མཆོག་སྤྲུལ་ཧཱུྃ་ཀར་རྡོ་རྗེ་རིན་པོ་ཆེ་མཆོག་སྐུ་བཀྲོངས་པ་གསལ་པོ་ཡིན་ཡང་ག་འདྲ་བཀྲོངས་ཡོད་མེད་ཁ་གསལ་བཟོ་ངེས་ཡིན་སྐོར་བརྗོད།
དེ་རིང་ཉིན་རྒྱབ་ཆུ་ཚོད་ ༢།༣༠ སྟེང་གཞུང་འབྲེལ་མིན་པའི་ཚོགས་སྡེ་ཁག་ལྔ་ཡི་གོ་སྒྲིག་འོག དྷ་ས་ས་གནས་མགོ་འཛིན་གྱི་ཚོགས་ཁང་དུ་མཆོག་སྤྲུལ་ཧཱུྃ་ཀར་རྡོ་རྗེ་རིན་པོ་ཆེ་མཆོག་གི་རྗེས་དྲན་བགྲོ་གླེང་ཞིག་འཚོགས་སོང་།
བོད་ཀྱི་གཞོན་ནུ་ལྷན་ཚོགས་ཀྱི་སྤྱི་ཁྱབ་དྲུང་ཆེ་བསོད་ནམས་ཚེ་རིང་ལགས་ཀྱིས། བོད་ཀྱི་གཞུང་འབྲེལ་མིན་པའི་ཚོགས་པ་ཆེ་ཁག་ལྔ་ཐུན་མོང་གི་ཐོག་ནས་སྤྲུལ་སྐུ་ཧཱུྃ་ཀར་རྡོ་རྗེ་རིན་པོ་ཆེ་མཆོག་རྗེས་དྲན་དང་། ཁོང་གི་མཛད་རྗེས་གླེང་སློང་དང་འབྲེལ་བའི་བགྲོ་གླེང་ཞིག་འཚོགས་ཡོད་པ་རེད། དེ་ཡང་བོད་ནང་དུ་ཡོད་པའི་གཞིས་ལུས་བོད་མི་ཚོས་བོད་མི་རིགས་ཀྱི་འཐབ་རྩོད་ཀྱི་ཆེད་དུ་བློས་གཏོང་མང་པོ་གནང་ཡོད་པ་དེ་དག་དྲན་པ་བརྗེད་མེད་པ་དང་། བོད་ནང་དུ་མཆོག་སྤྲུལ་ཧཱུྃ་ཀར་རྡོ་རྗེ་རིན་པོ་ཆེ་མཆོག་གཙོས་པའི་བླ་སྤྲུལ་དང་མཁས་ཆེན་མང་པོ་ཞིག་གིས་བོད་མི་རིགས་ཀྱི་ཆེད་དུ་བློས་གཏོང་མང་པོ་གནང་གི་ཡོད་པ་དེ་དག་བོད་པའི་སྤྱི་ཚོགས་ནང་དུ་གོ་རྟོགས་སྤེལ་རྒྱུའི་ཆེད་དུ་དམིགས་པ་ཞིག་རེད། ཅེས་དང་། རྒྱ་ནག་གཞུང་གིས་རྒྱལ་མཚམས་ལས་བརྒལ་བའི་གནོན་ཤུགས་སྤྲད་དེ། མཆོག་སྤྲུལ་ཧཱུྃ་ཀར་རྡོ་རྗེ་རིན་པོ་ཆེ་མཆོག་ཝི་ཐི་ནམ་དུ་ཕེབས་དགོས་བྱུང་བ་དང་། རྒྱ་ནག་གིས་བོད་མི་རྣམས་ལ་གནོན་ཤུགས་མུ་མཐུད་དུ་སྤྲོད་ཀྱི་ཡོད་པས་དེ་ལ་གདོང་ལེན་བྱེད་དགོས་སྐོར། གཞིས་ལུས་བོད་མི་ཚོས་བོད་བསྟན་སྲིད་མི་རིགས་ཀྱི་ཆེད་དུ་བློས་གཏོང་དང་། བོད་ཀྱི་ཆོས་དང་རིག་གཞུང་མི་ཉམས་རྒྱུན་འཛིན་གྱི་ཆེད་དུ་སྐུ་ལས་རབ་དང་རིམ་པ་བསྐྱོན་གྱི་ཡོད་པ་དེ་ལ་རྗེས་སུ་དྲན་པ་དང་། རང་དབང་ཡོད་པ་དེ་དག་ལོངས་སུ་སྤྱོད་དེ་བོད་བསྟན་སྲིད་མི་རིགས་ཀྱི་ཆེད་དུ་དཀའ་ལས་མུ་མཐུད་དུ་རྒྱག་དགོས་པའི་བརྡ་ལན་སྤྲོད་ཀྱི་ཡོད་སྐོར་འགྲེལ་བརྗོད་གནང་བྱུང་།
བོད་མིའི་སྒྲིག་འཛུགས་ཀྱི་མགྲིན་ཚབ་པ་བསྟན་འཛིན་ལེགས་བཤད་ལགས་ཀྱིས། མཆོག་སྤྲུལ་ཧཱུྃ་ཀར་རྡོ་རྗེ་རིན་པོ་ཆེ་མཆོག་དང་འབྲེལ་ནས་ད་ལྟའང་གནས་ཚུལ་ཆ་ཚང་བ་རག་གི་མེད་པ་དང་། ཁུངས་ལྡན་གྱི་གནས་ཚུལ་རག་པར་ཐབས་ཤེས་རིམ་པ་བྱེད་ཀྱི་ཡོད་པ་རེད། ཕྱི་དྲིལ་ལས་ཁུངས་ནས་དོན་གཅོད་ཁག་ལ་ཕྱག་བྲིས་བཏང་སྟེ། སོ་སོའི་ཁྱབ་ཁོངས་ཀྱི་གཞུང་དང་སྒྲིག་འཛུགས་ཁག་ལ་སྤྲུལ་སྐུ་ཧཱུྃ་ཀར་རྡོ་རྗེ་རིན་པོ་ཆེ་མཆོག་གི་གནད་དོན་དང་འབྲེལ་བའི་ཐོག་ནས་གོ་རྟོགས་སྤེལ་རྒྱུ་དང་། གནོན་ཤུགས་སྤྲོད་རྒྱུའི་ལམ་སྟོན་གནང་ཡོད་པ་རེད། རྒྱལ་མཚམས་བརྒལ་བའི་གནས་སྟངས་འདི་དང་འབྲེལ་བའི་དཀའ་ངལ་དེ་དག་གདོང་ལེན་བྱེད་དགོས་པའི་རིམ་པ་གསར་པ་ཞིག་ལ་བསླེབས་འདུག་བསམ་གྱི་འདུག ཅེས་དང་། མ་འོངས་པར་བླ་མ་དང་མཁས་པ་སོགས་བོད་མི་སུ་འདྲ་ཞིག་ཡིན་རུང་ཕྱིའི་རྒྱལ་ཁབ་ལ་ཕེབས་སྐབས། སོ་སོའི་ངོས་ནས་གཟབ་གཟབ་བྱེད་དགོས་ཀྱི་ཡོད་སྐོར་དང་། བོད་མི་རྣམས་ཀྱིས་བོད་ཀྱི་ཆོས་དང་རིག་གཞུང་། སྐད་ཡིག་སོགས་མི་ཉམས་རྒྱུན་འཛིན་བྱ་དགོས་གལ་ཆེ་སྐོར། རྒྱ་ནག་གཞུང་གིས་རྒྱལ་མཚམས་ལས་བརྒལ་བའི་གནོན་ཤུགས་སྤྲད་དེ་ཝི་ཐི་ནམ་དུ་མཆོག་སྤྲུལ་ཧཱུྃ་ཀར་རྡོ་རྗེ་རིན་པོ་ཆེ་མཆོག་སྐུ་བཀྲོངས་པའི་གནས་ཚུལ་དང་འབྲེལ་ནས་ཁུངས་ལྡན་གནས་ཚུལ་རག་པར་མུ་མཐུད་དུ་འབད་བརྩོན་བྱེད་བཞིན་ཡོད་སྐོར། མ་འོངས་པར་རིན་པོ་ཆེ་མཆོག་གི་སྐུ་ཕྲེང་རྗེས་མ་དེ་བོད་ནང་དུ་འཁྲུངས་པའམ། ཡང་ན་རང་དབང་ཅན་གྱི་ལུང་པ་ཞིག་ལ་འཁྲུངས་རྒྱུའི་སྨོན་འདུན་ཞུ་ཡི་ཡིན་སྐོར་སོགས་གསུངས་སོང་།
ཨ་མྱེས་རྨ་ཆེན་བོད་ཀྱི་རིག་གཞུང་ཞིབ་འཇུག་ཁང་གི་འགན་འཛིན་མཁན་པོ་འཇུ་བསྟན་སྐྱོང་ལགས་ཀྱིས། རིན་པོ་ཆེ་མཆོག་ནས་རྒྱ་ནག་གཞུང་གིས་ངོས་འཛིན་བྱས་པའི་རྒྱལ་མཚན་ནོར་བུ་མགོ་ལོག་ཁུལ་དུ་བསླེབས་སྐབས་རྒྱ་གཞུང་གི་འདོད་བློ་ལྟར་སྣེ་ལེན་མ་ཞུས་པ་དང་། ༧གོང་ས་རྒྱལ་བ་རིན་པོ་ཆེ་མཆོག་ལ་དད་གུས་ཤུགས་ཆེན་གནང་བ། དེ་བཞིན་བོད་ཀྱི་སྐད་ཡིག་སྲུང་སྐྱོབ་ཐོག་ཕྱག་ལས་གནང་བའི་ཉེས་བཙུགས་ཀྱི་རྐྱེན་གྱིས། རིན་པོ་ཆེ་མཆོག་རྒྱ་ནག་གི་རྒྱལ་མཚམས་ལས་བརྒལ་ཏེ་ཉེན་གཡོལ་དུ་ཕེབས་ཡོད་ཀྱང་། རྒྱ་གཞུང་གིས་གནོན་ཤུགས་འོག་ཝི་ཐི་ནམ་ནང་སྐུ་བཀྲོངས་པ་གསལ་པོ་ཡིན་ཡང་། ག་འདྲ་བཀྲོངས་ཡོད་མེད་གསལ་ཁ་གང་ཡང་ཆགས་མེད་པས། བཙན་བྱོལ་གྱི་གཞུང་སྒེར་ཁག་ནས་མུ་མཐུད་དུ་གསལ་ཁ་བཟོ་ངེས་ཡིན་སྐོར་གསུངས་སོང་།
བཙུན་མ་དགེ་འདུན་བཟང་མོ་ལགས་ཀྱིས། ཕྱི་ལོ་ ༢༠༠༥ ལོར་མཆོག་སྤྲུལ་ཧཱུྃ་ཀར་རྡོ་རྗེ་རིན་པོ་ཆེ་མཆོག་གིས་མདོ་སྨད་ཚེ་རིང་ལྗོངས་བཀྲ་ཤིས་གཡས་འཁྱིལ་གླིང་ཞེས་པའི་བཙུན་དགོན་གསར་བཞེངས་གནང་ཡོད་ཅིང་། བཙུན་མའི་གྲྭ་ཚང་དུ་རྒྱུན་བཞུགས་ཀྱི་གྲངས་ ༢༠༠ ལྷག་ཅིག་ཡོད་པ་རེད། དེ་བཞིན་ཕྱི་ལོ་ ༢༠༡༤ ཡས་མས་སུ་བཙུན་མའི་སྒོམ་གྲྭ་རིག་སྟོང་བདེ་ཆེན་ཕོ་བྲང་གསར་བཞེངས་གནང་ཞིང་། དེའི་ནང་བཙུན་མའི་སྒོམ་གྲྭ་བའི་གྲངས་ ༡༦ ཡོད་པ་རེད། ཕྱི་ལོ་ ༢༠༡༨ ཟླ་ ༩ ཚེས་ ༢༥ ཉིན་མཆོག་སྤྲུལ་ཧཱུྃ་ཀར་རྡོ་རྗེ་རིན་པོ་ཆེ་མཆོག་གིས་བཙུན་མ་རྣམས་ལ་སློབ་གཉེར་གྱི་གོ་སྐབས་དགོས་པ་གལ་ཆེན་དུ་དགོངས་ཏེ་བཙུན་མའི་བཤད་གྲྭ་དབྱངས་ཅན་བཞད་པའི་དགའ་ཚལ་ཞེས་པ་གསར་འཛུགས་མཛད་ཡོད་སྐོར་སོགས་འགྲེལ་བརྗོད་གནང་སོང་།
འདི་ལོའི་ཕྱི་ཟླ་ ༡ པོའི་ནང་མཆོག་སྤྲུལ་ཧཱུྃ་ཀར་རྡོ་རྗེ་རིན་པོ་ཆེ་མཆོག་གིས་ཨ་མ་གདུགས་དཀར་སྒྲོན་མ་ལགས་སུ་གཏམ་རྒྱུད་ཀྱི་རྣམ་པའི་འཕྲིན་ཡིག་ཅིག་བསྐུར་ཡོད་པའི་ནང་། རྩོག་གྲིབ་དེ་ཕྱི་ནང་གི་བར་ཆད་སྣ་མང་སློང་བའི་རྩ་བར་གྱུར་བ་དང་། རང་ཉིད་རྒྱང་དུ་བཞུད་དགོས་པའི་གོ་དོན་ལ་གཞོལ་ཞིང་འཇིགས་པ་དང་སྡུག་བསྔལ་གྱིས་ཁེངས་ཤིང་མི་ཚེའི་ལྷིང་འཇགས་ཞིག་པའི་འགུལ་བསྐྱོད་ཅིག་དང་དུ་བླང་བར་བརྩམས། སྔ་ཕྱི་གཉིས་ཀའི་རྔོན་པའི་དམིགས་ཡུལ་དུ་གྱུར་བས་ཉིན་དལ་མཚན་ཉལ་མེད་པ་ལྟ་བུའི་མི་ཚེ་ཞིག་ཏུ་གྱུར་བ་དང་། ཉིན་མོ་རི་དྭགས་དང་མཚན་མོ་འུག་པའི་རྟུལ་ཞུགས་ལྟར་འགྲུལ་བཞུད་མང་དུ་བྱས། འཛིན་པའམ་གསོད་པ་གང་རུང་བྱེད་དགོས་པའི་བཀའ་བབ། རྔོན་པ་དེ་དག་གི་ཀླད་པའི་རྩལ་དང་སྒྱུ་རྩལ་གྱི་ངོ་མཚར་ཡོ་ཆས་དང་། གཞན་ཡང་རྫས་དུག་དང་། འོད་དུག རེག་དུག་སོགས་ཅི་རིགས་བཀོལ་བར་བྱེད་དོ་ཅེས་པའང་ཐོས་པར་གྱུར་བ་དང་། རྙི་ལ་གཞུག་པའམ་གསོད་པའི་བྱེད་ཐབས་མང་དུ་བརྩམས། ཉིན་རེ་ཉིན་རེར་རྔོན་པའི་ཚོགས་དང་ཐག་ཇེ་ཉེ་རུ་ཕྱིན་པ་དང་། ཉིན་རེ་ཉིན་རེར་འཇིགས་པ་ཆེ་རུ་ཕྱིན། རྔོན་པ་ཚོས་ས་གནས་ཀྱི་རྔོན་པ་གཞན་པ་ཚོར་གསེར་གྱི་རྔན་པ་སྤྲད་ནས། ཞེས་གསལ་ཡོད་འདུག
གསར་འགོད་པ། བསྟན་འཛིན་ཕུར་བུ།
