དགའ་ལྡན་བྱང་རྩེ་གྲྭ་ཚང་གི་དགེ་བཤེས་རྡོ་རྗེ་དབང་ཕྱུག་ལགས་ཀྱིས་ཡེ་ཤུ་ཆོས་དཔོན་ཕོབ་ལེའོ་མཆོག་ལ་མཇལ་ཁ་ཞུ་སྐབས། ཕོབ་མཆོག་ནས་༧གོང་ས་མཆོག་དང་ལྷན་གང་མགྱོགས་མཇལ་འཕྲད་གནང་དགོས་པའི་འབོད་སྐུལ་ཞུས་པར་ཕོབ་མཆོག་ནས་ངོས་བཞེས་གནང་ཡོད་འདུག
ཟླ་འདིའི་ཕྱི་ཚེས་ ༡༨ ཉིན་ཨི་ཊ་ལིའི་ཡེ་ཤུའི་ཆོས་ཁང་དུ། ཡུལ་དེར་རྟེན་གཞི་བྱས་པའི་ཀུན་ཏུ་བཟང་བོའི་ཆོས་ཚོགས་ཀྱི་དགའ་ལྡན་བྱང་རྩེ་གྲྭ་ཚང་གི་དགེ་བཤེས་རྡོ་རྗེ་དབང་ཕྱུག་ལགས་དང་དགེ་བཤེས་ཡེ་ཤེས་དཔལ་ལྡན་ལགས་རྣམ་གཉིས་བཅས་ཆོས་ལུགས་འདྲ་མིན་གྱི་འཐུས་མི་ཁག་ཅིག་གིས་ཡེ་ཤུའི་ཆོས་དཔོན་གསར་པ་ཕོབ་ལེའོ་མཆོག་ལ་མཇལ་བཅར་ཞུས་ཡོད།
དེ་རིང་འདི་གའི་གསར་འགོད་པས་དྲ་ལམ་བརྒྱུད་དགེ་བཤེས་རྡོ་རྗེ་དབང་ཕྱུག་ལགས་སུ། མཇལ་འཕྲད་དེའི་བརྒྱུད་རིམ་གྱི་སྐོར་ལ་བཀའ་འདྲི་ཞུ་སྐབས་ཁོང་གིས། ཀུན་ཏུ་བཟང་བོའི་ཆོས་ཚོགས་ཀྱི་གྲྭ་བ་བཞི་ལ་མཇལ་ཁ་ཞུ་བའི་གོ་སྐབས་ཞུས་ནའང་གྲྭ་པ་གཉིས་མ་གཏོགས་ཡོང་གི་མེད་པའི་ལན་འདེབས་བྱུང་བ་བཞིན། ཨི་ཊ་ལིའི་རྒྱལ་སྤྱིའི་ནང་པའི་མཐུན་ཚོགས་ཀྱི་གོ་སྒྲིག་འོག་དགའ་ལྡན་བྱང་རྩེ་གྲྭ་ཚང་གི་དགེ་བཤེས་ལགས་གཉིས་ནས་ཡེ་ཤུའི་ཆོས་དཔོན་གསར་པ་ཕོག་ལེའོ་མཆོག་ལ་མཇལ་བཅར་ཞུས་ཡོད་ཅིང་། སྐབས་དེར་ཁོང་ཅག་དང་ལྷན་དུ་ཉི་ཧོང་གི་ནང་པའི་ཆོས་ལུགས་ཀྱི་དབུ་ཁྲིད་དང་རྗེས་འཇུག་པ། ཁ་ཆེ་ཆོས་ལུགས་ཀྱི་གནད་ཡོད་མི་སྣ། རྒྱ་གར་གྱི་སིག་དང་ཧིན་རྡུ་ཆོས་ལུགས་ཀྱི་བླ་ཆེན་ཁག་ཅིག དེ་བཞིན་ཡེ་ཤུ་ཆོས་ལུགས་ཀྱི་བླ་ཆེན་ཁག་ཅིག་བཅས་ཆོས་ལུགས་མི་འདྲ་བ་ལྔ་དྲུག་ཅིག་དང་ཁྱོན་མི་གྲངས་ ༣༠༠ ལྷག་འཛོམས་ཡོད་སྐོར་བརྗོད་བྱུང་།
མཇལ་འཕྲད་སྐབས་བཀའ་མོལ་ཅི་བྱུང་སྐོར་ལ་ཁོང་གིས། ཐོག་མར་ཕོབ་གསར་པ་ལེའོ་མཆོག་ནས་མཇལ་བཅར་བ་རྣམས་ལ་འཚམས་འདྲིའི་གསུང་བཤད་གནང་སོང་། དེ་ནས་ཞབས་བཀྱག་གི་བང་རིམ་བཞིན་མཇལ་ཁ་གནང་མགོ་བཙུགས་སོང་། ང་དང་དགེ་བཤེས་ཡེ་ཤེས་དཔལ་ལྡན་ངེད་གཉིས་ནས་ཀྱང་མཇལ་ཁ་ཞུས་པ་ཡིན། མཇལ་ཁའི་གོ་སྐབས་དེ་སྐར་མ་ལྔའི་རིང་ལ་བྱུང་སོང་། སྐབས་དེར་ངས་ཕོབ་མཆོག་ལ་མཇལ་དར་ཞིག་དང་ཕྲེང་བ་ཞིག་ཕུལ་ཏེ། ཁྱེད་ནས་ཕོབ་ཀྱི་མཚན་གནས་བཞེས་པ་དང་འཛམ་གླིང་ཞི་བདེ་ཡོང་བའི་བཀའ་མོལ་གནང་གི་འདུག་པར། ༧གོང་ས་མཆོག་དང་བོད་མི་ས་ཡ་བདུན་གྱི་ཚབ་ཞུས་ཏེ་བཀའ་དྲིན་ཆེ་ཞེས་ཞུས་པ་ཡིན། གཉིས་པ་དེར་བཞུགས་སྒར་དྷ་རམ་ས་ལར་བཞུགས་པའི་བོད་མིའི་བླ་ན་མེད་པའི་དབུ་འཁྲིད་༧གོང་ས་མཆོག་དང་མཇལ་འཕྲད་ཅིག་མགྱོགས་ནས་མྱུར་དུ་གནང་རོགས་ཞེས་པ་ཞུས་ཡིན། གསུམ་པ་དེང་སྐབས་འཛམ་གླིང་ནང་འཁྲུག་ཆ་དོད་པ་དང་དམག་འཁྲུག་སོགས་ཀྱི་འུར་ཟིང་ཆེ་བས། དམག་འཁྲུག་ཞི་འཇམ་དང་འཛམ་གླིང་ཞི་བདེ་ཡོང་བའི་བཀའ་སློབ་ལམ་སྟོན་མུ་མཐུད་གནང་བའི་འབོད་སྐུལ་བཅས་ཞུས་པར་ཁོང་གིས་དོན་ཚན་ཚང་མར་ཡིན་ད་ཡིན་གསུངས་བྱུང་།
ཟླ་འདིའི་ཕྱི་ཚེས་ ༡༧ ཉིན་ཡེ་ཤུ་ཆོས་དཔོན་ཕོབ་གསར་པ་རོ་བྷི་ཌི་པེ་ཝེ་སི་(Robert Prevost Pope Leo XIV) མཆོག་གི་གཞུང་འབྲེལ་ཁྲི་འདོན་མཛད་སྒོ་འཚོགས་ཡོད་པ་དང་། སྐབས་དེར་འཛམ་གླིང་རྒྱལ་ཁབ་ ༢༠༠ ལྷག་གི་མགོ་ཁྲིད་དང་རྒྱལ་ཁབ་ཁག་ཅིག་གི་རྒྱལ་སྲས་དང་རྒྱལ་པོ་རྒྱལ་མོ་བཅས་དང་། འཛམ་གླིང་གི་ཆོས་ལུགས་ཁག་གི་དབུ་ཁྲིད་དང་སྐུ་ཚབ། དེ་བཞིན། ཡེ་ཤུ་ཆོས་ལུགས་ཀྱི་དད་ལྡན་མི་མང་འབུམ་དྲུག་ལྷག་ཨི་ཊ་ལིའི་ཡེ་ཤུ་ཆོས་ཁང་གི་ཚོམས་ཆེན་དུ་འཛོམས་ནས་ཕོབ་གསར་བའི་ཁྲི་འདོན་མཛད་སྒོ་འཚོགས་ཡོད་འདུག ཡེ་ཤུའི་ཆོས་དཔོན་རོ་བྷི་ཌི་པེ་ཝེ་སི་མཆོག་ནི་ཨ་རིའི་ཆི་ཁ་གོར་སྐུ་འཁྲུངས། རོམ་གྱི་པོན་ཊི་ཕི་ཀལ་སློབ་གྲྭ་ཆེན་མོ་(Pontifical College of St) ནས་ཁྲིམས་ལུགས་ཐོག་འབུམ་རམས་པ་དང་། ཆི་ཁ་གོའི་ཝི་ལ་ནོ་ཝ་གཙུག་ལག་སློབ་གྲྭ་ (Villanova University ) དང་ཆོས་ལུགས་མཐུན་སྒྲིལ་ཚོགས་པར་འགྲིམས། ཁོང་གིས་ཕྱི་ལོ་ ༡༩༨༥ ནས་བཟུང་ཨ་གུ་སི་ཊི་ནི་ཡན་(Augustinian) གྱི་ལས་འགུལ་ནང་ཆོས་ཁང་གི་འགན་འཛིན་གྱི་ཕྱག་ལས་གནངས། ཕྱི་ལོ་ ༡༩༨༧ ལོར་ཆི་ཁ་གོར་དུས་ཡུན་ཐུང་ཐུང་ཞིག་བཞུགས་རྗེས་པེ་རུ་རུ་ཕྱིར་ཕེབས་ནས་ཆོས་ཕྱོགས་ཀྱི་མཛད་པ་བསྐྱངས། ཕྱི་ལོ་ ༢༠༡༥ ནས་ ༢༠༢༣ བར་པེ་རུ་རྒྱལ་ཁབ་ཏུ་ཡེ་ཤུའི་ཆོས་དཔོན་གནངས།
དགེ་བཤེས་རྡོ་རྗེ་དབང་ཕྱུག་ལགས་ནི་ཕྱི་ལོ་ ༢༠༡༨ ལོར་ཨི་ཊ་ལིར་རྟེན་གཞི་བྱས་པའི་དགའ་ལྡན་བྱང་རྩེ་གྲྭ་ཚང་གི་ཀུན་ཏུ་བཟང་བོའི་ཆོས་ཚོགས་ནང་ཞུགས་ཡོད་ཅིང་། ཆོས་ཚོགས་དེ་བཙུགས་ནས་ད་ཆ་ལོ་ངོ་ ༣༨ ལྷག་ཙམ་ཕྱིན་ཡོད་འདུག
གསར་འགོད་པ། སྐལ་བཟང་སྦྱིན་པ།
