བྱམས་བརྩེ་གོང་འཕེལ་གྱི་འཛམ་གླིང་སྐོར་སྐྱོད་ཀྱི་ལས་འགུལ་སྤེལ་བཞིན་འདུག

ཕྱི་ཟླ་ ༤ ཚེས་ ༧ ནས་ཕྱི་ཟླ་ ༧ ཚེས་ ༦ བར་ཟླ་བ་གསུམ་གྱི་རིང་རྒྱལ་སྤྱིའི་བོད་དོན་ལས་འགུལ་ཁང་གིས་བྱམས་བརྩེ་གོང་འཕེལ་གྱི་འཛམ་གླིང་ཡོངས་ལ་སྐོར་སྐྱོད་ཀྱི་ལས་འགུལ་སྤེལ་བཞིན་འདུག

འདི་ལོའི་ཕྱི་ཟླ་ ༧ ཚེས་ ༦ ཉིན་༧གོང་ས་རྒྱལ་བ་རིན་པོ་ཆེ་མཆོག་ཕྱི་ལུགས་ལྟར་དགུང་གྲངས་ ༩༠ ལ་ཕེབས་པའི་༧སྐུའི་གོ་སྟོན་དང་བསྟུན། བོད་མིའི་སྒྲིག་འཛུགས་གཙོས་པའི་འཛམ་གླིང་ས་ཕྱོགས་གང་སར་ཡོད་པའི་བོད་མིའི་འདུས་སྡོད་ས་གནས་ཁག་ཏུ་རྣམ་པ་འདྲ་མིན་གྱི་ཐོག་ནས་༧སྐུའི་གོ་སྟོན་སྲུང་གཙི་གནང་བཞིན་པའི་ཁྲོད། རྒྱལ་སྤྱིའི་བོད་དོན་ལས་འགུལ་ཁང་གིས་འཛམ་གླིང་ཡོངས་ལ་བྱམས་བརྩེ་གོང་འཕེལ་གྱི་སྐོར་སྐྱོད་ (Compassion Rising World Tour) ལས་འགུལ་ཞིག་སྤེལ་གྱི་ཡོད་འདུག

རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་བསྟན་ཆོས་རྒྱ་མཚོ་ལགས་ཀྱིས་ངོ་དེབ་སྟེང་བརྙན་ཐུང་ཞིག་སྤེལ་བའི་ནང་། འཛམ་གླིང་ཡོངས་སུ་བྱམས་བརྩེ་གོང་འཕེལ་གྱི་སྐོར་སྐྱོད་ལས་འགུལ་དེ་ནི་༧སྐུའི་གོ་སྟོན་སྲུང་གཙི་ཞུ་བ་ཙམ་མིན་པར་འཛམ་གླིང་ཁྱོན་ཡོངས་སུ་༧གོང་ས་རྒྱལ་བ་རིན་པོ་ཆེ་མཆོག་གི་བཀའ་སློབ་དང་། མཛད་འཕྲིན་ལས་སེམས་འགུལ་ཐེབས་པའི་མི་སྒེར་དང་ཚོགས་སྡེ་ཁག་ལ་དྲ་ཐོག་དང་ངོ་བཅར་གཉིས་ཀའི་ཐོག་ནས་མཉམ་ཞུགས་གནང་རྒྱུའི་མགྲོན་ཤོག་ཕུལ་ཏེ། ༧གོང་ས་མཆོག་གི་བཀའ་སློབ་སྙིང་པོ་སྟེ། སྙིང་རྗེ་ནི་རྒྱས་སྤྲོས་མིན། དེ་ནི་མེད་དུ་མི་རུང་བ་ཞིག་ཡིན་ཞེས་པའི་ཐོག་ནས་༧མགོན་པོ་གང་ཉིད་ཀྱིས་འཛམ་གླིང་འདིའི་སྟེང་བརྩེ་བ་དང་། ཁྱིམ་ཚང་གཅིག་གི་འདུ་ཤེས་ཡོང་ཐབས། ཁོར་ཡུག་སྲུང་སྐྱོབ་སོགས་༧གོང་ས་མཆོག་གི་མཛད་འཕྲིན་དེ་དག་མི་ཚེའི་ནང་དངོས་སུ་ལག་བསྟར་གནང་ཡོད་མེད་ཐོག་གསུང་བཤད་གནང་རྒྱུ་དང་། ལྷག་པར་དུ་༧གོང་ས་མཆོག་གི་ཐུགས་བསྐྱེད་དམ་བཅའ་བཞི་དང་། ཆོས་ལུགས་ལ་མ་བརྟེན་པའི་བཟང་སྤྱོད། དེ་བཞིན་འཚེ་མེད་ཞི་བ་དང་། བྱམས་བརྩེའི་ཉམས་ལེན་སྐོར་གྱི་བཀའ་སློབ་ངོ་སྤྲོད་ཀྱི་མཁས་པའི་གཏམ་བཤད། ཆོས་ལུགས་ཀྱི་དབུ་ཁྲིད་དང་ཁོར་ཡུག་ལས་འགུལ་བ་སོགས་དང་བགྲོ་གླེང་འཚོག་སྟེ། ཁ་ཡོད་ལག་ཡོད་ཀྱིས་རྒྱལ་སྤྱིའི་སྟེང་༧མགོན་པོ་གང་ཉིད་མཆོག་གི་དགོངས་གཞིའི་ཐོག་ནས་འཛམ་གླིང་འདིར་ཞི་བདེ་བསྐྲུན་ཐབས་ལ་དམིགས་ནས་ལས་འགུལ་དེ་གོ་སྒྲིག་ཞུས་ཡོད། ཅེས་འགྲེལ་བརྗོད་གནང་འདུག

བསྟན་ཆོས་རྒྱ་མཚོ་ལགས་ཀྱིས་མུ་མཐུད་དུ། བྱམས་བརྩེ་གོང་འཕེལ་གྱི་སྐོར་སྐྱོད་ཀྱི་ལས་འགུལ་འདིའི་ཐོག་ནས་བོད་མི་ཙམ་མིན་པར་རྒྱལ་སྤྱི་ཁྱོན་ཡོངས་སུ་༧གོང་ས་རྒྱལ་བ་རིན་པོ་ཆེ་མཆོག་གི་༧སྐུའི་གོ་སྟོན་སྲུང་གཙི་ཞུ་རྒྱུའི་གོ་སྐབས་བྱུང་བ་མ་ཟད། ༧མགོན་པོ་གང་ཉིད་ལ་བཅངས་པའི་བཀའ་དྲིན་རྗེས་དྲན་དང་། སྨོན་འདུན་ཞུ་རྒྱུའི་གོ་སྐབས་ཐོབ་ཀྱི་ཡོད་ལ། ལས་འགུལ་འདི་བརྒྱུད་འཛམ་གླིང་ཡོངས་ཀྱི་མི་མང་རྣམས་ལ་༧གོང་ས་མཆོག་གི་དགོངས་གཞིའི་ཐོག་ནས་འཛམ་གླིང་འདིར་སྨན་པའི་ཕྱག་ལས་གནང་རྒྱུའི་གོ་སྐབས་བྱུང་གི་ཡོད་པ་རེད། ཅེས་བརྗོད་འདུག

ཁ་སང་ཕྱི་ཚེས་ ༣༠ ཉིན་རྒྱལ་སྤྱིའི་བོད་དོན་ལས་འགུལ་ཁང་གིས་དྲ་ཐོག་ཏུ་གསར་འགོད་གསལ་བསྒྲགས་ཤིག་སྤེལ་བའི་ནང་། ༧གོང་ས་རྒྱལ་བ་རིན་པོ་ཆེ་མཆོག་གིས་རྒྱལ་སྤྱིའི་སྟེང་བཟང་སྤྱོད་དར་སྤེལ་དང་། ཆོས་ལུགས་ཕན་ཚུན་མཐུན་སྒྲིལ། བོད་ཀྱི་ཆོས་དང་རིག་གཞུང་སྲུང་སྐྱོབ། ཁོར་ཡུག་སྲུང་སྐྱོབ་སོགས་རླབས་ཆེན་གྱི་མཛད་པ་བསྐྱངས་ཏེ། འགྲོ་བ་མིའི་བདེ་སྐྱིད་དང་། འཛམ་གླིང་ཞི་བདེ་ཡོང་བར་རླབས་ཆེན་གྱི་མཛད་པ་མུ་མཐུད་བསྐྱངས་དང་སྐྱོང་མུས་ཡིན་པར་བཀའ་དྲིན་རྗེས་དྲན་ཞུ་སླད། ༧གོང་ས་རྒྱལ་བ་རིན་པོ་ཆེ་མཆོག་གི་༧སྐུའི་མཛད་པ་འཕྲིན་ལས་རྣམས་རྒྱལ་སྤྱིའི་སྟེང་ཁྱབ་སྤེལ་གནང་ཐབས་ལ་དམིགས་ཏེ། ༧མགོན་པོ་གང་ཉིད་མཆོག་དགུང་གྲངས་ ༩༠ ཕེབས་པའི་གོ་སྟོན་དང་བསྟུན། བོད་མིའི་སྒྲིག་འཛུགས་ཀྱིས་བྱམས་བརྩེའི་ལོ་ཞེས་སྲུང་གཙི་ཞུ་བཞིན་པ་དང་བསྟུན། འདི་ལོའི་ཕྱི་ཟླ་ ༤ ཚེས་ ༧ ནས་ཕྱི་ཟླ་ ༧ ཚེས་ ༦ བར་འཛམ་གླིང་ཡོངས་ལ་བྱམས་བརྩེ་གོང་འཕེལ་གྱི་སྐོར་སྐྱོད་ཀྱི་ལས་འགུལ་ཞིག་སྤེལ་གྱི་ཡོད། ཅེས་གསལ་འདུག

ཟླ་བ་གསུམ་རིང་གི་སྐོར་སྐྱོད་ཀྱི་ལས་འགུལ་འདིའི་ནང་། ༧སྐུའི་གསུང་སྒྱུར་བ་དགེ་བཤེས་ཐུབ་བསྟན་སྦྱིན་པ་ལགས་དང་། བཀའ་ཟུར་བཀྲས་མཐོང་བསྟན་འཛིན་རྣམ་རྒྱལ་ལགས། འགན་འཛིན་བསྟན་ཆོས་རྒྱ་མཚོ་ལགས། ཆབ་སྲིད་བཙོན་ཟུར་ངག་དབང་སངས་སྒྲོན་ལགས། རྩོམ་པ་པོ་གྲགས་ཅན་སྐུ་ཞབས་པེ་ཊི་རིག་མེག་ཌོ་ནེལ་ (Patrick McDonnell) ལགས། ༧གོང་ས་མཆོག་གིས་བསྐོ་གཞག་མཛད་པའི་ར་སྟོད་གྲྭ་ཚང་གི་མཁན་ཟུར་ནི་ཁོ་ལ་སི་ (Nicholas Vreeland) ལགས། ཨ་རི་དང་དབྱིན་ཡུལ། ཉི་ཧོང་སོགས་འཛམ་གླིང་ས་ཕྱོགས་གང་ས་ནས་༧གོང་ས་མཆོག་གི་བཀའ་སློབ་སྙིང་ལ་བཅངས་ཏེ་དངོས་སུ་ལག་བསྟར་གནང་མཁན་གྱི་མི་སྣ་གཙོས་པའི་མཁས་དབང་དང་། ཆོས་ལུགས་ཀྱི་དབུ་ཁྲིད་སོགས་མཉམ་ཞུགས་གནང་རྒྱུ་ཡིན་འདུག ད་དུང་སྐུ་ཞབས་མར་ཊིན་སི་ཁོར་སི་སི་ (Martin Scorsese) ལགས་ཀྱིས་བཟོ་སྐྲུན་གནང་བའི་༧གོང་ས་རྒྱལ་བ་རིན་པོ་ཆེ་མཆོག་གི་མཛད་རྣམ་སྐོར་གྱི་གློག་བརྙན་སྐུ་མདུན་ཞུ་བ་གཟིགས་འབུལ་ཞུ་རྒྱུ་ཡིན་འདུག

འདི་ལོར་༧གོང་ས་རྒྱལ་བ་རིན་པོ་ཆེ་མཆོག་ཕྱི་ལུགས་དགུང་གྲངས་ ༩༠ ལ་ཕེབས་པའི་ཉིན་མོ་དང་བསྟུན། བོད་མིའི་སྒྲིག་འཛུགས་ཀྱིས་ཕྱི་ཟླ་ ༧ པ་ནས་རྒྱལ་སྤྱིའི་ཁྱོན་ཡོངས་ལ་བྱམས་བརྩེའི་ལོ་ཞེས་གཞུང་འབྲེལ་གོ་སྟོན་སྲུང་གཙི་ཞུ་གཏན་འཁེལ་ཡོད་པ་ལྟར། བོད་མིའི་སྒྲིག་འཛུགས་ཀྱི་ཕྱི་དྲིལ་ལས་ཁུངས་ནས་༧གོང་ས་མཆོག་གི་ཐུགས་བསྐྱེད་དམ་བཅའ་བཞི་སྟེ། འགྲོ་བ་མིའི་བཟང་སྤྱོད་གོང་སྤེལ་དང་། ཆོས་ལུགས་མཐུན་སྒྲིལ། བོད་ཀྱི་རིག་གཞུང་དང་ཁོར་ཡུག་སྲུང་སྐྱོབ། རྒྱ་གར་གྱི་གནའ་བོའི་རིག་གཞུང་བསྐྱར་གསོ་བཅས་ཀྱི་སྐོར་ལ་མཁས་དབང་ཁག་གི་གསུང་བཤད་ཕྱོགས་སྒྲིག་གི་འཕྲུལ་དེབ་དེ་བོད་ཡིག་དང་དབྱིན་ཡིག རྒྱ་ཡིག རྒྱ་གར་གྱི་སྐད་ཡིག་བཅས་སྐད་ཡིག་བཞིའི་ཐོག་འགྲེམ་སྤེལ་གནང་ཡོད་པ་རེད།

གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། པདྨ་མཚོ།