རྒྱ་ནག་གཞུང་གིས་སྤྲུལ་སྐུ་ཧཱུྃ་ཀར་རྡོ་རྗེ་མཆོག་སྐུ་བཀྲོངས་ཡོད་འདུག

རྒྱ་ནག་གཞུང་གིས་བོད་མགོ་ལོག་དགའ་བདེ་རྫོང་ལུང་སྔོན་དགོན་པའི་ཁྲི་པ་སྤྲུལ་སྐུ་ཧཱུྃ་ཀར་རྡོ་རྗེ་མཆོག་སྐུ་གྲོངས་ཟིན་སྐོར་གྱི་བརྡ་ཡིག་ཅིག་སྤྲད་ཡོད་པ་ལས་སྐུ་ཕུང་རྩིས་སྤྲད་མི་འདུག

ཕྱི་ལོ་ ༢༠༢༤ ལོར་སྤྲུལ་སྐུ་ཧཱུྃ་ཀར་རྡོ་རྗེ་མཆོག་རྒྱ་ནག་གཞུང་གིས་འཛིན་བཟུང་བྱས་ཡོད་མེད་ཀྱི་གནས་ཚུལ་ཐོན་ཡོད་ཀྱང་།  ལོ་དེའི་ཕྱི་ཟླ་ ༨ པའི་ནང་རྒྱ་ནག་གཞུང་གིས་སྤྲུལ་སྐུ་ཁོང་བོར་བརླག་ཏུ་ཕྱིན་ཡོད་སྐོར་བསྒྲགས་ཡོད་པ་རེད། ཕྱིས་སུ་སྤྲུལ་སྐུ་ཁོང་ཕྱིའི་རྒྱལ་ཁབ་ཅིག་ནང་བཙན་བྱོལ་དུ་ཕེབས་ཐུབ་ཡོད་སྐོར་དང་།  ཡང་རྒྱ་ནག་གཞུང་གིས་འཛིན་བཟུང་བྱས་ཡོད་སྐོར་སོགས་ཀྱི་གནས་ཚུལ་འདྲ་མིན་ཐོན་ཡོད་ཀྱང་། དེ་རིང་འདི་ག་བོད་ཀྱི་དུས་བབ་གསར་ཁང་གི་ཁུངས་ལྡན་གནས་ཚུལ་མཁོ་སྤྲོད་པས། དེ་རིང་ཞོགས་པར་རྒྱ་ནག་དམར་གཞུང་གིས་མགོ་ལོག་དགའ་བདེ་རྫོང་ལུང་སྔོན་དགོན་པའི་མཁན་པོ་སོགས་གནད་ཡོད་མི་སྣ་བདུན་བརྒྱད་ཅིག་ལ་སྤྲུལ་སྐུ་ཁོང་སྐུ་གྲོངས་ཟིན་སྐོར་བརྗོད་པ་ཙམ་ལས་ས་གནས་གང་དུ་ག་འདྲ་སྐུ་གྲོངས་ཡོད་མེད་སོགས་ཀྱི་གནས་ཚུལ་གང་ཡང་འགྲེལ་བརྗོད་བྱས་མི་འདུག་ཀྱང་། ཕྱིས་སུ་ཕྱི་ཟླ་ ༣ ཚེས་ ༢༨ ཉིན་ཝེ་ཐི་ནམ་གྱི་རྒྱལ་སྤྱིའི་སྨན་ཁང་(Vinmec Central Park International Hospital )ནང་སྐུ་གྲོངས་ཡོད་སྐོར་གྱི་གནས་ཚུལ་ཐོན་ཡོད་པ་རེད།

རྒྱ་ནག་དམར་གཞུང་གིས་སྤྲུལ་སྐུར་ནག་ཉེས་ག་རེ་བཙུགས་ཡོད་མེད་ཐད་འདི་གའི་གནས་ཚུལ་མཁོ་སྤྲོད་པས། འདས་ལོར་རྒྱ་ནག་གཞུང་གིས་ངོས་འཛིན་བྱས་པའི་པཎ་ཆེན་རྒྱལ་མཚན་ནོར་བུ་ལགས་མགོ་ལོག་ཁུལ་དུ་བསླེབས་སྐབས་རྒྱ་གཞུང་གི་རེ་འདོད་ལྟར་སྣེ་ལེན་ཟབ་རྒྱས་ཞུས་མེད་སྐོར་དང་། གོང་རིམ་གྱི་བཀའ་ལ་མི་ཉན་པར་དགོན་པ་དང་སློབ་གྲྭ་མང་པོ་སྒེར་གྱིས་བཙུགས་པ། ཉམ་ཆུང་དབུལ་ཕོངས་ཀྱི་ཐོབ་ཐང་རྩོད་ལེན་གནང་ནས་རྙོག་ཟིང་བསླངས་ཡོད་སྐོར་གྱི་ཉེས་མིང་གཡོགས་ཏེ་སྐུ་བཀྲོངས་ཡོད་སྐོར་འགྲེལ་བརྗོད་གནང་བྱུང་།

བོད་ཕྱི་ནང་གཉིས་སུ་སྤྲུལ་སྐུ་ཁོང་གི་དད་ལྡན་པ་ཧ་ཅང་མང་པོ་ཡོད་འདུག་ལ། དེ་རིང་ཡིད་སྐྱོའི་གནས་ཚུལ་ཐོན་འཕྲལ་ཁོང་གི་སློབ་བུ་ཞིག་གིས་སྐད་འཕྲིན་དྲ་སྟེགས་སྟེང་། གློ་བུར་དབྱིངས་སུ་གཤེགས་པའི་རྣམ་ཐར་ནི། ། སྙིང་ལ་ལྕགས་ཀྱུས་བཏབ་པའི་དཔེར་མ་འོས། ། དགོངས་ཤིག་དགོངས་ཤིག་ཡབ་ཆེན་བཀའ་དྲིན་ཅན།  ཞེས་དང་། ཡང་སྐྱོ་སྡུག་སེམས་ལ་མྱོང་བའི་དྭ་བུ་དག། དབུགས་ཀྱི་རྒྱུ་བ་ལྟོ་བར་མི་ཤོང་ནས།། ཤུགས་རིང་ཤོར་བའང་ཁྱེད་ལ་གདུང་བའི་མཐུ།། ཞེས་སོགས་བརྗོད་དེ་ཁོང་གི་སྐུ་པར་རྣམས་དྲ་ལམ་དུ་བཀྲམས་འདུག

སྤྲུལ་སྐུ་ཧཱུྃ་ཀར་རྡོ་རྗེ་མཆོག་ནི་བོད་ནང་སྙན་གྲགས་ཡོད་པའི་ལུང་སྔོན་དགོན་ཕྱག་འདེབས་མཁན་སྤྲུལ་སྐུ་པདྨ་གཏུམ་པོ་མཆོག་གི་སྲས་ཡིན་ཞིང་། ཕྱི་ལོ་ ༢༠༠༤ ལོར་ཁོང་གིས་མཚོ་སྔོན་ཞིང་ཆེན་གེ་སར་གཞན་ཕན་ཐེབས་རྩ་གསར་འཛུགས་གནང་སྟེ་གེ་སར་རིག་གནས་རྒྱུན་འཛིན་ཐད་ཕྱག་ལས་མང་པོ་གནང་།  ཕྱི་ལོ་ ༢༠༠༧ ལོ་ནས་མགོ་ལོག་ཁུལ་སྲིད་གཞུང་དང་སློབ་གསོ་ཁང་གི་ཆོག་མཆན་ཐོབ་པ་བརྒྱུད་དགེ་སློབ་ཆིག་སྟོང་ཙམ་ཡོད་པའི་ཧཱུྃ་ཀར་རྡོ་རྗེ་མི་རིགས་ལག་རྩལ་མཐོ་འབྲིང་གསར་འཛུགས་གནང་བ་སོགས་བོད་ཁུལ་གྱི་རོང་འབྲོག་གི་བྱིས་པ་སྟོང་ཕྲག་མང་པོར་རིན་མེད་ཐོག་ཤེས་ཡོན་སློབ་སྦྱོང་གི་གོ་སྐབས་ཐོབ་སླད་སློབ་གྲྭ་ཆུང་འབྲིང་ ༡༤ ཙམ་སྔ་གཞུག་ཏུ་ཆེད་འཛུགས་གནང་ཡོད་པ་དང་། དེ་བཞིན་དགོན་པ་དང་བཤད་གྲྭ་མང་པོ་ཕྱག་བཏབ་སྟེ་བོད་ཀྱི་ཆོས་དང་རིག་གཞུང་སྐད་ཡིག་སོགས་མི་ཉམས་རྒྱུན་འཛིན་དང་ཉམས་པ་སླར་གསོའི་ཆེད་མཛད་འཕྲིན་རླབས་ཆེན་བསྐྱངས་ཡོད་པར་བརྟེན། རྒྱ་ནག་གཞུང་གིས་ཁོང་ལ་ཆབ་སྲིད་ཀྱི་སྙོན་འཛུགས་སྣ་ཚོགས་བྱས་ཡོད་འདུག

སྤྲུལ་སྐུ་ཧཱུྃ་ཀར་རྡོ་རྗེ་མཆོག་ནི་ཕྱི་ལོ་ ༡༩༦༩ ལོར་བོད་མགོ་ལོག་ཁུལ་དགའ་བདེ་རྫོང་ཁོངས་སུ་ཡབ་བླ་མ་༧པདྨ་གཏུམ་དྲག་རྡོ་རྗེ་མཆོག་དང་། ཡུམ་ཀ་བཟའ་གདུགས་དཀར་སྒྲོལ་མ་ལགས་གཉིས་ཀྱི་སྲས་སུ་སྐུ་འཁྲུངས་ཤིང་། ཕྱི་ལོ་ ༡༩༨༠ ནས་ ༡༩༨༩ བར་ལུང་སྔོན་དགོན་པ་ནས་ཐུན་མིན་རིག་གནས་སྤྱི་དང་། ལྷག་པར་དུ་ནང་བསྟན་གཞུང་ཆེན་ལ་གསན་བསམ་རྒྱ་ཆེན་མཛད།  ཕྱིས་སུ་རྒྱ་གར་ནང་བཙན་བྱོལ་དུ་ཕེབས་ཏེ་ཕྱི་ལོ་ ༡༩༨༩ ནས་ ༡༩༩༤ བར་རྒྱ་གར་ལྷོ་ཕྱོགས་འབྲས་སྤུངས་སྒོ་མང་གྲྭ་ཚང་དུ་སློབ་གཉེར་མཛད། ཕྱི་ལོ་ ༡༩༩༥ ནས་ ༡༩༩༧ བར་ཨ་རིར་ཕེབས་ཏེ་སློབ་གཉེར་མཛད་རྗེས་ཕྱིར་བོད་དུ་ཕེབས། ཕྱི་ལོ་ ༢༠༠༢ ལོར་རྒྱ་ནག་དམར་གཞུང་གི་ཆོག་མཆན་ཐོབ་པ་ལྟར་མགོ་ལོག་དགའ་བདེ་རྫོང་ཁོངས་ཀྱི་ལུང་སྔོན་དགོན་པའི་གདན་རབས་བཅུ་པར་གསེར་ཁྲིར་མངའ་གསོལ་ཞུས། ཕྱི་ལོ་ ༢༠༠༤ ནས་ ༢༠༠༦ བར་པེ་ཅིན་དུ་ཕེབས་ནས་ནང་བསྟན་ཆོས་ལུགས་ཐོག་དམིགས་བསལ་གསན་བསམ་མཛད་ཡོད་འདུག

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།