སྲིད་སྐྱོང་མཆོག་གིས་ཁེ་ན་ཌའི་གནད་ཡོད་མི་སྣ་ཁག་ཅིག་དང་ཐུག་འཕྲད་གནང་།

སྲིད་སྐྱོང་མཆོག་གིས་ཨ་རིའི་ནང་གི་གཞུང་འབྲེལ་མཛད་རིམ་གྲུབ་རྗེས་ཁེ་ན་ཌའི་གྲོས་ཚོགས་འཐུས་མི་སྐུ་ཞབས་ཇཱེམ་མེ་སི་མཱ་ལོ་ནི་ལགས་གཙོས་གྲོས་ཚོགས་འཐུས་མི་ཁག་ཅིག་ལ་མཇལ་འཕྲད་གནང་འདུག

བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ཁེ་ན་ཌའི་ནང་གཞུང་འབྲེལ་ཕྱོགས་ཕེབས་གནང་བཞིན་ཡོད་པ་ལྟར། ཁ་སང་ཕྱི་ཚེས་ ༡༣ ཉིན་ཁེ་ན་ཌའི་གངས་ལྗོངས་ཆོས་ལྡན་གླིང་དུ། སྲིད་སྐྱོང་སྤེན་པ་ཚེ་རིང་མཆོག་གིས་ཁེ་ན་ཌའི་གྲོས་ཚོགས་འཐུས་མི་སྐུ་ཞབས་ཇཱེམ་མེ་སི་མཱ་ལོ་ནི་ (James Maloney) ལགས་དང་། གྲོས་ཚོགས་འཐུས་མི་ཁཱ་རེམ་བྷར་དྷི་སི་ (Karim Bardeesy) ལགས། དེ་བཞིན་བློན་ཆེན་ཟུར་པ་དང་གྲོས་ཚོགས་འཐུས་མི་སྐུ་ཞབས་ཨ་རེ་ཧྥི་ཝི་རཱ་ནི་(Arif Viran)ལགས་བཅས་ལ་མཇལ་འཕྲད་གནང་ཡོད་ཅིང། སྐབས་དེར་བྱང་ཨ་རིའི་སྐུ་ཚབ་དོན་གཅོད་རྣམ་རྒྱལ་ཆོས་སྒྲུབ་ལགས་དང་། ཁེ་ན་ཌའི་བོད་རིགས་མཐུན་ཚོགས་ཀྱི་འཛིན་སྐྱོང་འགན་འཛིན་ཤེས་རབ་མཐར་ཕྱིན་ལགས་གཉིས་ཀྱང་ལྷན་བཞུགས་གནང་ཡོད་འདུག

དེ་འབྲེལ་གནས་ཚུལ་ཞིག་གྲོས་ཚོགས་འཐུས་མི་ཇཱེམ་མེ་སི་མཱ་ལོ་ནི་ལགས་སྒེར་གྱི་ངོ་དེབ་ཐོག་སྤེལ་བའི་ནང་། དེ་རིང་ཞོགས་པར་ང་རང་བོད་མིའི་སྒྲིག་འཛུགས་ཀྱི་དབུ་ཁྲིད་སྲིད་སྐྱོང་སྤེན་པ་ཚེ་རིང་མཆོག་དང་མཇལ་འཕྲད་བྱུང་། བོད་མིའི་སྒྲིག་འཛུགས་ནི་བོད་མིའི་ཐོབ་ཐང་དང་། རང་དབང་། རིག་གཞུང་ཆེད་ཞབས་འདེགས་ཞུ་བཞིན་པའི་བཙན་བྱོལ་གྱི་དམངས་གཙོའི་གཞུང་ཞིག་ཡིན། རང་ཉིད་ཁེ་ན་ཌའི་གངས་ལྗོངས་ཆོས་ལྡན་གླིང་དང་བོད་པ་མང་པོ་སྡོད་སའི་ཁུལ་གྱི་གྲོས་ཚོགས་འཐུས་མི་ཞིག་ཡིན་པའི་ཆ་ནས། སྤྱི་ཚོགས་འདིའི་ཞི་བདེ་དང་། བྱམས་བརྩེ། བརྟན་བརླིང་ཆེད་དུ་ལངས་ཐུབ་པར་སྤོབས་པ་སྐྱེ་བཞིན་ཡོད། ༧གོང་ས་རྒྱལ་བ་རིན་པོ་ཆེ་མཆོག་དང་སྲིད་སྐྱོང་རྣམ་གཉིས་ནས་མུ་མཐུད་དུ་ཞི་བདེའི་ཐབས་ལམ་བརྒྱུད་ནས་འགྲོ་བ་མིའི་ཐོབ་ཐང་གོང་སྤེལ་གཏོང་བར་འགྱུར་བ་མེད་པའི་ཐོག་ནས་དབུ་ཁྲིད་གནང་བཞིན་ཡོད། ཅེས་བརྗོད་འདུག

ཟླ་འདིའི་ཕྱི་ཚེས་ ༡༡ ཉིན་ཨ་རིའི་ཨི་ཐ་ཁར་ (Ithaca) ས་གནས་ཚོགས་ཁང་དུ། སྲིད་སྐྱོང་སྤེན་པ་ཚེ་རིང་མཆོག་གིས་ས་གནས་བོད་རིགས་རྣམས་ལ་ཐུག་འཕྲད་གནང་ཡོད་ཅིང་། སྐབས་དེར་དཔལ་ལྡན་སྲིད་སྐྱོང་མཆོག་གིས་འཛམ་གླིང་ནང་དྲག་སྤྱོད་དང་དམག་འཁྲུག་མུ་མཐུད་བྱེད་བཞིན་པའི་དུས་སྐབས་འདིར། ༸གོང་ས་རྒྱལ་བ་རིན་པོ་ཆེ་མཆོག་གི་རྗེས་འབྲང་བ་ཡིན་པའི་ཆ་ནས། བྱམས་སྙིང་རྗེའི་བཀའ་སློབ་གོང་མཐོར་གཏོང་དགོས་པ་དེ་ཧ་ཅང་གལ་ཆེན་པོ་ཆགས་ཡོད། ཅེས་དང་། དེ་བཞིན་དབུ་མའི་ལམ་གྱི་སྲིད་བྱུས་སྐོར་དང་། རྒྱལ་སྤྱིའི་ཆབ་སྲིད་ཀྱི་གལ་གནད། བཀའ་ཤག་སྐབས་བཅུ་དྲུག་པའི་ལས་གཞི་ཁག་ལས་གྲངས་འཛིན་དཔེ་མཛོད་དང་། སྡོད་ཁང་གསར་རྒྱག་གི་ལས་གཞི་སོགས་ཀྱི་སྐོར་གསུངས་ཡོད་འདུག

ཟླ་འདིའི་ཕྱི་ཚེས་ ༡༠ ཉིན་ཨ་རིའི་ཨེམ་ཧར་སི་ (Amherst) རུ། སྲིད་སྐྱོང་མཆོག་གིས་ཨེམ་ཧར་སི་གནས་སྡོད་བོད་རིགས་མི་མང་ལ་མཇལ་འཕྲད་གནང་ཡོད་ཅིང་། སྐབས་དེར་སྲིད་སྐྱོང་མཆོག་གིས་ཐེངས་འདིའི་གཞུང་འབྲེལ་ཕྱོགས་ཕེབས་ནང་ཨ་རིའི་གྲོས་ཚོགས་གོང་འོག་གི་འཐུས་མི་ཁག་ཅིག་དང་ལས་བྱེད་བཅས་ཁྱོན་བསྡོམས་གནད་ཡོད་མི་སྣ་ ༢༦ དང་ལྷན་དུ་མཇལ་འཕྲད་གནང་སྟེ། ༧གོང་ས་མཆོག་གི་འཁྲུངས་སྐར་སྲུང་གཙིའི་སྐོར་དང་།  ཨ་རིའི་རོགས་དངུལ་གྱི་སྐོར། དེ་བཞིན་ཨེ་ཤེ་ཡ་རང་དབང་རླུང་འཕྲིན་ཁང་དང་། ཨ་རིའི་རླུང་འཕྲིན་ཁང་གཉིས་ཀྱི་མ་དངུལ་མཚམས་འཇོག་གི་གནད་དོན་སྐོར་ལ་གྲོས་མོལ་གནང་ཡོད་སྐོར་སོགས་གསུངས་ཡོད་འདུག

དེ་བཞིན་སྲིད་སྐྱོང་མཆོག་གིས་ས་གནས་བོད་རིགས་གཞོན་སྐྱེས་རྣམས་ལ་བརྙན་རིས་བརྒྱུད་ནས་བོད་མཐོ་སྒང་གི་གལ་གནད་སྐོར་དང་།  རྒྱ་ནག་གིས་ཆུ་མཛོད་གསར་རྒྱག་གཙོས་པའི་ལས་གཞི་དེ་དག་གིས་བོད་ཀྱི་རང་བྱུང་ཁོར་ཡུག་གཏོར་བཤིག་གཏོང་བཞིན་པའི་སྐོར།  སློབ་དཔོན་ལའོ་ལགས་དང་། མ་ཧི་ཀལ་ཝན་ཝལ་པ་རག་ལགས་ཀྱིས་བརྩམས་པའི་དཔེ་དེབ་ཀློག་དགོས་པའི་གལ་གནད་དང་། ཕྱི་ཟླ་  ༦ ཚེས་ ༢༤ ནས་བཟུང་ཞུ་གཏུག་ཉིན་མོ་(Lobby Day) ཞེས་པའི་ནང་བོད་རིགས་གཞོན་སྐྱེས་གང་མང་མཉམ་ཞུགས་གནང་སྟེ་གྲོས་ཚོགས་འཐུས་མི་རྣམས་ལ་བོད་དོན་གླེང་སློང་བྱ་རྒྱུ་གལ་ཆེན་པོ་ཡིན་སྐོར་སོགས་གསུངས་འདུག

གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། སྐལ་བཟང་སྦྱིན་པ།