དེ་རིང་༧གོང་ས་རྒྱལ་བ་རིན་པོ་ཆེ་མཆོག་ནས་འབར་མ་དང་ཐའེ་ལེན་ཊི་རུ་ས་ཡོམ་ཁྲོད་མི་རྒྱུ་གཉིས་ལ་གོད་ཆག་ཆེན་པོ་བྱུང་བར་ཐུགས་སྨོན་མཛད།
༧གོང་ས་མཆོག་ནས་འབར་མ་དང་ཐའེ་ལེན་ཊིའི་མི་མང་ལ་ཐུགས་སྨོན་མཛད།
ཁ་སང་ཕྱི་ཟླ་ ༣ ཚེས་ ༢༨ ཉིན་ཨེ་ཤ་ཡའི་ལྷོ་རྒྱུད་དུ་ཆགས་པའི་འབར་མ་རྒྱལ་ཁབ་ཀྱི་མན་ཌ་ལེ་(Mandalay) ཁུལ་སོགས་སུ་ཚད་རིམ ༧། ༧ ཅན་གྱི་ས་འགུལ་བརྒྱུགས་ནས། འབར་མ་དང་ཐའེ་ལེན་ཊིའི་མི་རྒྱུ་གཉིས་ལ་གོད་ཆག་ཆེན་པོ་ཞིག་ཐེབས་མུས་ཡིན་སྟབས། དེ་རིང་༧གོང་ས་རྒྱལ་བ་རིན་པོ་ཆེ་མཆོག་གིས་བཞུགས་སྒར་རྒྱལ་བའི་ཕོ་བྲང་ནས། འབར་མ་དང་ཐའེ་ལེན་ཊིའི་ས་ཡོམ་ཁྲོད་རྐྱེན་འདས་སུ་གྱུར་བ་རྣམས་ལ་བསྔོ་སྨོན་དང་ཤུལ་ལུས་ནང་མི་སོགས་ལ་ཐུགས་གསོ་མཛད་འདུག
༧གོང་ས་རྒྱལ་བ་རིན་པོ་ཆེ་མཆོག་གི་གསུང་འཕྲིན་ཁྲོད། ངོས་རང་གིས་འབར་མའི་ས་ཡོམ་གྱི་གོད་ཆག་ཁྲོད་དུ་རང་གི་སྤུན་ཉེ་རྣམས་འཆི་རྨས་ཐེབས་མཁན་གྱི་ཤུལ་ལུས་ནང་མི་རྣམས་ལ་ཐུགས་སྨོན་དང་། ས་འགུལ་གྱི་གོད་ཆག་འདིའི་ཁྲོད་འབར་མའི་ཁྱིམ་མཚེས་རྒྱལ་ཁབ་ཐའེ་ལེན་ཌི་གཙོས་གནོད་འཚེ་ཐེབས་མཁན་རྣམས་ལ་ཐུགས་སྨོན་མཛད་ཀྱིན་ཡོད། ད་ལྟ་མཉམ་འབྲེལ་རྒྱལ་ཚོགས་གཙོས་རྒྱ་གར་དང་རྒྱལ་ཁབ་ཁག་གིས་གནོད་འཚེ་ཐེབས་པའི་ཡུལ་དངོས་སུ་ངལ་སེལ་སོགས་ཀྱི་ཐད་ནས་རོགས་འདེགས་ཞུ་མུས་ཡིན་པ་ནི་ཆེས་བློ་སྟོབས་སྐྱེས་འོས་པ་ཞིག་རེད། ཅེས་གསུངས་འདུག
ཡང་༧གོང་ས་རྒྱལ་བ་རིན་པོ་ཆེ་མཆོག་ནས། འབར་མའི་ས་ཡོམ་གྱི་གོད་ཆག་ལ་གདུང་སེམས་མཉམ་སྐྱེད་མཚོན་ཆེད། མྱུར་སྐྱོབ་དང་ངལ་སེལ་གྱི་སླད་དུ་དགའ་ལྡན་ཕོ་བྲང་ཡིག་ཚང་ལ་སེམས་ཙམ་མཚོན་སླད་ཞལ་འདེབས་ཤིག་འབུལ་རྒྱུར་མངག་བཅོལ་བྱས་ཡོད། ཅེས་གསུངས་འདུག
ཁ་སང་ཕྱི་ཟླ་ ༣ ཚེས་ ༢༨ ཉིན་ཨེ་ཤ་ཡའི་ལྷོ་རྒྱུད་དུ་ཆགས་པའི་འབར་མ་རྒྱལ་ཁབ་ཀྱི་མན་ཌ་ལེ་(Mandalay) ཁུལ་སོགས་སུ་ཚད་རིམ ༧། ༧ ཅན་གྱི་ས་འགུལ་བརྒྱུགས་ནས། ད་བར་ཉུང་མཐར་མི་གྲངས་ ༡༠༠༢ རྐྱེན་འདས་དང་། མི་གྲངས་ ༢༣༧༦ ལ་རྨས་སྐྱོན། མི་གྲངས་ ༣༠ གར་སོང་ཆ་མེད་དུ་གྱུར་ཡོད་པ་མ་ཟད། རྒྱལ་ཁབ་དེའི་དགོན་པ་དང་། ལྷ་ཁང་གཙོས་སྡོད་ཁང་། གཞུང་ལམ་སོགས་ལ་གནོད་འཚེ་ཆེན་པོ་ཐེབས་ཡོད་པའི་ཁར། ས་ཡོམ་དེའི་འགུལ་ཤུགས་ཐའེ་ལན་ཌིའི་རྒྱལ་ས་བྷེན་ཀོག་ཁུལ་དུའང་བརྒྱུགས་ནས། ད་བར་ཉུང་མཐར་མི་གྲངས་ ༡༠ རྐྱེན་འདས་དང་། ཁུལ་དེར་འཛུགས་སྐྲུན་གྱི་ལས་ཀ་བྱེད་མུས་ཡིན་པའི་ཨར་ལས་བ་མི་གྲངས་ ༡༠༠ ལྷག་གར་སོང་ཆ་མེད་དུ་གྱུར་འདུག
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
