟུན་བོད་ཀྱི་གཞུང་འབྲེལ་མ་ཡིན་པའི་ཚོགས་པ་ལྔས་གྲུབ་པའི་བོད་དོན་ཞུ་གཏུག་ལྷན་ཚོགས་ཀྱི་སྐུ་ཚབ་ཚོགས་ཆུང་ཞིག་གིས་ལྡི་ལི་ཁུལ་དུ་ཞུ་གཏུག་གི་ལས་འགུལ་ཐེངས་གཉིས་པ་དེ་སྤེལ་བཞིན་འདུག

ཟླ་འདིའི་ཕྱི་ཚེས་ ༡༧ ནས་ ༢༧ བར་གཞུང་འབྲེལ་མ་ཡིན་པའི་ཚོགས་པ་ལྔ་སྟེ།  དབུས་བོད་ཀྱི་གཞོན་ནུ་ལྷན་ཚོགས་དང་དབུས་བོད་ཀྱི་བུད་མེད་ལྷན་ཚོགས། བོད་རང་བཙན་སློབ་ཕྲུག་ཚོགས་པ། རྒྱལ་སྤྱིའི་བོད་དོན་འབྲེལ་མཐུད་ལས་ཁུངས། བོད་རྒྱལ་ཡོངས་མང་གཙོ་ཚོགས་པ་བཅས་ལས་གྲུབ་པའི་བོད་དོན་ཞུ་གཏུག་ཚོགས་ཆུང་ཞིག་གིས། རྒྱ་གར་གྱི་རྒྱལ་ས་ལྡི་ལི་རུ་བོད་དོན་ཞུ་གཏུག་གི་ལས་འགུལ་སྤེལ་མུས་ཡིན་ཞིང་། དེ་རིང་ཕྱི་ཟླ་ ༢༡ བར་རྒྱ་གར་གྱི་ཆབ་སྲིད་ཚོགས་པ་ཁག་དྲུག་གི་གྲོས་ཚོགས་འཐུས་མི་ ༡༩ ལ་མཇལ་འཕྲད་ཀྱིས་བོད་དོན་ཞུ་གཏུག་གནང་འདུག

ད་ལན་གྱི་བོད་དོན་ཞུ་གཏུག་གི་ལས་འགུལ་དེ་དང་འབྲེལ་ནས་བོད་ཀྱི་གཞོན་ནུ་ལྷན་ཚོགས་ཀྱི་དྲུང་ཆེ་བསོད་ནམས་ཚེ་རིང་ལགས་ཀྱིས་འདི་གའི་གསར་འགོད་པར། ད་ལན་རྒྱ་གར་གྱི་སྔོན་རྩིས་གྲོས་ཚོགས་དང་བསྟུན། བོད་དོན་ཞུ་གཏུག་ལྷན་ཚོགས་ཀྱིས་ཉིན་གྲངས་བཅུའི་རིང་རྒྱ་གར་གྱི་རྒྱལ་ས་ལྡི་ལི་རུ་བོད་དོན་ཞུ་གཏུག་གི་ལས་འགུལ་ཞིག་སྤེལ་མུས་ཡིན། དེ་རིང་ཕྱི་ཚེས་ ༢༡ བར་རྒྱ་གར་གྱི་གྲོས་ཚོགས་གོང་འོག་གཉིས་ཀྱི་ཆབ་སྲིད་ཚོགས་པ་དྲུག་དང་མངའ་སྡེ་འདྲ་མིན་བཅུ་ཡི་གྲོས་ཚོགས་འཐུས་མི་  ༡༩ ལ་ཐུག་འཕྲད་དང་། ཧི་མ་ཅལ་མངའ་སྡེའི་སྤྱི་ཁྱབ་བློན་ཆེན་ཟུར་བ་དང་། ཧི་མ་ཅལ་མངའ་སྡེའི་ད་ལྟའི་སྲིད་སྐྱོང་སོགས་ལ་ཐུག་འཕྲད་བྱ་རྒྱུའི་གོ་སྐབས་བྱུང་། ཞེས་བརྗོད་བྱུང་། 

ཡང་ཁོང་གིས། ད་ལན་དེ་སྔ་བོད་དོན་ཞུ་གཏུག་ཐེངས་དང་པོར་ཐུག་འཕྲད་ཟིན་པའི་རྒྱ་གར་གྲོས་ཚོགས་འཐུས་མི་དང་གསར་དུ་མཇལ་མོལ་འབྱུང་མཁན་རྣམས་ལ། བོད་དེ་རྒྱ་ནག་གཞུང་གིས་བཙན་འཛུལ་བྱས་པའི་རྒྱལ་ཁབ་ཅིག་གི་ངོ་བོའི་ཐོག་ནས་རྒྱབ་སྐྱོར་དང་རྒྱ་གར་གྲོས་ཚོགས་སུ་བོད་དོན་གླེང་སློང་དང་། གྲོས་ཚོགས་འཐུས་མི་དག་གིས་བོད་དང་རྒྱ་གར་གྱི་མཐའ་མཚམས་ཡིན་པ་ལས་རྒྱ་དཀར་ནག་གི་མཐའ་མཚམས་མིན་པའི་ཐད་ལ་གླེང་སློང་དགོས་པ། དེ་བཞིན་༧གོང་ས་རྒྱལ་བ་རིན་པོ་ཆེ་མཆོག་གི་གོ་སྟོན་སྲུང་གཙི་དང་འབྲེལ། ༧གོང་ས་རྒྱལ་བ་རིན་པོ་ཆེ་མཆོག་གི་མཛད་རྗེས་དག་རྒྱ་གར་གྲོས་ཚོགས་སུ་གླེང་དགོས་པ།  བོད་ནང་གི་ཛ་དྲག་གི་གནས་སྟངས་དང་བཅའ་སྡོད་སློབ་གྲྭ་ཁག་གི་སྐོར་ལ་གླེང་སློང་དགོས་པ།  རྒྱ་ནག་གཞུང་གིས་བོད་ཅེས་པའི་ཐ་སྙད་དེ་རྒྱལ་སྤྱིའི་སྤྱི་ཚོགས་ནང་ནག་གསུབ་ཏུ་གཏོང་ཐབས་བྱེད་མུས་ཡིན་པའི་ཐད་གླེང་སློང་དང་གོ་རྟོགས་སྤེལ་ཐབས་དང་། བོད་ནང་གི་ཁོར་ཡུག་གི་སྐོར་ལ་གླེང་སློང་གནང་བ་སོགས་དགོས་འདུན་དོན་ཚད་ལྔ་ཡི་ཐོག་ནས་བོད་དོན་ཞུ་གཏུག་གནང་མུས་ཡིན། ཞེས་བརྗོད་བྱུང་། 

བོད་དོན་ཞུ་གཏུག་གི་ཚོགས་ཆུང་དེའི་དམིགས་ཡུལ་གཙོ་བོ་ནི་རྒྱ་གར་གྱི་གྲོས་ཚོགས་འཐུས་མི་དང་གནད་ཡོད་མི་སྣའི་ཁྲོད་བོད་དོན་གོ་རྟོགས་སྤེལ་ཐབས་བྱ་རྒྱུ་ཡིན་པའི་མུར།  ད་ལན་གྱི་ཞུ་གཏུག་ལས་འགུལ་དེའི་ཁྲོད། རྒྱལ་སྤྱིའི་བོད་དོན་འབྲེལ་མཐུད་ལས་ཁུངས་ཀྱི་ཁོར་ཡུག་རིག་པའི་འབུམ་རམས་པ་བློ་བཟང་དབྱངས་འཛོམས་ལགས་དང་། དབུས་བོད་ཀྱི་གཞོན་ནུ་ལྷན་ཚོགས་ཀྱི་དྲུང་ཆེ་བསོད་ནམས་ཚེ་རིང་ལགས། དབུས་བོད་ཀྱི་བུད་མེད་ལྷན་ཚོགས་ཀྱི་དྲུང་ཆེ་བསྟན་འཛིན་ཉི་མ་ལགས། བོད་རྒྱལ་ཡོངས་མང་གཙོ་ཚོགས་པའི་ཚོགས་གཙོ་དགེ་འདུན་ཚེ་དཔལ་ལགས། བོད་རང་བཙན་སློབ་ཕྲུག་ཚོགས་པའི་ལས་འགུལ་འགན་འཛིན་བསྟན་འཛིན་ལེགས་ལྡན་ལགས། སྤྱི་འཐུས་ཚོགས་གཞོན་ཟུར་བ་ཨཅཱརྱ་ཡེ་ཤེས་ཕུན་ཚོགས་ལགས་བཅས་ཀྱིས་མཉམ་ཞུགས་གནང་མུས་ཡིན་འདུག་ལ། འདས་ལོའི་ཕྱི་ཟླ་ ༡༡ ནང་བོད་དོན་ཞུ་གཏུག་ཚོགས་ཆུང་དེས་རྒྱ་གར་གྱི་དགུན་དུས་གྲོས་ཚོགས་དང་བསྟུན། རྒྱ་གར་གྱི་ཆབ་སྲིད་ཚོགས་པ་ཁག་གི་གནད་ཡོད་མི་སྣ་དང་ཐུག་འཕྲད་བགྱིས་ཏེ། བོད་དོན་ཞུ་གཏུག་གི་ལས་འགུལ་ཐེངས་དང་པོ་དེ་སྤེལ་འདུག 

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།