༧གོང་ས་རྒྱལ་བ་རིན་པོ་ཆེ་མཆོག་ནས་ནང་པ་སངས་རྒྱས་པའི་ཆོས་ཀྱི་འགྲོ་སྟངས་ལ་སློབ་སྦྱོང་བྱས་པ་དེས་སོ་སོའི་རྒྱུད་ལ་ཞི་བདེ་ཡོང་བར་ཧ་ཅང་གལ་ཆེན་པོ་རེད་ཅེས་བཀའ་སློབ་སྩལ་འདུག
དེ་རིང་བཞུགས་སྒར་རྒྱལ་བའི་ཕོ་བྲང་དུ། ༧གོང་ས་རྒྱལ་བ་རིན་པོ་ཆེ་མཆོག་ནས་རྒྱ་གར་ཧི་མ་ལ་ཡ་ན་ལེནྡྲའི་ནང་པའི་སྲོལ་རྒྱུན་ལྷན་ཚོགས་ཀྱི་ཚོགས་མི་ཁག་ཅིག་ལ་མཇལ་ཁ་དང་བཀའ་སློབ་སྩལ་ཡོད་ཅིང་། སྐབས་དེར་༧གོང་ས་རྒྱལ་བ་རིན་པོ་ཆེ་མཆོག་ནས། ང་ཚོའི་དཔེ་ཆའི་ནང་དུ་སེམས་ཁམས་རིག་པའི་བློའི་འགྲོ་སྟངས་དེ་ཧ་ཅང་གསལ་བོ་འདུག དེ་དབྱིན་ཇིའི་སྐད་ཡིག་ནང་དུ་དགོས་རྒྱུ་ཧ་ཅང་གལ་ཆེན་པོ་རེད། ངོས་རང་གིས་ངོ་ཤེས་པའི་ཚན་རིག་མང་པོ་ངོས་ཀྱི་འགྲམ་དུ་ཡོང་བ་རེད། ཁོང་ཚོས་དམིགས་བསལ་སེམས་ཁམས་རིག་པའི་སྐོར་ལ་དོ་སྣང་བྱེད་ཀྱི་འདུག སྐྱེ་བ་སྔ་ཕྱི་དང་། ཐར་བ་དང་ཐམས་ཅད་མཁྱེན་པའི་སྐོར་སྐད་ཆ་མི་དགོས་པར་འཕྲལ་དུ་སེམས་ཀྱི་ཞི་བདེ་ག་འདྲ་བཟོ་དགོས་པའི་ཐོག་དོ་སྣང་ཤུགས་ཆེན་པོ་འདུག བྱས་ཙང་། ངོས་ཀྱིས་སེམས་ཁམས་རིག་པའི་འགྲོ་སྟངས་ཐོག་ཏོག་ཙམ་བཤད་བསྡད་ཀྱི་ཡོད། ནང་པ་སངས་རྒྱས་པའི་གཞུང་ལ་སློབ་སྦྱོང་བྱས་ཏེ་སེམས་ཁམས་རིག་པའི་སྐོར་ལ་སོ་སོས་ཉམས་ལེན་བྱོས། ཤེས་སོང་ངམ། གང་ལྟར་ཐོས་བསམ་སྒོམ་གསུམ་བྱས་པའི་ལག་རྗེས་སེམས་ག་འདྲ་བྱས་ནས་འདུལ་དགོས་ཀྱི་ཡོད་པ་དེ་རེད། སེམས་འདུལ་ཐབས་བྱ་རྒྱུ་དེ་ཧ་ཅང་གལ་ཆེན་པོ་རེད། ཡང་ང་ཚོའི་དཔེ་ཆའི་ནང་དུ་སེམས་མ་དུལ་བ་དེ་འདྲ་ཡོང་གི་འདུག དེ་འདྲའི་རིགས་ལ་ང་ཚོས་བལྟ་རྒྱུ་ཡོད་པ་མ་རེད། དཔེ་ཆ་ཡང་ཁ་བདེ་བོ་དེ་འདྲའི་རིགས་ཀྱང་ཡོང་གི་འདུག དེ་དག་གི་རིགས་ནི་དཀོན་མཆོག་གོང་ཕུད་རེད། གང་ལྟར་ང་ཚོ་སྤྱིར་བཏང་ཆོས་པ་ཡིན་པ་དང་། དེའི་ནང་ཚན་ནས་གྲྭ་ཆས་གྱོན་བསྡད་པའི་ཁྱེད་རང་ཚོས་ནང་པ་སངས་རྒྱས་པའི་ཆོས་ཀྱི་འགྲོ་སྟངས་དེ་སློབ་སྦྱོང་བྱོས། སློབ་སྦྱོང་བྱས་པ་དང་ཆབས་ཅིག་སོ་སོའི་རྒྱུད་ལ་ཞི་བདེ་ཡོང་རྒྱུ་ཧ་ཅང་གལ་ཆེན་པོ་རེད། ཅེས་གསུངས་སོང་།
འདི་གའི་གསར་འགོད་པས་རྒྱ་གར་ཧི་མ་ལ་ཡ་ན་ལེནྡྲའི་ནང་པའི་སྲོལ་རྒྱུན་ལྷན་ཚོགས་ཀྱི་ཚོགས་གཙོ་ཐེག་རྩེ་རིན་པོ་ཆེ་མཆོག་ལ་ཐེངས་འདིའི་མཇལ་ཁའི་སྐོར་དྲིས་པར་ཁོང་གིས། སྔོན་མ་རྒྱ་གར་གཞུང་གིས་བོད་ཡིག་གམ་བྷོ་ཊིའི་ཡི་གེ་ངོས་ལེན་ཡོད་པ་མ་རེད། ད་ལྟའི་ཆར་རྒྱ་གར་གཞུང་གིས་ཞལ་བཞེས་བཟང་བོ་ཐོབ་ཡོད། དེ་ནི་ཧ་ཅང་གི་གནས་ཚུལ་བཟང་པོ་ཞིག་རེད། དེ་༧གོང་ས་རྒྱལ་བ་རིན་པོ་ཆེ་མཆོག་ལ་སྙན་སེང་ཞུ་རྒྱུ་བྱུང་། རྒྱ་གར་གཞུང་གིས་བོད་ཡིག་དེ་ངོས་འཛིན་ཐོབ་པ་བཞིན་དུ། ལ་དྭགས་ནས་ཨ་རུ་ན་ཅལ་བར་དུ་བོད་ཡིག་དེ་དགོན་སྡེ་དང་འཛིན་རིམ་བཅུ་གཉིས་བར་དུ་སློབ་སྦྱོང་དང་ལག་འཁྱེར་ངོས་ལེན་ཡོད་པ་ཞིག་ཞལ་བཞེས་ཐོབ་ཡོད། མ་འོངས་བར་སངས་རྒྱས་བསྟན་པ་རྒྱ་གར་ཙམ་དུ་མ་ཟད། ཕྱིའི་རྒྱལ་ཁབ་ཁག་ཏུའང་གོང་སྤེལ་ཡོང་བར་སྐྱབས་འཇུག་ཞུས་ཡོད་ལ། ང་ཚོའི་དམིགས་ཡུལ་དེ་ཡིན། ཞེས་འགྲེལ་བརྗོད་གནང་བྱུང་།
དེ་བཞིན་རྒྱ་གར་ཧི་མ་ལ་ཡ་ན་ལེནྡྲའི་ནང་པའི་སྲོལ་རྒྱུན་ལྷན་ཚོགས་ཀྱི་དགེ་བཤེས་ཆོས་འཕེལ་བཟོད་པ་ལགས་ཀྱིས་འདི་གའི་གསར་འགོད་པར། རྒྱ་གར་གཞུང་གིས་བྷོ་ཊའི་ཡི་གེ་ངོས་ལེན་བྱས་ཏེ་ལོ་གཅིག་ཙམ་འགྲོ་བཞིན་ཡོད། དེ་ལ་བསྟུན་ནས་སློབ་དེབ་བཟོས་པ་རེད། ད་ལྟ་བར་དུ་ཧི་མ་ལ་ཡའི་ནང་དགོན་སྡེ་དང་སློབ་གྲྭ་གྲངས་ ༣༥ ཙམ་ལ་སློབ་སྦྱོང་མགོ་ཚུགས་པ་རེད། དེའི་ནང་ཚན་རིག་དང་ནང་དོན་རིག་པ་སོགས་ཡོད་ཅིང་། དེ་ནས་རིམ་བཞིན་མཐོ་རིམ་སློབ་གྲྭ་བར་དུ་སློབ་སྦྱོང་བྱེད་པར་གྲ་སྒྲིག་བྱེད་བཞིན་ཡོད། ༧གོང་ས་རྒྱལ་བ་རིན་པོ་ཆེ་མཆོག་གིས་ཐུགས་མཉེས་བོའི་ཐོག་ཁྱེད་ཚོས་བསྟན་པ་དང་འགྲོ་བའི་ཆེད་དུ་རླབས་ཆེ་བའི་ལས་ཀ་བྱས་འདུག ཧ་ཅང་དགའ་བོ་དང་ཐུགས་སྨོན་ཡོད། ཁྱེད་ཚོས་ཧུར་ཐག་འབད་ཐག་བྱེད་རོགས་ཅེས་གསུངས་སོང་། ཞེས་འགྲེལ་བརྗོད་གནང་བྱུང་།
ཟླ་འདིའི་ཕྱི་ཚེས་༡༥ ནས་ ༡༧ བར་ཉིན་གྲངས་གསུམ་རིང་བཞུགས་སྒར་གྱི་ཐེག་ཆེན་ཆོས་གླིང་གཙུག་ལག་ཁང་དུ། སེར་སྨད་ཐོས་བསམ་ནོར་གླིང་གྲྭ་ཚང་གི་མཁན་བླ་འདུས་མང་ཡོངས་ནས། ༸རྒྱལ་བའི་བཀའ་དྲིན་རྗེས་སུ་དྲན་པའི་སྒོ་ནས་༸སྐུའི་གོ་སྟོན་སྲུང་བརྩི་ཞུ་སླད་ས་ག་ཟླ་བའི་དུས་བཟང་ཁྱད་པར་ཅན་དང་བསྟུན། ༸རྒྱལ་བའི་༸སྐུ་ཕྱའི་ཞབས་རིམ་དུ་ལོ་རྒྱུས་ལྡན་པའི་སེར་སྨད་ཐོས་བསམ་ནོར་གླིང་གྲྭ་ཚང་གི་ཐུན་མོང་མིན་པའི་སྨན་བླའི་སྒྲུབ་མཆོད་ཆེན་མོ་འཚོག་བཞིན་ཡོད་པ་དང་། ཁ་སང་ཚོགས་ཉིན་དང་པོའི་ཚོགས་མགོན་དུ་༧གོང་ས་རྒྱལ་བ་རིན་པོ་ཆེ་མཆོག་ཆིབས་བསྒྱུར་གྱིས་བཀའ་རྩོམ་ལྷ་མོའི་འཕྲིན་བསྐུལ་གྱི་ལྗགས་ལུང་སྩལ་འདུག
མཛད་འཆར་ལྟར་ན། ཟླ་འདིའི་ཕྱི་ཚེས་ ༣༠ ཉིན་༧གོང་ས་རྒྱལ་བ་རིན་པོ་ཆེ་མཆོག་དགུང་གྲངས་ ༩༠ ཕེབས་པའི་གོ་སྟོན་དང་བསྟུན། བོད་ལྗོངས་མདོ་སྨད་ཆོལ་ཁའི་གཞིས་བྱེས་མི་མང་ཡོངས་ནས་བོད་ཟླ་ ༥ ཚེས་ ༥ ཉིན་གྱི་སྔ་དྲོ་དྷ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ་མགོན་པོ་མཆོག་སྐུ་ཚེ་ཞབས་པད་བརྟན་ཆེད་བརྟན་བཞུགས་བསྟར་འབུལ་ཞུ་རྒྱུ་ཡིན་འདུག ཕྱི་ཟླ་ ༧ ཚེས་ ༥ ཉིན་གྱི་སྔ་དྲོ་དྷ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ། ༧གོང་ས་རྒྱལ་བ་རིན་པོ་ཆེ་མཆོག་ལ་དབུས་བོད་མིའི་སྒྲིག་འཛུགས་བཀའ་ཤག་གིས་གཞིས་བྱེས་བོད་མི་ཡོངས་ཀྱི་ཚབ་ཞུས་ཏེ་བརྟན་བཞུགས་བསྟར་འབུལ་ཞུ་རྒྱུ་ཡིན་འདུག དེ་བཞིན་ཕྱི་ཟླ་ ༧ ཚེས་ ༦ ཉིན་༸གོང་ས་རྒྱལ་བ་རིན་པོ་ཆེ་མཆོག་དབུས་བོད་མིའི་སྒྲིག་འཛུགས་བཀའ་ཤག་གིས་གཞིས་བྱེས་བོད་མི་ཡོངས་ཀྱི་ཚབ་ཞུས་ཏེ་གོ་སྒྲིག་ཞུས་པའི་མགོན་པོ་གང་ཉིད་མཆོག་དགུང་གྲངས་དགུ་བཅུར་ཕེབས་པའི་སྐུའི་འཁྲུངས་སྐར་མཛད་སྒོར་ཆིབས་བསྒྱུར་བསྐྱང་རྒྱུ་བཅས་ཡིན་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
