ཆུ་བཞི་སྒང་དྲུག་ཅེས་པའི་བོད་ཀྱི་གློག་བརྙན་ལ་བྱ་དགའ་ཐོབ། 

ཕྱི་ལོ་ ༢༠༢༥ ལོའི་ཇུ་ལེན་དྷུ་བྷུ་འུག་གློག་བརྙན་དུས་སྟོན་སྟེང་གཞན་ཕན་ཁྱིམ་གསར་ལགས་ཀྱིས་བཟོ་སྐྲུན་བྱས་པའི་ཆུ་བཞི་སྒང་དྲུག་ཅེས་པའི་བོད་ཀྱི་གློག་བརྙན་ལ་གདངས་ཡག་ཤོས་ཀྱི་བྱ་དགའ་ཐོབ་འདུག

ཁ་སང་རྒྱལ་སྤྱིའི་གསར་ལམ་ཁག་ཏུ་གནས་ཚུལ་ཐོན་པ་ལྟར་ན། ཟླ་འདིའི་ཕྱི་ཚེས་ ༢༡ ནས་ ༢༧ བར་ཨ་རིའི་ལོ་ཝ་མངའ་སྡེའི་དྷུ་བྷུ་འུག་(dubuque ) ཏུ་འཚོགས་པའི་ཕྱི་ལོ་ ༢༠༢༥ ལོའི་ཇུ་ལེན་དྷུ་བྷུ་འུག་རྒྱལ་སྤྱིའི་གློག་བརྙན་དུས་སྟོན་(Julien Dubuque International Film Festival 2025) ཐོག ཨ་རིའི་རྒྱལ་ཡོངས་ཀྱི་གློག་བརྙན་འཁྲབ་ཁྲིད་པ་བརྒྱ་ལྷག་གིས་མཉམ་ཞུགས་བྱས་འདུག་ལ། བོད་ཀྱི་གློག་བརྙན་བཟོ་སྐྲུན་པ་གཞན་ཕན་ཁྱིམ་གསར་ལགས་ཀྱིས་བཟོ་སྐྲུན་བྱས་པའི་ཆུ་བཞི་སྒང་དྲུག་(Four Rivers Six Ranges ) ཅེས་པའི་གློག་བརྙན་ལ་གདངས་(Soundtrack) ཡག་ཤོས་ཀྱི་བྱ་དགའ་ཐོབ་འདུག

དེའི་ཐད་གཞན་ཕན་ཁྱིམ་གསར་ལགས་ཀྱིས། ངས་གློག་བརྙན་ཆུ་བཞི་སྒང་དྲུག་ལ་གདངས་ཡག་ཤོས་ཀྱི་བྱ་དགའ་ཐོབ་སོང་། དེ་ནི་ང་རང་གིས་སླར་ཡང་སེམས་ཤུགས་སྐྱེད་ནས་གོམ་སྟབས་གསར་པ་ཞིག་སྤོས་པ་ཡིན། ཚང་མས་ང་ལ་རྒྱབ་སྐྱོར་དང་ཡིད་ཆེས་གནང་བར་བཀའ་དྲིན་ཆེ། ཞེས་བརྗོད་འདུག

འདས་ལོའི་ཕྱི་ཟླ་ ༡ ཚེས་ ༢༥ ནས་ཟླ་ ༢ ཚེས་ ༤ ཉིན་ཡུ་རོབ་ཀྱི་ནཱ་ཐར་ལེན་ཌི་སི་རྒྱལ་ཁབ་ཀྱི་རོ་ཌིར་ཌམ་( Rotterdam) གྲོང་ཁྱེར་དུ་འཚོགས་པའི་རྒྱལ་སྤྱིའི་རོ་ཌིར་ཌམ་གློག་བརྙན་དུས་སྟོན་ཐེངས་ ༥༤ (International Film Festival Rotterdam) པའི་སྐབས་བསྟན་པ་དང་། སྐབས་དེར་རྒྱ་ནག་གཞུང་གིས་གློག་བརྙན་དེས་བོད་ཀྱི་ལོ་རྒྱུས་ལ་འཁྱོག་བརྗོད་བྱས་ཏེ་ཁ་བྲལ་རིང་ལུགས་པའི་དྲིལ་བསྒྲགས་ཀྱི་ལས་དོན་ཤུགས་ཆེན་སྤེལ་གྱི་ཡོད་ཚུལ་གྱི་སྐྱོན་བརྗོད་བྱས་ཡོད།

འབྲས་ལྗོངས་དུས་བབ་ (SIKKIM TIMES) ཀྱིས་དེ་འབྲེལ་གནས་ཚུལ་སྤེལ་བ་ལྟར་ན། འདི་ལོའི་ཕྱི་ཟླ་ ༥ པའི་ནང་གློག་བརྙན་དེ་ཨ་རི་དང་ཁེ་ན་ཊ། ཕྱི་ཟླ་ ༧ པའི་ནང་ཡུ་རོབ་དང་དེ་བཞིན་ཕྱི་ཟླ་ ༧ པའི་ནང་རྒྱ་གར་ནང་བསྟན་འཆར་ཡོད་འདུག

གཞན་ཕན་ཁྱིམ་གསར་ལགས་ཀྱི་ལོ་རྒྱུས་འཐབ་འཛིང་གི་གློག་བརྙན་ཆུ་བཞི་སྒང་དྲུག་ཅེས་པའི་ནང་བོད་མིའི་དཔའ་ངར་ལྡན་པའི་དམག་དོན་གྱི་རྣམ་པ་གསལ་སྟོན་བྱས་ཡོད་ལ། དེ་ནི་དགེ་འདུན་པ་ཚོས་ན་བཟའ་ཕུད་དེ་མེ་མདའ་བཟུང་བའི་གློག་བརྙན་ཞིག་ཡིན་པ་མ་ཟད།  གཡུལ་ས་རུ་རྒྱལ་གཅེས་པ་ཚོའི་དཔའ་རྟུལ་དང་། སྙིང་སྟོབས། མཐུན་སྒྲིལ། དམིགས་ཡུལ། བློས་གཏོང་བཅས་མངོན་པར་གསལ་བའི་གློག་བརྙན་ཞིག་ཡིན་འདུག ལེའུ་བཞི་ཅན་གྱི་གློག་བརྙན་དེ་ནི་གཞན་ཕན་ཁྱིམ་གསར་ལགས་ཀྱིས་རྩོམ་འབྲི་དང་འཁྲབ་ཁྲིད་བྱས་པ་དང་། བདེ་བ་ཚང་རྡོ་རྗེ་དབང་འདུས་ལགས་ཀྱིས་བཟོ་སྐྲུན་བྱས་ཡོད་འདུག གློག་བརྙན་དེའི་ནང་ཨ་རིའི་ཧོ་ལི་ཝོ་ཌིའི་གློག་བརྙན་བཟོ་སྐྲུན་པ་གྲགས་ཆེན་བྷི་རཱན་ཌོན་(Brandon Cox) ལགས་དང་། རྒྱ་གར་དང་བལ་ཡུལ་གྱི་བརྙན་ལེན་པ་གྲགས་ཅན་ཁག་ཅིག་གིས་བརྙན་ལེན་བྱས་ཡོད་འདུག  གློག་བརྙན་དེ་ཕབ་སྐྲུན་བྱ་ཡུལ་གཙོ་བོ་ནི་བལ་བོད་གཉིས་ཀྱི་ས་མཚམས་གློ་སྨོན་ཐང་ཡིན་ཞིང་། གློག་བརྙན་འཁྲབ་སྟོན་བྱེད་མཁན་གྱི་མི་སྣ་གཙོ་བོ་དག་ནི་བོད་པ་ཡིན་འདུག

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།