རྒྱལ་མཚམས་མེད་པའི་གསར་འགོད་མཐུན་ཚོགས་ཀྱིས་འཛམ་གླིང་གི་དཔལ་འབྱོར་ལ་ཉམས་དམས་ཤུགས་ཆེན་ཕྱིན་པའི་རྐྱེན་གྱིས་གསར་ཁང་ཁག་ལ་དཀའ་ངལ་ཆེན་པོ་འཕྲད་ཀྱི་ཡོད་པའི་ལོ་འཁོར་སྙན་ཐོ་བཏོན།
ལོ་ལྟར་ཕྱི་ཟླ་ ༥ ཚེས་ ༣ ཉིན་རྒྱལ་སྤྱིའི་གསར་འགོད་རང་དབང་གི་ཉིན་མོར་སྲུང་གཙི་ཞུ་ཡི་ཡོད་པ་ལྟར། ཁ་སང་ཕྱི་ཚེས་ ༡ ཉིན་རྒྱལ་མཚམས་མེད་པའི་གསར་འགོད་མཐུན་ཚོགས་ཀྱིས་ཕྱི་ལོ་ ༢༠༢༥ ལོའི་གསར་འགོད་རང་དབང་གི་ལོ་འཁོར་སྙན་ཐོ་ཞིག་འདོན་སྤེལ་གནང་སྟེ། འཛམ་གླིང་གི་རྒྱལ་ཁབ་དང་ས་ཁུལ་ ༡༨༠ ནང་ནས་རྒྱ་ནག་གསར་འགོད་རང་དབང་གི་གནས་སྟངས་ཞན་ཤོས་ཨང་གསུམ་པ་ཆགས་འདུག སྙན་ཐོ་ལྟར་ན། རྒྱ་ནག་ནི་འཛམ་གླིང་ནང་གི་གསར་འགོད་པ་བཙོན་འཇུག་བྱེད་མཁན་གྱི་རྒྱལ་ཁབ་ཚབས་ཆེ་ཤོས་ཡིན་པ་མ་ཟད། ད་ལྟའི་ཆར་གསར་འགོད་པ་ ༡༡༠ ཙམ་བཀག་ཉར་འོག་བཞག་འདུག
དེ་འབྲེལ་རྒྱལ་མཚམས་མེད་པའི་གསར་འགོད་མཐུན་ཚོགས་ཀྱི་འགན་འཛིན་ཨེན་ནེ་བྷོ་ཁན་ཌི་ (Anne Bocande) ལགས་ཀྱིས། ཉེ་ལམ་རང་དབང་དང་། རང་བཙན་དགོས་ན་དཔལ་འབྱོར་གྱི་གནས་སྟངས་ལེགས་པོ་དགོས་ཀྱི་ཡོད་པ་རེད། དཔལ་འབྱོར་གྱི་གནས་བབ་ལེགས་པོ་མེད་ཚེ། གསར་འགོད་པར་རང་དབང་ཞིག་ཡོང་ཐབས་མེད། གསར་ཁང་ཁག་ལ་དཔལ་འབྱོར་གྱི་དཀའ་ངལ་ཤུགས་ཆེན་འཕྲད་སྐབས། སྒེར་གཅོད་པ་དང་དབང་འཛིན་པའི་འོག་ཏུ་ཚུད་རྒྱུའི་ཉེན་ཁ་ཆེ་བ་དང་། གནས་ཚུལ་རྫུན་བཟོ་དང་། སྒེར་གཅོད་པའི་བསམ་ཚུལ་དྲིལ་བསྒྲགས་བྱེད་མཁན་དུ་གྱུར་ཉེན་ཆེ། དེར་བརྟེན་གསར་ཁང་ཁག་གིས་ཡིད་རྟོན་རུང་བའི་གནས་ཚུལ་ཁྱབ་སྤེལ་བྱ་རྒྱུའི་འགན་ཡོད་པ་མ་ཟད། དྲང་བདེན་གྱི་གནས་ཚུལ་དང་གསར་འགྱུར་ཚད་ལྡན་ཞིག་འདོན་སྤེལ་བྱ་རྒྱུ་གལ་ཆེན་པོ་རེད། ཅེས་བརྗོད་འདུག
འདི་ལོར་རྒྱལ་མཚམས་མེད་པའི་གསར་འགོད་མཐུན་ཚོགས་ཀྱིས་འཛམ་གླིང་གི་རྒྱལ་ཁབ་དང་ས་ཁུལ་ ༡༨༠ ལ་ཞིབ་འཇུག་བྱས་པ་བརྒྱུད། རྒྱ་ནག་ནི་གསར་འགོད་རང་དབང་ཞན་པའི་རྒྱལ་ཁབ་ཨང་རིམ་ ༡༧༨ དང་། བྱང་ཀོ་རི་ཡ་ཨང་རིམ་ ༡༧༩། ཨ་ཧྥི་རི་ཀའི་ཨེ་རི་ཊྲི་ཡ་ (Eritrea) ཨང་རིམ་ ༡༨༠ བཅས་རྒྱ་ནག་དང་བྱང་ཀོ་རི་ཡ། ཨ་ཧྥི་རི་ཀ་གསུམ་ནི་འཛམ་གླིང་གི་གསར་འགོད་རང་དབང་ཞན་ཤོས་ཀྱི་རྒྱལ་ཁབ་སྡུག་ཤོས་གསུམ་ཡིན་པ་དང་། ནོར་ཝེ་དང་། ཨེ་སི་ཊོ་ནི་ཡ་ (Estonia)། ནི་ཌར་ལན་ཌི། སུ་ཝེ་ཌན་བཅས་ནི་འཛམ་གླིང་གི་གསར་འགོད་རང་དབང་གི་གནས་སྟངས་ཡག་ཤོས་བཞི་ཡིན་འདུག
ཕྱི་ལོ་ ༢༠༢༤ ལོར་མཉམ་འབྲེལ་རྒྱལ་ཚོགས་ཀྱི་སྙན་ཐོ་ལྟར་ན། ཕྱི་ལོ་ ༡༩༩༣ ནས་ ༢༠༢༤ བར་འཛམ་གླིང་ཁྱོན་ཡོངས་སུ་གཡུལ་ས་དང་སྲིད་དབང་སྒེར་གཅོད། ལྐོག་ཟ་རུལ་སུངས་སོགས་ཀྱི་ཁ་གཏད་དུ་ལངས་མཁན་གསར་འགོད་པ་ཁྱོན་ ༡༧༦༢ རྐྱེན་འདས་སུ་བཏང་ཡོད་འདུག དེའི་ནང་ནས་རྒྱ་ནག་གཞུང་གིས་ད་བར་གསར་འགོད་པ་ ༡༢༧ ལྷག་འཛིན་བཟུང་བཙོན་འཇུག་བྱས་ཏེ། གར་སོང་ཆ་མེད་དུ་གྱུར་བ་དང་གཅར་རྡུང་བཏང་ནས་དུས་མིན་རྐྱེན་འདས་སུ་ཕྱིན་ཡོད་པའི་སྐོར་དང་། ལྷག་པར་དུ་ད་ལྟ་འཛམ་གླིང་ནང་དྲང་བདེན་མིན་པའི་ཁྲིམས་ཆད་ཕོག་པ་དང་། བཙོན་འཇུག་མནར་གཅོད་འོག་ཡོད་པའི་གསར་འགོད་པ་ཁྱོན་ ༣༢༠ ཡོད་པ་ཚང་མ་འཕྲལ་དུ་ཀློད་གྲོལ་གཏོང་དགོས་པའི་འབོད་སྐུལ་ཞུས་འདུག
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། པདྨ་མཚོ།
