ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས་ཀྱིས་རྒྱ་ནག་གཞུང་གིས་བོད་ནང་དུ་ནོར་འཁྲུལ་ཅན་གྱི་སྲིད་ཇུས་ལག་བསྟར་བྱེད་བཞིན་པ་དེ་དག་ལ་ཉམས་ཞིབ་བྱས་ཏེ་རྒྱལ་སྤྱིའི་སྟེང་ཐེར་འདོན་བྱེད་དགོས་ལ་ཐེར་འདོན་བྱ་རྒྱུ་ནི་ཧ་ཅང་གི་གལ་ཆེན་པོ་ཡིན་སྐོར་གསུངས།
དེ་རིང་སྔ་དྲོའི་ཆུ་ཚོད་ ༡༠།༣༠ སྟེང་བོད་ཀྱི་སྲིད་བྱུས་ཉམས་ཞིབ་ཁང་དུ། ཕྱི་དྲིལ་ཁྱབ་ཁོངས་བོད་ཀྱི་སྲིད་བྱུས་ཉམས་ཞིབ་ཁང་གིས་བོད་ནང་ས་བབ་ཤིན་ཏུ་མཐོ་བའི་སྐྱེ་ཁམས་གནས་སྤོའི་ལས་གཞི་ཞེས་པའི་ཉམས་ཞིབ་སྙན་ཐོ་ཞིག་འདོན་སྤེལ་དང་འབྲེལ་བགྲོ་གླེང་འཚོགས་སོང་། སྐབས་དེར་སྐུ་མགྲོན་གཙོ་བོ་ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས་དང་། བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས། སྤྱི་འཐུས་དགེ་བཤེས་ཨ་ཀྲོང་རིན་ཆེན་རྒྱལ་མཚན་ལགས། སྲིད་བྱུས་ཉམས་ཞིབ་ཁང་གི་འགན་འཛིན་གཞོན་པ་ཛམ་ལྷ་བསྟན་པ་རྒྱལ་མཚན་ལགས། ནོར་གླིང་མཐོ་སློབ་ཀྱི་རྒྱ་ཡིག་དགེ་རྒན་རྒྱལ་མཚན་ཆོས་སྐྱིད་ལགས། སྲིད་བྱུས་ཉམས་ཞིབ་ཁང་གི་ཉམས་ཞིབ་པ་འབུམ་རམས་པ་ཚེ་དབང་རྡོ་རྗེ་ལགས། ཉམས་ཞིབ་པ་བློ་བཟང་བཀྲ་ཤིས་ལགས་དང་ཉམས་ཞིབ་ཁང་གི་ལས་བྱེད་བཅས་འཛོམས་འདུག
ཐོག་མར་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས་ཀྱིས། དེ་སྔ་༧གོང་ས་རྒྱལ་བ་རིན་པོ་ཆེ་མཆོག་གིས། ཁོར་ཡུག་གཏོར་བརླག་ཕྱིན་པ་ཡིན་ན། བོད་མི་རིགས་འཚོ་གནས་བྱ་རྒྱུ་མེད་པར་ཆགས་ཀྱི་ཡོད་སྟབས། བོད་ཀྱི་ཁོར་ཡུག་དེ་གལ་ཆེ་ཤོས་ཡིན། ཞེས་གསུངས་ཡོད་པ་རེད། ང་ཚོས་ཁོར་ཡུག་སྲུང་སྐྱོབ་དང་འབྲེལ་ནས་གསར་འགོད་གསལ་བསྒྲགས་སོགས་བྱེད་ཀྱི་ཡོད། ད་ལན་སྙན་ཐོ་བཏོན་ཏེ་མི་ཚང་མས་དེབ་ནང་ནས་གནས་ཚུལ་ཤེས་རྟོགས་ཐུབ་པ་དང་། ཉམས་ཞིབ་པའི་ནུས་པ་སྟོན་ཐུབ་པ། དེ་བཞིན་མུ་མཐུད་དུ་སྙན་ཐོ་འདོན་སྤེལ་དང་། ཁོར་ཡུག་དེ་གལ་ཆེན་ཡིན་པ་མ་ཟད། དེའི་ཐོག་དོ་སྣང་ཡོང་རྒྱུར་དམིགས་པ་ཞིག་རེད། ཅེས་གསུངས་སོང་།
སྙན་ཐོ་དེའི་རྩོམ་པ་པོ་འབུམ་རམས་པ་ཚེ་དབང་རྡོ་རྗེ་ལགས་ཀྱིས་སྙན་ཐོ་བྲིས་པའི་བརྒྱུད་རིམ་དང་། རྒྱབ་ལྗོངས་ཀྱི་ལོ་རྒྱུས། གནས་ཚུལ་མཁོ་སྒྲུབ་གང་འདྲ་བྱས་ཡོད་པའི་སྐོར། རྒྱ་ནག་གི་བོད་ནང་དུ་གནས་སྤོའི་ལས་གཞི་སྤེལ་བཞིན་པའི་དངོས་ཡོད་གནས་སྟངས་སོགས་ངོ་སྤྲོད་གནང་སོང་། དེ་རྗེས་ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས་ཀྱིས། ད་ལན་བོད་ནང་ས་བབ་ཤིན་ཏུ་མཐོ་བའི་སྐྱེ་ཁམས་གནས་སྤོའི་ལས་གཞི་ཞེས་པའི་ཉམས་ཞིབ་སྙན་ཐོ་བཏོན་པར་ཉམས་ཞིབ་པ་རྣམ་པ་དང་། སློབ་སྟོན་གནང་མཁན། ཕྱག་རོགས་གནང་མཁན་རྣམས་ལ་དགའ་བསུ་ཞུ་རྒྱུ་ཡིན། ཉམས་ཞིབ་བྱེད་པར་དེབ་མང་པོ་ཀློག་དགོས་པ་དང་། དུས་ཚོད་མང་པོ་གཏོང་དགོས་པ། གནས་ཚུལ་མང་པོ་མཁོ་སྒྲུབ་བྱེད་དགོས་ཀྱི་ཡོད་པ་སོགས་ཉམས་ཞིབ་བྱ་རྒྱུ་ཧ་ཅང་གི་ཁག་པོ་རེད། བཀའ་ཤག་གི་དགོངས་པ་ལྟར་བོད་ནང་དུ་རྒྱ་ནག་གཞུང་གིས་ནོར་འཁྲུལ་ཅན་གྱི་སྲིད་ཇུས་ལག་བསྟར་བྱེད་བཞིན་པ་དེ་དག་ཉམས་ཞིབ་བྱས་ཏེ་རྒྱལ་སྤྱིའི་སྟེང་ཐེར་འདོན་བྱེད་དགོས་ལ། ཐེར་འདོན་བྱ་རྒྱུ་ནི་ཧ་ཅང་གི་གལ་ཆེན་པོ་རེད། སྙན་ཐོ་བཏོན་པ་འདི་བསྐྱར་ཞིབ་དང་ཁ་སྣོན་བྱས་ཏེ་མ་འོངས་པར་དབྱིན་ཡིག་དང་། རྒྱ་ཡིག་སོགས་སྐད་ཡིག་གཞན་གྱི་ནང་འདོན་སྤེལ་གནང་རྒྱུ་དེ་གལ་ཆེན་པོ་ཡིན་ལ། དེའི་ཐོག་འབད་བརྩོན་གནང་རོགས་གནང་ཞུ་རྒྱུ་དང་། སྐད་ཡིག་གཞན་པའི་ནང་སྙན་ཐོ་འདོན་སྤེལ་བྱེད་པ་དེས་རྒྱལ་སྤྱིའི་སྟེང་ཁྱབ་སྤེལ་མང་དུ་འགྲོ་ཡི་རེད་བསམ་གྱི་འདུག ཅེས་གསུངས་སོང་།
སྙན་ཐོ་འདོན་སྤེལ་དང་འབྲེལ་ནས་ཉམས་ཞིབ་པ་བློ་བཟང་བཀྲ་ཤིས་ལགས་ཀྱིས། སྙན་ཐོ་འདིའི་དམིགས་ཡུལ་གཙོ་བོ་ནི། སྐྱེ་ཁམས་གནས་སྤོའི་ལས་གཞི་འདིས་བོད་ཀྱི་ངོ་བོ་དང་མི་རིགས་ལ་གནོད་སྐྱོན་ཇི་ཙམ་ཡོད་མེད་དང་། གནས་སྤོའི་ལས་གཞི་ལ་བརྟེན་ནས་བོད་ནང་གི་འབྲོག་པ་རྣམས་ལ་དཀའ་ངལ་གང་དག་འཕྲད་ཀྱི་ཡོད་པ། རྒྱལ་སྤྱིའི་ཚོགས་སྡེ་ཁག་གིས་གནད་དོན་དེ་དང་འབྲེལ་ནས་རྒྱ་ནག་གཞུང་ལ་གནོན་ཤུགས་སྤྲད་དེ། ལས་གཞི་དེ་གང་མགྱོགས་མཚམས་འཇོག་ཡོང་བར་དམིགས་པ་ཞིག་རེད། ད་དུང་སྙན་ཐོ་འདིའི་ནང་རྒྱ་ནག་གཞུང་གིས་བོད་ནང་མི་སེར་སྤེལ་ཡུལ་གྱི་སྲིད་ཇུས་ལག་བསྟར་བྱེད་བཞིན་པའི་སྐོར་དང་། ད་ལྟའི་སྐྱེ་ཁམས་གནས་སྤོའི་ལས་གཞི་ལ་བརྟེན་ནས། ཕྱི་ལོ་ ༢༠༡༩ ནས་ ༢༠༢༥ བར་ནག་ཆུའི་རྫོང་ཁག་གསུམ་ནས་འབྲོག་པ་ ༣༦༠༠༠ ཙམ་ལྷོ་ཁའི་སྲིན་བུ་རིར་གནས་སྤོ་ཟིན་པ་རྣམས་ཀྱི་འཚོ་བ་སྐྱེལ་སྟངས་ཐད་དཀའ་ངལ་ཅི་ཞིག་བྱུང་གི་ཡོད་པ་སོགས་གསལ་སྟོན་བྱས་ཡོད། ཅེས་འགྲེལ་བརྗོད་གནང་སོང་།
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
