རྒྱ་ནག་གཞུང་གིས་སློབ་གྲྭ་ཆུང་འབྲིང་གི་སློབ་ཚན་དང་སྤྱི་ཚོགས་གླེང་སྟེགས་སོགས་ཀྱི་ནང་དམར་ཤོག་ཚོགས་པར་དམའ་འབེབས་དང་རྒྱལ་ཁབ་ཁ་བྲལ་གཏོང་བ་ཟེར་བའི་ནང་དོན་ཅན་ཡོད་མེད་ཞིབ་བཤེར་བྱ་རྒྱུ་ཡིན་འདུག
ཟླ་འདིའི་ཕྱི་ཚེས་ ༢༧ ཉིན་རྒྱ་ནག་དབུས་སློབ་གསོ་ཁང་གིས་ཚད་ལྡན་མིན་པའི་སློབ་གཉེར་བྱ་སྤྱོད་གཙང་བཤེར་བཅོས་སྒྲིག་བྱ་རྒྱུ་ཟེར་བའི་དོན་ཚན་བཅུ་དྲུག་ཅན་ཞིག་ཡོངས་ཁྱབ་གསལ་བསྒྲགས་བྱས་ཏེ། རྒྱ་ནག་དམར་ཤོག་ཚོགས་པ་དང་སྤྱི་ཚོགས་རིང་ལུགས་ལ་ངོ་རྒོལ་བྱེད་པ་དང་། རྒྱལ་ཁབ་ཁ་བྲལ་གཏོང་བ། དམར་ཤོག་ཚོགས་པའི་གཟུགས་བརྙན་དང་རྒྱལ་ཁབ་ཀྱི་མགོ་ཁྲིད་ལ་དམའ་འབེབས་གཏོང་བའི་སློབ་ཚན་དང་། གླེང་སྟེགས་འཆད་ཁྲིད། རྒྱུགས་ཤོག་སོགས་ཀྱི་ནང་ནང་དོན་དེ་རིགས་ཡོད་མེད་ཞིབ་བཤེར་གཏན་འགོག་བྱ་རྒྱུ་ཡིན་སྐོར་བསྒྲགས་འདུག
དབུས་སློབ་གསོ་ཁང་གི་གསལ་བསྒྲགས་དེའི་མགོ་རུ་མི་ཆོག་པ་ཁག་མང་པོ་བཀོད་ཡོད་པའི་ནང་། རྒྱ་ནག་དམར་ཤོག་ཚོགས་པ་དང་སྤྱི་ཚོགས་རིང་ལུགས་ལ་ངོ་རྒོལ་བྱེད་པ་དང་། དམར་ཤོག་ཚོགས་པ་དང་རྒྱལ་ཁབ་ཀྱི་གཟུགས་བརྙན་ལ་དམའ་འབེབས་གཏོང་བ། རྒྱལ་ཁབ་ཀྱི་མགོ་ཁྲིད་ལ་དམའ་འབེབས་གཏོང་བ། རྒྱལ་ཁབ་ཁ་བྲལ་གཏོང་བ། ལོ་རྒྱུས་འཁྱོག་བཤད་བྱེད་པ། ནོར་འཁྲུལ་གྱི་ལྟ་ཚུལ་ཁྱབ་སྤེལ་བྱེད་རིགས་སོགས་གཏན་འགོག་བྱེད་དགོས་པ་དང་། རྒྱལ་ཁབ་ཀྱི་སློབ་ཚན་གཏན་འབེབས་དང་འགལ་ནས་སློབ་ཚན་གྱི་ནང་དོན་གང་འདོད་ལེགས་སྒྲིག་དང་གསབ་འཕྲི་བྱེད་མི་ཆོག་པ་དང་། ཚད་ལས་བརྒལ་ནས་སྔོན་ལ་སློབ་ཁྲིད་བྱེད་པ་དང་། ཀུན་སྤྱོད། ལུས་རྩལ། མཛེས་རིག་སློབ་གསོ། ངལ་རྩོལ་སློབ་གསོ། ཕྱོགས་བསྡུས་ལག་ལེན་བྱེད་སྒོ་སོགས་ཀྱི་སློབ་ཚན་གྱི་དུས་ཚོད་བཙན་གྱིས་ལེན་མི་ཆོག སློབ་གསོ་དང་འབྲེལ་བའི་སྡེ་ཁག་ཚང་མས་གཏན་འབེབས་བྱས་པའི་དུས་ཡུན་ལས་བརྒལ་བའི་ལས་འཆར་བཀོད་སྒྲིག་དང་བསྐྱར་ཟློས་བྱེད་ཆོག་གི་མེད་སྐོར་སོགས་གསལ་འདུག
སློབ་སྦྱོང་གི་དུས་ཚོད་དང་འབྲེལ་ནས་མི་ཆོག་པ་ཁག་ཅིག་བྲིས་ཡོད་པའི་ནང་། སློབ་གྲྭ་སྔ་སྣུར་དང་ཕྱིར་འགྱངས་བྱེད་མི་ཆོག དུས་ཆེན་དང་དབྱར་དགུན་གུང་གསེང་དུ་གསབ་ཁྲིད་བྱེད་མི་ཆོག་པ། དེ་བཞིན་དམའ་འབྲིང་དང་སློབ་ཆུང་གི་སློབ་མ་འདེམས་སྒྲུག་བྱེད་པར་ཡིག་རྒྱུགས་དང་། སྤྱི་ཚོགས་གསོ་སྦྱོང་གི་རྒྱུགས་འབྲས་སོགས་སློབ་བསྡུའི་གཞི་འཛིན་སར་བྱེད་པ་རྣམས་གཏན་འགོག་དགོས་པ་དང་། ཡིག་རྒྱུགས་ལ་གཞིགས་ནས་སློབ་གྲྭར་དཔྱད་ཞིབ་དང་ཨང་རིམ་དགར་བ། དགེ་རྒན་ལ་ཨང་རིམ་དང་བྱ་དགའ་ཆད་གཅོད་བྱེད་མི་ཆོག
རྒྱ་ནག་ནང་ལ་དགེ་རྒན་གྱིས་སློབ་མར་ཉེས་རྡུང་བཏང་བའི་གནད་དོན་ཡང་ཡང་འབྱུང་གི་ཡོད་པར་བརྟེན། ད་ལན་གྱི་ཡོངས་ཁྱབ་གསལ་བསྒྲགས་དེའི་ནང་། དགེ་རྒན་གྱིས་སློབ་མར་མཐོང་ཆུང་དང་། རྣམ་པ་སྒྱུར་ནས་ལུས་ཆད་གཅོད་པ། གཤེ་གཤེ་གཏོང་བ། འདོད་སྲེད་བརྙས་བཅོས་དང་མི་གཤིས་ལ་རྒྱར་དམའ་འབེབས་གཏོང་བའི་བྱ་སྤྱོད་རྣམས་གཏན་འགོག་དགོས་སྐོར་དང་། སློབ་མ་རྒན་པས་ཆུང་བར་བརྙས་བཅོས་བྱེད་པ་སོགས་བརྙས་བཅོས་བྱེད་པའི་བྱ་སྤྱོད་སྣང་མེད་དུ་འཇོག་པ་དང་བཟོད་སྒོམ་བྱེད་རིགས་བཀག་འགོག་དགོས་སྐོར། དེ་བཞིན་སློབ་མར་ཟས་དུག་ཤོར་བའི་གནད་དོན་རིགས་གཏན་འགོག་བྱེད་དགོས་སྐོར། སློབ་མར་བཙན་གྱིས་སྒྲིག་ཆས་ཉོ་རུ་འཇུག་པ་སོགས་བྱེད་མི་ཆོག་པ་བཀོད་འདུག
བོད་ནང་གི་སློབ་གྲྭ་ཆུང་འབྲིང་གི་ནང་དུ་སློབ་མ་རྣམས་ཀྱིས་སྒྲིག་ཆས་ངེས་པར་དུ་གྱོན་དགོས་པ་དང་། ཐོག་མར་བོད་ནང་སློབ་ཆུང་སློབ་མར་གཏན་འཇགས་སློབ་གྲྭ་མང་པོ་ཆེད་འཛུགས་བྱས་ཏེ། བྱིས་པ་རང་ལོ་ ༤ དང་ ༥ ནས་གཏན་འཇགས་སློབ་གྲྭར་བཅུག་པའི་སྐབས། དང་ཐོག་སློབ་ཕྲུག་རྣམས་ལ་ཟས་དུག་ཤོར་བ་དང་། འཕྲོད་བསྟེན་ཡག་པོ་མ་བྱུང་བའི་དཀའ་ངལ་ཤུགས་ཆེན་འཕྲད་པར་བརྟེན། སློབ་གྲྭའི་འཛིན་སྐྱོང་དང་ཕ་མའི་བར་ལ་རྩོད་རྙོག་ཆེན་པོ་བྱུང་བར་བརྟེན། སློབ་གྲྭ་ཁག་གི་ཟ་མ་དང་འཕྲོད་བསྟེན་ལ་སྔར་ལས་ཡར་རྒྱས་གཏོང་དགོས་པའི་གནས་སྟངས་བྱུང་ཡོད་འདུག
གསར་འགོད་པ། བསྟན་འཛིན་ཕུར་བུ།
རྩོམ་སྒྲིག་བྱེད་མཁན། པདྨ་མཚོ།
དགྱ་ནག་གི་སློབ་གསོ་ནི་གུང་ཇག་གསོན་པའི་ཆེད་ངོ་མ་རེད།