སྲིད་སྐྱོང་མཆོག་གིས་འདི་ལོའི་ཆོས་ཚོགས་ཐེངས་ལྔ་པའི་ཐོག་༧སྐུའི་ཡང་སྲིད་དང་འབྲེལ་བའི་གནད་དོན་ཁག་ཅིག་གསལ་པོ་ཆགས་རྒྱུ་ཡིན་སྐོར་གསུངས།

སྲིད་སྐྱོང་སྤེན་པ་ཚེ་རིང་མཆོག་གིས་འདི་ལོའི་གོ་སྟོན་སྐབས་དམངས་གཙོའི་ཀ་བ་གསུམ་ཀའི་མཛད་གཙོ་རྣམས་སྡིངས་ཆའི་སྟེང་ཕེབས་ཐུབ་པ་བྱུང་བ་ནི་སྐབས་བཅུ་བདུན་པའི་སྤྱི་འཐུས་རྣམས་ཀྱི་གཟི་བརྗིད་རེད་ཅེས་གསུངས།

ཕྱི་ཟླ་ ༤ ཚེས་ ༢༦ ནས་ཕྱི་ཟླ་ ༦ ཚེས་ ༨ བར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ཨ་རི་དང་། ཁེ་ན་ཊ། ཉི་ཧོང་བཅས་རྒྱལ་ཁབ་གསུམ་གྱི་ནང་གཞུང་འབྲེལ་ཕྱོགས་ཕེབས་གནང་སྟེ། ད་ལྟ་ཁེ་ན་ཊའི་ནང་དུ་འཚམས་གཟིགས་གནང་བཞིན་ཡོད་པ་ལྟར། ཟླ་འདིའི་ཕྱི་ཚེས་ ༡༨ ཉིན་སྲིད་སྐྱོང་སྤེན་པ་ཚེ་རིང་མཆོག་གིས་ཁེ་ན་ཊ་ཊོ་རན་ཊོའི་མི་མང་ལ་ཐུག་འཕྲད་ཀྱིས་གསུང་བཤད་གནང་ཡོད་ཅིང་། སྐབས་དེར་སྲིད་སྐྱོང་མཆོག་གིས་ཕྱི་ལོ་ ༢༠༡༡ ལོར་༧གོང་ས་རྒྱལ་བ་རིན་པོ་ཆེ་མཆོག་ནས་བཀའ་ཕེབས་པ་བཞིན། འདི་ལོའི་ཟླ་བདུན་པའི་ནང་འཚོག་འཆར་ཡོད་པའི་བཙན་བྱོལ་བོད་མིའི་ཆོས་ཚོགས་ཐེངས་ལྔ་པའི་སྟེང་། ༧སྐུའི་ཡང་སྲིད་དང་འབྲེལ་བའི་གནད་དོན་ཁག་ཅིག་གསལ་པོ་ཆགས་རྒྱུ་ཡིན་སྐོར་སོགས་གསུངས་འདུག

དེ་ཡང་སྲིད་སྐྱོང་སྤེན་པ་ཚེ་རིང་མཆོག་གིས་མང་ཚོགས་ལ་གསུང་བཤད་གནང་སྐབས། འདི་ལོར་༧གོང་ས་རྒྱལ་བ་རིན་པོ་ཆེ་མཆོག་ཕྱི་ལུགས་ལྟར་དགུང་གྲངས་ ༩༠ ཕེབས་ཀྱི་ཡོད་སྟབས། འདི་ལོར་དབུས་བོད་མིའི་སྒྲིག་འཛུགས་ཀྱིས་བྱམས་བརྩེ་ལོར་སྲུང་གཙིར་ཞུ་རྒྱུ་ཡིན་ཞིང་། ༧གོང་ས་རྒྱལ་བ་རིན་པོ་ཆེ་མཆོག་ནས་ཕྱི་ལོ་ ༢༠༡༡ ལོར་མགོན་པོ་གང་ཉིད་མཆོག་རྗེ་དགེ་འདུན་གྲུབ་པའི་དགུང་ལོར་ཕེབས་པའི་སྐབས་དང་ཕྱི་ལུགས་ལྟར་དགུང་གྲངས་དགུ་བཅུར་ཕེབས་སྐབས་༸སྐུའི་ཡང་སྲིད་དང་འབྲེལ་ནས་བཀའ་སློབ་ཕེབས་རྒྱུ་ཡིན་སྟབས། ད་ལོའི་ཟླ་བ་བདུན་པའི་ནང་ཆོས་ཚོགས་ཀྱི་ཚོགས་ཆེན་ཞིག་འཚོག་རྒྱུ་ཡིན་པ་བརྒྱུད་གནས་ཚུལ་ཁག་ཅིག་གསལ་པོ་ཆགས་རྒྱུ་ཡིན། ཞེས་དང་། དེ་བཞིན་མང་ཚོགས་ལ་༧གོང་ས་རྒྱལ་བ་རིན་པོ་ཆེ་མཆོག་གི་ཐུགས་སྐྱེད་དམ་བཅའ་བཞི་འགྲེལ་བཤད་གནང་བ་དང་འབྲེལ། འཛིན་སྐྱོང་བཀའ་ཤག་གིས་ལོ་གཅིག་གི་སྔོན་ཚུད་ནས་༧གོང་ས་རྒྱལ་བ་རིན་པོ་ཆེ་མཆོག་གི་ཐུགས་སྐྱེད་དམ་བཅའི་ཐད་མང་ཚོགས་ལ་གོ་རྟོགས་སྤེལ་ཐབས་གནང་ཡོད་སྐོར་སོགས་གསུངས་འདུག

ཡང་སྲིད་སྐྱོང་མཆོག་གིས། རྒྱལ་སྤྱིའི་གསར་ལམ་ཁག་ཏུ་བོད་རྒྱའི་བཀའ་རྙོག་སེལ་ཐབས་དང་འབྲེལ་བའི་གནས་ཚུལ་འཐོན་མུས་ཡིན་པའི་མུར། དབུས་བོད་མིའི་སྒྲིག་འཛུགས་ཀྱིས་ཀྱང་གནད་དོན་དེའི་ཐད་ལ་དོ་སྣང་དང་བོད་རྒྱའི་དཀའ་རྙོག་སེལ་ཐབས་ཀྱི་གནད་དོན་ཐད་འབད་བརྩོན་ཞུ་མུས་ཡིན་ཞིང་། འདས་ལོར་ཨ་རིས་བོད་དོན་རྒྱབ་སྐྱོར་གྱི་ཁྲིམས་ཡིག་ (Tibet Resolve Act) གཏན་འབེབས་གནང་བ་དེས། བོད་དེ་ལོ་རྒྱུས་ཀྱི་ཐོག་ནས་རང་བཙན་གཙང་མའི་རྒྱལ་ཁབ་ཅིག་ཡིན་པ་གསལ་སྟོན་བྱས་ཡོད་པ་མ་ཟད། ཨ་རིའི་ཕྱི་སྲིད་དྲུང་ཆེ་མཆོག་གིས་གསུམ་བཅུའི་དུས་དྲན་སྐབས་འཕྲིན་ཡིག་ཅིག་བསྐུར་བའི་ཁྲོད། ཨ་རི་གཞུང་གིས་ཨ་རིའི་རོགས་ཚོགས་མཚམས་འཇོག་བྱས་པར་སེམས་འཚབ་དང་ཨ་རིས་མུ་མཐུད་དུ་བོད་དོན་ཐད་རྒྱབ་སྐྱོར་གནང་རྒྱུར་ཁས་ལེན་གནང་ཡོད་སྐོར་དང་། བོད་ཀྱི་འཐབ་རྩོད་སྲ་བརྟན་དང་ཚགས་ཚུད་ཡོད་སླད། འཛིན་སྐྱོང་གིས་ཀྱང་གང་ལྕོགས་ཀྱིས་འབད་བརྩོན་གནང་མུས་ཡིན་སྐོར་དང་།  བོད་མི་མང་དག་ཅིག་ཕྱིའི་རྒྱལ་ཁབ་ཁག་ཏུ་གནས་སྤོར་བྱེད་མུས་ཡིན་པས། མ་འོངས་པར་བོད་པའི་སློབ་གྲྭ་ཁག་གནས་ཐུབ་མིན་གྱི་སྐོར་དང་། དེ་བཞིན་སྐབས་བཅུ་བདུན་པའི་གྲོས་ཚོགས་བརྒྱུད་ཁྲིམས་ཞིབ་པ་རྣམ་པ་གསུམ་དང་། རང་དབང་ཅན་གྱི་སྡེ་ཚན་འགན་འཛིན་ཁག་བསྐོས་ཐུབ་ཡོད་པས། སླེབས་ལ་ཉེ་བའི་གོ་སྟོན་སྐབས་དམངས་གཙོའི་ཀ་བ་གསུམ་སྡིངས་ཆའི་སྟེང་གནས་ཐུབ་པ་ནི།  སྐབས་བཅུ་བདུན་པའི་སྤྱི་འཐུས་རྣམས་ཀྱི་གཟི་བརྗིད་དང་གྲུབ་འབྲས་ཡག་ཤོས་ཤིག་ཡིན་སྐོར་སོགས་གསུངས་འདུག

དེ་བཞིན་ཟླ་འདིའི་ཕྱི་ཚེས་ ༡༨ ཉིན་སྲིད་སྐྱོང་སྤེན་པ་ཚེ་རིང་མཆོག་ཁེ་ན་ཊའི་གངས་ལྗོངས་བོད་ཀྱི་སྐད་དང་རིག་གཞུང་སློབ་གྲྭར་ཆེད་ཕེབས་ཀྱིས། རྒྱ་ནག་གཞུང་གིས་བོད་ནང་དུ་དམ་དྲག་དང་ལྷག་པར་བོད་ཀྱི་ཆོས་རིག་སྦྱོང་སྤྱོད་ཐད་དམ་དྲག་ཤུགས་ཆེན་བྱེད་ཀྱིན་ཡོད་སྟབས། བོད་ཀྱི་སྐད་ཡིག་དང་རིག་གཞུང་སྦྱོང་སྤྱོད་དང་སྲུང་སྐྱོབ་བྱ་རྒྱུ་གལ་ཆེན་ཡིན་པའི་ཁར། བོད་མི་ནང་ཁུལ་སྐད་ཆ་ཤོད་སྐབས་བོད་སྐད་བཤད་རྒྱུ་དེ་ཧ་ཅང་གལ་ཆེན་ཡིན་སྐོར་སོགས་གསུངས་ཡོད་འདུག

དེ་བཞིན་ཟླ་འདིའི་ཕྱི་ཚེས་ ༡༧ ཉིན་སྲིད་སྐྱོང་མཆོག་གིས་ཁེ་ན་ཊའི་ལ་ཝིལ་ཊོརེན་ཊོན་ (Belleville- Trenton) གནས་སྡོད་བོད་མི་རྣམས་ལ་ཐུག་འཕྲད་ཀྱིས། བོད་དོན་དང་བོད་ཀྱི་སྐད་ཡིག་གི་གལ་ཆེའི་རང་བཞིན། བོད་མིའི་ངོ་བོ་སྲུང་སྐྱོབ་བྱ་རྒྱུ་གལ་ཆེན་ཡིན་པའི་སྐོར་སོགས་ཀྱི་ཐོག་ལ་གཏམ་བཤད་གནང་ཡོད་པ་དང་། ཟླ་འདིའི་ཕྱི་ཚེས་ ༡༦ ཉིན་ཁེ་ན་ཊའི་གྲོས་ཚོགས་འཐུས་མི་སྐུ་ཞབས་ཡི་ཝོན་བྷ་ཀེར་ (Yvon Baker) ལགས་སོགས་དང་མཇལ་འཕྲད་གནང་ཡོད་འདུག

གསར་འགོད་པ་དཔལ་ལྡན་གྱིས་བོད་མིའི་སྒྲིག་འཛུགས་ཀྱི་དྲ་བ་སོགས་ནས་བསྡུ་སྒྲིག་བྱས། རྩོམ་སྒྲིག་བྱེད་མཁན། པདྨ་མཚོ།