རྒྱ་གར་ནང་ཏོག་དབྱིབས་གཉན་རིམས་ཀྱི་ངོ་བོ་འགྱུར་བའི་ནད་འབུ་གསར་པ་ཞིག་མི་གྲངས་ ༡༠༠༠ ལྷག་འགོས་ཟིན་པ་དང་མི་གྲངས་ ༧ འདས་གྲོངས་སུ་ཕྱིན་ཡོད་པས་བོད་མིའི་སྒྲིག་འཛུགས་ནས་དེ་འབྲེལ་མི་མང་ལ་འབོད་སྐུལ་ཞིག་ཀྱང་གནང་འདུག
འདས་པའི་ཉིན་ཤས་རིང་རྒྱ་གར་ནང་ཏོག་དབྱིབས་གཉན་རིམས་ཀྱི་ངོ་བོ་འགྱུར་བའི་ནད་འབུ་གསར་པ་(NB.1.8.1 དང་ LF.7)ཁྱབ་གདལ་དུ་འགྲོ་མུས་ཡིན་འདུག་ལ། དེ་རིང་ཕྱི་ཚེས་ ༢༧ བར་རྒྱ་གར་ནང་ཏོག་དབྱིབས་རིམས་ནད་ཀྱིས་ན་བཞིན་པའི་ནད་པ་གྲངས་ ༡༠༡༠ ཡོད་ཅིང་། འདས་པའི་ཉིན་ཤས་རིང་ནད་པ་ ༧ འདས་གྲོངས་སུ་གྱུར་ཡོད་སྟབས། དབུས་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱིས་ཀྱང་བོད་མི་རྣམས་ཀྱིས་རིམས་ནད་ལ་དོགས་གཟོན་གནང་དགོས་པའི་འབོད་སྐུལ་གསལ་བསྒྲགས་ཤིག་ཀྱང་གནང་འདུག
དབུས་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་དེ་འབྲེལ་གསལ་བསྒྲགས་ནང་། དེ་སྔ་རྒྱ་ནག་ཝུ་ཧན་ནས་ཁྱབ་གདལ་བྱུང་བའི་ཏོག་དབྱིབས་གཉན་རིམས་ ༡༩ ཡི་རྣམ་པ་འགྱུར་བའི་ནད་འབུ་ད་ཆ་རྒྱ་ནག་དང་རྒྱ་གར་ས་གནས་ཁག་ཅིག ཨེ་ཤ་ཡའི་ཡུལ་གྲུ་ཁག་ཅིག་ནང་ཁྱབ་གདལ་འགྲོ་བཞིན་ཡོད་པར། ནད་གཞི་དེ་ཛ་དྲག་གྱི་གནས་སྟངས་མེད་ནའང་བོད་མིའི་འདུ་སྡོད་ས་གནས་ཁག་ནང་ཁྱབ་གདལ་མི་འགྲོ་བའི་སླད། དེ་སྔ་སྔོན་ཁབ་བརྒྱབ་མེད་པ་དང་། དུས་རྒྱུན་ནས་ན་ཚ་མང་དག་གིས་མནར་བཞིན་པ་ནད་གཅོང་ཅན། ལུས་ཟུངས་ནུས་པ་ཞན་པ་རྣམས་ལ་འགོས་སླ་བ་ཡོད་པའི་གནས་སྟངས་འདུག་པར་མི་མང་ཚང་མས་ཡིད་གཟབ་དང་ཐུགས་སྣང་དགོས་གལ། ནད་གཞིའི་ནད་རྟགས་དེ་བཞིན་དེ་སྔའི་ཏོག་དབྱིབས་གཉན་རིམས་ལྟར་གློ་རྒྱག་པ་དང་། ཚ་བ་འབར་བ། སྣ་ཁུག་འགག་པ། དབུགས་གཏང་རྒྱུར་དཀའ་ངལ་སོགས་ཡོད་འདུག་ན། མང་ཚོགས་ལ་མ་གོ་མ་ཐོས་མེད་པའི་གསལ་བསྒྲགས་ནན་པོ་གནང་དགོས་རྒྱུ་ཞེས་ཕེབས་སོང་བ་དེ་དོན་དགོངས་འཇགས་ཞུ། ཞེས་གསལ་འདུག
ད་ལྟ་རྒྱ་གར་ནང་རིམས་ནད་ན་བཞིན་པ་མི་གྲངས་ ༡༠༡༠ བྱུང་ཡོད་པའི་ཁྲོད། རྒྱ་གར་ལྷོ་རྒྱུད་ཀྱི་ཀེ་རེ་ལར་མི་གྲངས་ ༤༣༠ དང་། མ་ཧཱ་ར་ཤི་ཊ་ལ་ ༢༡༠། དེ་བཞིན་རྒྱ་གར་རྒྱལ་ས་ལྡི་ལི་ལ་ ༡༠༤ ཡོད་འདུག དེ་དག་ནི་རྒྱ་གར་ནང་ཏོག་དབྱིབས་རིམས་ནད་མཆེད་སའི་ས་ཚིགས་ལྟེ་བར་གྱུར་འདུག་ལ། རྒྱ་གར་དབུས་འཕྲོད་བསྟེན་དང་ནང་མི་བདེ་འཇགས་ལས་ཁུངས་(Ministry of Health and Family Welfare ) ཀྱི་གྲངས་ཐོ་ལྟར་ན། འདས་པའི་བདུན་ཕྲག་གཅིག་ལྷག་རིང་རྒྱ་གར་ནང་ཉུང་མཐར་ཡང་ཏོག་དབྱིབས་རིམས་ནད་ཀྱི་དབང་གིས་མི་གྲངས་ ༧ རྐྱེན་འདས་སུ་གྱུར་ཡོད་པ་རྣམས་ཀྱང་རྒན་འཁོགས་དང་ནད་པ་ཡིན་སྐོར་སོགས་གསལ་འདུག་ལ། རྒྱ་གར་ནང་རིམས་ནད་ཁྱབ་གདལ་དུ་མི་འགྲོ་སླད། མུ་མཐུད་དོགས་གཟོན་དང་སྔོན་འགོག་གི་ལས་དོན་རྣམས་གཉེར་དགོས་པའི་སྐུལ་མ་གནང་འདུག
འཛམ་གླིང་འཕྲོད་བསྟེན་སྒྲིག་འཛུགས་ལྟར་ན། ད་ལྟ་མཆེད་མུས་ཡིན་པའི་ངོ་བོ་གྱུར་བའི་ཏོག་དབྱིབས་རིམས་ནད་ཀྱིས་མིའི་ཚེ་སྲོག་ལ་ཉེན་ཁ་ཆུང་ནའང་། མིད་པ་ན་བ་དང་། གློག་རྒྱག་པ། ཚ་བ་རྒྱས་པ། རུས་ཚིགས་ན་བ། མགོ་ན་བ་སོགས་ཀྱི་ནད་རྟགས་མངོན་གྱི་ཡོད་སྐོར་གསལ་འདུག་ལ། ད་ལྟ་རིམས་ནད་དེ་རྒྱ་གར་དང་། སིངྒ་པུར། ཐའེ་ལེན་ཌི་གཙོས་ཨེ་ཤ་ཡའི་རྒྱལ་ཁབ་ཁག་ཅིག་ཏུ་མཆེད་མུས་ཡིན་པ་རེད།
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།
