༧རྒྱལ་དབང་ཀརྨ་པ་མཆོག་གོ་སྟོན་དང་ཆོས་ལུགས་ཀྱི་ཚོགས་ཆེན་ཐོག་ཕེབས་ཐུབ་མིན་ཐད་དྲི་བ་དྲིས་ལན་བྱས་སོང་།

དེ་རིང་སྐབས་ ༡༧ པའི་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དགུ་པའི་ལས་ཉིན་བརྒྱད་པའི་ཚོགས་ཐུན་གསུམ་པའི་སྟེང་། ཆོས་རིག་ལས་ཁུངས་ཀྱི་སྔོན་རྩིས་ཐོག་སྤྱི་ཡོངས་བགྲོ་གླེང་དང་གཏན་འབེབས་གནང་སོང་།

སྐབས་དེར་སྤྱི་འཐུས་ཀུན་དགའ་བསོད་སྟོབས་ལགས་ཀྱིས། ད་ལོ་གཞུང་འབྲེལ་གྱི་གོ་སྟོན་ཟབ་རྒྱས་དང་། ཆོས་ལུགས་ཀྱི་ཚོགས་ཆེན་ལ་སོགས་པ་མང་པོ་ཡོད་པའི་སྐབས་འདིར། བཀའ་ཤག་གིས་དབུ་ཁྲིད་བླ་ཆེན་རྣམ་པ་དང་བསྟན་བདག་བླ་ཆེན་རྣམ་པ་མང་པོ་གདན་འདྲེན་ཞུ་ཡི་ཡོད་པ་རེད། སྐབས་དེར་༧རྒྱལ་དབང་ཀརྨ་པ་མཆོག་གདན་འདྲེན་ཞུ་རྒྱུའི་འཆར་གཞི་ཡོད་མེད་དང་། དེའི་ཐོག་ལ་ལས་དོན་དང་ཕེབས་ཐུབ་རྒྱུར་གདེང་ཚོད་གང་འདྲ་ཡོད་སྐོར་དྲིས་པར། ཆོས་རིག་བཀའ་བློན་སྤེན་པ་ཚེ་རིང་མཆོག་གིས། གྲོས་ཚོགས་ནང་དུ་ཕྱི་གསལ་ནང་གསལ་བྱས་ནས་ཞུ་དགོས་རྒྱུ་ཡིན་མིན་དང་། འབྲེལ་ཡོད་ཆོས་བརྒྱུད་སྤྱི་འཐུས་ནས་ང་ཚོར་ཟུར་དུ་སྐད་ཆ་དྲིས་པ་ཡིན་ན་ལས་ཕུལ་ཆོག་གི་རེད། སྤྱི་ཡོངས་ནས་བླ་ཆེན་ཚང་མ་ལ་མགྲོན་ཤོག་ཕུལ་ཡོད་པ་རེད། ༧རྒྱལ་དབང་ཀརྨ་པ་མཆོག་གི་གནས་སྟངས་དེ་མང་ཆེ་བ་ཚང་མས་མཁྱེན་གྱི་ཡོད་པ་རེད། ང་ཚོས་ཞིབ་ཕྲ་འགྲོ་མི་དགོས་པའི་ཐོག་ནས་ད་ལྟའི་ཆར་ཕེབས་ཐུབ་ཀྱི་རེད་དང་མ་རེད་ཟེར་བའི་གནས་སྟངས་ཤིག་ད་ལྟ་ཤེས་མ་སོང་། ཞེས་ལན་འདེབས་གནང་སོང་།

སྤྱི་འཐུས་རྒྱལ་ལྡོང་ཕུར་པ་རྡོ་རྗེ་ལགས་ཀྱིས། ང་ཚོ་འཛིན་སྐྱོང་གི་ངོས་ནས་༧རྒྱལ་དབང་ཀརྨ་པ་མཆོག་རྒྱ་གར་ནང་ལོག་ཕེབས་ཐུབ་དགོས་རྒྱུའི་ཐད་ལ་སྐུ་ལས་བསྐྱོན་དགོས་རྒྱུ་ཧ་ཅང་གི་གལ་ཆེན་པོ་རེད་འདུག རྒྱ་གར་དབུས་གཞུང་གིས་དེའི་ཐད་དགོངས་པ་བཞེས་ཏེ་རྒྱ་གར་ནང་ཕེབས་རྒྱུ་གཅིག་པུ་ཙམ་མིན་པར་རྒྱ་གར་ནང་ཕེབས་ཚར་བའི་རྗེས་སུ་མུ་མཐུད་ནས་དཀའ་ངལ་མི་འཕྲད་པའི་ཐད་དགོངས་པ་བཞེས་དགོས་པ་དང་། འཛིན་སྐྱོང་གི་ངོས་ནས་དཀའ་ལས་རྒྱག་དགོས་པ་ཧ་ཅང་གི་གནད་འགག་ཅིག་རེད་འདུག ཅེས་དང་། གཞན་ཡང་སྤྱི་འཐུས་བསྟན་པ་ཡར་འཕེལ་ལགས་ཀྱིས་དཔལ་༧རྒྱལ་བ་ཀརྨ་པ་མཆོག་བོད་ནས་བློས་གཏོང་ཆེན་པོ་བྱས་ཏེ་རྒྱ་གར་ནང་ཕེབས་པ་དང་རྒྱ་གར་དུ་དཀའ་ངལ་མང་པོར་གདུང་ལེན་གནང་བའི་བརྒྱུད་རིམ་སོགས་ཀྱི་ཐོག་གླེང་སློང་གནང་སོང་།

ཆོས་རིག་བཀའ་བློན་སྤེན་པ་ཚེ་རིང་མཆོག་གིས། ང་ཚོའི་ནུས་པ་དང་གནས་སྟངས་ཀྱི་འོག་ནས་ང་ཚོས་ཞུ་འདོད་ག་རེ་ཡོད་པ་དེ་དག་ཕྱོགས་ཚང་མ་གསལ་པོ་ཆགས་ཡོད་བསམ་གྱི་འདུག གནད་དོན་ཁག་ཅིག་གཙང་མ་ཆགས་ཟིན་པ་ཡིན་ནའང་། གནད་དོན་གཞན་པ་ད་ལྟ་གཙང་མ་བཟོ་དགོས་པ་དེ་འདྲ་མང་པོ་ཞིག་ཡོད་པ་རེད། དེ་ཚོའི་ཐོག་ལ་བོད་མིའི་སྒྲིག་འཛུགས་ལ་འགན་ག་རེ་བསྐུར་བ་ཡིན་ནའང་། ང་ཚོར་ཞུ་རྒྱུའི་དང་ལེན་ཡོད། འདིའི་སྒང་ལ་ད་ལྟ་བར་དུ་ག་ཚོད་ཐུབ་ཐུབ་ཀྱིས་ཞུས་པ་ཡིན། མ་འོངས་པ་ཡིན་ནའང་ཞུ་རྒྱུའི་དམ་བཅའ་བརྟན་པོ་ཡིན། ཞེས་གསུངས་སོང་།

གསར་འགོད་པ། བྱམས་པ་ཚེ་རིང་། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།