ཟླ་འདིའི་ཕྱི་ཚེས་ ༢༠ ཉིན་དྷ་ས་ས་གནས་མགོ་འཛིན་གྱི་འོས་བསྡུ་བྱ་རྒྱུ་ཡིན་པ་དང་། ད་ལྟའི་ཆར་དྷ་ས་ས་གནས་མགོ་འཛིན་གྱི་འོས་མིར་ལས་ཐོག་ས་གནས་མགོ་འཛིན་དཀོན་མཆོག་མིག་དམར་ལགས་མ་གཏོགས་གཞན་མི་འདུག
བཙན་བྱོལ་བོད་མིའི་ས་གནས་ཁག་གི་ཁྲོད་ནས་ཧ་ཅང་གལ་ཆེན་དུ་བརྩི་བའི་དྷ་ས་ས་གནས་མགོ་འཛིན་གྱི་འོས་བསྡུ་བྱེད་གཏན་ཁེལ་ཡོད་པ་ལྟར། དེ་རིང་འདི་གའི་གསར་འགོད་པས་དྷ་ས་ས་གནས་འོས་བསྡུ་ལས་ཁང་ལ་འབྲེལ་བ་ཞུས་ཏེ། འདི་ལོའི་ས་གནས་མགོ་འཛིན་གྱི་འོས་བསྡུའི་སྔོན་འགྲོ་དང་དངོས་གཞི་ག་དུས་ཡིན་མིན་དང་ད་སྔ་བར་འོས་མི་སུ་དང་སུ་ཡོད་མེད་སྐོར་བཀའ་འདྲི་ཞུ་སྐབས། ད་ལྟ་ས་གནས་འོས་བསྡུའི་འགན་འཛིན་ལས་རོགས་རྣམ་རྒྱལ་ལགས་ཀྱིས། བཙན་བྱོལ་བོད་མིའི་འོས་བསྡུའི་སྒྲིག་གཞི་ལེའུ་ ༨ པའི་དགོངས་དོན་ལྟར། ཟླ་འདིའི་ཕྱི་ཚེས་ ༢༠ ཉིན་དྷ་ས་ས་གནས་མགོ་འཛིན་གྱི་སྔོན་འགྲོའི་འོས་བསྡུ་བྱ་རྒྱུ་ཡིན་པ་དང་། ཕྱི་ཚེས་ ༢༩ ཉིན་དངོས་གཞིའི་འོས་བསྡུ་བྱེད་གཏན་ཁེལ་ཡོད། ད་ལྟའི་ཆར་ལས་ཐོག་ས་གནས་མགོ་འཛིན་བསྐྱར་དུ་འོས་ལང་བྱ་རྒྱུ་ཡིན་པ་གོ་ཐོས་བྱུང་བ་ཙམ་ལས། གཞན་ས་གནས་མགོ་འཛིན་གྱི་འོས་མིར་བཞེང་མཁན་གྱི་འོས་བསྡུའི་དྲིལ་བསྒྲགས་བྱེད་བཞིན་པ་སོགས་གང་ཡང་ཤེས་ཚོར་བྱུང་མེད་སྐོར་བརྗོད་བྱུང་།
འདི་གའི་གསར་འགོད་པས་ཁ་པར་བརྒྱུད་ལས་ཐོག་ས་གནས་མགོ་འཛིན་དཀོན་མཆོག་མིག་དམར་ལགས་སུ། བསླེབ་ལ་ཉེ་བའི་དྷ་ས་ས་གནས་མགོ་འཛིན་གྱི་འོས་བསྡུའི་ནང་ཆ་ཤས་བཞེས་རྒྱུ་ཡིན་མིན་སྐོར་དྲིས་པར་ཁོང་གིས། ང་རང་བསྐྱར་དུ་དྷ་ས་ས་གནས་མགོ་འཛིན་གྱི་འོས་མིར་ལང་རྒྱུ་ཡིན། འོན་ཀྱང་། ད་ལྟ་འོས་མི་གཞན་ཡོད་མེད་ཤེས་རྟོགས་བྱུང་མ་སོང་། ཞེས་ལན་འདེབས་གནང་བྱུང་ལ། གསར་འགོད་པས་དྷ་ས་མེག་ལོར་གྷན་ཇི་གཡས་གཡོན་དུ་གནས་བཞུགས་མི་མང་དང་ཚོགས་སྐྱིད་ཁག་ཅིག་གི་འབྲེལ་ཡོད་ལ་བཀའ་འདྲི་ཞུས་པར་ད་ལྟ་ས་གནས་མགོ་འཛིན་གྱི་འོས་མིར་དཀོན་མཆོག་མིག་དམར་ལགས་མ་གཏོགས་མི་གཞན་ཡོད་པ་མཐོང་ཐོས་བྱུང་མེད་པའི་འགྲེལ་བརྗོད་གནང་བྱུང་།
ཕྱི་ཟླ་ ༤ ཚེས་ ༢༩ ཉིན་དྷ་ས་ས་གནས་འོས་བསྡུ་ལས་ཁང་ནས་ཁྱབ་ཁོངས་དགོན་སྡེ་ཁག་དང་། སློབ་གྲྭ་ཁག ཚོགས་སྐྱིད་ཁག་བཅས་ཀྱི་འབྲེལ་ཡོད་འགན་འཛིན་རྣམས་དང་། དེ་བཞིན་སེར་སྐྱ་མི་མང་ཡོངས་ལ་གསལ་བསྒྲགས་ཤིག་སྤེལ་བའི་ནང་། མི་མང་གིས་ཐད་ཀར་འོས་འདེམས་བྱས་པའི་ས་གནས་འགོ་འཛིན་གྱི་ལས་ཡུན་ལོ་གསུམ་དེ། ཕྱི་ལོ་ ༢༠༢༥ ཟླ་ ༦ ཚེས་ ༡༥ ཉིན་ཚང་གི་འདུག་ན། བཙན་བྱོལ་བོད་མིའི་འོས་བསྡུའི་སྒྲིག་གཞི་ལེའུ་ ༨ པའི་དགོངས་དོན་ལྟར་ས་གནས་མགོ་འཛིན་གྱི་འོས་བསྡུ་བྱ་དགོས་པས། ཕྱི་ལོ་ ༢༠༢༥ ཟླ་ ༥ ཚེས་ ༢༠ ཉིན་འགྲོའི་འོས་བསྡུ་དང་། ཕྱི་ལོ་ ༢༠༢༥ ཟླ་ ༥ ཚེས་ ༢༩ ཉིན་དངོས་གཞིའི་འོས་བསྡུ་བྱ་གཏན་ཁེལ་ཡོད་སྟབས། ཕྱི་ཟླ་ ༥ ཚེས་ ༡ ནས་ ༡༩ བར་མང་ཚོགས་ས་གནས་འོས་བསྡུའི་དེབ་སྐྱེལ་གནང་མེད་རིགས་ལ་དེབ་སྐྱེལ་བྱ་རྒྱུ་ཡིན་ན། འབྲེལ་ཡོད་དོ་བདག་སོ་སོའི་དཔྱ་དངུལ་ལག་དེབ་དང་ཕྱེད་པར་རེ་མཉམ་འཁྱེར་གྱིས་ས་གནས་མགོ་འཛིན་ལས་ཁུངས་དེབ་སྐྱེལ་གནང་བར་ངེས་ཕེབས་ཡོང་བ་སོགས་འཁོད་འདུག
སྤྱིར་བཏང་དྷ་ས་ས་གནས་མགོ་འཛིན་གྱི་འོས་མིར་བཞེང་བར་བཙན་བྱོལ་བོད་མིའི་འོས་བསྡུའི་སྒྲིག་གཞི་དོན་ཚན་དོན་བདུན་པའི་དགོངས་དོན་ལྟར། བོད་ཀྱི་ཡུལ་མི་ཡིན་པ། རང་ལོ་ ༢༥ ཧྲིལ་པོ་ལོན་པ། ཁྲིམས་ཁང་ངམ། སྨན་པ་ཚད་ལྡན་གྱིས་རིག་འཚོ་མ་ཟིན་པར་གསལ་བསྒྲགས་བྱས་པ་མ་ཡིན་པ། བུ་ལོན་སྒྲུབ་འཇལ་མ་ཐུབ་པ་མ་ཡིན་པ། ཁྲིམས་ཁང་ནས་ནག་ཉེས་ཕོག་ཟིན་པ་མ་ཡིན་པ། བོད་མིའི་སྒྲིག་འཛུགས་ཀྱི་ལས་བྱེད་མ་ཡིན་པ། བོད་མིའི་ཁེ་ཕན་ལ་གནོད་གཞིའི་རྒྱལ་ཁབ་གཞན་གྱི་ལས་དོན་དང༌། གོ་གནས། དངུལ་དངོས་ཀྱི་ཁེ་ཕན་ཡོད་རིགས་མ་ཡིན་པ། སྤྱི་འཐུས་ལྷན་ཚོགས་ཀྱིས་གཏན་འབེབས་བྱས་པའི་འོས་བསྡུའི་ཁྲིམས་ལུགས་སམ། ཁྲིམས་སྒྲིག་ཅི་རིགས་དང་མི་འགལ་བ། བོད་མིའི་རྩ་དོན་ལ་གནོད་པའི་ལས་དོན་གང་རུང་དང་དངོས་ཤུགས་བརྒྱུད་གསུམ་ནས་འབྲེལ་བ་ཡོད་པའི་དན་རྟགས་ཡོད་པ་མ་ཡིན་པ། ས་གནས་འགོ་འཛིན་དང་འགོ་འཛིན་ལས་རོགས་སོ་སོའི་ལས་འཁུར་ཡུན་ཚད་གཉིས་བསྟུད་མར་བྱེད་བཞིན་པ་མ་ཡིན་པ། བཙན་བྱོལ་བོད་མིའི་བཅའ་ཁྲིམས་ལ་ཡིད་ཆེས་བློ་གཏད་མེད་པའི་དན་རྟགས་ཡོད་པ་མ་ཡིན་པ་ཞིག་ཡིན་དགོས་ཀྱི་འདུག
ཕྱི་ལོ་ ༢༠༢༢ ཟླ་ ༦ ཚེས་ ༣ ཉིན་དྷ་ས་ས་གནས་མགོ་འཛིན་གྱི་དངོས་གཞིའི་འོས་བསྡུའི་ཁྲོད་ནས། དྷ་ས་ས་གནས་མགོ་འཛིན་ལས་ཁུངས་ཀྱི་རོགས་ཚོགས་དྲུང་ཡིག་ཟུར་པ་དཀོན་མཆོག་མིག་དམར་ལགས་སུ་འོས་གྲངས་ ༡༡༤༩ དང་། ས་གནས་མགོ་འཛིན་ལས་ཐོག་ཀུན་དགའ་ཚེ་རིང་ལགས་སུ་འོས་གྲངས་ ༦༩༠ ཐོབ་སྟེ། དཀོན་མཆོག་མིག་དམར་ལགས་དྷ་ས་ས་གནས་མགོ་འཛིན་གསར་པར་བདམས་ཐོན་བྱུང་ཡོད་འདུག དཀོན་མཆོག་མིག་དམར་ནི་བོད་མངའ་རིས་ཁུལ་ནས་ཡིན་ཞིང་། ཕྱི་ལོ་ ༡༩༩༧ ལོར་རྒྱ་གར་དུ་འབྱོར་ཏེ་ཕྱི་ལོ་ ༢༠༠༩ ལོར་དྷ་སའི་ཉེ་འཁྲིས་སུ་ཡོད་པའི་གོ་པར་པུར་བོད་ཕྲུག་ཁྱིམ་སྡེ་སློབ་གྲྭ་ནས་སློབ་མཐར་སོན། ཕྱི་ལོ་ ༢༠༡༢ ལོར་ལྡི་ལི་གཙུག་ལག་སློབ་གྲྭ་ནས་སྲིད་དོན་རིག་པའི་ཐོག་ལ་རབ་འབྱམས་པའི་བསླབ་པ་མཐར་སོན་གྱིས། ཕྱི་ལོ་ ༢༠༡༧ ལོར་དྷ་སར་རྟེན་གཞི་བྱས་པའི་བོད་ཀྱི་ཐེབས་རྩའི་ནང་ལོ་གཅིག་ཙམ་རིང་ལས་ཀ་བྱས་ཤིང་། ཕྱི་ལོ་ ༢༠༡༨ ནས་ཉེ་ཆར་བར་དྷ་ས་ས་གནས་མགོ་འཛིན་ལས་ཁུངས་སུ་རོགས་ཚོགས་ཀྱི་དྲུང་ཡིག་གི་ལས་འཁུར་ཞུས་ཡོད་འདུག
གསར་འགོད་པ། སྐལ་བཟང་སྦྱིན་པ།
