དེ་རིང་ཕྱི་དྲོའི་ཆུ་ཚོད་ ༣ པའི་སྟེང་ཕྱི་དྲིལ་ལྷག་པ་ཚེ་རིང་གི་ཚོགས་ཁང་དུ་བོད་མགོ་ལོག་དགའ་བདེ་རྫོང་ལུང་སྔོན་དགོན་པའི་ཁྲི་པ་སྤྲུལ་སྐུ་ཧཱུྃ་ཀར་རྡོ་རྗེ་མཆོག་སྐུ་གྲོངས་ཟིན་སྐོར་གྱི་གནས་ཚུལ་ཐོན་པ་དང་འབྲེལ་ནས་གསར་འགོད་གསལ་བསྒྲགས་ཤིག་སྤེལ་སོང་།
གསར་འགོད་གསལ་བསྒྲགས་སྟེང་མཁན་པོ་འཇུ་བསྟན་སྐྱོང་ལགས་ཀྱིས། བོད་གཞུང་མང་གཉིས་ཀྱིས་རྒྱ་ནག་དང་ཝི་ཐི་ནམ་གྱི་འབྲེལ་ཡོད་དབང་འཛིན་པ་རྣམས་ཀྱིས་སྤྲུལ་སྐུ་ཧཱུྃ་ཀར་རྡོ་རྗེ་མཆོག་སྐུ་གྲོངས་པའི་གནས་སྟངས་དང་རྒྱུ་རྐྱེན་རྣམས་གསལ་བཤད་ཁ་གསལ་དགོས་པའི་འབོད་སྐུལ་ཞུ་རྒྱུ་དང་། སྤྲུལ་སྐུ་ཁོང་ཉིད་ཀྱི་སྐུ་ཕུང་མྱུར་དུ་ལུང་སྔོན་དགོན་པར་རྩིས་སྤྲོད་བྱེད་དགོས་པའི་འབོད་སྐུལ་ཞུ་རྒྱུ་ཡིན། ཞེས་དང་། གནད་དོན་འདིས་བོད་མི་རིགས་ཀྱི་གཞི་རྩའི་ཐོབ་ཐང་དང་རང་དབང་ལ་བརྩི་བཀུར་དགོས་པ་གསལ་སྟོན་དང་། རིན་པོ་ཆེ་མཆོག་གི་ནང་མི་དང་། རྗེས་འཇུག་པ་རྣམས་ལ་གདུང་སེམས་མཉམ་སྐྱེད་ཞུ་རྒྱུ་ཡིན། ཕྱི་ཚེས་ ༣ ཉིན་དགོན་པའི་དགེ་འདུན་པ་ལྔ་དང་རྒྱ་གཞུང་གི་འཐབ་ཕྱོགས་གཅིག་གྱུར་ཁང་གི་མགོ་ཁྲིད་དང་། ཆོས་ལུགས་ཀྱི་མགོ་ཁྲིད་བཅས་ཝི་ཐི་ནམ་རྒྱལ་ཁབ་ཏུ་ཕྱིན་འདུག་ཀྱང་། དེ་རིང་བར་སྐུ་ཕུང་དངོས་སུ་མཇལ་ཐུབ་མེད་པ་རེད། ཅེས་གསུངས་སོང་།
གསར་འགོད་བསྒྲགས་གཏམ་ནང་། རྒྱལ་སྤྱིའི་སྤྱི་ཚོགས་ནས་སྤྲུལ་སྐུ་ཧཱུྃ་གར་རྡོ་རྗེ་མཆོག་གློ་བུར་དུ་སྐུ་གྲོངས་པར་རྒྱ་གཞུང་ལ་སྐྱོན་བརྗོད་གནང་དགོས་པ་དང་། རྒྱ་ནག་དང་ཝི་ཐི་ནམ་གྱི་དབང་འཛིན་པ་ཚོས་རིན་པོ་ཆེ་འཛིན་བཟུང་བཀག་ཉར་དང་སྐུ་གྲོངས་པའི་གནས་སྟངས་ཐད་གསལ་བཤད་དགོས་པའི་འབོད་སྐུལ་ཞུ་རྒྱུ་དང་། སྤྲུལ་སྐུ་ཧཱུྃ་དཀར་རྡོ་རྗེ་མཆོག་གི་སྐུ་ཕུང་དེ་འཕྲལ་དུ་ལུང་སྔོན་དགོན་པར་རྩིས་སྤྲོད་བྱ་དགོས་ཤིང་། བོད་ཀྱི་སྲོལ་རྒྱུན་ལྟར་འདས་མཆོད་ཆ་ཚང་ཞིག་བྱེད་དུ་འཇུག་དགོས་པ། དེ་བཞིན་རིན་པོ་ཆེ་མཆོག་གི་ནང་མི་དང་གྲོགས་པོ། དད་ལྡན་རྗེས་འཇུག་པ་ཡོངས་ལ་ཐུགས་གསོ་ཞུ་རྒྱུ་ཡིན། ཞེས་གསལ་འདུག
སྤྲུལ་སྐུ་ཧཱུྃ་ཀར་རྡོ་རྗེ་མཆོག་ནི་བོད་ནང་སྙན་གྲགས་ཡོད་པའི་ལུང་སྔོན་དགོན་ཕྱག་འདེབས་མཁན་སྤྲུལ་སྐུ་པདྨ་གཏུམ་པོ་མཆོག་གི་སྲས་ཡིན་ཞིང་། ཕྱི་ལོ་ ༢༠༠༤ ལོར་ཁོང་གིས་མཚོ་སྔོན་ཞིང་ཆེན་གེ་སར་གཞན་ཕན་ཐེབས་རྩ་གསར་འཛུགས་གནང་སྟེ་གེ་སར་རིག་གནས་རྒྱུན་འཛིན་ཐད་ཕྱག་ལས་མང་པོ་གནང་། ཕྱི་ལོ་ ༢༠༠༧ ལོ་ནས་མགོ་ལོག་ཁུལ་སྲིད་གཞུང་དང་སློབ་གསོ་ཁང་གི་ཆོག་མཆན་ཐོབ་པ་བརྒྱུད་དགེ་སློབ་ཆིག་སྟོང་ཙམ་ཡོད་པའི་ཧཱུྃ་ཀར་རྡོ་རྗེ་མི་རིགས་ལག་རྩལ་མཐོ་འབྲིང་གསར་འཛུགས་གནང་བ་སོགས་བོད་ཁུལ་གྱི་རོང་འབྲོག་གི་བྱིས་པ་སྟོང་ཕྲག་མང་པོར་རིན་མེད་ཐོག་ཤེས་ཡོན་སློབ་སྦྱོང་གི་གོ་སྐབས་ཐོབ་སླད་སློབ་གྲྭ་ཆུང་འབྲིང་ ༡༤ ཙམ་སྔ་གཞུག་ཏུ་ཆེད་འཛུགས་གནང་ཡོད་པ་དང་། དེ་བཞིན་དགོན་པ་དང་བཤད་གྲྭ་མང་པོ་ཕྱག་བཏབ་སྟེ་བོད་ཀྱི་ཆོས་དང་རིག་གཞུང་སྐད་ཡིག་སོགས་མི་ཉམས་རྒྱུན་འཛིན་དང་ཉམས་པ་སླར་གསོའི་ཆེད་མཛད་འཕྲིན་རླབས་ཆེན་བསྐྱངས་ཡོད་པར་བརྟེན། རྒྱ་ནག་གཞུང་གིས་ཁོང་ལ་ཆབ་སྲིད་ཀྱི་སྙོན་འཛུགས་སྣ་ཚོགས་བྱས་ཡོད་འདུག
སྤྲུལ་སྐུ་ཧཱུྃ་ཀར་རྡོ་རྗེ་མཆོག་ནི་ཕྱི་ལོ་ ༡༩༦༩ ལོར་བོད་མགོ་ལོག་ཁུལ་དགའ་བདེ་རྫོང་ཁོངས་སུ་ཡབ་བླ་མ་༧པདྨ་གཏུམ་དྲག་རྡོ་རྗེ་མཆོག་དང་། ཡུམ་ཀ་བཟའ་གདུགས་དཀར་སྒྲོལ་མ་ལགས་གཉིས་ཀྱི་སྲས་སུ་སྐུ་འཁྲུངས་ཤིང་། ཕྱི་ལོ་ ༡༩༨༠ ནས་ ༡༩༨༩ བར་ལུང་སྔོན་དགོན་པ་ནས་ཐུན་མིན་རིག་གནས་སྤྱི་དང་། ལྷག་པར་དུ་ནང་བསྟན་གཞུང་ཆེན་ལ་གསན་བསམ་རྒྱ་ཆེན་མཛད། ཕྱིས་སུ་རྒྱ་གར་ནང་བཙན་བྱོལ་དུ་ཕེབས་ཏེ་ཕྱི་ལོ་ ༡༩༨༩ ནས་ ༡༩༩༤ བར་རྒྱ་གར་ལྷོ་ཕྱོགས་འབྲས་སྤུངས་སྒོ་མང་གྲྭ་ཚང་དུ་སློབ་གཉེར་མཛད། ཕྱི་ལོ་ ༡༩༩༥ ནས་ ༡༩༩༧ བར་ཨ་རིར་ཕེབས་ཏེ་སློབ་གཉེར་མཛད་རྗེས་ཕྱིར་བོད་དུ་ཕེབས། ཕྱི་ལོ་ ༢༠༠༢ ལོར་རྒྱ་ནག་དམར་གཞུང་གི་ཆོག་མཆན་ཐོབ་པ་ལྟར་མགོ་ལོག་དགའ་བདེ་རྫོང་ཁོངས་ཀྱི་ལུང་སྔོན་དགོན་པའི་གདན་རབས་བཅུ་པར་གསེར་ཁྲིར་མངའ་གསོལ་ཞུས། ཕྱི་ལོ་ ༢༠༠༤ ནས་ ༢༠༠༦ བར་པེ་ཅིན་དུ་ཕེབས་ནས་ནང་བསྟན་ཆོས་ལུགས་ཐོག་དམིགས་བསལ་གསན་བསམ་མཛད་ཡོད་འདུག
གསར་འགོད་པ། བསྟན་འཛིན་ཕུར་བུ།
