འདི་ལོའི་གོ་སྟོན་སྲུང་གཙི་དང་བསྟུན་བཞུགས་སྒར་དྷ་སར་བསྡུ་འཆར་ཡོད་པའི་༧རྒྱལ་ཡུམ་ཆེན་མོའི་རྗེས་དྲན་གསེར་གྱི་རྟགས་མའི་རྐང་སྤོལ་འགྲན་ཚོགས་ཐེངས་ ༣༠ པའི་ཐོག ༧གོང་ས་རྒྱལ་བ་རིན་པོ་ཆེ་མཆོག་གི་དགོངས་པ་བཞིན་ཁོར་ཡུག་སྲུང་སྐྱོབ་གནང་རྒྱུ་ཡིན་འདུག
རྒྱལ་ཡུམ་ཆེན་མོའི་རྐང་སྤོལ་འགྲན་སྡུར་ཐེངས་ ༣༠ པ་འཚོག་ལ་ཉེ། བོད་ཀྱི་དུས་བབ་ཀྱིས་པར་སྒྲིག་སྦྱོར་བྱས། ༢༠༢༥།༥།༢༨
འདི་ལོའི་ཕྱི་ཟླ་ ༦ ཚེས་ ༡ ནས་ ༡༡ བར་ཉིན་གྲངས་བཅུ་གཅིག་རིང་༧གོང་ས་རྒྱལ་བ་རིན་པོ་ཆེ་མཆོག་ཕྱི་ལུགས་ལྟར་དགུང་གྲངས་ ༩༠ ཕེབས་པའི་གོ་སྟོན་དང་བསྟུན། ༧རྒྱལ་ཡུམ་ཆེན་མོའི་རྗེས་དྲན་གསེར་གྱི་རྟགས་མའི་རྐང་སྤོལ་འགྲན་ཚོགས་ཐེངས་ ༣༠ པ་དེ་བཞུགས་སྒར་དྷ་སར་འཚོག་རྒྱུ་ཡིན་ཞིང་། འདི་ལོའི་རྩེད་འགྲན་ཁྲོད་རུ་ཁག་བཅུ་དྲུག་གིས་མཉམ་ཞུགས་བྱ་རྒྱུ་ཡིན་འདུག
དེའི་ཐད་བོད་རྒྱལ་ཡོངས་རྩེད་རིགས་ཚོགས་པའི་ཚོགས་གཙོ་བྱང་ཆུབ་རྒྱལ་མཚན་ལགས་ཀྱིས་ཁ་པར་བརྒྱུད་འདི་གའི་གསར་འགོད་པར། འདི་ལོའི་རྒྱལ་ཡུམ་ཆེན་མོ་རྗེས་དྲན་གྱི་རྐང་སྤོལ་འགྲན་སྡུར་ཐེངས་སུམ་ཅུ་པ་ཆགས་ཡོད་ཅིང་། འདི་ལོར་རུ་ཁག་བཅུ་དྲུག་གིས་མཉམ་ཞུགས་གནང་གི་ཡོད་པའི་ཁྲོད། དུས་ཡུན་རིང་པོར་འཛུལ་ཞུགས་གནང་མ་ཐུབ་པའི་རུ་ཁག་ཁག་ཅིག་གིས་འཛུལ་ཞུགས་གནང་གི་ཡོད་ལ། དེ་བཞིན་འདི་ལོར་ལྷོ་ཕྱོགས་ཀྱི་གཞིས་ཆགས་ཆེ་ཁག་ལྔ་ནས་བཞི་ཡི་རུ་ཁག་གིས་ཀྱང་འཛུལ་ཞུགས་གནང་གི་ཡོད། འདི་ལོའི་རྩེད་འགྲན་དེ་རྒྱ་གར་རྒྱལ་ཡོངས་རྐང་སྤོལ་མཐུན་ཚོགས་(AIFF)ཀྱིས་ཆོག་མཆན་རང་བཞིན་ལྡན་པའི་རྐང་སྤོལ་གྱི་འགྲན་ཚོགས་དམིགས་བསལ་ཞིག་ཡིན། ཞེས་བརྗོད་བྱུང་།
ཡང་ཁོང་གིས། ལོ་ལྟར་རྒྱལ་ཡུམ་ཆེན་མོའི་རྐང་སྤོལ་རྩེད་འགྲན་པ་རྣམས་ཀྱིས་ཆུ་འཐུང་ནས་འགྱིག་དམ་གྱིས་ཁོར་ཡུག་སྦག་བཙོག་བཟོ་ཡི་ཡོད་སྟབས། ༧གོང་ས་རྒྱལ་བ་རིན་པོ་ཆེ་མཆོག་གི་ཁོར་ཡུག་སྲུང་སྐྱོབ་དང་བདག་གཅེས་དགོས་པའི་དགོངས་བཞེད་བཞིན། ༧རྒྱལ་ཡུམ་ཆེན་མོའི་རྐང་སྤོལ་རྩེད་འགྲན་འདིའི་ཐོག་ཏུ་རྐང་སྤོལ་བ་རྣམས་ལ་ཆེད་དུ་བཟོས་པའི་ཆུའི་འགྱིག་དམ་རེ་རེ་སྤྲད་ནས། ཁོར་ཡུག་སྲུང་སྐྱོབ་གང་ཐུབ་བྱ་རྒྱུ་དང་། རྗེས་མ་ཡང་རྩེད་འགྲན་གང་དུ་བསྡུས་རུང་། ཁོར་ཡུག་སྲུང་སྐྱོབ་ཀྱི་ལས་དོན་ལ་དོ་སྣང་བྱ་རྒྱུའི་རེ་བ་ཡོད་སྐོར་སོགས་བརྗོད་བྱུང་།
བོད་རྒྱལ་ཡོངས་རྩེད་རིགས་ཚོགས་པས་གོ་སྒྲིག་གནང་བཞིན་པའི་རྒྱལ་ཡུམ་ཆེན་མོའི་དྲན་རྟེན་གསེར་གྱི་གཟེངས་རྟགས་རྐང་སྤོལ་འགྲན་སྡུར་ནི། ཕྱི་ལོ་ ༡༩༨༡ ལོར་བོད་ཕྲུག་ཁྱིམ་སྡེའི་རྩིས་དཔོན་ཟུར་པ་ཇོ་བོ་ཚེ་རིང་ལགས་ཀྱིས་གསར་འཛུགས་གནང་ཡོད་པ་དང་། རྩེད་འགྲན་འདི་ལོ་ལྟར་ཚོགས་ཀྱི་ཡོད་པ་རེད། འོན་ཀྱང་། ཕྱི་ལོ་ ༢༠༢༠ ལོར་ཏོག་དབྱིབས་གཉན་རིམས་ཀྱི་རྐྱེན་གྱིས་རྒྱལ་ཡུམ་ཆེན་མོའི་དྲན་རྟེན་གསེར་གྱི་གཟེངས་རྟགས་རྐང་སྤོལ་འགྲན་སྡུར་འཚོགས་ཐུབ་མེད་ཅིང་། རྒྱལ་ཡུམ་ཆེན་མོའི་རྩེད་འགྲན་དེ་ཕྱི་ལོ་ ༢༠༡༢ ལོར་དྷ་རམ་ས་ལ་དང་ ༢༠༡༣ ལོར་ཧོན་སུར་རབ་རྒྱས་གླིང་། ༢༠༡༤ ལོར་དོན་གྲུབ་གླིང་(Clement town)། ༢༠༡༥ ལོར་དྷ་རམ་ས་ལ། ༢༠༡༦ ལོར་མོན་གྷོ། ༢༠༡༧ ལོར་ཀོ་ལི་གྷལ་དོན་ལྡན་གླིང་། ༢༠༡༨ ལོར་སྦེལ་ཀོབ་བདེ་སླར་གཞིས་ཆགས། ༢༠༡༩ ལོར་དྷ་རམ་ས་ལ། ༢༠༢༡ ལོར་དོན་གྲུབ་གླིང་དང་། ཕྱི་ལོ་ ༢༠༢༢ ལོར་སྤོན་ཊ་ཆོལ་གསུམ་གཞིས་ཆགས། ཕྱི་ལོ་ ༢༠༢༣ དང་ ༢༠༢༤ བཅས་སུ་དྷ་ས་དང་ཀོ་ལི་གྷལ་བོད་མིའི་གཞིས་ཆགས་བཅས་སུ་འཚོགས་ཡོད།
བོད་རྒྱལ་ཡོངས་རྩེད་རིགས་ཚོགས་པའི་དྲ་རྒྱར་གཞིགས་ན། ད་བར་རྒྱལ་ཡུམ་ཆེན་མོའི་རྩེད་འགྲན་ཐེངས་ ༢༩ བྱས་པའི་ཁྲོད། ཕྱི་ལོ་ ༢༠༡༥ ལོར་མོན་གྷོ་འདོད་རྒུ་གླིང་རུ་ཁག་དང་། ༢༠༡༦ ལོར་ཊི་ཌི་ཨེལ་སྦེལ་ཀོབ་རུ་ཁག ༢༠༡༧ ལོར་བཀྲིས་གླིང་ཧི་མ་ལ་ཡ་རུ་ཁག ༢༠༡༨ དང་ ༢༠༡༩ ལོར་མོན་གྷོ་འདོད་རྒུ་གླིང་རུ་ཁག ༢༠༢༡ ལོར་སིམ་ལ་རུ་ཁག ༢༠༢༢ ལོར་དོན་གྲུབ་གླིང་རུ་ཁག ༢༠༢༣ ལོར་དྷ་ས་གཅིག་སྒྲིལ་རུ་ཁག་དང་ཕྱི་ལོ་ ༢༠༢༤ ལོར་མོན་གྷོ་འདོད་རྒུ་གླིང་རུ་ཁག་ལ་རྒྱལ་ཁ་ཐོབ་ཡོད་པ་རེད།
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
