རྒྱལ་སྤྱིའི་འགྲེམས་སྟོན་ཉིན་མོ་དང་བསྟུན་དྷ་ས་ཁུལ་གྱི་བོད་ཀྱི་སྒྱུ་རྩལ་བའི་ཚོགས་པ་ཁག་བདུན་གྱིས་དཔེ་དེབ་དང་སྒྱུ་རྩལ་སོགས་ཀྱི་བརྩམས་ཆོས་རྣམས་འགྲེམས་སྟོན་བྱས་སོང་།
དེ་རིང་བོད་མིའི་སྒྲིག་འཛུགས་ཕྱི་དྲིལ་བོད་ཀྱི་འགྲེམས་སྟོན་ཁང་གི་གོ་སྒྲིག་འོག རྒྱལ་སྤྱིའི་འགྲེམས་སྟོན་ཉིན་མོ་ཐེངས་ ༤༨ པ་སྲུང་གཙི་གནང་ཡོད་ཅིང་། མཛད་སྒོའི་ཐོག་བོད་མིའི་སྒྲིག་འཛུགས་ཀྱི་ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས་དང་། བོད་མིའི་སྒྲིག་འཛུགས་ཀྱི་མགྲིན་ཚབ་པ་བསྟན་འཛིན་ལེགས་བཤད་ལགས། ཕྱི་དྲིལ་འགྲེམས་སྟོན་ཁང་གི་འགན་འཛིན་བསྟན་འཛིན་སྟོབས་ལྡན་ལགས། དྷ་ས་ཁུལ་གྱི་ཉམས་ཞིབ་པ། སྒྱུ་རྩལ་པ། སློབ་ཕྲུག་བཅས་མཉམ་ཞུགས་གནང་སོང་། ཐེངས་འདིར་བོད་ཀྱི་ཁ་དོག་རི་མོ་ཚོགས་པ་དང་། བོད་སྨྱུག་དཔེ་སྐྲུན་ཁང་། འཇམ་དབྱངས་ཤེས་ཡོན་ཞབས་ཞུ་ཁང་། གཡུ་བྱུ་རུའི་སྒྱུ་རྩལ། བོད་ཀྱི་རྩེད་ཆས། (Dolls4 Tibet) བློ་བཟང་བཟོད་པའི་བྱིས་སྒྲུང་། དྷ་ས་ས་གནས་ཁོར་ཡུག་ཚན་པ་བཅས་ཀྱིས་དེབ་དང་སྒྱུ་རྩལ་བརྩམས་ཆོས་འགྲེམས་སྟོན་གནང་སོང་།
ཐེངས་འདིའི་འགྲེམས་སྟོན་སྐོར་ལ་ཕྱི་དྲིལ་འགྲེམས་སྟོན་ཁང་གི་འགན་འཛིན་བསྟན་འཛིན་སྟོབས་ལྡན་ལགས་ཀྱིས། རྒྱལ་སྤྱིའི་འགྲེམས་སྟོན་ཉིན་མོ་ཐེངས་ ༤༨ པ་སྲུང་གཙི་དང་བསྟུན། ཐེངས་འདིར་དྷ་སའི་ཁུལ་གྱི་བོད་པའི་སྒྱུ་རྩལ་ཚོགས་པ་ཁག་བདུན་མཉམ་ཞུགས་བྱས་ཡོད། ཕྱི་ལོ་ ༢༠༡༤ ནས་བོད་ཀྱི་འགྲེམས་སྟོན་ཁང་གིས་རྒྱལ་སྤྱིའི་འགྲེམས་སྟོན་ཉིན་མོ་སྲུང་གཙི་བྱེད་མགོ་ཚུགས་ཡོད་ཀྱང། དེའི་སྐབས་སུ་འགྲེམས་སྟོན་ཁང་གི་ལས་བྱེད་དང་སློབ་ཕྲུག་རྣམས་ལས་མཉམ་ཞུགས་བྱས་ཡོད་པ་མ་རེད། རྗེས་སུ་དམིགས་བསལ་བོད་ཀྱི་སྒྱུ་རྩལ་བ་རྣམས་ལ་གོ་སྐབས་བསྐྲུན་རྒྱུ་གལ་ཆེན་པོར་བརྩིས་ཏེ། ད་ལན་བོད་ཀྱི་སྒྱུ་རྩལ་བ་རྣམས་ཀྱིས་སྒྱུ་རྩལ་བརྒྱུད་ནས་བོད་ཀྱི་རྩ་དོན་དང་རིག་གཞུང་ཐོག་གོ་རྟོགས་སྤེལ་གྱི་ཡོད་ལ། དེས་གཞོན་སྐྱེས་རྣམས་ལ་གཞུང་གཅིག་པོ་མིན་པར་མི་སྒེར་གྱི་ཐོག་ནས་བོད་དོན་ཐོག་ཚོར་བ་ཞིག་སླེབས་ཐུབ་པའི་སྡིངས་ཆ་ཞིག་བསྐྲུན་ཡོད། དེ་བཞིན་རྒྱལ་སྤྱིའི་ཐོག་༧པཎ་ཆེན་སྐུ་ཕྲེང་བཅུ་གཅིག་པ་མཆོག་གང་མགྱོགས་ཀློད་གྲོལ་དགོས་པའི་འབོད་སྐུལ་དང་། ༧པཎ་ཆེན་སྐུ་ཕྲེང་བཅུ་བ་མཆོག་གི་མཛད་པ་འཕྲིན་ལས་བཅས་གཟིགས་འབུལ་ཞུས་ཡོད། ཅེས་འགྲེལ་བརྗོད་གནང་བྱུང་།
འདི་གའི་གསར་འགོད་པས་བོད་སྨྱུག་དཔེ་སྐྲུན་ཁང་གི་རྩོམ་སྒྲིག་པ་ལྡུམ་ར་བུ་ཆུང་བསོད་ནམས་ལགས་སུ་རྒྱལ་སྤྱིའི་འགྲེམས་སྟོན་ཉིན་མོའི་གལ་གནད་སྐོར་ལ་དྲིས་པས་ཁོང་གིས། སྤྱིར་དེ་རིང་རྒྱལ་སྤྱིའི་འགྲེམས་སྟོན་ཉིན་མོ་རེད། ང་ཚོ་བོད་པའི་ངོས་ནས་རི་མོའི་ལམ་གྱི་སྒྲུང་དང་། ལོ་རྒྱུས་དང་ལྡན་པའི་དེབ། སྒྱུ་རྩལ་ལྡན་པའི་རི་མོ་སོགས་འགྲེམས་སྟོན་བྱ་རྒྱུ་ཧ་ཅང་གལ་ཆེན་པོ་རེད་བསམ་གྱི་འདུག བོད་མི་རིགས་ཀྱི་འཐབ་རྩོད་ཀྱང་སྒྲུང་བཤད་སྟངས་དང་འབྲེལ་བ་ཆེན་པོ་ཡོད་པ་རེད། མིའི་སེམས་ཁམས་ནང་བག་ཆགས་འཇོག་པར་སྒྲུང་ལ་རག་ལས་ཡོད་པས། སྒྱུ་རྩལ་གྱི་ལམ་ནས་བོད་ཀྱི་དངོས་བྱུང་ལོ་རྒྱུས་བཤད་ཐུབ་ན་མིའི་སེམས་སུ་བག་ཆགས་ཆེན་པོ་འཇོག་ཐུབ་ཀྱི་འདུག ད་ལན་གྱི་འགྲེམས་སྟོན་ཐོག་སྒྱུ་རྩལ་བ་དང་དཔེ་སྐྲུན་ཁང་ཁག་གིས་སྒྱུ་རྩལ་གྱི་ལམ་ནས་སྒྲུང་བཤད་དེ་མི་མང་བར་ཟམ་པ་བསྐྲུན་གྱི་ཡོད་པ་རེད། འདི་བརྒྱུད་ནས་བོད་ཀྱི་འཐབ་རྩོད་དང་ལོ་རྒྱུས་ངོ་སྤྲོད་རྒྱ་ཆེན་པོ་ཞིག་ཡོང་གི་འདུག་དེ་གལ་ཆེན་པོ་རེད་བསམ་གྱི་འདུག ཅེས་འགྲེལ་བརྗོད་གནང་བྱུང་།
དེ་བཞིན་འཇམ་དབྱངས་ཤེས་ཡོན་ཞབས་ཞུ་ཁང་གི་འགན་འཛིན་འཇམ་དབྱངས་རྒྱལ་མཚན་ལགས་ཀྱིས། འཇམ་དབྱངས་ཤེས་ཡོན་ཞབས་ཞུ་ཁང་བཙུགས་དགོས་པའི་དམིགས་ཡུལ་ནི་ལོ་ཆུང་བྱིས་པ་གསོ་སྐྱོང་གི་ཤེས་ཡོན་ཐོག་བོད་པའི་སྤྱི་ཚོགས་ནང་གོ་རྟོགས་སྤེལ་བ་དང་། དེ་འབྲེལ་གྱི་མཐུན་རྐྱེན་སྦྱོར་རྒྱུ་དེ་ཡིན། དམིགས་བསལ་བོད་པའི་ཕྲུ་གུ་ལ་བོད་ཀྱི་སྐད་ཡིག་གི་ཐོག་ནས་བྱིས་པའི་ལོ་ཚད་དང་བསྟུན་ནས། ཁམས་དང་མོས་པར་འཚམ་པའི་དེབ་པར་སྐྲུན་བྱེད་རྒྱུ་དེ་ལས་ཀ་གཙོ་བོ་ཆགས་ཡོད། ད་ལན་གྱི་འགྲེམས་སྟོན་འདི་ངེད་ཤེས་ཡོན་ཁང་གིས་བྱིས་པའི་དེབ་རྣམས་འགྲེམས་སྟོན་བྱེད་པར་གོ་སྐབས་རྩ་ཆེན་ཞིག་རེད། དེ་བཞིན་ཉིན་མོ་འདི་བོད་པ་དང་འབྲེལ་བའི་ཅ་དངོས་སོགས་འགྲེམས་སྟོན་བྱེད་པར་གོ་སྐབས་གལ་ཆེན་ཞིག་རེད། ཅེས་འགྲེལ་བརྗོད་གནང་བྱུང་།
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།
![Changpa nomads walk on a rugged path in Ladakh's Chushul valley [Tarushi Aswani/Al Jazeera]](https://tibettimes.net/wp-content/uploads/2026/10/Screen-Shot-2026-10-16-at-2.29.07-PM-360x180.png)
