རྩོམ་ཁུངས། བོད་ཀྱི་དུས་བབ།
རྩོམ་པ་པོ། རེ་མདོ་སེངྒེ།
ཨ་རིའི་བོད་སྐད་ཀྱི་རླུང་འཕྲིན་ཁང་གཉིས་ནི་བོད་ནང་གི་བོད་མི་ཚོས་ཕྱི་ཕྱོགས་ཀྱི་གནས་ཚུལ་ལ་རྒྱུས་ལོན་དང་གོ་རྟོགས་བྱེད་སའི་གཞི་རྟེན་གཙོ་བོ་ཞིག་ཏུ་གྱུར་ཡོད་པར་བརྟེན། རླུང་འཕྲིན་ཁང་འདི་གཉིས་བོད་ཕྱི་ནང་གི་བོད་མི་ཚོའི་ནུས་པ་མཉམ་སྤུངས་ངང་བདེན་དོན་འཐབ་རྩོད་ཀྱི་སྟོབས་ཤུགས་རྒྱུན་གནས་གོང་འཕེལ་ཡོང་བའི་ཆ་རྐྱེན་གལ་ཆེན་པོ་ཞིག་ཏུ་གྱུར་ཡོད་པ་ཡོངས་གྲགས་ཡིན། འོན་ཀྱང་བར་སྐབས་ཨ་རིའི་གཞུང་གསར་པའི་སྲིད་བྱུས་ཀྱི་འགྱུར་བའི་དབང་གིས་ཨ་རིའི་རླུང་འཕྲིན་ཁང་ (VOA) དང། ཨེ་ཤ་ཡ་རང་དབང་རླུང་འཕྲིན་ཁང་ (RFA) གཉིས་ཀྱི་འགྲོ་གྲོན་མཚམས་འཇོག་བྱས་པའི་རྐྱེན་གྱིས་བོད་སྐད་རླུང་འཕྲིན་ཁང་གཉིས་ཀྱི་ལས་མཚམས་འཇོག་དགོས་བྱུང་བ་ནི། བོད་ཕྱི་ནང་གི་བོད་མི་བསམ་ཤེས་ཅན་ཡོངས་རྫོགས་ཀྱིས་བློ་ཕམ་དང་སེམས་ཁྲལ་བྱ་བའི་གནད་དོན་གཙོ་བོ་ཞིག་ཏུ་གྱུར་ཡོད།
ཁོ་བོར་མཚོན་ན་རླུང་འཕྲིན་ཁང་འདི་གཉིས་བརྒྱུད་ནས་ཉིན་རེའི་བོད་ཕྱི་ནང་དང་རྒྱལ་སྤྱིའི་གསར་འགྱུར་ཙམ་མ་ཡིན་པར། ཤེས་བྱའི་རྣམ་གྲངས་དང་གོ་རྟོགས་མང་པོ་ཐོབ་མྱོང་མཁན་ཞིག་ཡིན་པའི་ཆ་ནས་རླུང་འཕྲིན་འདི་གཉིས་ལ་ལྟ་ཉན་བྱ་རྒྱུ་ནི་གོམས་གཤིས་སུ་འཇགས་པའི་ཉིན་རེའི་འཚོ་བའི་ནང་གི་ཆ་ཤས་གལ་ཆེན་ཞིག་ཏུ་གྱུར་ཡོད། དེར་བརྟེན་རླུང་འཕྲིན་འདི་གཉིས་ཀྱི་ལས་མཚམས་བཞག་པའི་གནས་ཚུལ་ཐོས་མ་ཐག་བློ་ཕམ་དང་སེམས་ཁྲལ་ཆེན་པོ་བྱུང་བར་མ་ཟད། རླུང་འཕྲིན་ཁང་འདི་གཉིས་གཏན་དུ་མེད་པར་གྱུར་ན་འབྱུང་སྲིད་པའི་ཉེན་ཁའི་གནས་ཚུལ་མང་པོ་ཞིག་ཀྱང་བསམ་བློར་འཁོར་མྱོང། བློ་ཕམ་དང་སེམས་ཁྲལ་འབྱུང་སྲིད་པའི་ཉེན་ཁའི་འཆར་སྣང་བཅས་ལས་བྱུང་བའི་སྒེར་བའི་མཐོང་ཚུལ་ཁག་ཡིག་ཐོག་ཏུ་འགོད་རྒྱུའི་བསམ་བློ་འཁོར་མྱོང་ཡང། བར་ལམ་ལས་བྲེལ་སྣ་ཚོགས་ཀྱི་རྐྱེན་པས་རླུང་འཕྲིན་ཁང་འདི་གཉིས་དང་འབྲེལ་བའི་ཚོར་སྣང་ཡིག་ལམ་དུ་སྤེལ་རྒྱུ་འགོར་འགྱངས་སུ་གྱུར། དེ་རིང་ཉིན་གུང་ཡོལ་ཙམ་ལ་ལྷོ་ཕྱོགས་བོད་མིའི་གཞིས་ཁག་ལྔ་ལས་ཀོ་ལི་སྒར་དོན་ལྡན་གླིང་དུ་འབྱོར་བའི་སྐབས་ཕྱི་དྲོར་ལས་རིམ་དམིགས་བསལ་སྒྲིག་མི་འདུག་པར་བརྟེན། མགྲོན་ཁང་དུ་སེམས་ཚོར་དེ་དག་ཡིག་ཐོག་ཏུ་འགོད་རྒྱུར་འབད་བརྩོན་བྱས་ཡོད། ཁོ་བོས་ཡིག་རྩོམ་འདི་འདྲ་ཞིག་སྤེལ་བས་ད་ལྟའི་གནས་སྟངས་དངོས་ལ་བཟང་ཕྱོགས་ཀྱི་འགྱུར་བ་འགྲོ་རྒྱུར་ཤུགས་རྐྱེན་གང་ཡང་ཐེབས་མི་ཐུབ་པ་གསལ་པོ་ཤེས་ཀྱང། བོད་མིའི་སྤྱི་ཚོགས་དང་ཤེས་ཡོན་པའི་ཁྲོད་རླུང་འཕྲིན་ཁང་འདི་གཉིས་ཀྱི་ལས་མཚམས་འཇོག་དགོས་བྱུང་བར་བློ་ཕམ་དང་སེམས་ཁྲལ་ཅི་ཙམ་བྱེད་ཀྱི་ཡོད་མེད་དང། རླུང་འཕྲིན་ཁང་འདི་གཉིས་ལས་མཚམས་བཞག་པ་ལ་བརྟེན་ནས་འགྱེལ་བའི་སྒང་ལ་རྡོག་བརྫིས་ཞེས་པའི་དཔེ་ལྟར། ཉམ་ཐག་པའི་བོད་མི་རིགས་ལ་གྱོང་གུད་སྣོན་མ་ཅི་ཞིག་ཕོག་སྲིད་པའི་སྐོར་གང་ཟག་སྒེར་པའི་ལྟ་ཚུལ་ཡིག་ཐོག་ཏུ་གནས་ཐུབ་ན་སྙམ་པ་ཙམ་ཡིན།
བོད་སྐད་གསར་ཁང་འདི་གཉིས་ཀྱིས་འདས་པའི་ལོ་བཅུ་ཕྲག་དུ་མའི་རིང་འཛམ་གླིང་ནང་ཉིན་རེར་འབྱུང་བཞིན་པའི་རྒྱལ་སྤྱིའི་གསར་འགྱུར་ཁག་བོད་སྐད་ཡིག་ལམ་ནས་བརྒྱུད་སྒྲོགས་བྱས་པ་ཙམ་མ་ཡིན་པར། ༸གོང་ས་༸སྐྱབས་མགོན་༸རྒྱལ་དབང་ཐམས་ཅད་མཁྱེན་པ་མཆོག་གི་ཆོས་སྲིད་ཀྱི་མཛད་འཕྲིན་ཁག་དང་རླབས་ཆེན་གྱི་དགོངས་གཞི་ངོ་སྤྲོད། བོད་མིའི་སྒྲིག་འཛུགས་ཀྱི་འཆར་འཕར་གྱི་གལ་ཆེའི་མཛད་བྱུས་རིགས། བོད་ནང་དུ་བོད་མི་ཚོས་དཀའ་སྡུག་སྣ་ཚོགས་མྱོང་བཞིན་པའི་དངོས་ཡོད་གནས་སྟངས། བཙན་བྱོལ་བོད་མིའི་སྤྱི་ཚོགས་ཁྲོད་ཀྱི་གནས་ཚུལ་གལ་ཆེའི་རིགས་བཅས་ཡིག་ཐོག་དང་ངག་ཐོག བརྙན་ལམ་བཅས་ནས་འཇིག་རྟེན་ཡོངས་ཁྱབ་རང་བཞིན་དུ་དྲང་བདེན་དང་བསླད་མེད་པར་བརྒྱུད་སྒྲོགས་བྱེད་ཐུབ་པ་བྱུང་ཡོད།
རླུང་འཕྲིན་ཁང་འདི་གཉིས་ཀྱིས་ཐོག་མའི་དམིགས་ཡུལ་དང་རྩ་འཛིན་གྱི་གཞི་རྩ་མ་བརླགས་པའི་ཐོག་ནས། ༸གོང་ས་མཆོག་གི་རླབས་ཆེ་བའི་ཆོས་སྲིད་ཀྱི་དགོངས་པ་ངོ་སྤྲོད་དང། འཛམ་གླིང་རང་བཞིན་གྱི་ཆབ་སྲིད། ཤེས་ཡོན། དཔལ་འབྱོར། དམག་དོན། འཕྲོད་བསྟེན། ཡུལ་ཁམས་ཆགས་ལུགས། ཁོར་ཡུག་གི་གནད་དོན། མི་སྣ་ངོ་སྤྲོད་བཅས་གལ་གནད་ཆེ་བའི་ལེ་ཚན་བརྒྱ་ཕྲག་མང་པོ་གཙོ་སྒྲུབ་བྱེད་ཐུབ་ཡོད་པར་མ་ཟད། དེ་བཞིན་བོད་ཀྱི་སྐད་ཡིག་དང། རིག་གཞུང། ཆོས་ལུགས། ལོ་རྒྱུས། ཆབ་སྲིད། དམག་དོན། འཛུགས་སྐྲུན། ཤེས་ཡོན་དང་འབྲེལ་བའི་གལ་ཆེའི་གནད་དོན། ཆོས་སྲིད་ཀྱི་གལ་ཆེའི་མི་སྣ་ངོ་སྤྲོད། སྤྱི་ཚོགས་ཀྱི་བདེ་དོན། བཙན་བྱོལ་བོད་མིའི་ཚོང་ལས། ཞིང་འབྲོག་གི་འཚོ་ཐབས་ངོ་སྤྲོད། གཞན་ཡང་གལ་ཆེ་བའི་བརྗོད་གཞི་སྣ་ཚོགས་པའི་ཐོག་ཆེད་མཁས་པ་དང་ལྷན་དཔྱད་ཞིབ་དང་བགྲོ་གླེང་གནང་བ་སོགས་བརྒྱུད་བོད་ཕྱི་ནང་གི་བོད་མིས་མཚོན། བོད་ཡིག་དང་བོད་སྐད་ལ་བརྟེན་པའི་ཤེས་ཡོན་དོན་གཉེར་ཅན་དང་མང་ཚོགས་སྟོང་ཕྲག་མང་པོར་རྣམ་དཔྱོད་དང་ཤེས་རབ་སྤེལ་བའི་མཛད་རྗེས་རླབས་ཆེན་བཞག་གནང་ཡོད།
འཛམ་གླིང་གི་མི་རིགས་མང་ཆེ་བར་སོ་སོའི་སྐད་ཡིག་གི་བརྒྱུད་ལམ་ནས་མང་ཚོགས་ཀྱི་ཤེས་ཡོན་དང། བསམ་བློ། ཀུན་སྤྱོད་བཅས་གོང་འཕེལ་ཡོང་བའི་ཐབས་སུ་ཆེད་མཁས་མི་སྣ་དང་ལྷན་ལེ་ཚན་མང་པོ་གོ་སྒྲིག་བྱེད་ཀྱི་ཡོད་པར་མ་ཟད། བརྗོད་གཞི་འདྲ་མིན་སྣ་ཚོགས་ཐོག་དཔྱད་ཞིབ་དང་བགྲོ་གླེང་གི་རིགས་སྣ་མང་གོ་སྒྲིག་བྱེད་སྲོལ་ཡོད་པ་ལྟར། རླུང་འཕྲིན་ཁང་འདི་གཉིས་ཀྱིས་བོད་སྐད་རླུང་འཕྲིན་གྱི་སྟོང་ཆ་མང་པོ་ཁ་གསབ་བྱས་པ་ཙམ་མ་ཟད། གསར་འགྱུར་གྱི་འབྱུང་ཁུངས་དང་སྐད་ཡིག་གི་སྤུས་ཚད། ལེ་ཚན་གཞན་དག་གི་ཤེས་ཡོན་གྱི་རྒྱབ་ལྗོངས་དང་དཔྱད་ཞིབ་ཀྱི་རིགས་ལམ་བཅས་གང་ཅིའི་ཐད་ནས་ཕུན་སུམ་ཇེ་ཚོགས་སུ་གྱུར་ཏེ། གཟུ་བོར་གནས་པའི་སྐྱེ་བོ་ཀུན་གྱི་དང་བ་འདྲེན་པའི་གསར་འགྱུར་བརྒྱུད་ལམ་ཚད་ལྡན་དུ་འགྱུར་བཞིན་པའི་སྐབས། གློ་བུར་བར་གཅོད་ཀྱི་དབང་དུ་ཚུད་པ་ནི་བོད་མི་རིགས་སྤྱིའི་གོད་ཆག་ཆེན་པོ་ཞིག་ཅིའི་མ་ཡིན།
གསར་ཁང་འདི་གཉིས་ཀྱི་ལས་མཚམས་བཞག་པ་ལ་བརྟེན་ནས་བོད་ཕྱི་ལོགས་སུ་བོད་ཀྱི་སྐད་ཡིག་གི་བརྒྱུད་ལམ་ནས་གནས་ཚུལ་མང་པོ་ཤེས་རྟོགས་བྱེད་པའི་བརྒྱུད་ལམ་གལ་ཆེན་ཞིག་སྒོ་ཁེགས་པ་ཙམ་མ་ཡིན་པར། དེ་བས་ཀྱང་ཉེན་ཁ་དང་བློ་ཕམ་གྱི་གནས་སུ་གྱུར་པ་ནི་བོད་ནང་གི་བོད་མི་སྟོང་ཕྲག་མང་པོས་ཕྱི་ལོགས་ཀྱི་གནས་ཚུལ་དྲང་བདེན་དང་བསླད་མེད་པ་ཤེས་རྟོགས་ཐུབ་པའི་སྒོ་མོ་བཀག་པ་ཞིག་ཏུ་གྱུར་ཡོད་ལ། བརྒྱུད་ལམ་འདི་གཉིས་གཏན་དུ་ཁེགས་ན་བོད་ནང་གི་བོད་མི་སྟོང་ཕྲག་མང་པོའི་དྲང་བདེན་གྱི་གནས་ཚུལ་ཤེས་རྟོགས་བྱེད་སའི་འབྱུང་ཁུངས་སྤུས་གཙང་གལ་ཆེན་གཉིས་གཏན་ནས་མེད་པར་གྱུར་པ་ཡིན་པས། དེ་ལྟར་གྱུར་ན་བོད་ཕྱི་ནང་གི་འབྲེལ་བའི་གནས་སྟངས་ལ་ཉམས་ཆག་ཆེན་པོ་འབྱུང་ངེས་ཡིན་པ་དང། བོད་ཕྱི་ནང་གི་འབྲེལ་བའི་གནས་སྟངས་ཉམས་ཆག་ཏུ་ཕྱིན་ན། མི་རེ་ཟུང་གི་འཚོ་བ་དང་མི་ཚེའི་གནད་དོན་ལ་ཤུགས་རྐྱེན་ཐེབས་པ་ཙམ་མ་ཡིན་པར། བོད་ཀྱི་བདེན་དོན་འཐབ་རྩོད་བྱེད་པའི་གཞི་རྩའི་སྟོབས་ཤུགས་ཉམས་དམས་སུ་འགྲོ་བའི་ཉེན་ཁ་ཆེན་པོ་ཡོད་པ་ཡང་རང་བཞིན་གྱིས་རྟོགས་ཐུབ།
བོད་ཀྱི་བདེན་དོན་འཐབ་རྩོད་བྱེད་པའི་སྟོབས་ཤུགས་འཕེལ་རྒྱས་དང་རྒྱུན་གནས་ཡོང་བའི་གཞི་རྩ་གཙོ་བོ་ཞིག་ནི། རྒྱུ་རྐྱེན་སྣ་མང་འཛོམས་པའི་འོག་ནས་བོད་ཕྱི་ནང་གི་བར་འབྲེལ་བ་གཏིང་ཟབ་ཏུ་ཕྱིན་ཏེ། བོད་ཕྱི་ནང་བར་ཕན་ཚུན་བསམ་བློ་དང་གནས་ཚུལ་ཤེས་རྟོགས་དང་རྒྱུས་ལོན་ཐུབ་པ་ལ་བརྟེན་ནས་བྱུང་བ་ཡིན་པ་ལོ་རྒྱུས་འཕེལ་རིམ་གྱི་ཐོག་ནས་རྟོགས་ཐུབ། ཀུན་སློང་ཡོད་མེད་ལ་མ་ལྟོས་པར་བོད་ནང་གི་བོད་མི་ཚོས་ཕྱིའི་དྲང་བདེན་གྱི་གནས་ཚུལ་དང། ༸གོང་ས་མཆོག་གི་ཆོས་སྲིད་ཀྱི་མཛད་འཕྲིན་ཁག་ཤེས་རྟོགས་བྱེད་པའི་བརྒྱུད་ལམ་གཙོ་བོ་གཉིས་བཀག་པ་ནི། བོད་ནང་གི་བོད་མི་རྣམས་ཀྱི་བློ་སྟོབས་དང་སེམས་ཤུགས་འཕེལ་རྐྱེན་གྱི་བརྒྱུད་ལམ་གཙོ་བོ་གཉིས་མེད་པར་གྱུར་པ་ཡིན་པས། དེ་ལ་བརྟེན་ནས་ཁོང་རྣམ་པའི་བློ་སྟོབས་དང་སེམས་ཤུགས་ལ་གནོད་སྐྱོན་ཅི་ཙམ་ཐེབས་མིན་བཤད་ཚོད་ཐུབ་པ་ཞིག་མིན་ཡང། བློ་སྟོབས་དང་སེམས་ཤུགས་འཕེལ་བའི་འགལ་རྐྱེན་དུ་གྱུར་ཡོད་པ་ནི་བཤད་མ་དགོས་པ་ཞིག་ཡིན།
བོད་ཀྱི་བདེན་དོན་འཐབ་རྩོད་ལ་ཕམ་ཉེས་བྱུང་ན་བོད་མི་རིགས་རྐྱང་པའི་ཕམ་ཁ་མ་གཏོགས། སྟོབས་ཆེན་རྒྱལ་ཁབ་ཚོའི་ཆོས་སྲིད་དང་དཔལ་འབྱོར་གྱི་གནས་བབ་ལ་འབྲེལ་བ་གང་ཡང་མེད་པའི་ལྟ་ཚུལ་འཛིན་པ་ནི་ཤིན་ཏུ་ནོར་བ་སྟེ། མི་རིགས་ཤིག་གི་བདེན་དོན་འཐབ་རྩོད་ལ་ཕམ་ཉེས་བྱུང་ན་འཛམ་གླིང་སྤྱི་ཚོགས་ཁྲོད་རང་བཞིན་གྱིས་དྲང་བདེན་དང་ཁྲིམས་ལུགས་ལ་བརྩི་མཐོང་བྱེད་པའི་བསམ་བློ་ཉམས་དམས་སུ་འགྲོ་རྒྱུ་ཡིན་པ་སྨོས་མ་དགོས་ལ། དེ་ལྟར་གྱུར་ན་དམག་དོན་དང་སྟོབས་ཤུགས་ཁོ་ནས་རྒྱལ་ཕམ་ཐག་གཅོད་བྱེད་པ་མ་གཏོགས། བདེན་པ་དང་ཁྲིམས་ལུགས་ཟེར་བ་ནི་ཆབ་སྲིད་པའི་ཁ་ལྕེའི་བར་གྱི་འབོད་ཚིག་ཙམ་དུ་འགྱུར་ངེས་ཡིན། འཛམ་གླིང་འདིར་བདེན་པ་ལ་རིན་ཐང་མེད་པར་གྱུར་པའི་ཉིན་མོ་ནས་བརྩེ་བ་དང་ཡིད་ཆེས་ཀྱི་བསམ་བློའི་གཞི་རྟེན་མེད་པར་གྱུར་པ་ཡིན་ལ། བདེན་པ་དང། བརྩེ་བ། ཡིད་ཆེས་བཅས་ཀྱིས་སྟོང་པའི་ཡུལ་ཁམས་སུ་ཞི་བདེ་དང་ལྷིང་འཇགས་ཟེར་བ་ནི། ཚིག་གི་རི་མོ་ཙམ་མ་གཏོགས་དངོས་ཡོད་འཚོ་བའི་ནང་འབྱུང་བའི་སེམས་ཚོར་ཞིག་ཏུ་གཏན་ནས་འགྱུར་མི་སྲིད། འདི་དག་ནི་རླུང་འཕྲིན་འདི་གཉིས་ལས་མཚམས་བཞག་པ་ལ་བརྟེན་ནས་འབྱུང་སྲིད་པའི་ཉེན་ཁ་དང་བློ་ཕམ། སེམས་ཁྲལ་བཅས་འབྱུང་བའི་རྒྱུ་མཚན་གཙོ་བོའི་གྲས་ཀྱི་དཔེ་མཚོན་འགའ་ཤས་ཤར་མར་ཡིག་ཐོག་ཏུ་སྤེལ་བའི་སེམས་ཚོར་ཞིག་ཡིན།
ཕྱི་ལོ་ ༢༠༢༥ ལོའི་ཟླ་ ༥ ཚེས་ ༣ ཉིན་གྱི་ཕྱི་དྲོ་ཀོ་ལིས་སྒར་བོད་མིའི་གཞིས་སྒར་དོན་ལྡན་གླིང་ནས་བྲིས།
