འདི་ལོའི་རྒྱ་གར་རྒྱལ་ཡོངས་ཀྱི་འཛིན་རིམ་བཅུ་གཉིས་པའི་ཡིག་རྒྱུགས་ནང་བོད་ཕྲུག་ཁྱིམ་སྡེའི་སློབ་མ་ཁྱོན་ ༤༡༦ མཉམ་ཞུགས་བྱས་ཏེ། སློབ་ཕྲུག་གྲངས་ ༤༡༡ གིས་ཡིག་རྒྱུགས་འཕྲོད་ཡོད་ཅིང་། འཛིན་རིམ་བཅུ་གཉིས་དང་བཅུ་བའི་རྩེ་ཕུད་ལེན་མཁན་སེ་ལ་ཀུ་བོད་ཁྱིམ་རེད་འདུག
ཉེ་ལམ་རྒྱ་གར་རྒྱལ་ཡོངས་འཛིན་རིམ་བཅུ་གཉིས་དང་བཅུ་བའི་ཡིག་རྒྱུགས་གྲུབ་འབྲས་ཡོངས་བསྒྲགས་བྱས་ཡོད་པ་ལྟར། དེ་རིང་འདི་གའི་གསར་འགོད་པས་བོད་ཁྱིམ་དང་སམ་བྷོ་ཊ། བོད་སློབ་འཛིན་ཚོགས་བཅས་ཀྱི་འབྲེལ་ཡོད་ལ་བཀའ་འདྲི་ཞུ་ཐབས་བྱས་པ་ཡིན་མོད། བོད་ཕྲུག་ཁྱིམ་སྡེའི་འབྲེལ་ཡོད་མ་གཏོགས་བོད་སློབ་གཞན་ལ་འབྲེལ་བ་བྱེད་ཐུབ་མ་སོང་ལ། གསར་འགོད་པས་རྒྱུས་ལོན་བྱས་ཏེ་ཤེས་རྟོགས་བྱུང་བའི་གནས་ཚུལ་ལྟར་ན། བོད་ཁྱིམ་སློབ་གྲྭ་ཁག་གི་འཛིན་རིམ་བཅུ་གཉིས་པའི་ཡིག་རྒྱུགས་ཁྲོད་སེ་ལ་ཀུ་བོད་ཁྱིམ་གྱིས་ཕྱོགས་བསྡོམས་ཆ་སྙོམས་བརྒྱ་ཆ་ ༧༦།༧ བླངས་ཏེ་བོད་ཁྱིམ་སློབ་གྲྭ་ཚང་མའི་ནང་ནས་ཨང་དང་པོ་དང་། གོ་པལ་པུར་བོད་ཁྱིམ་གྱིས་ཆ་སྙོམས་བརྒྱ་ཆ་ ༧༠།༨ བླངས་ཏེ་ཨང་གཉིས་པ། དྷ་སྟེང་བོད་ཁྱིམ་གྱིས་ཆ་སྙོམས་བརྒྱ་ཆ་ ༦༨།༤ བླངས་ཏེ་ཨང་གསུམ་པ་བཅས་ཆགས་ཡོད། དེ་བཞིན། བོད་ཁྱིམ་གྱི་འཛིན་རིམ་བཅུ་བའི་ཡིག་རྒྱུགས་ཁྲོད། སེ་ལ་ཀུ་བོད་ཁྱིམ་གྱིས་ཕྱོགས་བསྡོམས་ཆ་སྙོམས་བརྒྱ་ཆ་ ༨༥།༤ བླངས་ནས་ཨང་དང་པོ་དང་། དྷ་སྟེང་བོད་ཁྱིམ་གྱིས་ཆ་སྙོམས་བརྒྱ་ཆ་ ༧༣།༢ བླངས་ནས་ཨང་གསུམ་པ། སུ་ཇཱ་བོད་ཁྱིམ་གྱིས་ཆ་སྙོམས་བརྒྱ་ཆ་ ༦༩།༨ བླངས་ཏེ་ཨང་གསུམ་པ་ཆགས་ཡོད་འདུག
ཕྱི་ལོ་ ༢༠༢༥ ལོའི་འཛིན་རིམ་བཅུ་གཉིས་པའི་རྒྱ་གར་རྒྱལ་ཡོངས་ཀྱི་ཡིག་རྒྱུགས་ཁྲོད་བོད་ཕྲུག་ཁྱིམ་སྡེའི་སློབ་མ་ ༤༡༦ མཉམ་ཞུགས་བྱས་ཏེ། སློབ་ཕྲུག་གྲངས་ ༤༡༡ གིས་ཡིག་རྒྱུགས་འཕྲོད་ཡོད་ཅིང་། དེའི་ཁྲོད་དུ་བུ་མོ་ ༢༢༠ དང་བུ་ ༡༩༡ ཡོད་འདུག དེ་བཞིན་འཛིན་རིམ་བཅུ་བའི་ཡིག་རྒྱུགས་ཁྲོད། སློབ་མ་ཁྱོན་ ༥༤༩ ཞུགས་ཤིང་། སློབ་མ་ ༥༤༥ ཡིས་ཡིག་རྒྱུགས་འཕྲོད་པའི་ཁྲོད་བུ་ ༢༣༨ དང་བུ་མོ་ ༣༠༧ ཡོད་འདུག་ལ། འཛིན་རིམ་བཅུ་གཉིས་པའི་ཡིག་རྒྱུགས་ནང་མཉམ་ཞུགས་བྱེད་མཁན་སློབ་གྲྭ་ཁག་ལྔའི་ཡིག་རྒྱུགས་འཕྲོད་པའི་ཆ་སྙོམས་བརྒྱ་ཆ་ ༧༢།༢ ཡིན་པ་དང་། འཛིམ་རིམ་བཅུ་བའི་ཡིག་རྒྱུགས་ནང་ཞུགས་མཁན་སློབ་གྲྭ་ཁག་བདུན་གྱི་ཆ་སྙོམས་ཡིག་རྒྱུགས་འཕྲོད་པའི་བརྒྱ་ཆ་ ༦༩།༤ ཡིན་འདུག
འཛིན་རིམ་བཅུ་གཉིས་པའི་རྒྱལ་ཡོངས་ཡིག་རྒྱུགས་ཁྲོད་བོད་ཁྱིམ་སློབ་གྲྭ་ཁག་གི་ནང་ནས་དྷ་སྟེང་བོད་ཁྱིམ་གྱི་སློབ་མ་བསྟན་འཛིན་ཚེ་ལྷ་ཡིས་བརྒྱ་ཆ་ ༩༤།༨༠ བླངས་ནས་ཨང་དང་པོ་དང་། སེ་ལ་ཀུ་བོད་ཁྱིམ་གྱི་སློབ་མ་ཚེ་དབང་རྒྱལ་མཚན་གྱིས་བརྒྱ་ཆ་ ༩༤།༤༠ བླངས་ནས་ཨང་གཉིས་པ། སྦེལ་ཀོབ་བོད་ཁྱིམ་གྱི་སློབ་མ་བསྟན་འཛིན་འོད་ཟེར་གྱིས་བརྒྱ་ཆ་ ༩༤།༢༠ བླངས་ཏེ་གསུམ་པ་བཅས་རེད་འདུག་ལ། དེ་བཞིན། སེ་ལ་ཀུ་བོད་ཁྱིམ་གྱི་སློབ་མ་བསྟན་འཛིན་ཀུན་གསལ་དང་སྦེལ་ཀོབ་བོད་ཁྱིམ་གྱི་སློབ་མ་ཉི་མ་མཚམས་ཆོས། གོ་པལ་པུར་བོད་ཁྱིམ་གྱི་སློབ་མ་བཀྲ་ཤིས་དབྱངས་འཛོམས། སེ་ལ་ཀུ་བོད་ཁྱིམ་གྱི་སློབ་མ་བསྟན་འཛིན་ཆོས་འཛོམས། དྷ་སྟེང་བོད་ཁྱིམ་གྱི་སློབ་མ་པདྨ་ཀུན་བཟང་བླ་མ། གོ་པལ་པུར་གྱི་སློབ་མ་བསྟན་འཛིན་འཛོམས་པ་བཅས་ཀྱིས་གོ་རིམ་བཞིན་ཡིག་རྒྱུགས་ཁྲོད་བརྒྱ་ཆ་ ༩༠ ཡན་བླངས་འདུག
འཛིན་རིམ་བཅུ་བའི་རྒྱལ་ཡོངས་ཡིག་རྒྱུགས་ཁྲོད། བོད་ཁྱིམ་སློབ་གྲྭ་ཁག་བདུན་གྱི་བརྒྱ་ཆ་ ༩༠ ཡན་ལོན་པའི་སློབ་མ་ཁྱོན་ ༢༡ ཡོད་ཅིང་། དེ་དག་གི་ཁྲོད་ནས་སེ་ལ་ཀུ་བོད་ཁྱིམ་གྱི་སློབ་མ་བསྟན་འཛིན་ཆོས་དབྱིངས་ལ་གྲུབ་འབྲས་བརྒྱ་ཆ་ ༩༦།༦ ཐོབ་སྟེ་ཨང་དང་པོ་དང་སེ་ལ་ཀུའི་སློབ་མ་ཀརྨ་ཆོས་སྐྱིད་དོན་འགྲུབ་ལ་བརྒྱ་ཆ་ ༩༤།༤ ཐོབ་སྟེ་ཨང་གཉིས་པ་བླངས། ཅོན་ཏཱ་ར་བོད་ཁྱིམ་གྱི་སློབ་མ་ལ་དགའ་འཛོམས་པས་བརྒྱ་ཆ་ ༩༤ བླངས་ཏེ་ཨང་གསུམ་པ་ཆགས་ཡོད་འདུག
གསར་འགོད་པ། སྐལ་བཟང་སྦྱིན་པ།
