༧གོང་ས་རྒྱལ་བ་རིན་པོ་ཆེ་མཆོག་ནས་ཁེ་ན་ཊའི་སྲིད་བློན་ལ་འཚམས་འདྲི་མཛད།

༧གོང་ས་རྒྱལ་བ་རིན་པོ་ཆེ་མཆོག་ནས་ཁེ་ན་ཊའི་གུ་ཡངས་སྲིད་དོན་ཚོགས་པའི་མགོ་ཁྲིད་སྐུ་ཞབས་མར་ཁི་ཁར་ནི་མཆོག་ཁེ་ན་ཊའི་སྲིད་བློན་ལ་བསྐྱར་དུ་འོས་འདེམས་བྱུང་བར་འཚམས་འདྲི་མཛད།

དེ་རིང་ཁེ་ན་ཊའི་གུ་ཡངས་སྲིད་དོན་ཚོགས་པའི་མགོ་ཁྲིད་ཀྱི་མར་ཁི་ཁར་ནི་ (Mark Carney) མཆོག་ལ་འདི་ལོའི་ཁེ་ན་ཊའི་སྲིད་བློན་གྱི་འོས་བསྡུ་ལས་རྣམ་པར་རྒྱལ་ཡོད་པ་ལྟར། ༧གོང་ས་རྒྱལ་བ་རིན་པོ་ཆེ་མཆོག་ནས་བཞུགས་སྒར་རྒྱལ་བའི་ཕོ་བྲང་ནས། ཁེ་ན་ཊའི་གུ་ཡངས་སྲིད་དོན་ཚོགས་པའི་མགོ་ཁྲིད་མར་ཁི་ཁར་ནི་མཆོག་གི་མཚན་ཐོག་ཏུ་འཚམས་འདྲིའི་གསུང་འཕྲིན་ཞིག་སྩལ་ཏེ། ཁོང་དང་ཁོང་གི་ཆབ་སྲིད་ཚོགས་པ་འོས་བསྡུ་ལས་རྣམ་པར་རྒྱལ་ནས་ལོ་རྒྱུས་རང་བཞིན་གྱི་ཟིན་ཐོ་ཞིག་གསར་དུ་གཏོད་པར་འཚམས་འདྲི་གནང་འདུག

༧གོང་ས་རྒྱལ་བ་རིན་པོ་ཆེ་མཆོག་གི་འཚམས་འདྲིའི་གསུང་འཕྲིན་ནང་། ངོས་རང་གི་ཁེ་ན་ཊའི་ཕྱོགས་སྐྱོད་དེ་དག་གི་སྐབས། ཁེ་ན་ཊའི་མི་མང་གི་མཛའ་བརྩེའི་དྲོད་ཁོལ་དང་བརྩེ་སེམས་ཀྱིས་ཡིད་འགུལ་ཆེན་པོ་ཐེབས་སོང་། ངོས་རང་གིས་ཀྱང་ཁེ་ན་ཊའི་མི་སེར་གྱི་ཆེ་བསྟོད་དེ་དང་ལེན་ཞུས་ནས། སྣ་འཛོམས་རིག་གཞུང་རང་བཞིན་ལྡན་པའི་མང་གཙོའི་ཐོབ་ཐང་ལོངས་སྤྱོད་བྱེད་མཁན་གྱི་ཁེ་ན་ཊའི་མི་སེར་གྱུར་བར་ཡིད་སྨོན་སྐྱེས་ཀྱིན་ཡོད། ཅེས་དང་།  ངོས་རང་གིས་ཁྱེད་ཀྱི་གོང་མ་རྣམས་ལ་ཞུས་པ་བཞིན་ཁྱེད་ཅག་གིས་བོད་མི་རྣམས་ལ་རྒྱུན་མཐུད་ནས་རྒྱབ་སྐྱོར་དང་རོགས་རམ་གནང་བར། ཁེ་ན་ཊའི་གཞུང་དང་མི་མང་ལ་ཐུགས་རྗེ་ཆེ་ཞུ་རྒྱུ་ཡིན། ཁྱེད་ཅག་གིས་ཁེ་ན་ཊ་མི་མང་གི་རེ་བ་དང་སྨོན་འདུན་ཡོངས་སུ་སྐོང་ཐུབ་པ་དང་། འཛམ་གླིང་ཞི་བདེ་དང་བརྟན་ལྷིང་གི་ཐད་ལ་ནུས་པ་གང་མང་འདོན་ཐུབ་པའི་སྨོན་འདུན་ཞུ། ཞེས་གསུངས་འདུག

ཕྱི་ལོ་ ༢༠༠༧ ལོར་༧གོང་ས་རྒྱལ་བ་རིན་པོ་ཆེ་མཆོག་དང་ཁེ་ན་ཊའི་སྲིད་བློན་ཧར་པུར་(Stephen Joseph Harper) མཆོག་རྣམ་གཉིས་མཇལ་འཕྲད་གནང་སྟེ་ཐུགས་རེ་གནང་བ་ལྟར། ཁེ་ན་ཊའི་གཞུང་གིས་ཕྱི་ལོ་ ༢༠༡༡ ཟླ་ ༣ ནས་བཟུང་རྒྱ་གར་བྱང་ཕྱོགས་ཨ་རུ་ན་ཅལ་མངའ་སྡེའི་མེའོ་ཆོས་འཕེལ་གླིང་དང་ཏེ་ཛུ་དར་རྒྱས་གླིང་། ཀྲུ་ཀྲིང་དང་བསྟན་འཛིན་སྒང་བཅས་གཞིས་ཆགས་ཁག་ ༤ ནས་གཞིས་སྤོ་བ་བླངས་ཏེ། ཁེ་ན་ཊའི་གྲོང་ཁྱེར་ཊོ་རོན་ཊོ་ (Toronto) དང་ཝན་ཀོ་ཝར་ (Vancauver)། ཨོ་ཊ་ཝ་ (Ottawa) ལ་སོགས་པར་གཞིས་ཆགས་སུ་བཅུག་ཡོད་པ་རེད། སྐབས་དེར་ཁྱོན་བོད་མི་ ༡༠༠༠ ལྷག་ཅིག་ལས་གཞི་དེའི་འོག་ནས་ཁེ་ན་ཊའི་ནང་གཞིས་སྤོར་བྱས་ཡོད་འདུག དེ་བཞིན་ཕྱི་ལོ་ ༡༩༧༠ དང་ ༡༩༧༡ ཙམ་ལ་སྔ་རྗེས་སུ་ཁེ་ན་ཊ་གཞུང་གིས་རྒྱ་གར་བྱང་ཕྱོགས་ནས་བོད་མི་ ༢༣༠ ཙམ་སྐྱབས་བཅོལ་དུ་བླངས་ཡོད་པ་དང་། ཕྱི་ལོ་ ༢༠༡༦ ལོའི་བསྡོམས་རྩིས་ལྟར་ན། ཁེ་ན་ཊའི་ནང་དུ་བོད་མི་ ༨༠༠༠ ལྷག་གནས་སྡོད་བྱེད་ཀྱི་ཡོད་འདུག

སྐུ་ཞབས་མག་ཁར་ནེ་མཆོག་གིས་འདས་པའི་ལོ་ངོ་ ༡༣ རིང་བྷོ་སི་ཊོན་དང་། ལོན་ཌོན། ནེའུ་ཡོག ཊོག་ཡོ། ཊོ་རོན་ཊོ་སོགས་ལ་ཡོད་པའི་དངུལ་ཁང་མང་པོ་ཞིག་ཏུ་ཕྱག་ལས་གནང་། ཕྱི་ལོ་ ༢༠༠༣ ལོར་ཁེ་ན་ཊའི་དངུལ་ཁང་དུ་འགན་འཛིན་གཞོན་པའི་ལས་གནས་གཉེར་ཞིང་། ལོ་ངོ་གཅིག་གི་རྗེས་སུ་ཁེ་ན་ཊའི་དཔལ་འབྱོར་ལས་ཁུངས་ཀྱི་དྲུང་ཆེ་རུ་བསྐོ་གཞག་གནང་། ཕྱི་ལོ་ ༢༠༠༨ ནས་ ༢༠༡༣ བར་ཁེ་ན་ཌའི་དངུལ་ཁང་དུ་འགན་འཛིན་གྱི་ཕྱག་ལས་གནང་མྱོང་བ་མ་ཟད། ཕྱི་ལོ་ ༢༠༡༣ ནས་ ༢༠༢༠ བར་དབྱིན་ཡུལ་དངུལ་ཁང་གི་འགན་འཛིན་གྱི་ཕྱག་ལས་གནང་། ༢༠༢༠ ནས་ ༢༠༢༤ བར་ལོ་ངོ་བཞིའི་རིང་ཁེ་ན་ཌའི་སྲིད་བློན་རྗ་སི་ཊིན་ཊིར་ཌུའུ་མཆོག་གི་སློབ་སྟོན་པའི་ཕྱག་ལས་གནང་། ཕྱི་ལོ་ ༢༠༢༥ ལོའི་ཕྱི་ཟླ་ ༡ པོའི་ནང་སྲིད་བློན་དུ་འདེམས་ཐོན་བྱུང་སྟེ། ད་ལྟའི་ཆར་སྲིད་བློན་གྱི་ཕྱག་ལས་གནང་མུས་ཡིན་པ་རེད།

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།