༧གོང་ས་རྒྱལ་བ་རིན་པོ་ཆེ་མཆོག་གི་དབུས་འཛམ་གླིང་གི་སྐྱེས་ཆེན་ཁག་ཅིག་གི་སྐུ་ཚེའི་ལོ་རྒྱུས་དང་འབྲེལ་བའི་འགྲེམས་སྟོན་ཞིག་ཞུ་རྒྱུ་ཡིན་འདུག 

ཨ་རིའི་ཇེཀ་མར་ཁེས་བོད་ཀྱི་སྒྱུ་རྩལ་འགྲེམས་སྟོན་ཁང་གིས་༧གོང་ས་རྒྱལ་བ་རིན་པོ་ཆེ་མཆོག་གི་སྐུ་ཚེའི་ལོ་རྒྱུས་དང་རླབས་ཆེན་གྱི་མཛད་འཕྲིན་ཁག་ཚུད་པའི་འཛམ་གླིང་གི་སྐྱེས་ཆེན་ཁག་གི་ལོ་རྒྱུས་ཀྱི་རིག་དངོས་འགྲེམས་སྟོན་གནང་རྒྱུ་ཡིན་འདུག

ཟླ་འདིའི་ཕྱི་ཚེས་ ༡༥ ཉིན་ཨ་རིར་རྟེན་གཞི་བྱས་པའི་ཇེཀ་མར་ཁེས་བོད་ཀྱི་སྒྱུ་རྩལ་འགྲེམས་སྟོན་ཁང་(The Jacques Marchais Museum of Tibetan Art) གིས།  དེང་གི་སྤྱི་ཚོགས་ཁྲོད་ཀྱི་མཐུན་སྒྲིལ་གྱི་འབོད་སྒྲ་( Voices for Unity in Contemporary Society) ཞེས་པའི་བརྗོད་གཞིའི་ཐོག ༧གོང་ས་རྒྱལ་བ་རིན་པོ་ཆེ་མཆོག་དང་། བདག་ཉིད་ཆེན་པོ་གྷན་དྷི། ནེ་སེན་མེན་ཌ་ལ། ཨ་མ་ཊེ་རི་ས། ཉི་ཧོང་གི་རྩོམ་པ་པོ་དྷ་ས་ཀུ་ཨེ་ནི་དྷ་(Daisaku Ikeda) བཅས་ཀྱིས་ལོ་རྒྱུས་ཁྲོད་འགྲོ་བ་མིའི་རིགས་ཀྱི་རིན་ཐང་གི་ཆེད་དུ་འཚེ་མེད་ཞི་བ་དང་གྲོས་མོལ་སོགས་ཀྱི་ཐབས་ལམ་ཐོག་སྐུ་ལས་འཛད་མེད་བསྐྱོན་པར་ཆེ་མཐོང་མཚོན་པའི་པར་རིས་འགྲེམས་སྟོན་ཞིག་ཞུ་རྒྱུ་ཡིན་འདུག

སྤྱིར་བཏང་ཐེངས་འདིའི་འགྲེམས་སྟོན་དེ་ནི་འདི་ལོའི་ཕྱི་ཟླ་ ༢ ནང་ཕྱི་དྲིལ་བོད་ཀྱི་འགྲེམས་སྟོན་གྱི་སྐོར་སྐྱོད་འགྲེམས་སྟོན་སྐབས་འགྲེམས་སྟོན་ཁང་དེའི་འབྲེལ་ཡོད་ལ་དངོས་སུ་ཐུག་ནས་ཐག་གཅོད་བྱུང་ཡོད་པ་མ་ཟད། ཐེངས་འདིའི་འགྲེམས་སྟོན་ཆེད་༧གོང་ས་རྒྱལ་བ་རིན་པོ་ཆེ་མཆོག་གི་ཐུགས་སྐྱེད་དམ་བཅའ་བཞི་གཙོས། སྐུ་ན་གཞོན་དུས་ཀྱི་མཛད་པ་དང་། དེ་བཞིན་བོད་རྒྱའི་དཀའ་རྙོག་སེལ་ཐབས་སུ་ཐབས་ལམ་ཅི་ལ་གཞོལ་ཡོད་མེད་དང་འབྲེལ་བའི་སྐུ་པར་ ༢༡ མཐུན་འགྱུར་གནང་ཡོད་འདུག

ཐེངས་འདིའི་འགྲེམས་སྟོན་ཐད་ཕྱི་དྲིལ་བོད་ཀྱི་འགྲེམས་སྟོན་ཁང་གི་འགན་འཛིན་བསྟན་འཛིན་སྟོབས་ལྡན་ལགས་ཀྱིས། ཇེཀ་མར་ཁེས་ལགས་ཀྱིས་དུས་རབས་ཉི་ཤུའི་གོང་བོད་དང་ཧི་མ་ཡ་ལ་ཁུལ་གྱི་ས་གནས་མང་དག་ཅིག་ནས་ཅ་དངོས་རྙིང་པ་མང་པོ་ཞིག་མཁོ་སྒྲུབ་བྱས་ཏེ། ཕྱི་ལོ་ ༡༩༥༠ ཙམ་ནས་འགྲེམས་སྟོན་བྱེད་མགོ་བཙུགས་ཡོད་ཅིང་། ད་ལན་འགྲེམས་སྟོན་ཁང་དེ་བཙུགས་ནས་མི་ལོ ༢༥ འཁོར་བ་དང་བསྟུན། འཛམ་གླིང་གི་སྐྱེས་ཆེན་དྲུག་གི་སྐུ་ཚེའི་བྱུང་བ་དང་། སྤྱི་ཚོགས་སུ་ཞབས་འདེགས་གནང་བའི་གོ་རིམ་སོགས་ཚུད་པའི་འགྲེམས་སྟོན་ཞིག་གནང་གི་ཡོད་པ་རེད། དེའི་ཁྲོད་དུ་༧གོང་ས་རྒྱལ་བ་རིན་པོ་ཆེ་མཆོག་གི་རླབས་ཆེན་གྱི་མཛད་པ་རྣམས་ཀྱང་འགྲེམས་སྟོན་ཞུ་ཡི་ཡོད་སྐོར་བརྗོད་བྱུང་།

ཨ་རིའི་ནེའུ་ཡོག་གྲོང་ཁྱེར་གྱི་ཁོངས་གཏོགས་ཉིན་རེའི་ཚགས་པར་ཁང་སི་ལའེ་ཧྥུ་(Silive)ཡིས་དེ་འབྲེལ་གནས་ཚུལ་སྤེལ་བ་ལྟར་ན།  འགྲེམས་སྟོན་དེའི་ཐོག་ལོ་རྒྱུས་ནང་བྱུང་བའི་སྐྱེས་ཆེན་རྣམས་ཀྱིས་སྐུ་ལས་འཛད་མེད་བསྐྱོན་ཏེ་སྙིང་རྗེའི་ནུས་མཐུ་དང་། སྙིང་སྟོབས་སྐྱེད་ནས་དྲང་བདེན་དང་གནས་ལུགས་དབེན་པའི་སྤྱི་ཚོགས་ནང་འདུམ་སྒྲིག་ཇི་ལྟར་མཛད་ཡོད་མེད་དང་། ལྷག་པར་དུ་བོད་ཀྱི་རིག་གཞུང་དང་༧གོང་ས་རྒྱལ་བ་རིན་པོ་ཆེ་མཆོག་གི་དབུ་ཁྲིད་འོག་ཆོས་ཕྱོགས་ཀྱི་རྨང་གཞི་ཇི་ལྟར་བཙུགས་ཡོད་མེད་སོགས་ཚུད་པའི་སྐུ་ཚེའི་ལོ་རྒྱུས་དང་། ཆོས་ཕྱོགས་ཀྱི་མཛད་པ། དེ་བཞིན་དེང་གི་འགྱུར་ལྡོག་ཆེ་བའི་འཛམ་གླིང་ཐོག་སྐྱོང་མུས་ཡིན་པའི་མཛད་པ་རླབས་ཆེན་རྣམས་དང་འབྲེལ་ནས་སྐུ་པར་འགྲེམས་སྟོན་དང་།  ལོ་རྒྱུས་རང་བཞིན་ལྡན་པའི་བོད་ཀྱི་སྐུ་འདྲ། ཐང་ག དེ་བཞིན་༧པཎ་ཆེན་སྐུ་ཕྲེང་བཅུ་པ་མཆོག་གི་ཆོས་ཕྱོགས་ཀྱི་སྐུ་ཆས་ཁག་ཅིག་ཀྱང་དགྲམ་རྒྱུ་ཡིན་འདུག

ཇེཀ་མར་ཁེས་བོད་ཀྱི་སྒྱུ་རྩལ་འགྲེམས་སྟོན་ཁང་ནི་ཕྱི་ལོ་ ༡༩༤༥ ལོར་བོད་ཀྱི་སྒྱུ་རྩལ་ལ་དོ་དབྱིངས་ཡོད་པའི་ཨ་རིའི་བུད་མེད་ཇེཀ་མར་ཁེས་ཀྱིས་ཐོག་མར་གསར་འཛུགས་བྱས་པ་ཞིག་ཡིན་ཞིང་། གཙོ་བོ་བོད་ཀྱི་མཆོད་རྫས་རིགས་དང་། སྐུ་འདྲ། ཐང་ག  པར་རིས། གླེགས་བམ་སོགས་འཛམ་གླིང་མི་མང་དང་ལྷག་པར་ཡུལ་སྐོར་བ་རྣམས་ལ་འགྲེམས་སྟོན་བྱེད་བཞིན་ཡོད་འདུག

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།