ཨེ་མོ་རི་གཙུག་ལག་སློབ་གཉེར་ཁང་གི་སློབ་དཔོན་ཆེན་མོ་དགེ་བཤེས་བློ་བཟང་བསྟན་འཛིན་ལགས་ཀྱིས་སཱི་ཤེས་ཡོན་སློབ་གསོ་བརྒྱུད་ནས་༧གོང་ས་རྒྱལ་བ་རིན་པོ་ཆེ་མཆོག་ལ་བརྩི་བཀུར་དང་། བོད་པའི་རིག་གཞུང་ལ་བརྩི་མཐོང་བསླེབ་ཀྱི་ཡོད་པ་གསལ་བོ་རེད་ཅེས་གསུངས་སོང་།
དེ་རིང་ཕྱི་ཚེས་ ༢༡ ནས་ ༢༧ བར་ཉིན་གྲངས་བདུན་རིང་བོད་མིའི་སྒྲིག་འཛུགས་ཀྱི་འཛིན་སྐྱོང་སྦྱོང་བརྡར་ཁང་དུ། ཤེས་རིག་ལས་ཁུངས་ཀྱི་གོ་སྒྲིག་འོག བོད་པའི་སློབ་གྲྭ་ཁག་གི་སཱི་ཤེས་ཡོན་སློབ་གསོའི་མཐུན་སྦྱོར་བ་རྣམས་ལ་སཱི་ཤེས་ཡོན་སློབ་གསོ་དང་། དཔྱད་སྒོམ་ལ་བརྟེན་པའི་སྙིང་རྗེའི་སྦྱོང་བརྡར་གྱི་ཟབ་སྦྱོང་ཞིག་འཚོག་བཞིན་ཡོད་ཅིང་། དབུ་འབྱེད་མཛད་སྒོའི་ཐོག་བཙན་བྱོལ་བོད་མིའི་ཤེས་ཡོན་ལྷན་ཚོགས་ཀྱི་ཚོགས་གཙོ་དགེ་བཤེས་ལྷག་རྡོར་ལགས་དང་། ཨེ་མོ་རི་གཙུག་ལག་སློབ་གཉེར་ཁང་གི་སློབ་དཔོན་ཆེན་མོ་དགེ་བཤེས་བློ་བཟང་བསྟན་འཛིན་ལགས། རྒྱ་གར་དང་བལ་ཡུལ་གྱི་བོད་སློབ་ཁག་ ༣༣ ནས་སཱི་ཤེས་ཡོན་མཐུན་སྦྱོར་བ་གྲངས་ ༦༦ མཉམ་ཞུགས་གནང་འདུག
ཐེངས་འདིའི་ཟབ་སྦྱོང་སྐོར་ལ་ཤེས་རིག་ལས་ཁུངས་ཤེས་ཡོན་ལྷན་ཚོགས་ཡིག་ཚང་གི་འགན་འཛིན་བསྟན་འཛིན་པདྨ་ལགས་ཀྱིས་འདི་གའི་གསར་འགོད་པར། སཱི་ཤེས་ཡོན་སློབ་གསོའི་ཟབ་སྦྱོང་ལོ་འཆར་ཅན་ལྟར་ཤེས་རིག་ལས་ཁུངས་ཀྱིས་གོ་སྒྲིག་ཞུ་བཞིན་ཡོད།ཐེངས་འདིའི་ཟབ་སྦྱོང་སྔོན་མ་དང་ཅུང་ཙམ་མི་འདྲ་བ་ཞིག་ནི་ནམ་རྒྱུན་སཱི་ཤེས་ཡོན་མཐུན་སྦྱོར་བ་རུ་ཁག་གསུམ་དུ་བགོས་ཏེ་རུ་ཁག་སོ་སོར་ཟབ་སྦྱོང་སྤྲོད་བཞིན་ཡོད་ཀྱང་། ད་ལན་སཱི་ཤེས་ཡོན་མཐུན་སྦྱོར་བའི་རུ་ཁག་གསུམ་པོ་མཉམ་ཞུགས་གནང་བཞིན་ཡོད་པས་ཟབ་སྦྱོང་གི་ཉིན་གྲངས་ཀྱང་མང་དུ་བཏང་ཡོད། ཟབ་སྦྱོང་ཉིན་རེའི་ནང་ཉུང་མཐར་ཚོགས་ཐུན་ལྔ་དྲུག་ཡོད། ཉིན་གསུམ་རིང་སཱི་ཤེས་ཡོན་སློབ་གསོའི་བསླབ་གཞི་དང་། ཉིན་གསུམ་རིང་དཔྱད་སྒོམ་ལ་བརྟེན་པའི་སྙིང་རྗེའི་སྦྱོང་བརྡར་ཐོག་ཟབ་སྦྱོང་བྱ་རྒྱུ་ཡིན། ཞེས་དང་། ཤེས་རིག་ལས་ཁུངས་ཀྱི་ངོས་ནས་སཱི་ཤེས་ཡོན་སློབ་གསོ་ཧ་ཅང་གལ་ཆེན་པོར་བརྩི་བཞིན་ཡོད་ལ། ཤེས་ཡོན་ལྷན་ཚོགས་ཀྱི་ལོ་འཁོར་ཚོགས་ཆེན་སྐབས་ཀྱི་གྲོས་ཆོད་གཞི་བཟུང་ཤེས་རིག་ལས་ཁུངས་ཀྱིས་ལག་ལེན་དུ་བསྟར་བཞིན་ཡོད་པ་དང་། མ་འོངས་བའང་སཱི་ཤེས་ཡོན་སློབ་གསོའི་ཐོག་མུ་མཐུད་དུ་ཡར་རྒྱས་གཏོང་རྒྱུ་ཡིན་སྐོར་འགྲེལ་བརྗོད་གནང་བྱུང་།
འདི་གའི་གསར་འགོད་པས་ཨེ་མོ་རི་གཙུག་ལག་སློབ་གཉེར་ཁང་གི་སློབ་དཔོན་ཆེན་མོ་དགེ་བཤེས་བློ་བཟང་བསྟན་འཛིན་ལགས་སུ་རྒྱལ་སྤྱིའི་ཐོག་གི་སཱི་ཤེས་ཡོན་སློབ་གསོའི་སྐོར་དྲིས་པར་ཁོང་གིས། སྤྱིར་འཛམ་གླིང་གི་རྒྱལ་ཁབ་ ༡༤༡ ནང་སཱི་ཤེས་ཡོན་སློབ་གསོ་ངོ་སྤྲོད་ཐོབ་ཡོད་ཅིང་། ད་ལྟའི་ཆར་འཛམ་གླིང་གི་རྒྱལ་ཁབ་ ༧༨ ནང་སཱི་ཤེས་ཡོན་སློབ་གསོའི་ལས་གཞི་ལག་བསྟར་བྱེད་བཞིན་པ་རེད། ཕྱི་ལོ་ ༢༠༢༤ ཟླ་ ༥ བར་གྱི་གྲངས་ཐོ་ལྟར་ན་སློབ་ཕྲུག་གྲངས་ས་ཡ་ ༡༧ ལྷག་གིས་སློབ་གཉེར་བྱས་ཡོད་འདུག སྰི་ཤེས་ཡོན་མཐུན་སྦྱོར་བ་གྲངས་ ༡༠༠༠ ལྷག་ཡོད། ང་ཚོ་དང་འབྲེལ་བ་ཡོད་པའི་རྒྱལ་ཁབ་ ༥༠ ལྷག་ཡོད། དེའི་ཁྲོད་རྒྱ་གར་དང་བྷ་རཱ་ཛིལ་སོགས་ཀྱི་རྒྱལ་ཁབ་ཁག་ཅིག་གིས་རང་ཉིད་ཀྱིས་སཱི་ཤེས་ཡོན་མཐུན་སྦྱོར་བའི་སྦྱོར་བརྡར་བྱེད་ཐུབ་ཀྱི་ཡོད་པས། དེ་དག་ང་ཚོས་གྲངས་ཐོའི་ནང་དུ་བླངས་ཡོད་པ་མ་རེད། སཱི་ཤེས་ཡོན་སློབ་གསོས་དགེ་རྒན་དང་སློབ་ཕྲུག་རྣམས་ལ་ཕན་ཐོགས་ཆེན་པོ་ཡོང་གི་ཡོད་པ་མ་ཟད། ཁྱིམ་ཚང་ནང་གི་བཟའ་ཚང་དང་བུ་ཕྲུག་སོགས་ཀྱི་མཐུན་ལམ་དང་འབྲེལ་བ་ཡག་པོ་ཡོང་བར་ཕན་ཐོགས་ཡོང་གི་འདུག དེའང་རྒྱལ་ཁབ་གཅིག་གཉིས་ཤིག་གི་ནང་དུ་བྱུང་བ་ཞིག་མ་རེད། སཱི་ཤེས་ཡོན་སློབ་གསོའི་ལས་གཞིའི་ཐོག་ལས་འགུལ་སྤེལ་མཁན་གྱི་ཚོགས་པ་མང་པོར་ཐུག་དུས། སཱི་ཤེས་ཡོན་སློབ་གསོའི་སྒྲོམ་གཞིས་སྤྱི་ཚོགས་ནང་དང་བུ་ཕྲུག་གི་དཀའ་ངལ་སེལ་བར་རྨི་ལམ་འགྲུབ་སོང་ཟེར་གྱི་འདུག སཱི་ཤེས་ཡོན་སློབ་གསོ་བརྒྱུད་ནས་༧གོང་ས་རྒྱལ་བ་རིན་པོ་ཆེ་མཆོག་ལ་བརྩི་བཀུར་དང་། བོད་མི་དང་བོད་པའི་རིག་གཞུང་ལ་བརྩི་མཐོང་བསླེབ་ཀྱི་ཡོད་པ་གསལ་བོ་རེད། ཅེས་འགྲེལ་བརྗོད་གནང་བྱུང་།
མཛད་སྒོའི་ཐོག་བཙན་བྱོལ་བོད་མིའི་ཤེས་ཡོན་ལྷན་ཚོགས་ཀྱི་ཚོགས་གཙོ་དགེ་བཤེས་ལྷག་རྡོར་ལགས་ཀྱིས། ང་ཚོས་ཤེས་བྱ་རིག་པའི་གནས་ཐམས་ཅད་ཤེས་ཀྱི་མེད་ཀྱང་། ཡིན་གཅིག་མིན་གཅིག་ཤེས་དགོས་པ་དེ་ཡག་པོ་ཤེས་དགོས། ཡིན་དགོས་མིན་གཅིག་ཤེས་དགོས་པའི་ནང་ལྷག་པ་ཚུལ་ཁྲིམས་ཀྱི་བསླབ་པའམ་སཱི་ཤེས་ཡོན་སློབ་གསོ་ཞེས་པ་དེ་གལ་ཆེ་ཤོས་ཤིག་རེད། དེ་གལ་ཆེན་པོ་ཡིན་ཚུལ་ང་ཚོས་བཤད་ནས་ཕན་ཐོགས་ཀྱི་མེད་པར་སོ་སོས་བསམ་བློ་གཏོང་དགོས། སོ་སོའི་ཁྱིམ་ཚང་ནང་རྟག་ཏུ་རྒྱག་རེས་བྱས་ན་ཡག་གམ། ཁོང་ཁྲོ་ཉུང་ཙམ་བསྟན་ནས་འཆམ་པོ་བྱས་ན་ཡག་པོ་རེད། དེ་ནི་རང་ཉིད་ཀྱི་ཉམས་མྱོང་སྟེང་ནས་མྱོང་དགོས་པ་ལས། ཡིན་གཅིག་མིན་གཅིག་ཚན་རིག་གི་བརྟག་དཔྱད་བྱེད་དགོས་པ་ཞིག་མ་རེད། སཱི་ཤེས་ཡོན་སློབ་གསོས་འཛམ་གླིང་དུ་ཞབས་འདེགས་ཞུ་བཞིན་ཡོད་ཀྱང་། གལ་ཆེ་བ་དེ་སོ་སོའི་ཁྱིམ་ཚང་གི་འཆམ་མཐུན་ནས་མགོ་བཙུགས་དགོས་པ་དང་། དེ་བཞིན་བོད་སྤྱི་པའི་དོན་དུ་ཕན་ཐོགས་པའི་བསམ་བློ་གཏོང་རྒྱུ་གལ་ཆེན་པོ་རེད། ཅེས་གསུངས་སོང་།
ཐེངས་འདིའི་ཟབ་སྦྱོང་ནང་ཨེ་མོ་རི་གཙུག་ལག་སློབ་གཉེར་ཁང་གི་སློབ་དཔོན་ཆེན་མོ་དགེ་བཤེས་བློ་བཟང་བསྟན་འཛིན་ལགས་དང་། སཱི་ཤེས་ཡོན་སློབ་གསོའི་རྒྱལ་སྤྱིའི་འབྲེལ་མཐུད་པ་བགྲེས་པ་བརྩོན་འགྲུས་བསམ་འཕེལ་ལགས་ཀྱིས་སཱི་ཤེས་ཡོན་སློབ་གསོའི་བསླབ་གཞི་དང་དཔྱད་སྒོམ་ལ་བརྟེན་པའི་སྙིང་རྗེའི་སྦྱོང་བརྡར་ཐོག་ཟབ་ཁྲིད་གནང་བཞིན་ཡོད་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།
