༧གོང་ས་རྒྱལ་བ་རིན་པོ་ཆེ་མཆོག་ནས་མི་གྲངས་ ༣༦༠ ལ་མཇལ་ཁ་སྩལ། 

དེ་རིང་༧གོང་ས་རྒྱལ་བ་རིན་པོ་ཆེ་མཆོག་ནས་བོད་མི་དང་ཧི་མ་ལ་ཡ་རི་རྒྱུད་ཁུལ་ནས་ཕེབས་པའི་མཇལ་བཅར་བ་སོགས་ལ་མཇལ་ཁ་སྩལ་ཡོད་འདུག 

དེ་རིང་ཕྱི་ཟླ་ ༥ ཚེས་ ༦ ཉིན་བཞུགས་སྒར་རྒྱལ་བའི་ཕོ་བྲང་དུ་༧གོང་ས་རྒྱལ་བ་རིན་པོ་ཆེ་མཆོག་ནས། རྒྱལ་ཁབ་ཕྱི་ནང་ཀུན་གྱི་དད་ལྡན་མང་ཚོགས་ ༣༦༠ ལ་མཇལ་ཁ་སྩལ་ཏེ། ང་ཚོ་སྐྱེས་མ་ཐག་ནས་ཨ་མའི་བྱམས་བརྩེའི་མཐུ་འོག་ནས་འཚར་བ་བཞིན།  གང་ཐུབ་ཐུབ་ཀྱིས་བྱམས་བརྩེ་གོང་མཐོར་གཏང་དགོས་སྐོར་སོགས་གསུངས་འདུག་ལ། སང་ཉིན་ཕྱི་ཚེས་ ༧ ཉིན་ཐེག་ཆེན་ཆོས་གླིང་གཙུག་ལག་ཁང་དུ་༸གོང་ས་རྒྱལ་བ་རིན་པོ་ཆེ་མཆོག་ལ་བལ་ཡུལ་ཤང་དགའ་ལྡན་ཆོས་འཁོར་གླིང་དང་། ཆ་ཕྲེང་མི་མང་ཚོགས་ཁག་ཅིག ཕག་རི་མི་མང་བཅས་ནས་བརྟན་བཞུགས་བསྟར་འབུལ་ཞུ་རྒྱུ་ཡིན་འདུག 

དེ་རིང་དད་ལྡན་མཇལ་བཅར་བ་ཞིག་གིས་བྱམས་བརྩེ་མི་བརླག་ཐབས་ཇི་ལྟར་བྱ་དགོས་མིན་ཐད་དྲིས་པའི་བཀའ་ལན་དུ། ང་ཚོ་སྐྱེས་མ་ཐག་ནས་ཨ་མའི་བྱམས་བརྩེ་དེ་རང་བཞིན་གྱི་སླེབས་ཀྱི་འདུག་ག དེ་རྒྱུན་མཐུན་ནས་ཉམས་ལེན་བྱ་དགོས། ཞེས་དང་། ང་ཚོ་སྐྱེས་མ་ཐག་ནས་རང་བཞིན་མེད་པར་ཨ་མའི་ཤུགས་རྐྱེན་ཞིག་སྦྱོང་མི་དགོས་པར་ཡོད་ཡོད་པ་རེད། དེང་སྐབས་འཇིག་རྟེན་འདིའི་ཐོག་ཚང་མས་སེམས་བཟང་པོར་དགའ་མོས་བྱེད་ཀྱི་ཡོད། ཅེས་གསུངས་འདུག 

མཇལ་ཁ་གྲུབ་མཚམས་གོ་པལ་པུར་བོད་ཁྱིམ་སློབ་གྲྭའི་བོད་དགེ་དབྱངས་མཚོ་ལགས་ཀྱིས། དེ་རིང་ང་ཚོ་ནང་མི་གསུམ་ལ་༧གོང་ས་རྒྱལ་བ་རིན་པོ་ཆེ་མཆོག་ནས་མཇལ་ཁ་སྩལ་བར་དཔེ་མི་སྲིད་བསྐལ་བ་བཟང་པོ་ཡིན་བསམ་གྱི་འདུག་ལ། སོ་སོ་ལ་མཇལ་ཁ་རག་པ་མ་ཟད། ལོ་ངོ་བཞི་ལ་སོན་པའི་ངའི་བུ་ལ་མཇལ་ཁ་ཐེངས་དང་པོར་ཐོབ་སོང་ལ། ཁོས་༧གོང་ས་རྒྱལ་བ་རིན་པོ་ཆེ་མཆོག་ལ་སྙན་ཚིག་ཅིག་ཀྱང་སྤྱན་འབུལ་ཞུས་སོང་། ཞེས་དང་། དེ་བཞིན་དད་ལྡན་མཇལ་ཞུ་བ་ཚེ་རིང་དབང་མོ་ལགས་ཀྱིས། དེ་རིང་༧གོང་ས་རྒྱལ་བ་རིན་པོ་ཆེ་མཆོག་མཇལ་ནས་སེམས་དཔེ་དགའ་པོ་བྱུང་། དེ་རིང་མི་ཚེའི་ནང་གི་གལ་ཆེ་ཤོས་དང་རྩ་ཆེ་ཤོས་ཤིག་བྱུང་སོང་། ཚོར་བ་ཧ་ལས་པའི་སྐྱིད་པོ་བྱུང་ལ། སངས་རྒྱས་ཀྱི་ཞབས་དྲུང་དུ་སྐྱེས་བ་ཡང་བསྐྱར་ལེན་པ་དང་། ༧གོང་ས་རྒྱལ་བ་རིན་པོ་ཆེ་མཆོག་སྐུ་ཚེ་བརྟན་པར་ཤོག་ཅེས་སྨོན་ལམ་བཏབ་པ་ཡིན། ཞེས་བརྗོད་བྱུང་། 

དེ་བཞིན་དགའ་ལྡན་ཕོ་བྲང་ཡིག་ཚང་གིས་སྤེལ་བའི་༧གོང་ས་རྒྱལ་བ་རིན་པོ་ཆེ་མཆོག་གི་མཛད་འཆར་ཁྲོད། འདི་ལོའི་ཕྱི་ཟླ་  ༥ ཚེས་ ༧ ཉིན་ཐེག་ཆེན་ཆོས་གླིང་གཙུག་ལག་ཁང་དུ་༸གོང་ས་རྒྱལ་བ་ཆེན་པོ་མཆོག་ལ་བལ་ཡུལ་ཤང་དགའ་ལྡན་ཆོས་འཁོར་གླིང་དང་། ཆ་ཕྲེང་མི་མང་ཚོགས་ཁག་ཅིག ཕག་རི་མི་མང་བཅས་ཀྱིས་བརྟན་བཞུགས་བསྟར་འབུལ་དང་། ཕྱི་ཟླ་ ༦ ཚེས་ ༤ ཉིན་༧གོང་ས་རྒྱལ་བ་རིན་པོ་ཆེ་མཆོག་ལ་རྡོར་གླིང་གཏན་སློབ་ཀྱི་སློབ་ཟུར་ཚོགས་པ་དང་། ནེའུ་ཡོག་དང་ནེའུ་འཇར་སི་བོད་རིགས་སྤྱི་མཐུན་ཚོགས་པ། མི་ནི་སོ་ཊ་ཨ་རི་བོད་མིའི་སྤྱི་མཐུན་ཚོགས་པ་བཅས་ནས་བརྟན་བཞུགས་བསྟར་འབུལ། དེ་བཞིན་ཕྱི་ཟླ་ ༦ ཚེས་ ༣༠ ཉིན་༧གོང་ས་རྒྱལ་བ་རིན་པོ་ཆེ་མཆོག་དགུང་གྲངས་ ༩༠ ཕེབས་པའི་གོ་སྟོན་དང་བསྟུན་བོད་ལྗོངས་མདོ་སྨད་ཆོལ་ཁའི་གཞིས་བྱེས་མི་མང་ཡོངས་ནས་བརྟན་བཞུགས་བསྟར་འབུལ་ཞུ་རྒྱུ་ཡིན་འདུག 

ཡང་མཛད་འཆར་ཁྲོད། འདི་ལོའི་ཕྱི་ཟླ་  ༧ ཚེས་ ༥ ཉིན་ཐེག་ཆེན་ཆོས་གླིང་གཙུག་ལག་ཁང་དུ་༸གོང་ས་རྒྱལ་བ་རིན་པོ་ཆེ་མཆོག་ལ་དབུས་བོད་མིའི་སྒྲིག་འཛུགས་བཀའ་ཤག་གིས་གཞིས་བྱེས་བོད་མི་ཡོངས་ཀྱི་ཚབ་ཞུས་ཏེ་བརྟན་བཞུགས་བསྟར་འབུལ་དང་། ཕྱི་ཟླ་ ༧ ཚེས་ ༦ ཉིན་༸གོང་ས་རྒྱལ་བ་རིན་པོ་ཆེ་མཆོག་དབུས་བོད་མིའི་སྒྲིག་འཛུགས་བཀའ་ཤག་གིས་གཞིས་བྱེས་བོད་མི་ཡོངས་ཀྱི་ཚབ་ཞུས་ཏེ་གོ་སྒྲིག་ཞུས་པའི་མགོན་པོ་གང་ཉིད་མཆོག་དགུང་གྲངས་དགུ་བཅུར་ཕེབས་པའི་སྐུའི་འཁྲུངས་སྐར་མཛད་སྒོར་ཆིབས་བསྒྱུར་བསྐྱང་རྒྱུ་ཡིན་འདུག 

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།