རྒྱལ་སྤྱིའི་ཐོག་གི་བོད་དོན་དང་འབྲེལ་བའི་ཚོགས་པ་ཁག་ ༡༤༥ ནས་བལ་ཡུལ་གྱི་ཀ་ཐུ་མན་ཌུ་གློག་བརྙན་དུས་སྟོན་ཐོག་རྒྱ་ནག་གཞུང་གི་དྲིལ་བསྒྲགས་གློག་བརྙན་ཕྱིར་འཐེན་བྱ་དགོས་པ་དང་། བོད་ཀྱི་ཚབ་ཏུ་ཞིས་ཙང་བེད་སྤྱོད་མི་གཏོང་བའི་ཡོངས་ཁྱབ་བསྒྲགས་གཏམ་སྤེལ་དགོས་པའི་འབོད་སྐུལ་བྱས་འདུག
ཟླ་འདིའི་ཕྱི་ཚེས་ ༢༨ ནས་ཕྱི་ཟླ་ ༦ ཚེས་ ༡ བར་བལ་ཡུལ་གྱི་རྒྱལ་ས་ཀ་ཐི་མ་ན་ཌུ་རུ། ཀ་ཐུ་མན་ཌུ་རྒྱལ་སྤྱིའི་རི་བོ་གློག་བརྙན་དུས་སྟོན་ (Kathmandu International Mountain Film Festival) ཐེངས་ ༢༢ འཚོགས་བཞིན་ཡོད་ཅིང་། ཐེངས་འདིའི་གློག་བརྙན་དུས་སྟོན་ཐོག་ཞིས་ཙང་པཱ་ནོ་རཱ་མཱ་(Xizang Panorama) ཟེེར་བའི་རྒྱ་ནག་གཞུང་གི་དྲིལ་བསྒྲགས་ཀྱི་གློག་བརྙན་དྲུག་སྟོན་འཆར་ཡོད་པས། ཁ་སང་རྒྱལ་སྤྱིའི་ཐོག་གི་བོད་དོན་དང་འབྲེལ་བའི་ཚོགས་པ་ཁག་ ༡༤༥ ནས་རྒྱ་ནག་གཞུང་གི་དྲིལ་བསྒྲགས་གློག་བརྙན་དེ་དག་གློག་བརྙན་དུས་སྟོན་ལས་གང་མགྱོགས་ཕྱིར་འཐེན་བྱ་དགོས་པའི་འབོད་སྐུལ་ཞུས་འདུག
དེའི་སྐོར་ལ་རྒྱལ་སྤྱིའི་བོད་དོན་འབྲེལ་མཐུད་ཁང་གི་དྲ་ལམ་ཐོག་རྒྱལ་སྤྱིའི་བོད་དོན་དང་འབྲེལ་བའི་ཚོགས་པ་ཁག་གིས་བསྒྲགས་གཏམ་ཞིག་སྤེལ་ཡོད་པའི་ནང་། ཀ་ཐུ་མན་ཌུ་རྒྱལ་སྤྱིའི་རི་བོ་གློག་བརྙན་དུས་སྟོན་ཁྲོད་ཞིས་ཙང་པཱ་ནོ་རཱ་མཱ་ཞེས་བོད་ལ་ཞིས་ཙང་ཟེར་བའི་ནོར་འཁྲུལ་ཅན་གྱི་མིང་བཏགས་ཡོད། ཐ་སྙད་དེ་ནི་རྒྱ་ནག་གཞུང་གིས་བོད་བཙན་བཟུང་བྱས་ཏེ་ཆབ་སྲིད་ཀྱི་ངོ་བོ་མཚོན་ཆེད་བེད་སྤྱོད་བྱེད་བཞིན་ཡོད་པ་དང་། བོད་ཀྱི་ལོ་རྒྱུས་དང་རིག་གཞུང་གི་ངོ་བོ་རྩ་གཏོར་གཏོང་བྱེད་ཀྱི་ལག་ཆ་གཙོ་བོ་ཞིག་ཡིན། གློག་བརྙན་དུས་སྟོན་ནང་བོད་ལ་ཞིས་ཙང་ཟེར་བའི་ཐ་སྙད་བེད་སྤྱོད་བྱས་ཡོད་པ་མ་ཟད། རྒྱ་གཞུང་གིས་བོད་ནང་གི་གནས་སྟངས་འཁྱོག་བཤད་བྱས་པའི་དྲིལ་བསྒྲགས་ཀྱི་གློག་བརྙན་སྟོན་གྱི་ཡོད་ལ། དེའི་ནང་གི་གློག་བརྙན་སྤུ་བདག་གི་ལམ་བུ་ (life of buda ) ཟེར་བས་རྒྱ་གཞུང་གིས་བོད་བཙན་འཛུལ་བྱས་པའི་ཚབ་ཏུ་ཞི་བའི་བཅིངས་གྲོལ་བྱས་ཚུལ་དྲིལ་བསྒྲགས་བྱེད་ཀྱི་ཡོད་པས། འགྲེམས་སྟོན་འདི་དག་རྫུན་མ་ཡིན་པ་མ་ཟད་ཉེན་ཁ་ཆེན་པོ་ཞིག་ཀྱང་རེད། ཀ་ཐུ་མན་ཌུ་རྒྱལ་སྤྱིའི་རི་བོ་གློག་བརྙན་དུས་སྟོན་གྱི་སློབ་གསོའི་ལས་གཞི་དང་འགལ་ཟླ་གྱུར་ཡོད། ཅེས་འཁོད་འདུག
ཡང་བསྒྲགས་གཏམ་དེའི་ནང་། ཕྱི་ལོ་ ༡༩༥༠ ལོ་ནས་བཟུང་རྒྱ་ནག་གིས་བོད་ལ་བཙན་བཟུང་བྱས་ཏེ་དྲག་གནོན་བྱས་རྐྱེན། རྒྱལ་སྤྱིའི་འགྲོ་བ་མིའི་ཐོབ་ཐང་སྲུང་སྐྱོབ་ཚོགས་སྡེ་ཁག་གིས་བོད་ནི་འཛམ་གླིང་ཐོག་གི་ཆབ་སྲིད་དང་འགྲོ་བ་མིའི་ཐོབ་ཐང་མེད་པའི་ས་ཁུལ་དུ་མིང་བཏོན་ཡོད་ལ། ལོ་ ༧༠ རིང་རྒྱ་ནག་གཞུང་གིས་བཙན་གནོན་འོག་བོད་ཀྱི་སྐད་ཡིག་དང་རིག་གཞུང་གི་ངོ་བོ་སོགས་རྩ་གཏོར་བཏང་ཡོད་པ་མ་ཟད། བོད་ཀྱི་བྱིས་པ་ས་ཡ་གཅིག་ཙམ་རང་ཉིད་ཀྱི་ཁྱིམ་དང་ཕ་མར་ཁ་བྲལ་དུ་བཏང་སྟེ། རྒྱ་ནག་གི་བཅའ་སྡོད་སློབ་གྲྭའི་ནང་དུ་བཙན་འཇུག་བྱས་ཏེ་བོད་མི་རིགས་རྩ་གཏོར་གཏོང་བཞིན་ཡོད། ཞིས་ཙང་པཱ་ནོ་རཱ་མ་ཟེར་བ་ནི་བོད་ཀྱི་སྐོར་ལ་གློག་བརྙན་བསྟན་པ་ཙམ་མིན་པར། དེ་ནི་རྒྱ་གཞུང་གིས་བོད་མི་རྣམས་ལ་དྲག་གནོན་དང་བོད་ཀྱི་ལོ་རྒྱུས་ནག་གསུབ་གཏོང་བར་དམིགས་པའི་གཏམ་རྒྱུད་ཀྱི་མཚོན་ཆ་འགྲེམས་སྟོན་བྱེད་བཞིན་པ་ཞིག་ཏུ་གྱུར་ཡོད། རྒྱ་ནག་གི་འཁྱོག་བཤད་དྲིལ་བསྒྲགས་ལ་སྡིངས་ཆ་བསྐྲུན་པ་ནི་བལ་ཡུལ་རྒྱལ་སྤྱིའི་གློག་བརྙན་དུས་སྟོན་གྱིས་རྒྱ་ནག་གཞུང་གིས་བོད་ནང་རིག་གཞུང་རྩ་གཏོར་བྱེད་པར་རྒྱབ་སྐྱོར་བྱེད་ཀྱི་ཡོད་པ་དང་། གློག་བརྙན་དུས་སྟོན་ནང་ཞིས་ཙང་པཱ་ནོ་རཱ་མཱ་ཟེར་བའི་གློག་བརྙན་འགྲེམས་སྟོན་དང་འབྲེལ་བའི་ལས་རིགས་ཡོངས་རྫོངས་ཕྱིར་འཐེན་བྱེད་དགོས་པ་དང་། བོད་ཀྱི་ཚབ་ཏུ་རྒྱ་གཞུང་གིས་དྲིལ་བསྒྲགས་བྱེད་བཞིན་པའི་ཞིས་ཙང་བེད་སྤྱོད་མི་བྱེད་པའི་ཡོངས་ཁྱབ་བསྒྲགས་གཏམ་སྤེལ་དགོས་པའི་འབོད་སྐུལ་གནང་ཡོད་འདུག
ཀ་ཐུ་མན་ཌུ་རི་བོ་རྒྱལ་སྤྱིའི་གློག་བརྙན་དུས་སྟོན་ཐེངས་ ༢༢ པའི་དྲ་ལམ་ཐོག་ཞིས་ཙང་པཱ་ནོ་རཱ་མ་ཞེས་པའི་ནང་། གསའ་དང་གྲོགས་པོ།་(Snow Leopards and Friends)དང་། བོད་ཀྱི་རི་སྐྱེས་སྲོག་ཆགས། (Wild Wonders in Xizang ) ང་གཙང་པོའི་མགོ་ཁུངས་སུ་ཡོད། ( Where the Mighty Rivers Begin ) བོད་ནང་གི་ཉིན་མཚན། (Days and Nights in Xizang)། ས་མཐོའི་སྙན་དབྱངས།( Youthful Xizang )། དེ་བཞིན་སྤུ་བདག་གི་ལམ་བུ།(Life of Buda )བཅས་བོད་རང་སྐྱོང་ལྗོངས་ཟེར་བའི་ནང་རྒྱ་ནག་གི་འཁྱོག་བཤད་དྲིལ་བསྒྲགས་གློག་བརྙན་དྲུག་སྟོན་རྒྱུ་ཡིན་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
