སྤྱི་འཐུས་ཚོགས་གཙོ་མཆོག་གིས་སྤྱི་ཚོགས་དྲ་རྒྱ་བེད་སྤྱོད་བྱས་ཏེ་བོད་དང་བོད་ཀྱི་རྩ་དོན་ཐོག་དྲིལ་བསྒྲགས་བྱ་རྒྱུ་གལ་ཆེན་ཡིན་པ་དང་། སྤྱི་ཚོགས་དྲ་རྒྱ་བེད་སྤྱོད་ལོག་པར་བཏང་ཚེ་སྤྱི་ཚོགས་སྤྱི་ཡོངས་ལ་བརྡབ་གསིག་ཐེབས་ཀྱི་ཡོད་པ་གསལ་པོ་ཡིན། དེར་བརྟེན་བོད་ཀྱི་རྩ་དོན་ཐོག་ཞབས་འདེགས་ཕྲན་བུ་ཞིག་ཞུ་ཐུབ་ན་སོ་སོ་གསོན་པའི་རིང་ལ་བྱས་རྗེས་ཆགས་ཀྱི་ཡོད་སྐོར་གསུངས་སོང་།
བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་མཇུག་བསྡོམས་གསུང་བཤད་གནང་སྐབས། གྲོས་ཚོགས་ནང་དགོངས་ཚུལ་བྱུང་བ་ཁག་ལ་གཞི་བཞག་ནས་སྔོན་རྩིས་ཀྱི་ཐོག་བསྲི་ཚགས་གནང་རྒྱུ་དང་། སྔོན་རྩིས་ཀྱི་ལས་རིམ་གང་དང་གང་བརྩམས་རུང་། དོན་དག་ལ་ཕན་ཐོགས་རྒྱུ་ཞིག་ཡོང་བར་འགན་ཁུར་བཞེས་ཐུབ་དགོས་རྒྱུ་གལ་ཆེན་པོ་རེད། དེ་སྔོན་བོད་པའི་ལོ་གསར་སྐབས་སྦེལ་ཀོབ་ཏུ་བཅར་བ་རེད། སྐབས་དེ་དུས་སྔོན་རྩིས་ཕུལ་སྟངས་ལ་ཆབ་སྲིད་དང་འཛིན་སྐྱོང་། སྤྱི་ཚོགས་བདེ་དོན་བཅས་སྡེ་ཚན་གསུམ་ནང་བསྡུས་ཐུབ་ཀྱི་ཡོད་པ་རེད། སྔོན་རྩིས་གཏོང་ས་མང་ཤོས་དེ་སྤྱི་ཚོགས་བདེ་དོན་ཆགས་ཀྱི་ཡོད་པ་རེད། འཕྲོད་བསྟེན་དང་ཤེས་ཡོན་སོགས་རིགས་གཅིག་ལ་ང་ཚོས་མ་གཏོང་ཀ་མེད་ཆགས་ཀྱི་ཡོད་པ་རེད། དེ་མིན་བཙན་བྱོལ་དུ་ཆགས་ནས་ལོ་ངོ་ ༦༦ ཆགས་ཀྱི་ཡོད་པ་དང་། རང་ཁ་རང་གསོའི་འགྲེལ་བཤད་སྣ་ཚོགས་པ་གནང་གི་འདུག་སྟེ། སོ་སོས་གཞན་ལ་བརྟེན་མ་དགོས་པ་ཞིག་ཡོང་ཐུབ་དགོས་རྒྱུ་གལ་ཆེན་པོ་རེད་བསམ་གྱི་འདུག མང་ཚོགས་ལ་དཀའ་ངལ་ཡོད་ཀྱང་། དཀལ་ངལ་དེ་སེལ་བར་སོ་སོའི་ངོས་ནས་ཐབས་ཤེས་བྱེད་ཐུབ་དགོས་རྒྱུ་དང་། གཞུང་ལ་ཡིན་ཅིག་མིན་ཅིག་ཞུས་ནས་ཡོང་དགོས་པའི་རེ་བ་དེ་ཏོག་ཙམ་ཉུང་དུ་གཏོང་ཐུབ་རྒྱུའི་འབད་བརྩོན་ཞུ་རྒྱུ་དང་། གཞུང་གི་ཆབ་སྲིད་དང་དཔལ་འབྱོར་གྱི་ལས་དོན་མང་པོ་ཞིག་བོད་སྤྱི་ལ་ཕན་པའི་ལས་དོན་ཐོག་གཏོང་ཐུབ་པའི་གོ་སྐབས་དང་རྣམ་པ་ཤུགས་ཆེ་བ་ཐོན་པ་ཡིན་ན། བཙན་བྱོལ་གྱི་སྤྱི་ཚོགས་ཀྱི་གནས་སྟངས་དེ་ཆབ་སྲིད་དང་། དཔལ་འབྱོར། རིག་གནས་སོགས་གང་ཅིའི་ཐོག་ནས་ཡར་ཐོན་ཡོང་ཐུབ་རྒྱུར་དཔེ་མཚོན་བཞག་ཐུབ་རྒྱུའི་གོ་སྐབས་ཤིག་ཏན་ཏན་ཡོང་གི་རེད་བསམ་གྱི་འདུག དེ་ཡོང་ཐུབ་རྒྱུར་ཚང་མས་འབད་བརྩོན་བྱ་རྒྱུ་གལ་ཆེན་པོ་རེད་འདུག ཉམ་ཐག་དངོས་གནས་དཀའ་ངལ་ཅན་ཡིན་ན་ང་ཚོས་གཏོང་དགོས་ངེས་ཅན་ཆགས་ཀྱི་ཡོད་པ་རེད། བཙན་བྱོལ་བོད་མིའི་བཅའ་ཁྲིམས་ནང་དུའང་བོད་ཀྱི་རྩ་དོན་ཐོག་བོད་དོན་བདེན་མཐའ་གསལ་ཐུབ་རྒྱུ་དང་། བཙན་བྱོལ་བོད་མིའི་སྤྱི་ཚོགས་ཀྱི་བདེ་དོན་ལ་གཟིགས་སྐྱོང་བྱེད་དགོས་པའི་འགན་བསྐུར་ཡོད་པ་རེད། འགན་བསྐུར་བ་གཞིར་བཟུང་ལག་ལེན་ཐོག་ནས་ཕེབས་དགོས་རེད་དེ། སྤྱི་ཚོགས་ཀྱི་ངོས་ནས་དེ་ལ་ཆ་ཤས་བཞེས་སྟངས་ཀྱི་ཐོག་ལ་ཡར་རྒྱས་གཏོང་ཐུབ་དགོས་རྒྱུ་གལ་ཆེན་པོ་རེད། ཅེས་གསུངས།
ཚོགས་གཙོ་མཆོག་གིས། བཙན་བྱོལ་དུ་གྱར་ནས་ལོ་ངོ་ ༦༦ ཆགས་ཡོད་པ་དང་། ང་ཚོ་ཆབ་སྲིད་ཀྱི་སྐྱབས་བཅོལ་བ་ཆགས་པ་རེད། གཙོ་བོ་ཆབ་སྲིད་ཀྱི་འཐབ་རྩོད་ཐོག་ལ་བོད་མི་གནམ་བསྟན་ཡོངས་ནས་འགན་ཁུར་ཆེ་ཙམ་བཞེས་ཐུབ་དགོས་རྒྱུ་གལ་ཆེན་པོ་རེད། དེ་བཞིན་བོད་ནང་བོད་མི་ཚོའི་བློས་གཏོང་དང་། ཉིན་འཁྱོལ་ཡང་མཚན་མ་འཁྱོལ་བའི་འགྲོ་བ་མིའི་ཐོབ་ཐང་གི་གནས་སྟངས་དང་། ཆོས་དད་རང་དབང་། ཁོར་ཡུག་གི་གནས་སྟངས། འདུ་འཛོམས་ཀྱི་རང་དབང་། སྨྲ་བརྗོད་རང་དབང་། སོ་སོའི་སྐད་ཡིག་བེད་སྤྱོད་གཏོང་མི་ཆོག་པའི་གནས་སྟངས་སོགས་ལ་གཞི་བཞག་ནས་ང་ཚོས་གདོང་ལེན་གནང་ཕྱོགས་དེ་གང་འདྲ་དགོས་ཀྱི་འདུག དེང་སང་བོད་ཕྱི་ནང་གཉིས་ཀྱི་གནས་ཚུལ་དེ་ཚོ་གང་ལ་གང་འཚམ་ང་ཚོས་ཚོད་དཔག་བྱེད་ཐུབ་པའི་གནས་སྟངས་ཆགས་ཀྱི་ཡོད་པ་རེད། སྤྱི་ཚོགས་དྲ་རྒྱ་བརྒྱུད་ནས་བོད་ནང་གི་བོད་མི་ཚོས་བཀའ་མོལ་གསུང་ཕྱོགས་སོགས་ང་ཚོས་གང་ལ་གང་འཚམ་རྟོགས་ཐུབ་ཀྱི་འདུག ང་ཚོ་བཙན་བྱོལ་སྤྱི་ཚོགས་ཀྱི་གནས་བབ་ཡིན་རུང་གང་ལ་གང་འཚམ་བོད་ནང་གི་བོད་མི་ཚོས་རྟོགས་ཐུབ་ཀྱི་ཡོད་པ་རེད། དེར་བརྟེན་གཅིག་གིས་གཅིག་ལ་སེམས་ཤུགས་སྤར་རྒྱུ་དང་། གྲོགས་སུ་འགྲོ་ཐུབ་པར་འབད་བརྩོན་ག་རེ་ཞུ་དགོས་པའི་ཐོག་ལ་ཏན་ཏན་གྱིས་དགོངས་པ་ཆེན་པོ་ཞིག་བཞེས་རྒྱུ་ཡོད་རེད་བསམ་གྱི་འདུག རྒྱལ་སྤྱིའི་ཆབ་སྲིད་ནང་དུ་བོད་དོན་ཟེར་དུས་ཨ་རི་ཚུད་པའི་ཡུ་རོབ་དང་། ཨེ་ཤ་ཡའི་ནང་དུ་བོད་ཀྱི་གནད་དོན་དེ་རིམ་པ་དང་པོའི་ནང་བསླེབས་མ་ཐུབ་ནའང་། ཚང་མས་ཐུགས་སྣང་གནང་སའི་གནས་སྟངས་ཤིག་ཆགས་བསྡད་ཡོད་པ་རེད། ང་ཚོའི་ངོས་ནས་ཟུར་དུ་ཐོན་ནས་བོད་ཟེར་བའི་རྣམ་པ་ཐོན་ཐུབ་རྒྱུར་སོ་སོའི་ངོས་ནས་ག་རེ་བྱེད་དགོས་ཀྱི་ཡོད་པ་དང་། འདུ་ཤེས་ག་རེ་འཁུར་དགོས་ཀྱི་འདུག བོད་ཟེར་བའི་རྣམ་པ་མ་ཡལ་བར་ག་རེ་བྱེད་དགོས་ཀྱི་འདུག དེ་ཚོའི་ཐོག་དགོངས་པ་བཞེས་དགོས་རྒྱུ་གལ་ཆེན་པོ་རེད་འདུག སྤྱི་ཚོགས་དྲ་རྒྱ་བེད་སྤྱོད་བྱས་ཏེ་བོད་དང་བོད་མི། བོད་ཀྱི་རྩ་དོན་ཐོག་དྲིལ་བསྒྲགས་བྱ་དགོས་པ་དང་། སྤྱི་ཚོགས་དྲ་རྒྱ་བེད་སྤྱོད་ལོག་པར་བཏང་སྟེ་སྤྱི་ཚོགས་སྤྱི་ཡོངས་ལ་བརྡབ་གསིག་ཐེབས་ཀྱི་ཡོད་པ་གསལ་པོ་རེད། བོད་དང་བོད་མི་རིགས། བོད་ཀྱི་རིག་གཞུང་དང་། བོད་ཀྱི་རྩ་དོན་ཐོག་ཞབས་འདེགས་ཕྲན་བུ་ཞུ་ཐུབ་ན་ཏན་ཏན་གྱིས་སོ་སོ་གསོན་པའི་རིང་ལ་བྱས་རྗེས་ཆགས་ཀྱི་ཡོད་པ་རེད། ཅེས་གསུངས།
ཡང་ཚོགས་གཙོ་མཆོག་གིས། ༧གོང་ས་རྒྱལ་བ་རིན་པོ་ཆེ་མཆོག་སྐུ་ཚེ་ཡུན་རིང་བཞུགས་རྒྱུ་ནི་བོད་མི་ཚང་མའི་བསམ་འདུན་གཅིག་ཆགས་ཀྱི་ཡོད་ལ། དེ་ནི་གལ་ཆེན་པོ་ཞིག་ཆགས་ཀྱི་ཡོད། ༧གོང་ས་མཆོག་ནས་ལོ་ངོ་ ༩༠ རིང་བོད་བསྟན་སྲིད་ཀྱི་ཆེད་དུ་ཕྱག་ལས་མང་པོ་ཞིག་གནང་ཡོད་པ་དྲན་གསོ་བྱེད་དགོས། ༧གོང་ས་མཆོག་གི་དགོངས་གཞི་ཕྱི་ནང་གསང་གསུམ་ནས་མང་པོ་ཡོད་ཀྱང་། ང་ཚོ་ཐུན་མོང་གི་སྣང་ངོར་དགོངས་གཞི་དེ་དག་གང་འཚམ་ཚོད་དཔག་བྱེད་ཐུབ་ཀྱི་ཡོད། ༧གོང་ས་མཆོག་གི་དགོངས་གཞི་བསྒྲུབ་པར་གང་དག་བྱེད་དགོས་པ་དང་། དགོངས་གཞི་དང་འགལ་བའི་ཆ་དག་ཉིན་རེ་བཞིན་ཉུང་དུ་གཏོང་བའི་ཐབས་ཤེས་བྱས་ཚེ། ༧མགོན་པོ་གང་ཉིད་མཆོག་གི་སྐུ་ཚེ་ལ་བར་ཆད་མི་ཡོང་བར་བོད་མི་སྤྱི་མཐུན་གྱི་བསོད་ནམས་བསགས་པར་ཏན་ཏན་ཕན་ཐོགས་ཀྱི་རེད། དེ་བཞིན་སོ་སོའི་བློས་བཅད་ཐོག་ནས་ཚེ་ཐར་སྲོག་བསླུ་གཏོང་བ་དང་། རྣམ་དཀར་གྱི་དགེ་བ་བསྒྲུབ་པ། མ་ཎི་ཕྲེང་བསྐོར་རེའང་དགེ་བའི་རྩ་བར་བསྔོས་པ་ཡིན་ན། ང་ཚོས་ཐུགས་ཕན་ཆེན་པོ་གསོས་ཀྱི་ཡོད་ཅིང་། དེ་དག་ཚང་མ་ཀུན་སློང་བཟང་བོ་ཐོག་ནས་གནང་ཐུབ་ཚེ་འབྲས་བུ་གཡུར་དུ་ཟ་བ་ཞིག་སྨིན་ཐུབ་ཀྱི་རེད། ཅེས་གསུངས་སོང་།
གསར་འགོད་པ། བྱམས་པ་ཚེ་རིང་། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
![China's Vice Minister of Foreign Affairs Sun Weidong in Tokyo, Japan in 2023 [File: Issei Kato/Pool via Reuters]](https://tibettimes.net/wp-content/uploads/2026/04/Screen-Shot-2026-04-15-at-2.32.14-PM-360x180.png)
