ཨ་རིས་རྒྱ་ནག་གི་དཔོན་རིགས་ཁག་ཅིག་ལ་འགྲོ་འོང་གི་ཁྲིམས་ཆད་བཅད་འདུག

རྒྱ་ནག་གཞུང་གིས་ཨ་རི་དང་རྒྱལ་སྤྱིའི་གནད་ཡོད་མི་སྣ་ཁག་བོད་དུ་བསྐྱོད་པར་བཀག་འགོག་བྱས་ཏེ་འདྲ་མཉམ་མིན་པའི་ཁྲིམས་ལག་བསྟར་བྱེད་ཀྱིན་ཡོད་སྟབས། ཨ་རིས་རྒྱ་ནག་གི་འབྲེལ་ཡོད་དཔོན་རིགས་ཁག་ཅིག་གི་འགྲོ་འོང་ལ་བཀག་སྡོམ་ཁྲིམས་ཆད་བཅད་ཡོད་འདུག

ཁ་སང་ཕྱི་ཚེས་ ༣༡ ཉིན་ཨ་རིའི་རྒྱལ་སྲིད་དྲུང་ཆེ་མར་ཁོ་རོ་བྷོའུ་ལགས་ཀྱིས། ཕྱི་ལོ་ ༢༠༡༨ ལོའི་བོད་ནང་འགྲོ་འོང་འདྲ་མཉམ་གྱི་ཨ་རིའི་སྲིད་ཇུས་དང་འབྲེལ་ནས། རྒྱ་ནག་དམར་ཤོག་ཚོགས་པས་ད་དུང་ཡང་ཨ་རི་གཞུང་འབྲེལ་གནད་མི་སྣ་ཁག་གཙོས་པའི་གསར་འགོད་པ་དང་རྒྱལ་སྤྱིའི་ཚོགས་སྡེ་ཁག་གི་མི་སྣ་རྣམསབོད་ནང་དུ་བསྐྱོད་པར་བཀག་སྡོམ་བྱེད་མུས་ཡིན་སྟབས། ཨ་རིས་རྒྱ་ནག་དམར་ཤོག་ཚོགས་པའི་འབྲེལ་ཡོད་དཔོན་རིགས་ཁག་ཅིག་གི་འགྲོ་འོང་ལ་བཀག་སྡོམ་ཁྲིམས་ཆད་བཅད་ཡོད་སྐོར་བརྗོད་འདུག

ཨ་རིའི་ཕྱི་སྲིད་བློན་ཆེན་མར་ཁོ་རོ་བྷོའུ་ལགས་ཀྱིས། རྒྱ་ནག་གི་དཔོན་རིགས་ཚོ་དང་གསར་འགོད་པ་དག་གིས་ཡུན་རིང་ཨ་རིའི་ནང་འགྲོ་འོང་གི་སྟབས་བདེར་སྤྱོད་བཞིན་ཡོད། འོན་ཀྱང་། རྒྱ་ནག་དམར་ཤོག་ཚོགས་པས་ཨ་རིའི་གཞུང་འབྲེལ་མི་སྣ་དང་གསར་འགོད་པ། རྒྱལ་སྤྱིའི་གནད་ཡོད་མི་སྣ་ཁག་བོད་རང་སྐྱོང་ལྗོངས་ཟེར་བ་དང་རྒྱ་ནག་གི་བོད་ཀྱི་ས་ཁུལ་གཞན་གྱི་ནང་དུ་འགྲོ་འོང་བྱེད་པར་བཀག་སྡོམ་བྱས་ཡོད། ཨ་རིའི་གཞུང་འབྲེལ་མི་སྣ་དག་གིས་ཨ་རིའི་མི་སེར་རྣམས་བོད་ནང་དུ་བསྐྱོད་པའི་གོ་སྐབས་བསྐྲུན་ཐུབ་མེད། འགྲོ་འོང་འདྲ་མཉམ་མིན་པའི་གནས་སྟངས་འདི་ནི་ངོས་ལེན་བྱ་ཐབས་བྲལ་བས། ངས་དམ་དྲག་ཆེ་བའི་བོད་རང་སྐྱོང་ལྗོངས་ཟེར་བ་དང་རྒྱ་ནག་གི་བོད་ཀྱི་ས་ཁུལ་གཞན་དུ་ཨ་རིའི་གནད་ཡོད་མི་སྣ་དང་འབྲེལ་ཡོད་ཁག་འཕྲལ་མ་མྱུར་དུ་འགྲོ་འོང་བྱེད་དུ་འཇུག་པར་རྒྱ་ནག་དམར་ཤོག་ཚོགས་པར་ནན་སྐུལ་བྱེད་བཞིན་ཡོད། ཅེས་བརྗོད་འདུག

ཐེངས་འདིའི་ཕྱི་སྲིད་བློན་ཆེན་མཆོག་གི་བསྒྲགས་གཏམ་ནང་། བོད་རང་སྐྱོང་ལྗོངས་དང་རྒྱ་ནག་གི་བོད་ཀྱི་ས་ཁུལ་གཞན་ཞེས་བཀོད་འདུག་ལ། ཨ་རིས་འགྲོ་འོང་བཀག་སྡོམ་གྱི་ཁྲིམས་ཆད་བཀལ་བའི་རྒྱ་ནག་དམར་ཤོག་ཚོགས་པའི་དཔོན་རིགས་དག་གི་མིང་ཐེར་འདོན་བྱས་མེད་ཀྱང་། ཨ་རིའི་ཕྱི་སྲིད་ལྷན་ཁང་གིས། རྒྱ་ནག་གཞུང་གིས་བོད་མིའི་ཆོས་དད་རང་དབང་དང་། རིག་གཞུང་དང་སྐད་ཡིག་སྲུང་སྐྱོབ་སོགས་ལ་ཐེ་གཏོགས་མི་བྱེད་པར་གུས་བརྩི་བྱེད་དགོས་པ་སོགས་ནན་བརྗོད་བྱས་དང་བྱེད་མུས་ཡིན་སྐོར་གསལ་འདུག

ཨ་རིའི་བོད་ནང་འགྲོ་འོང་འདྲ་མཉམ་གྱི་ཁྲིམས་དེ་ཕྱི་ལོ་ ༢༠༡༨ ནང་ཨ་རིའི་གྲོས་ཚོགས་གོང་འོག་གཉིས་ནས་སྔ་གཞུག་ཏུ་རྒྱབ་སྐྱོར་ཐོབ་སྟེ། ཕྱི་ལོ་ ༢༠༡༨ ཟླ་ ༡༢ ཚེས་ ༡༩ ཉིན་ཨ་རིའི་སྲིད་འཛིན་ཊོམ་ཕུ་མཆོག་གིས་མཚན་རྟགས་བསྐྱོན་ཏེ་ཨ་རིའི་ཁྲིམས་སུ་གཏན་འབེབས་གནང་ཡོད་པ་དང་། ཁྲིམས་དེའི་དམིགས་ཡུལ་ནི་རྒྱ་ནག་གཞུང་གིས་བོད་ནང་ཨ་རིའི་མི་སེར་གཙོས་ཕྱིའི་རྒྱལ་ཁབ་ཁག་གི་མགོ་འཁྲིད་དང་ཆེད་མཁས་པ། གསར་འགོད་པ་སོགས་འདྲ་མཉམ་དང་རང་དབང་གིས་གཏོང་གི་མེད་པའི་གནས་སྟངས་ལ་ཡ་ལན་སྤྲོད་ཐབས་ཤིག་ཡིན་ཞིང་། དམིགས་བསལ་རྒྱ་ནག་དམར་ཤོག་ཚོགས་པའི་འབྲེལ་ཡོད་དཔོན་རིགས་ཚོའི་འགྲོ་འོང་བཀག་སྡོམ་བྱས་ཏེ་ཡ་ལན་སྤྲོད་ཀྱིན་ཡོད་པ་ཞིག་ཡིན་འདུག

གསར་འགོད་པ། སྐལ་བཟང་སྦྱིན་པ།