བཀའ་ཟུར་བཀྲ་ཤིས་དབང་འདུད་མཆོག་གི་ཤུལ་ལུས་ནང་མིར་གདུང་སེམས་མཉམ་སྐྱེད་གནང་།

སྲིད་ཚབ་རྒྱ་རི་སྒྲོལ་མ་མཆོག་གིས་བཀའ་ཟུར་བཀྲ་ཤིས་དབང་འདུད་མཆོག་གིས་མི་ལོ་ ༤༠ ལྷག་བོད་མིའི་སྒྲིག་འཛུགས་ལ་སྲི་ཞུ་བསྒྲུབས་པའི་རླབས་ཆེན་གྱི་མཛད་རྗེས་དེ་དག་ཤེས་རྟོགས་བྱ་རྒྱུ་དེ་ཧ་ཅང་གལ་ཆེན་ཡིན་སྐོར་སོགས་གསུངས་སོང་།

ཁ་སང་ཕྱི་ཚེས་ ༡ ཉིན་བཀའ་ཟུར་བཀྲ་ཤིས་དབང་འདུད་ལགས་ཁེ་ན་ཌར་སྐུ་གྲོངས་པའི་གནས་ཚུལ་ཐོན་པ་ལྟར། དེ་རིང་དབུས་བོད་མིའི་སྒྲིག་འཛུགས་ཀྱིས་དམ་པ་ཁོང་ལ་རྗེས་དྲན་མཚོན་ཆེད་ཀྱི་གསར་འགོད་ལྷན་ཚོགས་ཤིག་འཚོགས་ཡོད་ཅིང་། སྐབས་དེར་དབུས་བོད་མིའི་སྒྲིག་འཛུགས་ཀྱི་སྲིད་ཚབ་དང་བདེ་སྲུང་བཀའ་བློན་གཅིག་ལྕོགས་རྒྱ་རི་སྒྲོལ་མ་མཆོག་གིས། དམ་པ་ཁོང་གི་ཤུལ་ལུས་ནང་མི་རྣམས་ལ་སེམས་གསོ་དང་གདུང་སེམས་མཉམ་སྐྱེད་ཞུས་ཏེ། ཁོང་གི་སྐུ་ཚེ་གང་བོར་བོད་བསྟན་སྲིད་ཀྱི་ཆེད་དུ་སྲི་ཞུ་བསྒྲུབས་པར་བསྔགས་བརྗོད་གནང་སོང་།

གསལ་འགོད་ལྷན་ཚོགས་སྟེང་སྲིད་ཚབ་རྒྱ་རི་སྒྲོལ་མ་མཆོག་གིས། བཀའ་ཟུར་བཀྲ་ཤིས་དབང་འདུད་ལགས་ཁ་སང་ཕྱི་ཟླ ༥ ཚེས་ ༡ ཉིན་གྱི་ཆུ་ཚོད་བཅུ་གཉིས་དང་ཕྱེད་ཀ་ཙམ་ཞིག་ལ་ཁེ་ན་ཌའི་ཨོ་ཌ་ཝར་དགོངས་པ་རྫོགས་པའི་ཡིད་སྐྱོ་བའི་གནས་ཚུལ་ཐོན་པ་རེད། ཚང་མས་མཁྱེན་གསལ་ལ་བོད་མིའི་སྒྲིག་འཛུགས་སུ་སྲི་ཞུ་བསྒྲུབ་མྱོང་མཁན་དང་མཛད་གཙོ་རྣམས་སྐུ་ཚེ་མ་བརྟན་པའི་གནས་སྟངས་བྱུང་སྐབས། བཀའ་ཤག་གིས་མཆོད་འབུལ་སྨོན་ལམ་ཞིག་གོ་སྒྲིག་བྱེད་ཀྱི་ཡོད་རེད། ད་རེས་ཞིང་གཤེགས་བཀའ་ཟུར་བཀྲ་ཤིས་དབང་འདུད་ལགས་ཀྱི་ཁ་ཆེམས་ཀྱི་ནང་དོན་གཅིག བཀའ་ཟུར་མཆོག་གི་སྐུ་ཟླའི་གཅུང་པོ་སྨན་པ་ས་འདུས་ཚང་ཚེ་བརྟན་ལགས་བརྒྱུད་ནས་བཀའ་དྲུང་ཡིག་ཚང་དུ་གསུངས་པའི་ནང་། ནམ་རྒྱུན་ལྟར་ལས་བྱེད་པ་རྣམས་ཀྱི་ལས་དོན་ལ་བརྡབ་གསིག་མི་འགྲོ་སླད། མཆོད་འབུལ་སྨོན་ལམ་འཚོག་མི་དགོས་རྒྱུར་དགོངས་པ་བཞེས་རོགས་གནང་ཞེས་ཁ་ཆེམས་ཤིག་འབྱོར་སོང་། ད་ལན་བཀའ་ཤག་གིས་སྤྱིར་མི་རབས་གཅིག་རྫོགས་འགྲོ་བའི་དུས་ཤིག་དང་། བོད་སྤྱིའི་རྩ་དོན་ལ་གྱོང་གུད་ཆེན་པོ་ཞིག་ཡིན་པར་ངོས་འཛིན་བྱེད་ཀྱི་ཡོད། ཅེས་དང་། ད་ལན་བཀའ་ཟུར་མཆོག་གི་ཁ་ཆེམས་བཞིན་ལས་ཁུངས་ཁག་སྒོ་བརྒྱབ་ནས་མཆོད་འབུལ་སྨོན་ལམ་འཚོག་མི་དགོས་པ་བྱས་ཡིན། ཞེས་གསུངས་སོང་།

ཡང་སྲིད་ཚབ་མཆོག་གིས། བཀའ་ཟུར་བཀྲ་ཤིས་དབང་འདུད་མཆོག་ནི་༧གོང་ས་རྒྱལ་བ་རིན་པོ་ཆེ་མཆོག་གི་དགོངས་པ་ལྟར། བོད་སྤྱིའི་རྩ་དོན་ཐོག་ཞབས་འདེགས་རླབས་ཆེན་སྒྲུབ་མཁན་ཞིག་ཡིན་སྟབས། རྒྱ་ཆེའི་མང་ཚོགས་ཀྱིས་ཀྱང་ཁོང་གི་མཛད་རྗེས་རྣམས་ཤེས་རྟོགས་བྱ་རྒྱུ་དེ་ཧ་ཅང་གལ་ཆེན་ཡིན་སྐོར་དང་། དམ་པ་ཁོང་གིས་དགའ་ལྡན་ཕོ་བྲང་གཙོས་དབུས་བོད་མིའི་སྒྲིག་འཛུགས་ཀྱི་ལྷན་ཁང་མང་དག་ཅིག་ཏུ་སྲི་ཞུ་བསྒྲུབས་ཡོད་པའི་མུར། ཁོང་དང་ཁོང་ལྟ་བུའི་སྲི་ཞུའི་ལས་བྱེད་པ་རྣམས་ནི་བོད་མིའི་སྒྲིག་འཛུགས་དང་བོད་མི་རྣམས་ལ་བཀའ་དྲིན་ཆེན་པོ་ཡིན་སྟབས། ཁོང་གི་ཤུལ་ལུས་བུ་ཕྲུག་གཙོས་ཉེ་འབྲེལ་ཡོངས་ལ་གདུས་སེམས་མཉམ་སྐྱེད་དང་སེམས་གསོ་ཞུ་ཡི་ཡོད་སྐོར་སོགས་གསུངས་སོང་།

དེ་བཞིན་དེ་རིང་བཀའ་དྲུང་ཡིག་ཚང་གིས་དབུས་བོད་མིའི་སྒྲིག་འཛུགས་ཀྱི་ལྷན་ཁང་ཁག་དང་། ཆེས་མཐོའི་ཁྲིམས་ཞིབ་ཁང་། ཚོགས་དྲུང་ལས་ཁུངས། རང་དབང་ཅན་གྱི་སྡེ་ཚན་བཅས་སུ་བསྐུར་བའི་གསལ་བསྒྲགས་སུ།  བཀའ་ཟུར་བཀྲ་ཤིས་དབང་འདུད་མཆོག་ཁ་སང་ཕྱི་ཚེས་ ༡ ཉིན་ཨོ་ཊ་ཝར་སྐུ་ཚེའི་འཕེན་པ་རྫོགས་པའི་ཡིད་སྐྱོའི་གནས་ཚུལ་ཐོན་པར་ཆེས་བློ་ཕམ་ཐོག་མྱ་ངན་གུས་འདུད་ཞུ་རྒྱུ་དང༌། སྤྱིར་མཛད་གཙོ་ཟུར་པ་སྐུ་གཤེགས་ཤུལ་དུ་བོད་མིའི་སྒྲིག་འཛུགས་ཀྱི་མཛད་གཙོ་ལས་ཐོག་རྣམ་པ་དབུས་པའི་ལས་བྱེད་ཚང་འཛོམས་ཐོག་མཆོད་འབུལ་སྨོན་ལམ་གསུང་འདོན་དང༌། དེ་རྗེས་གཞུང་འབྲེལ་མྱ་ངན་གུས་འདུད་མཚོན་བྱེད་དབུས་ལས་ཁུངས་ཁག་ལས་མཚམས་འཇོག་གི་ཡོད་ནའང་། དམ་པ་ཁོང་གི་ཞལ་ཆེམས་ལ་གུས་བརྩིའི་ཐོག་མུ་མཐུད་ལས་ཁུངས་འཚོག་རྒྱུ་ཡིན་ཡང་། ལས་བྱེད་རྣམས་ཀྱིས་བསྔོ་སྨོན་ཞུ་བའི་འབོད་སྐུལ་ཞུ་ཡི་ཡོད་སྐོར་སོགས་གསལ་འདུག ཞེས་གསལ་འདུག

གསར་འགོད་པ། དཔལ་ལྡན།