རང་དབང་ལུང་པའི་ནང་བོད་ཀྱི་སྐད་ཡིག་དང་རིག་གཞུང་སོགས་མི་ཉམས་རྒྱུན་འཛིན་བྱ་དགོས་སྐོར་གསུངས།

སྲིད་སྐྱོང་སྤེན་པ་ཚེ་རིང་མཆོག་གིས་དབུ་མ་དང་རང་བཙན་གྱི་ལྟ་བ་གང་ཞིག་བཟུང་ཡང་བོད་སྤྱིའི་བདེ་དོན་ཐོག་ཚང་མས་ཁུར་མཉམ་ལེན་དང་ནུས་པ་མཉམ་སྤུངས་བྱ་དགོས་སྐོར་གསུངས་འདུག

ཕྱི་ཟླ་ ༤ ཚེས་ ༢༦ ནས་ཕྱི་ཟླ་ ༦ ཚེས་ ༨ བར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ཨ་རི་དང་། ཁེ་ན་ཌ། ཉི་ཧོང་བཅས་རྒྱལ་ཁབ་གསུམ་གྱི་ནང་གཞུང་འབྲེལ་ཕྱོགས་ཕེབས་གནང་སྟེ། ད་ལྟ་ཁེ་ན་ཌའི་ནང་དུ་འཚམས་གཟིགས་གནང་བཞིན་ཡོད་པ་ལྟར། ཟླ་འདིའི་ཕྱི་ཚེས་ ༢༥ ཉིན་སྲིད་སྐྱོང་སྤེན་པ་ཚེ་རིང་མཆོག་ཁེ་ན་ཌའི་གྲོང་ཁྱེར་ཝན་ཁུ་ཝར་དུ་འཚམས་གཟིགས་ཀྱིས་ས་གནས་བོད་མི་རྣམས་ལ་གསུང་བཤད་གནང་ཡོད་ཅིང་། སྐབས་དེར་སྲིད་སྐྱོང་མཆོག་གིས་དབུ་མ་དང་རང་བཙན་གྱི་ལྟ་བ་གང་ཞིག་བཟུང་ཡང་བོད་སྤྱིའི་བདེ་དོན་ཐོག་ཚང་མས་ཁུར་མཉམ་ལེན་དང་ནུས་པ་མཉམ་སྤུངས་བྱེད་དགོས་པ་དང་། རྒྱལ་སྤྱིའི་སྟེང་བོད་དེ་ལོ་རྒྱུས་ཐོག་ནས་རང་བཙན་རྒྱལ་ཁབ་ཅིག་ཡིན་པ་གསལ་བཀྲོལ་གྱིས་བོད་དོན་བདེན་པའི་འཐབ་རྩོད་ཐོག་ཤུགས་སྣོན་རྒྱག་དགོས་སྐོར་གསུངས་འདུག

དེ་ཡང་སྲིད་སྐྱོང་མཆོག་གིས་མི་མང་ལ་གསུང་བཤད་གནང་སྐབས། བཀའ་ཤག་སྐབས་ ༡༦ པའི་ངོས་ནས་གཉིས་སྨན་དབུ་མའི་ལམ་གྱི་སྲིད་བྱུས་ལ་གདེང་འཇོག་ཡོང་སླད་རྒྱལ་སྤྱིའི་སྟེང་ཞུ་གཏུག་རིམ་པ་བྱེད་བཞིན་པའི་ཁྲོད། ཉེ་ལམ་ཕྱི་ལོ་ ༢༠༢༤ ལོར་ཨ་རིའི་སྲིད་གཞུང་ནས་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་ཡིག་གཏན་འབེབས་གནང་ཡོད་པ་དང་། ཁྲིམས་ཡིག་ནང་བོད་རྒྱའི་དཀའ་རྙོག་དེ་ད་བར་སེལ་ཐུབ་མེད་པའི་རྒྱལ་སྤྱིའི་དཀའ་རྙོག་ཞིག་ལ་ངོས་འཛིན་གནང་སྟེ། ཞི་བའི་གྲོས་མོལ་ལམ་ནས་བོད་རྒྱའི་དཀའ་རྙོག་སེལ་རྒྱུར་རྒྱ་ནག་གཞུང་ནས་ཆ་རྐྱེན་གང་ཡང་མེད་པའི་ཐོག་ནས་བོད་རྒྱ་གྲོས་མོལ་བསྐྱར་མཐུད་དགོས་སྐོར་འཁོད་ཡོད་པ་མ་ཟད།  ཁྲིམས་ཡིག་དེ་བརྒྱུད་བོད་མིའི་རང་ཐག་རང་གཅོད་ཀྱི་ཐོབ་ཐང་ལ་རྒྱབ་སྐྱོར་དང་རྒྱ་ནག་གཞུང་གིས་བོད་དེ་གནའ་དུས་ནས་རྒྱ་ནག་གི་ཆ་ཤས་ཡིན་ཚུལ་བཤད་བཞིན་པ་དེར་ཁ་གཏད་གཅོག་རྒྱུར་ནུས་པ་ཆེ་རུ་གཏོང་གི་ཡོད་ཅེས་དང་། བཀའ་ཤག་སྐབས་ ༡༦ པས་འཛམ་གླིང་གང་སར་བཀྲམ་ནས་ཡོད་པའི་བོད་རིགས་གཞོན་སྐྱེས་ཚོའི་ངོས་ནས་རང་རེའི་འཐབ་རྩོད་ལ་དབུ་འོག་དཔུང་འདེགས་དང་གཞོན་སྐྱེས་འགོ་ཁྲིད་ཀྱི་ནུས་པ་སྐྱེད་སྲིང་། དེ་བཞིན་བོད་དོན་འཐབ་རྩོད་ཀྱི་ལས་འགུལ་རྒྱུན་མཐུད་ཡོང་རྒྱུར་དམིགས་ཏེ་དང་བླངས་བོད་དོན་ཞུ་གཏུག་ལས་འགུལ་དབུ་འཛུགས་གནང་ཡོད་པས་གཞོན་སྐྱེས་གང་མང་མཉམ་ཞུགས་དགོས་པའི་འབོད་སྐུལ་དང་། རྒྱ་ནག་གཞུང་གིས་བོད་ནང་རིག་གཞུང་རྩ་གཏོར་གྱི་སྲིད་བྱུས་ལག་བསྟར་བྱེད་བཞིན་པའི་ཁྲོད་བཙན་བྱོལ་རང་དབང་ལུང་པར་གནས་འཁོད་རང་རིགས་མང་ཚོགས་ནས་བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་། སྐད་ཡིག ངོ་བོ་དང་བཅས་པ་མི་ཉམས་རྒྱུན་འཛིན་དགོས་སྐོར་སོགས་གསུངས་འདུག

ཟླ་འདིའི་ཚེས་ ༢༤ ཉིན་སྲིད་སྐྱོང་སྤེན་པ་ཚེ་རིང་མཆོག་གིས་ཀེལ་གྷེ་རི་ (Calgary) ས་གནས་བོད་མི་དང་གཟའ་མཇུག་སློབ་གྲྭར་འཚམས་གཟིགས་གནང་ཡོད་ཅིང་། སྐབས་དེར་སྲིད་སྐྱོང་མཆོག་གིས་ཐོག་མར་བོད་མི་རྣམས་ཁེ་ན་ཌར་གནས་སྡོད་བྱེད་འགོ་ཚུགས་པའི་བྱུང་རིམ་དང་། མི་རབས་རྒན་པ་དང་བོད་རིགས་སྤྱི་མཐུན་ཚོགས་པས་འགན་ཁུར་ནས་བོད་པའི་སྤྱི་ཚོགས་རྒྱུན་སྐྱོང་ཐུབ་པའི་སྐོར། ༸གོང་ས་རྒྱལ་བ་རིན་པོ་ཆེ་མཆོག་དང་བོད་ནང་གི་བོད་མི་རྣམས་ཀྱི་བཀའ་དྲིན་ལ་བརྟེན་ནས། བོད་མི་རྣམས་སྐྱབས་བཅོལ་བ་གཞན་དང་མི་འདྲ་བ་ཞིག་ཆགས་ཐུབ་པ་དང་། བོད་ཀྱི་གནད་དོན་འཛམ་གླིང་སྟེང་གསོན་པོར་གནས་ཐུབ་པ། དེ་བཞིན་བཙན་བྱོལ་དུ་མང་གཙོའི་ཀ་བ་གསུམ་ལྡན་གྱི་སྒྲིག་འཛུགས་ཤིག་བཙུགས་ཐུབ་ཡོད་སྐོར་གསུངས་འདུག

དེ་བཞིན་ཁོང་གིས་དེང་སྐབས་མི་སྒེར་ཡར་རྒྱས་འགྲོ་བཞིན་པའི་སྐབས་སྤྱི་པ་ཉམས་ཆག་འགྲོ་བའི་རྣམ་པ་ཞིག་འབྱུང་གི་འདུག མི་མང་ཚང་མ་སོ་སོའི་རང་མགོ་ཐོན་ཏེ་ཕྱིན་པ་ཡིན་ན་སྤྱི་ཚོགས་ཀྱི་ཕྱག་ལས་གནང་མཁན་མེད་པ་ཆགས་ཏེ། བོད་མིའི་སྒྲིག་འཛུགས་ཀྱིས་རོགས་བྱེད་མི་ཐུབ་པའི་གནས་སྟངས་ཤིག་བྱུང་ཚེ། མི་མང་རང་ནས་འགན་འཁུར་གནང་དགོས། དེའི་ཆེད་དུ་ཕྲུ་གུ་རྣམས་ངེས་པར་དུ་གཟའ་མཇུག་སློབ་གྲྭར་འཇུག་དགོས་པ་དང་། དུས་ཐོག་ཏུ་དཔྱ་ཁྲལ་ཕུལ་དགོས། གཞན་ཡང་ས་གནས་རེ་རེར་སྤྱི་པའི་སྒྲིག་འཛུགས་ཚགས་ཚུད་པོ་དགོས་ཀྱི་ཡོད། ཅེས་དང་། བོད་མིའི་གྲངས་འབོར་ཉུང་དུ་འགྲོ་བཞིན་པའི་སྐོར་གསལ་སྟོན་དང་སྦྲགས། བོད་མིའི་སྒྲིག་འཛུགས་ཀྱིས་གཞིས་སྤོ་གཙོས་པའི་གཞིས་ཆགས་སྲ་བརྟན་གྱི་ལས་གཞིའི་སྐོར།  ཁ་ཐོར་གཞིས་ཆགས་ཀྱི་བོད་མིའི་འཚོ་བའི་དཀའ་ངལ་སོགས་ཀྱི་སྐོར་གསུངས་འདུག

གསར་འགོད་པ་བྱམས་པ་ཚེ་རིང་གིས་བོད་མིའི་སྒྲིག་འཛུགས་ཀྱི་དྲ་བ་སོགས་ནས་བསྡུ་སྒྲིག་བྱས།  རྩོམ་སྒྲིག་བྱེད་མཁན། སྐལ་བཟང་སྦྱིན་པ།