བཀའ་ཤག་སྐབས་ ༡༦ པའི་གཏན་འཇགས་ཐབས་བྱུས་འཆར་འགོད་ཚོགས་ཆུང་གི་ཚོགས་འདུ་ཐེངས་བདུན་པ་དེ་ཉིན་གྲངས་གསུམ་རིང་དྷ་ས་དབུས་སྣེ་ལེན་ཁང་གི་འཛིན་སྐྱོང་སྦྱོང་བརྡར་ཁང་དུ་འཚོག་བཞིན་འདུག
དྷ་ས་དབུས་སྣེ་ལེན་ཁང་དུ་གཏན་འཇགས་ཐབས་བྱུས་འཆར་འགོད་ཚོགས་ཆུང་གི་ཚོགས་འདུ་ཐེངས་བདུན་པ་འཚོག་གིན་འདུག ༢༠༢༥།༤།༩ བོད་མིའི་སྒྲིག་འཛུགས་ཀྱི་པར།
ཁ་སང་ཕྱི་ཚེས་ ༩ ནས་ ༡༡ བར་དྷ་ས་དབུས་སྣེ་ལེན་ཁང་གི་འཛིན་སྐྱོང་སྦྱོང་བརྡར་ཁང་དུ། དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དབུ་བཞུགས་ཐོག གཏན་འཇགས་ཐབས་བྱུས་འཆར་འགོད་ཚོགས་ཆུང་གི་ཚོགས་འདུ་ཐེངས་བདུན་དེེ་འཚོག་མུས་ཡིན་ཞིང་། ཚོགས་ཐོག་ཏུ་བོད་ནང་གི་གནས་སྟངས་དང་། རྒྱ་ནག་ནང་གི་ཆབ་སྲིད་འགྱུར་འགྲོས། རྒྱལ་སྤྱིའི་ཆབ་སྲིད་ཀྱི་འགྱུར་འགྲོས་སོགས་ཀྱི་ཐད་ལ་གོ་བསྡུར་གནང་གི་ཡོད་འདུག
དེའི་ཐད་གཏན་འཇགས་ཐབས་བྱུས་འཆར་འགོད་ཚོགས་ཆུང་གི་མགྲིན་ཚབ་པ་ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས་ཀྱིས་འདི་གའི་གསར་འགོད་པར། གཏན་འཇགས་ཐབས་བྱུས་ཚོགས་ཆུང་གི་ཚོགས་འདུ་དེ་བཀའ་ཤག་སྐབས་བཅུ་དྲུག་པའི་སྐབས་འཆར་ཅན་ལོ་རེར་གཉིས་ལ་འཚོགས་གནང་གི་ཡོད་རེད། ན་ནིང་གི་ཚོགས་འདུ་དེ་སུད་སིའི་རྒྱལ་ས་ཛུ་རིག་ཏུ་འཚོགས་པ་རེད། ཐབས་བྱུས་ཚོགས་འདུ་འཚོགས་དགོས་དོན་ནི་བོད་ནང་གི་གནས་སྟངས་དང་། རྒྱལ་སྤྱི་དང་རྒྱ་ནག་ནང་གི་ཆབ་སྲིད་ཀྱི་འགྱུར་འགྲོས་ཐད་བཀའ་བསྡུར་གནང་རྒྱུ་དེ་གཙོ་བོ་གཅིག་རེད། དེ་བཞིན་ཉེ་ལམ་རྒྱ་ནག་གཞུང་གིས་བཏོན་པའི་རྒྱབ་ཤ་དཀར་པོའི་ཐད་ལའང་གོ་བསྡུར་གནང་གི་ཡོད། ཅེས་གསུངས་བྱུང་།
ད་ལན་གྱི་ལྷན་ཚོགས་ཐོག་ཚོགས་ཆུང་གི་སློབ་སྟོན་པ་བཀའ་ཟུར་བསྟན་པ་ཚེ་རིང་མཆོག་དང་བཀའ་ཟུར་འབྲོང་ཆུང་དངོས་གྲུབ་མཆོག དགའ་ལྡན་ཕོ་བྲང་གི་དྲུང་ཆེ་ཚེ་རྒྱམ་ལགས། ༧གོང་ས་རྒྱལ་བ་རིན་པོ་ཆེ་མཆོག་གི་དམིགས་བསལ་སྐུ་ཚབ་ཟུར་པ་སྐལ་བཟང་རྒྱལ་མཚན་ལགས་བཅས་དང་། ཚོགས་མི་སྲིད་སྐྱོང་སྤེན་པ་ཚེ་རིང་མཆོག་དང་། བདེ་སྲུང་བཀའ་བློན་རྒྱ་རི་སྒྲོལ་མ་མཆོག ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག བཀའ་ཤག་གི་ཆབ་སྲིད་དྲུང་ཆེ་བཀྲ་ཤིས་རྒྱ་མཚོ་ལགས་དང་། ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས། བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས་བཅས་མཉམ་ཞུགས་གནང་འདུག
ཕྱི་ལོ་ ༢༠༢༡ ཟླ་ ༨ ཚེས་ ༡༣ ཉིན་བཀའ་ཤག་སྐབས་ ༡༦ པས་བོད་རྒྱ་འབྲེལ་མོལ་ལས་དོན་ཚོགས་ཆུང་ཕྱིར་བསྡུ་གནང་བ་དང་སྦྲགས་ཚོགས་ཆུང་འདི་ཆེད་འཛུགས་གནང་སྟེ། ཚོགས་ཆུང་གི་ཚོགས་འདུ་ཐེངས་དང་པོ་དེ་ཕྱི་ལོ་ ༢༠༢༡ ཟླ་ ༡༡ ཚེས་ ༡༦ ནས་ ༡༨ བར་ཉིན་གྲངས་གསུམ་རིང་ནོར་གླིང་ཉེ་འཁྲིས་རྒྱ་གར་གྱི་ (Imperial Heights) གསོལ་མགྲོན་ཁང་དུ་འཚོགས་ཡོད་པ་དང་། ཐེངས་གཉིས་པ་དེ་ཕྱི་ལོ་ ༢༠༢༢ ཟླ་ ༧ ཚེས་ ༢༧ ནས་ ༢༩ བར་ཉིན་གསུམ་རིང་བཞུགས་སྒར་དྷ་སར་ཡོད་པའི་ཨེ་ཤ་ཡའི་གསོལ་མགྲོན་ཁང་ (Asia Health Resort) དང་། ཚོགས་ཐེངས་གསུམ་པ་དེ་ཕྱི་ལོ་ ༢༠༢༢ ཟླ་ ༡༡ ཚེས་ ༢༥ ནས་ ༢༧ བར་ཉིན་གྲངས་གསུམ་རིང་དང་། ཚོགས་ཐེངས་བཞི་པ་ཕྱི་ལོ་ ༢༠༢༣ ཟླ་ ༤ ཚེས་ ༦ ནས་ ༨ བར་ཉིན་གསུམ་རིང་བཅས་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་གི་ཚོགས་ཁང་དང་། ཚོགས་ཐེངས་ལྔ་བ་ཕྱི་ལོ་ ༢༠༢༣ ཟླ་ ༡༡ ཚེས་ ༨ ཉིན་ནས་ཉིན་གྲངས་གསུམ་རིང་སཱ་ར་མཐོ་སློབ། དེ་བཞིན་ཐེངས་དྲུག་པ་དེ་ཡུ་རོབ་རྒྱལ་ཁབ་སུད་སིའི་གྲོང་ཁྱེར་ཛུ་རིག་ཏུ་འཚོགས་ཡོད་པ་རེད།
ཕྱི་ལོ་ ༢༠༡༠ ཟླ་དང་པོའི་ནང་ནས་བཟུང་བོད་རྒྱ་གཉིས་ཀྱི་ཡོངས་ཁྱབ་འབྲེལ་མོལ་མཚམས་ཆད་ཡོད་ནའང་། བོད་མིའི་སྒྲིག་འཛུགས་ཀྱི་ངོས་ནས་ཡང་དང་བསྐྱར་དུ་འབྲེལ་མོལ་བསྐྱར་མཐུད་གནང་རྒྱུར་གྲ་སྒྲིག་ཨང་གསར་ཡོད་ཅེས་གསུང་གི་ཡོད་པ་རེད། ཕྱི་ལོ་ ༢༠༢༤ ཟླ་ ༤ ཚེས ༢༦ ཉིན་རྒྱ་ནག་ཕྱི་སྲིད་ལས་ཁུངས་ཀྱི་མགྲིན་ཚབ་པ་ཝང་ཝིན་པིན་( Wang Wenbin) ཟེར་བ་དེས་རྒྱུན་ལྡན་གྱི་གསར་འགོད་གསལ་བསྒྲགས་ཤིག་གི་སྟེང་། བཙན་བྱོལ་བོད་མིའི་གཞུང་ནི་ཁ་བྲལ་བའི་ཚོགས་པ་ཞིག་ཡིན་ལུགས་དང་། དེ་ལ་འཛམ་གླིང་གི་རྒྱལ་ཁབ་སུས་ཀྱང་ངོས་ལེན་བྱེད་ཀྱི་མེད་ཚུལ་བརྗོད་དེ། འབྲེལ་མོལ་བསྐྱར་གསོ་ཡོང་བར་གཅིག ༸གོང་ས་རྒྱལ་བ་རིན་པོ་ཆེ་མཆོག་གི་སྐུ་ཚབ་དང་ལྷན་དུ་འབྲེལ་ལམ་དང་གྲོས་མོལ་བྱ་རྒྱུ་ཡིན་པ་ལས་བཙན་བྱོལ་བོད་གཞུང་ངམ་བོད་མིའི་སྒྲིག་འཛུགས་ལ་འབྲེལ་མོལ་བྱ་རྒྱུ་མིན་ལུགས། གཉིས། འབྲེལ་མོལ་དེ་༸གོང་ས་རིན་པོ་ཆེ་མཆོག་དང་སྐུ་འཁོར་ཁག་གཅིག་གི་མ་འོངས་པའི་སྐུ་སྒེར་གྱི་གནད་དོན་ཡིན་པ་ལས་མིང་དོན་མཚུངས་བའི་རང་སྲིད་རང་སྐྱོང་ཟེར་བའི་སྐོར་མིན་ལུགས་སོགས་བཤད་ཡོད་པ་རེད།
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།
གཏན་འཇགས་ཟེར་ན་ག་རེ་ཟེར་གྱི་ཡོད་རེད། བོད་གཞུང་དང་རྒྱ་གཞུང་། ཆབ་སྲིད་དང་དཔལ་འབྱོར། ཆོས་དང་འཇིག་རྟེན། རོགས་དངུལ་དང་རང་ཁ་རང་གསོ། ཐབས་བྱུས་དང་སྲིད་བྱུས། སྲིད་སྐྱོང་དང་བཀའ་ཤག རྒྱ་འོག་སྡོད་དང་མི་སྡོད་ཆ་ཚང་དངོས་ཤུགས་བརྒྱུད་གསུམ་གང་ག་མི་རྟག་པ་མ་རེད་པས། རྒྱ་དང་མཉམ་དར་གྲོལ་མོལ་ཡང་གཏན་འཇགས་ཤིག་མིན་ཁོ་ཐག་རེད། དཀོན་མཆོག་གསུམ། །