བོད་དོན་ལས་འགུལ་བ་བསྟན་འཛིན་བརྩོན་འགྲུས་ལགས་ཀྱིས་རྒྱ་གཞུང་གིས་གྲོས་མཐུན་དོན་ཚན་བཅུ་བདུན་གྱི་དབང་འོག་ནས་བོད་བཙན་བཟུང་བྱས་པ་གསལ་བོ་ཡིན་པས། བདེན་པའི་མཐའ་གསལ་བའི་ལོ་རྒྱུས་འདི་རྒྱལ་སྤྱིའི་ཐོག་དང་བོད་ཀྱི་གཞོན་སྐྱེས་རྣམས་ལ་འགྲེལ་བཤད་བྱ་རྒྱུ་ལས་འགན་རེད་ཅེས་བརྗོད་སོང་།
དེ་རིང་ཕྱི་ཚེས་ ༢༣ཉིན་དྷ་ས་ས་གནས་མགོ་འཛིན་གྱི་ཚོགས་ཁང་དུ། དྷ་ས་ས་གནས་གཞོན་ནུ་ལྷན་ཚོགས་ཀྱི་གོ་སྒྲིག་འོག བཙན་འོག་གི་གྲོས་མཐུན་དོན་ཚན་བཅུ་བདུན་གླེང་བ་ཞེས་པའི་བགྲོ་གླེང་ཞིག་འཚོགས་ཡོད་ཅིང་། བགྲོ་གླེང་ཐོག་བོད་མིའི་སྒྲིག་འཛུགས་ཀྱི་མགྲིན་ཚབ་པ་བསྟན་འཛིན་ལེགས་བཤད་ལགས་དང་། ས་རཱ་མཐོ་སློབ་ཀྱི་ལོ་རྒྱུས་སློབ་དཔོན་གཙང་ཕྲུག་སྟོབས་ལགས། རྒྱལ་སྤྱིའི་བོད་དོན་འབྲེལ་མཐུད་ཁང་གི་ཉམས་ཞིབ་པ་བློ་བཟང་དབྱངས་མཚོ་ལགས། བོད་དོན་ལས་འགུལ་བ་བསྟན་འཛིན་བརྩོན་འགྲུས་ལགས། དེ་བཞིན་གཞུང་ཁུངས་དང་གཞུང་ཁུངས་མིན་པའི་ཚོགས་པ་ཁག་གི་འཐུས་མི། ཉམས་ཞིབ་པ། དྷ་སའི་མི་མང་བཅས་མཉམ་ཞུགས་གནང་སོང་།
ཐེངས་འདིའི་བགྲོ་གླེང་སྐོར་ལ་བོད་དོན་ལས་འགུལ་བ་བསྟན་འཛིན་བརྩོན་འགྲུས་ལགས་ཀྱིས་འདི་གའི་གསར་འགོད་པར། བཙན་འོག་ནས་གྲོས་མཐུན་དོན་ཚན་བཅུ་བདུན་བཞག་པའི་ཉིན་མོ་འདིར་ཡང་ནས་བསྐྱར་དུ་རྟོག་ཞིབ་བྱས་ཏེ། འཛམ་གླིང་ཐོག་འདེིའི་སྐོར་གྱི་དངོས་ཡོད་གནས་ཚུལ་གང་ཡིན་པ་གསལ་བསྒྲགས་བྱ་དགོས་རྒྱུ་གལ་ཆེན་པོ་རེད། རྒྱ་ནག་གཞུང་གིས་ཡིག་ཆ་འདི་ལ་བརྟེན་ནས་བོད་བཙན་འཕྲོག་བྱས་པ་རེད། ད་དུང་ཡང་རྒྱ་ནག་གིས་བོད་དེ་བཙན་འོག་ཏུ་ཉར་བསྡད་ཡོད། རྒྱ་ནག་གཞུང་གིས་བོད་ཞི་བའི་བཅིངས་གྲོལ་བཏང་བར་དྲིལ་བསྒྲགས་བྱས་ཡོད། ང་ཚོས་བདེན་པའི་མཐའ་གསལ་བོ་བཤད་དགོས་པ་གལ་ཆེན་པོ་རེད། རྒྱ་ནག་གིས་ཐོག་མར་བོད་བཙན་གནོན་བྱེད་དུས་བོད་རང་བཙན་ལྡན་པའི་རྒྱལ་ཁབ་ཅིག་རེད། ༧གོང་ས་རྒྱལ་བ་རིན་པོ་ཆེ་སྐུ་ཕྲེང་བཅུ་བཞི་བ་མཆོག་ནས་གཞུང་འཛིན་པའི་དུས་སྐབས་རེད། དེ་དུས་རྒྱ་གཞུང་གིས་བོད་ལ་ཐེ་གཏོགས་བྱེད་པའི་དབང་ཆ་མེད་པས་དམག་ལ་བརྟེན་ནས་བཙན་འཛུལ་བྱས་པ་རེད། ཅེས་འགྲེལ་བརྗོད་གནང་བྱུང་།
ཡང་ཁོང་གིས། བོད་ཀྱི་སྐུ་ཚབ་རྣམས་རྒྱ་ནག་གི་རྒྱལ་ས་པེ་ཅིན་དུ་ཕྱིན་ཡང་། རྒྱ་གཞུང་གིས་འཇིགས་སྐུལ་དང་གཉའ་གནོན་གྱི་འོག་ནས་གྲོས་མཐུན་དོན་ཚན་བཅུ་བདུན་འཇོག་དགོས་ཁེལ་བ་རེད། དེ་དུས་ང་ཕོད་ངག་དབང་འཇིགས་མེད་སོགས་ལ་བོད་དོན་ཐག་གཅོད་བྱེད་པའི་དབང་ཆ་མེད་ཀྱང་། རྒྱ་ནག་གཞུང་གིས་ཡི་གེའི་དག་ཆ་ནོར་བའི་དམ་ཕྲུག་རྫུན་མ་བརྒྱབ་སྟེ། གྲོས་མཐུན་དོན་ཚན་བཅུ་བདུན་བཞག་དགོས་པའི་གནས་སྟངས་ཆགས་པ་རེད། དེ་བཞིན་རྒྱ་ནག་གཞུང་གིས་གྲོས་མཐུན་དོན་ཚན་བཅུ་བདུན་གྱི་དོན་ཚན་རེ་རེ་བཞིན་ནུས་མེད་དུ་བཏང་བས། ཕྱི་ལོ་ ༡༩༥༩ ལོར་༧གོང་ས་རྒྱལ་བ་རིན་པོ་ཆེ་མཆོག་བཙན་བྱོལ་ཕེབས་ཏེ། གྲོས་མཐུན་དོན་ཚན་བཅུ་བདུན་ངོས་ལེན་མེད་པའི་གསལ་བསྒྲགས་གནང་བ་རེད། རྒྱ་གཞུང་གིས་གྲོས་མཐུན་དོན་ཚན་བཅུ་བདུན་གྱི་དབང་འོག་ནས་བོད་བཙན་བཟུང་བྱས་པ་གསལ་བོ་རེད་ལ། ང་ཚོས་ཡང་ནས་བསྐྱར་དུ་བདེན་པའི་མཐའ་གསལ་བའི་ལོ་རྒྱུས་འདི་རྒྱལ་སྤྱིའི་ཐོག་དང་བོད་ཀྱི་གཞོན་སྐྱེས་རྣམས་ལ་འགྲེལ་བཤད་བྱ་རྒྱུ་དེ་ལས་འགན་རེད། བོད་དོན་འཐབ་རྩོད་ནི་བདེན་པའི་མཐའ་དང་ལོ་རྒྱུས་རེད། ཅེས་འགྲེལ་བརྗོད་གནང་བྱུང་།
གྲོས་མཐུན་དོན་ཚན་བཅུ་བདུན་གྱི་བགྲོ་གླེང་གི་གལ་གནད་སྐོར་ལ་ས་རཱ་མཐོ་སློབ་ཀྱི་ལོ་རྒྱུས་སློབ་དཔོན་གཙང་ཕྲུག་སྟོབས་ལགས་ཀྱིས་འདི་གའི་གསར་འགོད་པར། རྒྱ་ནག་གཞུང་གིས་ནམ་རྒྱུན་བོད་རྒྱ་ནག་གི་མངའ་ཁོངས་ཡིན་ཟེར་གྱི་ཡོད་པ་མ་ཟད། དེ་ནི་ཁྲིམས་མཐུན་ཡིན་ཟེར་གྱི་ཡོད་པ་རེད། རྒྱ་ནག་གཞུང་གིས་མངའ་ཁོངས་སུ་ཆགས་པའི་གཞི་བཅོལ་ས་དང་ཁུངས་གཙོ་བོ་གྲོས་མཐུན་དོན་ཚན་བཅུ་བདུན་ཆགས་ཀྱི་ཡོད་པ་རེད། གཞི་རྩའི་ཐོག་ནས་ལོ་རྒྱུས་ཀྱི་གནད་དོན་མང་པོ་བཤད་ཡོང་གི་ཡོད་ཀྱང་ཁུངས་འདི་གཙོ་བོར་འཛིན་གྱི་ཡོད་པ་རེད། ང་ཚོས་ཐོག་མ་ནས་བཙན་གནོན་འོག་བཞག་པས་ཁས་ལེན་མེད་པའི་གནད་དོན་ཞིག་ཡིན། ང་ཚོས་ཁས་མ་བླངས་ཚེ་རྒྱ་ནག་གི་མངའ་ཁོངས་ཆགས་ཀྱི་མེད་ལ་ཁྲིམས་མཐུན་ཡང་ཆགས་ཀྱི་མེད། ང་ཚོ་བཙན་བྱོལ་དུ་ཡོང་བའི་གནད་དོན་འདི་དང་འབྲེལ་བ་ཆགས་ཡོད། ཅེས་འགྲེལ་བརྗོད་གནང་བྱུང་།
དེ་བཞིན་རྒྱལ་སྤྱིའི་བོད་དོན་འབྲེལ་མཐུད་ཁང་གི་ཉམས་ཞིབ་པ་བློ་བཟང་དབྱངས་མཚོ་ལགས་ཀྱིས། གྲོས་མཐུན་དོན་ཚན་བཅུ་བདུན་ཐོག་བགྲོ་གླེང་བྱེད་དགོས་པ་གནད་འགག་ཆེན་པོ་ཆགས་ཀྱི་འདུག སྤྱིར་ང་ཚོའི་ངོས་ནས་གྲོས་མཐུན་དོན་ཚན་བཅུ་བདུན་ལ་ཁྲིམས་ཐོག་ནས་ངོས་ལེན་མེད་པ་ཞིག་ཆགས་ཡོད་ཀྱང་། རྒྱ་ནག་གི་གཞུང་འབྲེལ་ཡིག་ཆའི་ཐོག་ནས་བོད་བཅིངས་གྲོལ་བྱས་པ་དྲིལ་བསྒྲགས་བྱེད་བཞིན་ཡོད་པས། ད་ལྟའི་ཆར་བོད་ནང་དུ་རང་དབང་མེད་པའི་གནད་དོན་དེ་རྒྱལ་སྤྱིའི་ཐོག་ཏུ་བཤད་དགོས་པ་གལ་ཆེན་པོ་ཆགས་ཀྱི་འདུག ཅེས་འགྲེལ་བརྗོད་གནང་བྱུང་།
བོད་མིའི་སྒྲིག་འཛུགས་ཀྱི་མགྲིན་ཚབ་པ་བསྟན་འཛིན་ལེགས་བཤད་ལགས་ཀྱིས། བོད་ཀྱི་བདག་དབང་འཛིན་སྟངས་ཐོག་རྒྱ་ནག་གི་མགོ་ཁྲིད་རྣམས་ཀྱིས་ལོ་རྒྱུས་ཀྱི་དུས་ཚིགས་འདྲ་མིན་ལུང་འདྲེན་བྱས་ཡོད་ཀྱང་། ལོ་རྒྱུས་ཀྱི་ཁ་གྲགས་ས་གཙོ་བོ་གྲོས་མཐུན་དོན་ཚན་བཅུ་བདུན་ཆགས་ཀྱི་ཡོད་པས། བོད་ཀྱི་བདེ་སྡུག་གི་ཆེད་དུ་༧གོང་ས་རྒྱལ་བ་རིན་པོ་ཆེ་མཆོག་རྒྱ་ནག་ཏུ་ཕེབས་ཡོད་པ་མ་ཟད། ཕྱི་རྒྱལ་ཁག་དང་མཉམ་འབྲེལ་རྒྱལ་ཚོགས་སོགས་སུ་རྒྱ་ནག་གི་བཙན་གནོན་ཐད་ཞུ་གཏུགས་གནང་ཡོད་སྐོར་སོགས་གསུངས་སོང་།
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།
ཆིང་ཡིག་དོན་ཚན་བཅུ་བདུན་ནང་བོད་ས་གནས་སྲིད་གཞུང་ཟེར་བ་འཁོད་འདུག་དབུ་མའི་ལམ་གྱི་དགོས་འདུན་ནང་བོད་ས་གནས་སྲིད་གཞུང་ཟེར་བའི་ཐ་སྙད་དེ་འཁོད་ཡོད་རེད་པས།