རྒྱ་དཀར་ནག་གཉིས་ཀྱིས་ཧིན་བོད་མཐའ་མཚམས་ཁུལ་དུ་ཞི་འགྲིག་ཡོང་ཐབས་ཐད་གླེང་སློང་བྱས།

རྒྱ་དཀར་ནག་གཉིས་ཀྱི་སྐུ་ཚབ་ཚོགས་ཆུང་གི་ཐུག་འཕྲད་ཐེངས་ ༣༣ པའི་ཐོག་ཧིན་བོད་མཐའ་མཚམས་ཁུལ་དུ་ཞི་འགྲིག་དང་བརྟན་བརླིང་ཡོང་ཐབས་ཀྱི་ཐད་ལ་གླེང་སློང་གནང་འདུག

India and China held a high-level meeting in Beijing on Tuesday where both sides discussed the boundary issue. Photo:NDTV

ཁ་སང་ཕྱི་ཚེས་ ༢༥ ཉིན་རྒྱ་གར་ཕྱི་སྲིད་བློན་ཆེན་ལས་ཁུངས་ཀྱི་སྐུ་ཞབས་གྷུ་རང་དྷལ་(Gourangalal Das) མཆོག་གིས་སྣེ་འཁྲིད་པའི་རྒྱ་གར་གྱི་སྐུ་ཚབ་ཚོགས་ཆུང་ཞིག་གིས་རྒྱ་ནག་གི་རྒྱལ་ས་པེ་ཅིན་དུ་རྒྱ་ནག་གི་ཕྱི་སྲིད་བློན་ཆེན་ལས་ཁུངས་ཀྱི་རྒྱ་མཚོ་དང་རྒྱལ་མཚམས་ལས་དོན་གྱི་འགན་འཛིན་ཧོང་ལིང་(Hong Liang) ཟེར་བས་སྣེ་འཁྲིད་པའི་སྐུ་ཚབ་ཚོགས་ཆུང་ཞིག་དང་ཐུག་འཕྲད་ཀྱིས། རྒྱ་དཀར་ནག་གཉིས་ཀྱི་ས་མཚམས་ས་ཐིག་(LAC) གི་གནས་སྟངས་ལ་བསྐྱར་ཞིབ་བྱས་ཏེ། ས་ཐིག་གི་རྒྱུན་དུ་གནས་པའི་ཆུ་བོ་དང་གངས་རིན་པོ་ཆེ་སོགས་རྒྱལ་མཚམས་ལས་བརྒལ་བའི་མཉམ་ལས་དང་བརྗེ་རེས་ཀྱི་ལས་རིམ་ཁག་སྔ་ས་ནས་སླར་གསོ་བྱེད་པར་མོས་མཐུན་བྱུང་ཡོད་འདུག

གནད་དོན་དེ་དང་འབྲེལ་ནས་རྒྱ་ནག་ཕྱི་སྲིད་བློན་ཆེན་ལས་ཁུངས་ཀྱིས། ཕྱོགས་གཉིས་ཀྱིས་སྔོན་དུ་གྲོས་མཐུན་བྱུང་བ་དོན་འཁྱོལ་བྱེད་སླད། ཕྱོགས་ཡོངས་དང་གཏིང་ཟབ་པའི་བསམ་ཚུལ་བརྗེ་རེས་བྱས་ཏེ་བསྐྲུན་འཛུགས་རང་བཞིན་གྱི་མཉམ་ལས་དང་མདུན་ཕྱོགས་ལ་བལྟས་ཏེ་གྲོས་མོལ་བྱས་ཡོད་ཅིང་། ཕྱོགས་གཉིས་ཀྱི་མཉམ་ལས་ཀྱི་ཐོག་ནས་མཐའ་མཚམས་ཀྱི་རྩོད་རྙོག་ཞི་འགྲིག་བྱས་ཏེ། མཉམ་ལས་ཀྱི་ཐོག་ནས་ཁུལ་དེར་བརྟན་བརླིང་ཡོད་ཐབས་ཐད་གླེང་སློང་བྱས་སྐོར་སོགས་བརྗོད་འདུག

ད་ལན་རྒྱ་དཀར་ནག་གཉིས་ཀྱི་སྐུ་ཚབ་ཚོགས་ཆུང་གི་ཐུག་འཕྲད་སྐབས། ཧིན་བོད་མཐའ་མཚམས་ཁུལ་གྱི་རྒྱ་དཀར་ནག་གཉིས་ཀྱི་རྩོད་རྙོག་ཞི་འགྲིག མཉམ་ལས་ཀྱི་ནུས་པ་བསྐྱེད་ནས་ཁུལ་དེར་བརྟན་བརླིང་དང་ཞི་འཇགས་ཡོང་ཐབས་ལ་སོགས་པའི་ཕྱོགས་གཉིས་ཀྱི་རྩོད་གླེང་བྱེད་མུས་ཡིན་པའི་ཧིན་བོད་མཐའ་མཚམས་ཁུལ་སོགས་ཞི་འཇམ་ཡོང་ཐབས་དང་། འདས་ལོའི་ཕྱི་ཟླ་ ༡༢ ནང་རྒྱ་གར་གྱི་བདེ་སྲུང་སློབ་སྟོན་པ་སྐུ་ཞབས་ཨ་ཇི་ཐི་དྷོ་ཝལ་ (Ajit Doval ) དང་རྒྱ་ནག་ཕྱི་སྲིད་བློན་ཆེན་ཝང་ཡི་(Wang Yi) གཉིས་ཐུག་འཕྲད་སྐབས། གངས་རིན་པོ་ཆེར་གནས་མཇལ་འགག་སྒོ་ཁག་སླར་གསོ་བྱ་རྒྱུ་ཡིན་པ་སོགས་དང་འབྲེལ་པའི་དོན་ཚན་དྲུག་ཅན་ཞིག་ལ་མོས་མཐུན་བྱུང་ཡོད་པ་སོགས་ཀྱི་ཐད་ལའང་གླེང་སློང་བྱས་འདུག

འདས་ལོའི་ཕྱི་ཟླ་ ༡༢ ཚེས་ ༡༨ ཉིན་རྒྱ་གར་གྱི་བདེ་སྲུང་སློབ་སྟོན་པ་སྐུ་ཞབས་ཨ་ཇི་ཐི་དྷོ་ཝལ་(Ajit Doval ) དང་རྒྱ་ནག་ཕྱི་སྲིད་བློན་ཆེན་ཝང་ཡི་གཉིས་ཀྱི་སྣེ་འཁྲིད་པའི་ཚོགས་ཆུང་གཉིས་རྒྱ་ནག་གི་རྒྱལ་ས་པེ་ཅིན་དུ་ཐུག་འཕྲད་བྱས་ཏེ། རྒྱ་དཀར་ནག་གཉིས་ཀྱི་ཧིན་བོད་མཐའ་མཚམས་ཀྱི་རྩོད་གླེང་ཞི་འཇགས་ཡོང་ཐབས་དང་། ཕྱོགས་གཉིས་ཀྱི་མཉམ་ལས་ཡར་རྒྱས་གཏོང་ཐབས་ཚུད་པའི་དོན་ཚན་དྲུག་ལ་མོས་མཐུན་བྱུང་ཡོད་ལ། དེ་བཞིན་འདི་ལོའི་ཕྱི་ཟླ་ ༡ ཚེས་ ༢༧ ཉིན་རྒྱ་གར་ཕྱི་སྲིད་བློན་ཆེན་ལས་ཁུངས་ཀྱི་སྤྱི་ཁྱབ་དྲུང་ཆེ་སྐུ་ཞབས་ཝི་ཀི་རམ་ (Vikram Misri) མཆོག་གིས་རྒྱ་ནག་གི་རྒྱལ་ས་པེ་ཅིན་དུ་རྒྱ་ནག་གི་ཕྱི་སྲིད་བློན་ཆེན་ཝང་ཡི་ཟེར་བ་དང་ཐུག་འཕྲད་བྱས་ཏེ། རྒྱ་དཀར་ནག་གཉིས་ཀྱི་མཉམ་ལས་ཀྱི་ནུས་པ་སྐྱེད་ཐབས་དང་འབྲེལ་ལམ་སྲ་བརྟན་ཡོང་ཐབས་ཟེར་བ་ཞིག་གི་འོག་ནས། འདི་ལོའི་དབྱར་དུས་ནས་རྒྱ་ནག་གིས་རྒྱ་གར་གྱི་གནས་མཇལ་བ་རྣམས་བོད་ཀྱི་གངས་རིན་པོ་ཆེར་གནས་མཇལ་གཏང་རྒྱུ་དང་། རྒྱ་དཀར་ནག་གཉིས་ཀྱི་མཁའ་ལམ་སྒོ་ཕྱེ་ནས་གནམ་གྲུ་ཤར་གཏོང་བྱ་རྒྱུ་སོགས་ཚུད་པའི་མཉམ་ལས་ཀྱི་ཐད་ལ་གྲོས་མཐུན་བྱུང་ཡོད་འདུག

ཕྱི་ལོ་ ༢༠༢༠ ཟླ་ ༦ ཚེས་ ༡༥ ཉིན་བོད་དང་རྒྱ་གར་གྱི་ས་མཚམས་སུ་ཁེལ་བའི་གྷལ་ཝན་ལུང་གཞོངས་སུ་རྒྱ་དཀར་ནག་གཉིས་ཀྱི་དམག་མིའི་བར་དྲག་པོའི་འཁྲུག་འཛིང་ཤོར་ཏེ། རྒྱ་གར་གྱི་མཐའ་སྲུང་དམག་མི་ ༢༠ དང་རྒྱ་ནག་གི་མཐའ་སྲུང་དམག་མི་ ༤ ཡི་ཚེ་སྲོག་ཤོར་ཡོད་པའི་གནས་ཚུལ་ཐོན། ཕྱོགས་གཉིས་བར་ཐེངས་མང་པོར་གྲོས་མོལ་བྱས་ཡོད་ཀྱང་དོན་འབྲས་དེ་ཙམ་ཐོན་མེད་པར་བརྟེན་འཁོན་འཛིང་ཆེ་རུ་ཕྱིན་ཏེ། འདས་པའི་ལོ་ཤས་རིང་རྒྱ་དཀར་ནག་གཉིས་བར་ཧིན་བོད་མཐའ་མཚམས་ཁུལ་དུ་གདོང་ཐུག་ཡང་ཡང་བྱུང་ནས་གནས་སྟངས་ཛ་དྲག་ཅན་དུ་གྱུར། དེ་བཞིན་ཕྱོགས་གཉིས་ནས་མཐའ་མཚམས་བརྟན་སྲུང་ཆེད་གཞུང་ལམ་དང་དམག་དོན་ལྟེ་གནས་སྔར་ལས་མང་པོ་འཛུགས་སྐྲུན་བྱས་ཏེ་དམག་དོན་ནུས་པ་གོང་སྤེལ་དུ་གཏོང་བཞིན་ཡོད་པ་མ་ཟད། ཕྱི་ལོ་ ༢༠༡༧ ལོར་རྒྱ་ནག་གཞུང་གིས་རྒྱ་དཀར་ནག་གི་དམག་མི་གདོང་ཐུག་བྱུང་སའི་འབྲོག་ལམ་ཁུལ་དུ། ཉུང་མཐར་ཡང་དུད་ཚང་ ༢༢ ཅན་གྱི་གྲོང་ཚོ་ཞིག་གསར་འཛུགས་ཀྱིས་ཁུལ་དེར་བརྟན་སྲུང་དང་འབྲུག་རྒྱལ་ཁབ་ཁུལ་དུ་རྒྱ་ནག་གཞུང་གི་དབང་ཤུགས་སྐྱེད་གང་ཐུབ་བྱེད་མུས་ཡིན་པའི་གནས་ཚུལ་ཤེས་རྟོགས་བྱུང་ཡོད།

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།